香到不得了的牛油曲奇!

喜歡牛油味嘅朋友一定會鍾意這款牛油曲奇，
只要打開錫紙包裝就會嗅到濃烈嘅牛油香味，
雖然細細塊，
但餅身外脆內軟，
感受着它在口中慢慢溶化，
簡直齒甲留香，
而且甜而不膩，
伴着紅茶一起食，
實在係人間樂事，
加上價錢優惠，
一包才20多元，
唔試都對唔住自己，
我極力向大家推介。

我大個仔吖嘛!

1988年嘅廣告，
哩度有幾多人睇過呢?
入便個小主角如今都差不多有30了，
真係好佩服麥記啲廣告，
由細個開始就入侵小朋友嘅心靈，
你大個仔未呀?
係就要食麥當勞嘞，
食吓食吓真係大個咗，
食到成為習慣，
有啲人真係一星期唔食返一兩次就週身唔舒服，
唔讚吓麥記嘅長遠計劃都唔得啦!

另外，
見到入便嗰個小朋友真係好純好乖，
依家啲細路就唔係人咁品嘞，
彈三彈四吋到爆，
又話麥記啲玩具低能唔好玩，
但係吋完人又喜歡食佢啲香口嘢喎，
係都要去食，
唔俾佢食又發哂皮氣，
週街叫週街嘈，
你話係咪俾佢哋激爆吖?
不過無論啲細路點吋點惡都好，
佢哋今日都係走唔出麥記嘅五指山，
你問吓身邊嘅細路吖，
睇吓有幾個唔喜歡食麥記!

粗口鬧人呀~~

好X離舖呀，
有無人咁賤格架?

噚日中午係地鐵站同朋友講兩句話，
順手將把遮放喺身邊條柱度，
距離都唔夠一呎半，
可能係我側身睇唔到把遮，
唔夠一分鐘再睇吓把遮就發覺無咗嘞，
有無咁快手呀?
乜啲人賤成咁架?
攞我把遮嗰條友實知把遮係我架啦，
明知有人都偷，
同賊有乜分別喎，
把遮仲係八成新架，
正扑街黎架，
哩啲咁嘅人行雷咪出街呀，
把遮擋唔到雷劈架!!

講開哩樣嘢就火滾嘞，
不少香港人真係好X自私，
尤其係落雨天就更明顯，
啲人唔理把遮又濕又多水，
週圍迫滿人都"縫"一聲彈開把遮，
搞到身邊嘅人成衫都係水，
有啲仲麻X煩，
開住把遮又係都要行入去騎樓底，
人哋無遮嘅係入便避緊雨就俾班"富貴"滴濕哂，
最賤係行到入黎都唔收遮喎，
你哋想點先?
開遮就唔好行入黎啦，
淨係你唔想濕呀?
你哋盲架?
有無睇到週圍啲人被你把遮滴到濕X哂架?
正扑街自私鬼!

其餘啲遮尖"啄"到人唔講SORRY啦，
收咗把濕淋淋嘅遮擦到人哋件衫濕哂都當睇唔到啦，
真係乜人都有呀!
都唔知點解依家啲香港人咁X自私兼賤格架，
定亦或一向都係咁衰格呢?
我以前真係唔覺咁衰架，
我哋成日話內地人無禮貎，
真係非常之唔X知醜呀，
唔好話哩啲咁自私嘅人係內地黎架，
我見到好多係香港人黎，
廣東話都唔知幾地道呀，
五十步笑百步，
笑人之前檢討吓自己先啦，
不知所謂!

唔知大家有無類似嘅勞氣事呢?
講出黎發洩吓啦!

從芥辣果仁到浪漫情懷!

這款 Washibi 味的果仁很特別，
咸香味中夾雜了少少日本芥辣味，
很新奇、很有趣，
而且帶點刺激，
但辣味卻適可而止，
不吃辣的也能接受。

有時人對食物的喜好會反映人在不同時期對人生的睇法，
果仁是生活中添加情趣的小吃，
人活了半輩子生活自然想有點變化，
傳統的果仁吃多了會有點悶，
加入少辣的日本芥辣能夠刺激味覺，
容易接受之餘又不會失於過激。
我們時常見到不少結婚多年的夫妻相處無言而對，
日日如是的返工、回來、吃飯、睡教，
生活千遍一律很乏味，
如果在適當的時候，
兩人一起找點刺激和突破，
例如夜裏兩人一起到海灘裸泳，
然後黎個沙灘燭光晚餐，
你說是不是浪漫得黎又帶點刺激呢?
當然人人接受程度不同，
不過只要你鍾意有乜唔可以?
但係被差人拉咗唔好話我教你喎，
哈哈哈~~~~

揀書!

