老媽語錄: 車厘子

圖片來源:http://zh-yue.wikipedia.org/wiki

老人家淡淡的說:
「我從來都没有吃過車厘子。」
一句很平常卻又令我很震撼的說話。

車厘子(櫻桃)看來是很普通的水果，
但從前卻不常見，
不是很容易找到，
今天變得比較便宜、普遍，
平的十多元一磅，
貴的六七十元一磅，
豐儉由人，
當然質量會相差很遠，
不過，
好的劣的也没所謂，
總叫吃過就是。
可是有些人就是没有吃過，
不是因為貧窮，
不是因為什麼，
只是缺乏關懷和細心，
街市裏賣車厘子的成行成市，
自己也買過數遍來吃，
就是没有問過她吃過没有，
實在太没心肝了，
當然我没法把所有東西都買來給她吃一遍，
但有心和無心是有分別的，
這次事情我要好好記住!

老媽語錄: 願望與暖包!

冷天真的到了，
做了一點事。

買了兩包暖包，
是貼在衣服內用的，
有暖七小時和十二小時的，
老媽血氣不好，
手腳不夠暖，
除了多吃補品外，
她也天天耍太極。
送她暖包，
讓她晚上睡眠貼在被內，
手腳不易冷僵，
她不愛用暖爐，
說一年只用幾個星期，
太浪費了，
更不敢用電毯，
好像很危險，
蓋在身上很不安心。
她有暖水袋，
但也怕她裝熱水時燙到，
有點擔心。
暖包作用不會太大，
但比較讓人放心，
也可以帶上一點温暖。

拖着她的手，
手温没有從前的暖和，
感覺她這兩年真的老了，
用自己温熱的手掌緊緊拉着她，
想温暖她涼涼的手掌，
握得有點緊，
不可以甩掉，
拖完右手轉到左手，
直至兩隻手掌都暖和一點，
願望是可以拖得更長久!!

老媽語錄: 慳返十八蚊!

十八蚊做得乜?
搭吓車、街邊買幾串魚旦都仲可以，
但係就連食個早餐都唔夠了，
唔好講連鎖式快餐店，
就係街坊茶餐廳嘅早餐都要廿三、四蚊，
凍飯加三蚊，
出前一丁麵加五蚊，
加吓加吓就三十大元一個早餐了，
所以十八蚊真係唔係好多錢，
不過噚日就係嗰十八蚊氹得新鮮媽鬼咁開心了。

有曰新鮮媽打電話問我觀塘換手錶電池要幾錢，
我一時都俾佢問到口窒窒，
完全唔知點答佢，
原來佢隻精工錶無哂電，
係佢嗰頭間舖頭要收佢 $38蚊，
仲大大聲話 $38 換粒電池好平喎，
新鮮媽把幾火就唔幫襯佢，
特登打黎要我睇吓觀塘啲街邊檔收幾錢，
噚日一問就知道 $20 搞掂，
於是新鮮媽就嗱嗱臨攞埋隻錶走過黎，
二話不說就俾廿皮換咗佢囉，
換完仲大大聲咁講:「咁又慳返18蚊嘞!」，
其實18蚊事少，
俾之前個錶佬"CKOK"住條氣無癮嘛，
收得咁貴仲好似老溤咁緊係火滾啦，
結果就係哩十八蚊氹得新鮮媽成日都笑咪咪，
有時氹人唔係好難，
只要能夠捉得住當事人嘅心理，
包你事半功倍，
大家日日都會好開心。

老媽語錄: "扭一扭、舔一舔、浸一浸"!

"扭一扭、舔一舔、浸一浸"，
新鮮媽最近時常在我耳邊說着這句口號，
仲一路說一路做埋扭餅乾動作，
成個老頑童一樣，
看來這個廣告成功地打入咗佢腦裏。
星期天和她逛超市，
在零食架上發現它，
她兩眼bing bing發光似的看得入神，
嘴郁郁好想試的模樣，
結果買了一小筒藍莓味給她，
後來問她覺得味道如何，
她說:「甜得濟，唔浸牛奶食唔到呀!」，
問她要唔要再買，
她連忙撒手兼擰頭，
說:「試一次就夠了!」。

老媽語錄: 我要利工民!

