我的第一次（初生之犢篇）

冬冬寫她的我的第一次 ，非常有意思，所以我都來奏下熱鬧，大家有興趣都一齊寫吧！

我的第一次暑期工：中六時暑假係沙田一間相機廠做Line仔，嗰時人工係逐件計，於是我就瘋狂咁砌機，上面個亞姐一砌好放落line，我就搶來做自己嗰part,　簡直好似發錢寒咁，結果全部唔得要砌過，真係激死．第二年又係去個間廠做summer，今次就快手好多了，我重帶埋細佬一齊做，就係係那裏，細佬找到他的另一半！

第一次唱卡拉OK: 中學時我好乖架，從來無去過唱K，讀大學時才第一次同啲part-time同事去過．初時好怕羞，淨係聽人唱，人地俾支咪我都唔敢唱，後來習慣左就攞住支咪係咁唱，死都唔放手，而且重得到個『作詞人』稱號添．

第一次學揸車：出左來做嘢先至學揸車，係沙田駕駛學院學，次次都唔同師夫，大家都無默契．自己最怕就係入迴旋處，師夫見我咁怕就叫我入去轉到唔怕為止，嗰次足足轉左成廿個圈先至收科，真係轉都頭都暈埋！

第一次做長工：畢左業出來做事，先真正知道什麼是人心險惡，做亞頭嗰個唔係單止有事唔幫你，有鍋重專登要你揹，做替死鬼，有時真係死左都唔知邊個係自己背脊插一刀，嗰時都好心寒！

第一次攞獎：由細到大都無物攞過什麼獎，係舊公司週年晚宴上忽然宣佈我得到『最優秀員工獎』，上台時啲閃光燈係咁閃，係嗰一刻覺得自己好似做明星咁．事後知道自己負責的一個產品幫公司賺到成五六千萬，那時就明白這個世界是無免費午餐的，如果你無利用價值，就連早餐都無得你食呀！

待續...