很久以前想買下這本書，
曾經多次拿上手翻閱，
作者很能夠從新的角度觀看中國歷史，
雖然有些觀點比較偏頗，
但論述亦算很深入，
不過價錢太貴，
而且看這些書會很花氣力，
結果還是没有買，
其實公共圖書館裏也有不少類似的，
無必要一定買，
現在是先把家中的看完才買新的。
書本，
是要去看去讀去理解才有作用的，
只是買而不看，
放着封塵是一種浪費，
這是我對自己說的話。

書展?
我無去，
很多年都無去，
太迫太多人了，
又不是要買兒童書圖書、玩具，
何必自找辛苦。
要找好書，
街上的書店裏多的是，
而且還有打折，
書店裏比平時還少了些人，
感覺更好更寧靜，
在一個又嘈又迫人的地方，
真的可以專心揀到心頭好嗎?
定亦或貪熱鬧、貪過癮呀?
哈哈哈~~~~

ps:
左邊那本【漫畫易經】可以更有"智慧"!

人道主義!!

究竟是生命重要還是氣節重要?
(希望大家能耐心把這篇看完)

公元755年,
唐玄宗天寶十四年安史叛亂，
叛軍大舉南侵，
睢陽太守許遠和守將張巡以數千兵力，
力抗十三萬叛軍圍攻，
被圍城半年，
兵盡糧絶，
初時城內兵民以蟲鼠為食，
其後蟲鼠吃光，
就以戰袍皮革煮水飽肚，
及至皮革食盡，
不少城內兵民相繼餓死，
此時軍中士氣低落，
更有人提意投降叛軍，
亦有人欲突圍而去，
但張巡以睢陽地握江南運河上游，
如果失守，
江南之地必盡歸叛軍手中，
到時唐室反攻必無希望，
所以堅持死守不棄。
在無可奈何之下，
張巡忍痛殺死自己愛妾，
(一說此妾因飢餓死了)
以其肉來供眾將果腹，
其後太守許遠亦殺書童供眾人食用，
希望可以繼續堅守下去，
可惜叛軍久圍不去，
城內三萬多人民相繼餓死，
其肉即成為守軍糧食，
慘絕人寰，
而在附近的各城唐軍又以自保為上，
見死不救，
睢陽最終城破，
張巡等三十六守將不降被殺!

以人肉為食自然有違天理，
所以其後引起唐室朝野爭論不休，
雖然朝臣都讚譽張巡等忠於國家，
他的堅持讓肅宗(唐玄宗子)能夠有充裕時間集結軍隊反攻，
避免安史叛軍可以直搗南下，
但卻讓睢陽全城軍民盡喪，
且以人肉相食，
在封建儒家思想下是有違天理，
不是人類可為的。
若果張巡等投降叛軍，
城內軍民又是否可以免死呢?
我們可以看到睢陽附近一帶被叛軍攻破的城鄉，
不但得不到安寧，
反而被叛軍搶奪斬殺，
安史所過之處人煙罕至，
全部成為空無一人的廢墟，
從而可知投與不投降，
結果都是差不多。
對於此事時人李翰曾說:
「巡所以固守者，以待諸軍之救，救不至而食盡，食既盡而及人，
乖其素志，設使巡守城之初已有食人之計，損數百之眾以全天下，
臣犹曰功過相掩﹐況非其素志乎!」
李翰認為張巡等以幾千人力抗十三萬叛軍多時，
等待救援不至，
糧盡才會以死人為食，
這根本不是他所想的，
以其功過相補，
行為理應得到肯定的，
而最後朝庭亦以此定論下來。

若果以今日的觀點來看，
我們不會接受拚死抵抗不投降這個做法，
但如果推上至日本侵華時期來看，
當我們看到南京大屠殺後，
明白敵人攻城之後必定會大肆殺戮，
我們會跟張巡一樣，
就算糧盡人相食也死守不棄嗎?
也許今天在這裏討論這個問題是很儍的，
因為香港人基本上是唯利主義的，
國家觀念不強，
對自己國家歷史認識很淺，
對自己文化根源没有歸屬感，
加上不少人對中共有極端反感，
抱着抗拒態度，
因而更加唔認同自己是中國的一部份，
有些人更情願由英國人統治。
但大家要知道認同自己的身份不等於認同中共，
抗拒中共不民主的作風不等於要否定自己的文化根源，
兩者一定要分開處理。