雖然新鮮媽已經又冷帽又頸巾又羽絨大褸，
全身都包到好似隻糉咁樣了，
佢仲係話:「我想買返件利工民羊毛內衣。」
於是我摸吓佢隻手但又唔係好凍喎，
「依家邊度仲有利工民架? 好似執咗啦!」
「邊個話執咗， 好似係深水埗呀!」
「你依家唔夠暖咩? 件羽絨唔得咩?」
「暖就暖，不過利工民啲衫真係又薄又暖架!」
「無啦啦都唔知係邊度揾件利工民俾你! 雞X嘜好唔好呀?」
「唔好，又貴又麻麻，佢哋啲嘢差哂啦!」
「咁真係唔知仲有無利工民噃!」
「無利工民? 咁要秋蟬牌啦!」
「秋蟬牌? 又係乜傢伙黎架?」
「秋蟬牌羊毛內衣呀! 我做女時好興架!」
「噢......」

後記:
利工民秋蟬牌羊毛內衣是同一個品牌，
利工民係公司名，
秋蟬牌係商品牌子，
因為日子久遠，
新鮮媽把兩者搞混亂了，
同系的還有利工民金鹿線衫，
又薄又通氣，
夏天著咗成身爽哂架!

老媽語錄: 通街"老友記"!

今日長者免費搭巴士、港鐵，
新鮮媽去到邊度都話:
「你睇吓幾多"老友記"?」
我環顧四週又唔係好覺好多老人家，
「係咩? 好多咩?」
「梗係，搭車唔洗錢喎，啲老人家仲唔走哂出黎!」
「都係慳返幾蚊啫，唔係咁大件事啫。」
「乜嘢唔大件事呀? 幾蚊唔係錢咩? 老人家無收入、幾蚊好多架!」
「咁唔通無免費就唔出街咩?」
「係架，去近唔去遠囉，費事哂錢嘛。」
「都要啲老人家有人陪先有意思噃!」
「梗係啦，戇居居自己一條老嘢去邊都無用啦。」
「其實要陪自己親人嘅都唔一定要揀今日嘅!」
「有個藉口囉，老人家免費搭車咪可以叫啲仔女陪佢行吓街囉。」
「咁都係，不過有幾多子女知道今日有優惠呢?」
「實有嘅，至怕知道當唔知，講埋俾佢聽都當聽唔到啫!」
「唉~~ 咁樣都得嘅?」
「都無辦法架，唔通攞枝鎗指住佢哋個頭咩?」
「可能啲後生要揾食嘛。」
「一年到晚都抽唔到時間咩?」
「算吧啦~~ 咪咁勞氣，行吓街開心吓啦!」
「有人陪梗開心啦!」

完。

老媽語錄: 食到嘔!

新鮮仔:「嘩~~好大塊鬆餅呀!」
新鮮媽:「係噃! 攞返屋企有排食喎!」
新鮮仔:「你估一個人要食幾耐吖嗱?」
新鮮媽:「一個禮拜左右啦。」
新鮮仔:「邊食到呀? 一餐最多食兩個拳頭咁多，一日三餐，一星期廿一餐，
即係六十三個拳頭咁多，嗰塊鬆餅咁大嚿，點止六十三個拳頭呀?」
新鮮媽:「唔~~~~~」
新鮮仔:「起碼食一個月啦，係咪?」
新鮮媽:「不過日日都淨係食佢?會嘔噃!」
新鮮仔:「咁又係喎~~哈哈哈~~」

上面啲對話係咪好無聊呀?
嘻嘻~~~

老媽語錄: 睇佢點死!

新鮮媽:「今日要早啲返歸。」
新鮮仔:「點解呀?」
新鮮媽:「今晚做"鐵馬尋橋"大結局。」
新鮮仔:「你有追開咩?好好睇咩?」
新鮮媽:「好好睇呀! 你無睇過咩?」
新鮮仔:「有睇過，都OK啦!」
新鮮媽:「你唔記得你哋細細個都係咁嘅咩?」
新鮮仔:「我哋都無殺父仇人噃!!」
新鮮媽:「你哋細個時，我一個帶住你哋幾個，成日被人"蝦"架!」
新鮮仔:「又好以係噃!」
新鮮媽:「嗰啲扑街見我一個女人就"蝦"得就"蝦"，同林嘉華一樣咁衰格!」
(新鮮媽一講粗口就知佢火起了，佢平時很少講粗口的。)
新鮮媽:「我返去睇佢點樣死! 佢實無好收場架!」
新鮮仔:「好! 好! 好! 買埋啲嘢就送你返屋企啦!」
(真不敢想像如果沈萬均唔死，新鮮媽會唔會拆咗個電視機呀!)