回說過來，
無論大家對張巡的做法認同與否，
我們都可以看到國家動亂最終受苦的都是廣大的人民，
是叛軍勝利還是唐室成功，
流血的都只是人民百姓，
當權者只是"幸蜀一會"就可以回朝做其太上皇了，
而其子肅宗不一樣繼承其位做其天子下去，
當時朝臣關心的是張巡的做法對唐室是否忠心，
但對睢陽內餓死的三萬人民卻没有多少理會，
人命輕賤如此，
悲哉!

後補:
當權者視人命如草芥非我中華民族獨有，
所有古代文明以至非文明的民族都是如此，
權力能令人瘋狂、無知、自大、自戀、貪婪......
古往今來，
多少人能夠做到居高位而不忘以民為本呢?

生生不息

這棵生長得很茂盛的大樹讓我想起了
【龍貓】戲裏那棵一夜便長得很高很大的橡樹。
雖然它經過多次不專業的修剪，
但生命力依然保持強勁，
大自然嘅力量真係神奇，
可惜人類卻不知道珍惜，
有些東西會在不知不覺中消失的。

方言滅不了!

哩個星期網上熱爆嘅應該係"取替廣東方言"吧!

事緣係由於廣東政府倡議減少廣東話嘅衛星廣播，
加上把廣東東莞抗清英雄袁崇煥紀念公園石像下那句:
「掉那媽!頂硬上!」剷掉，
最終引起廣大廣東人的反動，
一時民情鼓動，
齊聲反對。

中國係一個地廣人多嘅國家，
不要說當中包含了不少少數民族，
就是漢族裏便就分成不同區域、不同方言，
粵、閩、滬、川、魯等等不同方言，
多得不可勝數，
而同時中國人又喜歡搞內鬥，
大如南、北地區人民亙相相輕，
小如上海人笑北京人古板，
北京人又譏上海人市儈無內涵，
香港人又說內地人暴發無品，
總之亙相睇對方唔順眼，
雞毛蒜皮嘅嘢都嘈得一餐，
加上中國政治上中多在黃河以北，
普通話(北京話)在中央決定下就成為國語了，
就方便統治和維護國家統一來睇，
就如歐美國家都會定出一種語言為國語一樣﹐
定性一種方言為國家主語是無錯嘅，
至於點解係北京話唔係廣東話就很難說了，
當中當然包含了不少歷史、政治因素，
且況北京話已恆用幾十年了，
如今亦没有必要再爭議下去，
但至於是否應該"消滅"各區方言就是另一個問題。

秦始皇統一文字的確令七零八落嘅華夏民族鞏固了統一的概念，
如果同一個民族人人用着不同的文字，
就很難產生向心力，
更加唔可能出現一個統一強大嘅國家，
這點是不容置疑的。
但統一文字和方言又可否同日而言呢?
也許問題可以分為兩個方向黎睇，
第一，
如果已經有了同一的文字，
我們又有必要要把方言都統一嗎?
只要國民有一種有效和亙通的溝通方式不就可以嗎?
況且國語(北京話)已成了官方語言，
再加上中文全國人民都通曉，
這不是已經有鞏固團結的作用嗎?
中國地域其廣，
不同地方自成個別不同的特式文化，
當中亦包含了方言，
是幾千年來發展而成的，
"消滅"方言很大程度中等於"消滅"了地區文化，
這樣做是災還是福呢?

另一方面，
方言是文化組成的主要部份，
就如上面所說，
是經過幾千年來千百萬人民累積下來的，
無論在感情上、根基上、滲透度上都已經根深蒂固了，
而且遍及人民嘅地方文化、藝術、習俗裏，
這是上位者可以輕易動搖嗎?
而在下的又可以隨便放棄嗎?
史書記載中國千百年來改朝換代，
逐鹿中原者敢於對敵人斬草除根，
殺得一個不留也毫無恐懼，
唯一不敢的就是踐踏老百姓的家山祖墳，
因為他們知道中國的老百姓什麼都可以接受，
話知你係陳、李、張、王、何，
誰人當家作主無所謂，
但係踐踏祖墳就是天皇都無面比，
一定會起來反抗。
而今次"消滅"方言這個構想，
就正正和掘人祖墳意義相近，
有斷根絶源嘅感覺，
因以產生了強大的反動力。
也許有人會笑這樣的封建思想還會存在中國的心裏嗎?
會不會不是一人說的，
大家可以看看各地論壇，
查看大家對"消滅"方言的看法吧!

因此，
我相信"消滅"方言這想法是旣不可為，
亦不能為，
無必要亦無需要，
如果有某些官員還是固執堅持，
相信不單不能促進國家鞏固，
反而會產生更大的反動和離心力。
團結人民不是單靠行政手段，
要向根本去理解人民嘅需要和習慣，
強行逆返只會造成反效果而已!

ps:
其實剷掉袁崇煥所句:
「掉那媽!頂硬上!」
是因為方言問題還是爛口問題呢?

風雲幻化

風吹邁走
雲湧千遍
幻變無一
化身眾生

咸香飄飄!

我知，
食咸魚會生癌吖嘛，
食咁咸會高血壓吖嘛，
所以我好少食囉，
我都有叫新鮮媽唔好食，
佢都戒咗好多年了。
不過話時話，
咸魚蒸肉餅真係好香好好味架，
仲有啲軟身嘅"梅香"咸魚，
用黎餸飯真係一流架，
不過都好多年無食囉，
我諗無十年都有八年了，
點解好食啲嘢總係無益架?

從前聽過一個咸魚嘅笑話，
一家好喜歡食咸魚嘅中國人移民外國，
佢哋見外國無咸魚賣，
就叫親友偷偷地攞幾條過黎，
收到後吊哂係後園曬，
點知"香剩風勢"吹到過隔離洋人屋裏便，
個外國師奶從來都未嗅過咁"香"嘅味道，
仲以為係乜嘢死屍味添，
一驚之下就打電話報警，
警察黎到去隔離屋一查先知原來係"咸魚"味，
個個掩住個鼻、皺哂眉頭問嗰家中國人點解要掛啲魚屍係度，
但係無論嗰家人點解釋都無用，
外國人根本接受唔到陣味，
仲要佢以後唔好掛出屋外面添!

"香味"哩家嘢真係見仁見智，
就好似臭豆腐、榴槤咁，
喜歡嘅人就鍾意得不得了，
唔喜歡嘅就嗅到就想嘔，
再加上文化上嘅差別，
就更加難以明白了。
不過我聽聞北歐一帶嘅"維京人"有一種類似嘅"咸魚"，
佢哋將啲鮮魚放埋一堆任佢發霉，
經過一時間後就可以入罐出售，
啲"香味"仲勁過中國嘅咸魚，
有人試過開罐一嗅就暈咗添，
仲厲害過哥羅芳呀!
有機會我都試吓嗅一嗅，
不過要打定999先噃，
哈哈哈~~~

謎!

上圖嗰啲枯枝枯葉是什麼呢?
有什麼作用呢?
你估唔估到呀?
估中讚你叻嘞!
嘻嘻~~~~

腦生草架?

香港政府真係同人群脫離得好厲害，
試舉兩件事講吓。

世界杯轉播:
雖然不是球迷，
但係都知道四年一次嘅世界杯係香港人嘅盛事。
其實早於幾個月前，
無記和亞記已爆出有記獅子大開口，
要人俾錢買轉播之餘，
仲要人家直播埋佢嘅節目兼廣告，
無記同亞記梗係唔制啦，
邊有人笨到同有記播節目架，
一睇就知會翻枱收場啦，
但係政府淨係話會呼籲各方諒解，
盡量令到香港市民有波睇，
結果咪係齋講無嘢做過囉!
上星期睇嗰套唔知係"新聞透視"定"鏗鏘集"講，
香港好多低收人仕根本睇唔到波，
俾唔起有記幾佰蚊月費，
又唔多錢去酒吧消費，
結果只有走去啲有直播嘅商場睇波，
再唔係就唯有聽收音機，
雖然話睇世界杯唔係生活必需品，
但從這件事可見政府真係後知後覺，
對市民需要和氣息了解很微，
又或者啲高官個個坐係屋企睇大電視，
根本唔知有人會無波睇。
我唔可以話政府做錯嘢，
不過係轉播哩件事上面，
政府真係好失民心，
完完全全無做過嘢，
失敗之極!