報應即係話做咗衰嘢個天會知嘅，
到時到候個天就會將啲衰人"處理"，
這就是所謂"天道"，
中國人相信這一套，
是真是假很難說，
但如果没有這樣"東西"真係幾大劑，
個個作姦犯料都唔驚有報應，
到時真係天下大亂了。
做人最緊要心安理得，
過得人過得自己，
有無"報應"都好，
凡事都要憑良心做人，
名、利、權都只是過眼雲煙，
唔值得不擇手段，
所謂"天網灰灰"，
瞞得過天也瞞不過自己個心，
午夜夢迴，
要一睡到天明，
還是做個好人有意思一點!

老媽語錄: 女為己容!

新鮮仔:「你敢唔敢著這條裙呀?」
新鮮媽:「點解唔敢呀?」
新鮮仔:「依家喎?」
新鮮媽:「唏~~我咁著，人哋以為我發老姣呀! 條裙長返啲唔低胸就敢著。」
新鮮仔:「如果你仲係做女嘅時候呢?」
新鮮媽:「梗會，乜嘢短裙、花衫、高跟鞋我都想著吖，不過以前無咁多花款之嘛!」

新鮮媽是位年過花甲的老婦人，
但是每次經過鞋店、時裝店的厨窗前都唔想走，
早前I.T.大減價時，
她都曾經想走入去八八，
只是聽我講完啲價錢後佢就調頭走，
她說她才不會那樣笨做水魚喎，
做唔做"水魚"就睇個人想法，
你覺得值咪唔係囉!

老媽語錄: 女為己容!

跟據筆者非正式的統計，
即是個人胡思亂想，
大部女性都愛扮靚的，
無論三歲還是八十，
看見漂亮的衣飾就想買，
愛靚是女性天生的本性。

新鮮媽雖然不再年青，
但經過一些賣年青女性衣著的店舖都會停下來看看，
有次經過一間賣女性鞋飾的商店時，
她又用貪婪的眼光看着櫥窗裏花款百出的高跟鞋，
口裏總是諗諗有詞的。
新鮮媽:「啲鞋真係好靚!」
新鮮仔:「你點著喎，對鞋咁高好危險架~」
新鮮媽:「我都無話要買，睇吓之嘛。」
新鮮仔:「啲鞋咁閃，又釘珠又花花、你著會唔會誇啲呢?」
新鮮媽:「如果我後生十年，我實會買返對架!」

從前說"女為悅己者容"，
但如今的女性又不一定是這樣想，
穿得漂亮一點可以是為了讓自己開心一點，
所以不見得女性只是為取悅別人而裝扮，
當然有人喜歡時打扮起來就更有勁啦，
有誰不喜歡別人稱讚的眼光呢?

新鮮媽和我的"恩怨"!

這是一篇很長的心裏話。
近日在網上看到一篇關於「孝道」的文章，
引發我想說說自己和母親的關係。

曾經有段時間我和新鮮媽的關係不太好，
或者可以用"惡劣"來形容。
從前在我心目中，
她是一個很堅強、固執、惡死、計算的女人，
小時候只要我們頑皮便會給她打到皮肉開花，
有時她心情不好，
半夜三更也會拖我起身打鬧，
可以說是一個喜惱無常的女人。
到我們初初出來工作時，
她會主動和我們"商討"要給多少家用，
那時我覺得她很"發錢寒"，
什麼東西都用錢來衡量，
好像一切事物都要向錢看，
所以當時我很討厭她的。
而且我和她一樣的掘強，
只要我們覺得不合理的，
大家都不會退讓，
當時我有句話時常常掛在咀邊:
「如果無道理，就是天王老祖都話之你!」
結果我們時常爭吵不休，
大家的關係差到不得了，
而我亦自己搬了出來住，
目的就是不想見到她。
如今回想，
「道理」由誰來定呢?
有誰會說自己没有道理呢?

近七、八年，
我和她的關係好了很多，
不單時常會陪她逛街、食飯，
而且還會手拖着手的行，
我不知道為什麼會這樣，
其間我們之間亦没有發生過什麼事，
更没有什麼人做過和事老，
但有一樣事情我是知道的，
她老了，
而且愈來愈老了，
但我和她的溝通卻愈來愈好。
如果你問我和她在一起時會談什麼，
其實全都一些無聊閒事，
好像我會問她有没有跟社區中心去那裏旅行，
說說旅行時那些老人家搶食和貪心的行為，
有時我們又會談談今期六合彩無人中頭獎，
下期我們會夾份買條摶一摶，
她說中了三獎就會全屋大裝修，
我會笑她無大志，
為何恨中三獎不恨中頭獎，
如果真的中了的，
她希望有人陪她環遊世界，
還說所有洗費她包下添，
結果我們廿蚊都未中過。
最好笑的她時常會跟我說:
「今次無開我們的號碼，下期就會輪到我們中了」，
有時真給她弄得哭笑不得。