ps:
無記和亞記轉播最尾幾場世波都喺係高清台，
其實好多平民百姓都睇唔到，
唔好睇少嗰個幾百蚊嘅機頂盒，
好多人真係俾唔起，
就算有錢都要留返買餸。

街頭表演劃區:
噚日睇新聞話政府考慮劃出某幾個區域用作街頭表演，
當中包括沙田、荃灣等地，
但係就正正無旺角，
其實旺角行人區一向已有類似嘅表演，
但係政府話驚街頭表演會影響到附近商戶做生意喎，
一聽就知啲官係食草架啦，
旺角行人區一早就有哩類街頭表演架啦，
又唔見對商戶有乜大影響，
點解唔認為表演會帶旺商戶呢?
啲人淨係識向單方向思考咩?
另外，
又規定啲街頭表演範圍有呎吋限制，
其實藝術表演好難話俾太多規範嘅，
只求自律，
如果有問題咪口頭警告囉，
唔洗嘢嘢限住哂吖?
我們見外國都有好多街頭表演，
好似英國倫敦、法國巴黎咁樣，
人家都唔會左限右限啦，
結果咪自自然然產生了一個又一個嘅街頭藝術小區出黎，
我真係唔明白點解香港政府啲官員個腦會咁死實，
搞黎搞去都係一塌糊塗，
佢哋個腦用黎做乜架!
真係想講句:
「搞少啲嘢當幫忙啦」。

黃色寶石!

"啫哩"係一個令人喜悅的名字，
看着那包香味撲鼻的粉狀物體倒入熱水中，
慢慢攪拌變成晶瑩剔透的顏色液體，
再加入少量冰塊，
又再緩緩攪動至冰塊完全溶解，
然後把它放入雪櫃冰涼一會，
着急的等待着，
每次查看都令人失望，
幹嗎等着等着都未成形呢?
最後把它忘記去睡了，
朝早起來第一時間去找它，
看見眼前冰涼通透的黃寶石，
方覺等待都是值得的!

喜歡那質量的感覺!

有些東西是用黎"睇"的，
擁有它是一種喜悅的感覺。
這兩條朱古力買回來兩個星期了，
但從來没有折開來吃的衝動。
就是喜歡它的包裝、重量和質感，
看包裝估計它是非常好味的，
拿在手掌裏是重累累的感覺，
也許有人會問我:
「你不吃，買回來幹嗎?」
我就是喜歡那種質量感和漂亮感，
什麼是質量感和漂亮感，
這很難解釋，
人人定義不同，
拿上手喜歡就是喜歡。
問我會存放到何時?
我答不上，
也許有天口癢癢，
回家就會把它吃掉了。

男人老狗講護膚!

今日要講嘅係"護膚"，
哈哈哈~~~~~
男人老狗講乜Q護膚呀?
唏~~
男人唔可以護膚咩?
尤其哩排咁鬼曬，
晨早八點幾個太陽就好似有毒咁，
塊面暴露係陽光下唔洗五分鐘就赤赤痛，
如果唔打理吓佢，
好易就曬到龜裂變乾屍，
又或者會起粒粒、黑點、雀斑、幼紋等等，
無人想自己變成"巢皮鴨"啩?

對於護膚，
其實我係門外漢，
由細到大啲皮膚都唔算差，
少年時代只有少少暗瘡，
過咗發育期就無問題，
依家都唔知幾恨有暗瘡，
哈哈哈~~~~
嗰時塊面點曬都唔會有雀斑，
不過我嘅皮膚好易變深色，
從前住係馬料水海邊，
日曬夜曬下，
週身黑麻麻，
嗰時有個"朵"叫"黑炭頭"，
其實我唔係好鍾意人哋咁叫我，
嗰時只有啲"古哩"、"地盤佬"先至咁黑，
俾人叫"黑炭頭"即係話我似佢哋，
你話幾無癮呢!
所以嗰時都幾想變返白架，
不過細個無諗過有乜方法可以做到，
所以最後都無理佢。

我係啲一曬就黑嘅人，
黑咗要好耐好耐先至會白返少少，
好彩我係男人喳，
黑少少都無乜所謂，
依家啲女仔個個都話要白，
如果佢哋好似我咁實喊死。
後黎中三後我搬返出九龍，
跟住啲膚色慢慢變淺色咗，
不過都用咗十幾年時間，
直至依家我嘅膚色仲係保持淺古銅色，
唔會白到發光咁，
係我喜歡嘅Tone!
哈哈哈~~~~

至於所謂護膚，
我只係隔日用吓啲cheap cheap嘅洗面膏，
耐不中又敷吓mask咁，
牌子就無定架，
有時係"撩曹賤拿"，
有時係"雪魚尾"，
見塊面乾乾哋咪用吓，
不過年紀大咗啦，
啲眼角尾、額頭有少少紋，
唉~~~~
聽啲人講"爺事奇II"嘅神仙水好好用，
又聽啲人話用咗面皮會變薄，
用開唔用皮膚會仲差，
跟手又話用前要化裝水，
用後又要搽精華素，
嘩~~~真係煩到乜咁，
點搞架?
又有啲人話有男人專用嘅護膚品喎，
唔知又係乜Q牌子嘞，
男人老狗真係好怕要走入去問左問右，
護膚哩樣哩真係煩過搞政治，
不過日日照鏡見啲幼紋掛喺塊面度都幾無癮，
唔好話我知男人有少少皺紋先至Man呀，
少少我無所謂，
至怕唔理佢愈黎愈多，
仲要愈黎愈深嗰隻呀，
唉~~~~
真係頭痕呀!!

冰涼透心 醉轉彎

上海菜的"醉轉彎"即是"醉雞翼"，
這個名字很有趣，
第一次接觸時不明所意，
後來才知"轉彎"是指雞翼骨節的形狀，
明白後頓然發出會心微笑。

夏天吃冰涼帶酒味的菜色很好，
開胃、醒神，
煮醉雞翼比醉雞方便，
因為不用斬雞(斬雞好講技巧)，
只要買樽醉雞汁，
紹酒、魚露各加一湯匙，
把煮熟了的雞翼用冰震、待涼、抹乾，
然後把所有汁料倒入浸過雞翼，
放入雪櫃下格浸三至四小時即成，
有時間的可以浸過夜，
開飯時一攞出黎，
酒香撲鼻，
入口齒甲留香，
冰涼透心，
好味到要食兩大隻呀!

告示: 留言系統故障

Blogspot的留言系統出現故障，
留言可能會間歇性不能顯示，
相信會在短時間內恢復正常，
留了的言不久會再次出現的，
如有問題請在右邊的cbox留言，
對此我深表歉意!

orz

新鮮人

小野花 (九) 紫藍色的跳動

漂亮的花朵讓人眼前一亮，
輕鬆的音樂讓人心情愉快，
啦叭形的小野花兩者兼得，
讓輕鬆和喜悅把悶熱取代。

附錄:
小野花系列

"不幸事件"續續集!

"不幸事件"繼續發展，
友人老婆出走一個多月，
最近卻給他發現她竟然已有孕一個月，
而經手人就是那個在背後搞風搞雨的前男友，
這使他感到傷心欲絶。
新婚一年未及，
雖然因為妻子和姑不和，
弄至夫妻關係有隙，
但事件竟然發展如此快速，
相信事件早已暗藏"殺機"的。

友人妻子所持的是雙程証，
每三個月都要回鄉續証，
友人相信早在半年前她回鄉時，
已經開始和她舊男友搭上了，
再加上那男人暗地裏的"落力支持"，
最終就把人家的家庭搞散了。
本來家家有本難諗的經，
那對夫妻會没有吵鬧呢?
況且兩人的問題又未去到不能解決的地步，
本來慢慢坐下來有商有量總有辦法的，
可是這個界就是有些人喜歡混水摸魚，
那前男友當她每次回鄉都用車管接管送，
又話開間廳室給她打理，
總之什麼花言巧語都出齊，
還曾多次偷用友人妻子手機發送短訊，
故意把友人激怒，
以至他們夫妻的關係更趨惡化，
這樣的男人真係賤到無倫，
男人大丈夫愛一個人不應如此乘虛而入，
更不應該搞那樣下流的小動作，
這不是真正的愛，
這只是一個下流賤男的佔有慾表現，
不過事情已經發展到這個地步，
友人亦已多次盡力修補和妻子的關係，
可是她卻連正面對話的機會也拒絶了，
只是口口聲聲說不想傷害他，
但事實卻是迴然相反。
如今一切都不可能再回頭了，
他已決定這個星期單方面提出離婚，
因為友人那顆心已經徹底死了。

"小王子"、"小公主"群 的出現!

假日外出見到最多嘅是什麼呢?
不是車不是船，
而係"小王子"同"小公主"，
點解咁講呢?
因為假日係一家大細外出嘅日子，
人人拖男帶女，
做父母一定會帶啲細路哥出去玩，
全家大細總動員嘛。
點解又叫"小王子"、"小公主"呢?
因為見到啲父母對子女呵護備至，
唔好講"一隻蛋三個願望"吖，
就算一千個一萬個願望都可以，
要風得風、要雨得雨，
唔係王子、公主係乜。

星期六下午在快餐店黎個下午茶，
見隔離枱一對四十幾歲嘅父母帶着一個十三、四歲嘅兒子坐下，
阿爸嗰個就走去攞嘢食，
阿媽就同個仔坐低等食，
見到個仔黑口黑面咁，
坐低唔出聲就爬係張枱度，
一眼都唔望佢阿媽一嘢，
等咗一陣佢阿爸攞咗兩個餐入黎，
兩公婆一個餐，
另一個就係俾個仔嘅，
點知個仔"騷"都唔"騷"佢哋，
照舊爬係枱度唔理，
個阿媽見佢咁樣就靜靜哋幫佢將件西多逐嚿逐嚿咁切細，
然然仲慢慢咁幫佢塗埋牛油，
跟手仲叉埋伸到個細路咀邊添，
點知個細路眼尾"照照"個老母，
跟住一句嘢都唔講就自己走咗出去嘞，
做老豆嗰個叫都叫唔住，
最後剩低兩公婆無言相對。

我唔知佢哋背後發生了什麼事，
但係做人子女嘅點都無理由咁無禮貎架?
咁大個人，
做老母嗰個又洗唔洗服事週到成咁呀?
你估佢癱嘅咩?
自己唔識切呀?
其實哩啲都唔係個別例子，
每逢假日就會見到類似嘅情況，
十幾歲嘅就黑口黑面，
好似同父母有仇咁，
攞埋位同佢飲茶都千唔願萬唔願，
就算唔願飲茶都唔洗咁嘅面口吖?
十幾歲應該係自己去幫老豆老母攞位啦，
依家出埋錢叫佢哋陪吓老豆老母飲一朝茶都咁嘅樣，
哩啲係乜嘢態度呢?

細啲十歲樓下嘅一樣係王子、公主皮氣，
係快餐店成日都聽到啲細路"依嘩鬼叫"，
再唔係就大庭廣眾大聲嚎哭，
總之就要搞到父母買佢哋怕，
有啲仲離舖到一唔鍾意就一巴巴咁打落父母塊面度，
"拍拍"聲環迴立體聲都出埋﹐
最難得係見到啲做父母嘅任佢哋打，
被打完仲要應承野蠻子女嘅所有要求，
你話係咪自己攞嘅賤吖?
咁樣縱容啲細路，
依家啲細路唔鬧得、唔話得、唔錯得、唔失敗得、唔讚唔得......
你話點會唔變"王子"、"公子"吖!

搞到今日咁，
都怪啲父母過份溺愛，
唔識教就去上吓堂啦，
從前嘅因，
今日嘅果，
佢哋自作自受無所謂，
但係知唔知咁樣會幫社會製造一堆"垃圾"出黎呢?。

磨人的飄色!!

"飄色"係民間傳統，
舉辦嘅人會好自豪，
因為佢哋自謂維護傳統文化，
觀看嘅人會好開心，
因為大家看到七彩斑爛又精彩嘅工藝，
但係被扎在鋼架上的小朋友倒不好受，
大熱天時，
我們只是站着一會就全身是汗，
但他們卻要化上厚厚濃妝，
穿上幾層的衣飾，
還要在烈日當空下遊行，
由上妝到上架以至出行，
大大話話要大半日時間，
對於一個六七歲的小朋友來講，
他們所受的痛苦可想而知。
維護傳統本是好事，
但對於有問題嘅傳統就要改變，
要不是就把飄色改在秋冬舉行，
至少不用小朋友受盡烈日折磨。

萬里晴空

忍受着酷熱和汗水，
回報就是萬里晴空!

鴻溝與疏離!

當我自以為對民族有所認識時，
面對面看着內地的民間色彩後，
才驚覺無數書本上看到的歷史面貎，
以至曾經背着背包遊過不少省份所見到的人與物，
都只不過是所有的一鱗半爪，
現在所見所感是非常之陌生。

中華民族發源於黃河河套黃土高原，
但我好像只是殖民殘留下來的變種，
那是一種格格不入的感覺!