近年她的腳不靈光，
要食藥和走不遠，
我對她說以她這樣的年紀只是腳力不好已是上天的恩賜了，
看見社區中心裏不少年紀比她小的都週身病痛，
她就會沾沾自喜的說:
「我真係幾好胃口架，吃得行得幾精神」。
現在我時常都會給她試新食材，
例如上星期我便和她去試了"棉花冰"，
其實我自己都没有試過，
今次和她一起試了，
大家的評語都是:
「麻麻哋，無乜特別」。
新鮮媽時常說:「食一餐少一餐」，
所以她很喜歡試一些她從來没有吃過的東西，
無論喜歡不喜歡，
總算嘗了心願嘛。

每次和她逛完街送她搭地鐵時，
我都會在閘口看着她踏上行人電梯遠去，
而她每次亦會轉身向我招手告別，
我不知道還有多少這樣的機會，
也許我和她曾經亙相"計交"過，
也許我和她也曾經爭吵不休過，
也許她没有問過我願不願來到個世界，
(其實可以點問?同精子、卵子說話嗎?)
但我知道我現在非常珍惜和她相處的每一刻，
很多人發覺和父母很難溝通，
時常說他們不明白我們，
但我們可有花時間和他們溝通呢?
年青人思想變化大、適應力強，
如果由我們做主動從他們的角度來做，
不是比由老人家做主動容易一點嗎?

星期天我的信用咭給櫃員機噬了，
我向身邊的新鮮媽借了一百五十元，
那天我們的洗費只有這樣多，
雖然吃的、買的都是平宜貨，
但是我們一樣玩得很開心，
臨離開時我向她說下星期還她百五元，
隨後再奉上剛巧在身上的半打裝西餅咭，
我說餅咭當作是利息吧，
新鮮媽立刻笑逐顏開，
有時溝通不是很難，
重點在於有無用心。

老媽語錄: 消失哂!

新鮮媽給我一張"環保棺材"的單張，
有些豪華如真木一樣，
有些卻像細小的紙皮盒，
讓人看了很不舒服。

新鮮仔:「你相信人死後會重遇已先逝的親人嗎?」
新鮮媽:「唔信!人死了就乜都無哂了。」
新鮮仔:「積係你死咗就完全消失哂?」
新鮮媽:「係架!」
新鮮仔:「咁我們要開開心心的過生活。」
新鮮媽:「梗係!」

老媽語錄: 新不了情!

數星期前新鮮媽說無記午間播的"新不了情"讓她很感動，
那套應該是電視劇而不是電影版，
老媽很少主動提及什麼電視劇好看的，
她說一個少女在有生之年花盡了氣力、忍受不少痛楚，
就在以為可以戰勝癌魔的時候卻又再舊病復發，
本來滿天喜地卻又再重墜黑暗的深淵，
没有什麼比這樣更痛苦了。
不知是否老媽年青時的艱苦生活讓她有所感觸呢?

我問她有没有看過劉青雲和袁詠儀的版本，
她說没有看過，
於是我說買VCD給她看，
但她卻說我花無謂錢，
其實只是十元八塊的舊影碟，
又不是什麼大錢碼，
而且難得有她喜歡的故事，
於是我堅持要買給她，
最後老媽也没有反對了。
這兩天我正在各影視店尋找着，
希望能夠找到這個她喜歡的故事吧!

老媽語錄: 可樂杯

新鮮仔:「麥記套可樂杯好靚喎。」
新鮮媽:「乜嘢可樂杯呀?」
新鮮仔:「電視廣告都有賣啦，半透明好型嗰套呀!」
新鮮媽:「哦~~~~~原來係嗰套，我哋都有啦。」
新鮮仔:「你換咗咩?係邊度呀?快啲攞黎睇吓!」
新鮮媽:「嗱~~哩套咪係囉。」
新鮮仔:「都無可樂logo嘅，呃人!」
新鮮媽:「睇落咪差唔多。」
新鮮仔:「唓~~無啲taste!」
新鮮媽:「ta你個頭，換咁多返哩封塵呀?」

老媽語錄: 包包要改名!

新鮮媽:「什麼叫酵母包?」
新鮮仔:「唔~~~~~肯定喎!」
新鮮媽:「咁哩個青bb嘅又係乜黎架?」
新鮮仔:「我都唔清楚喎。」
新鮮媽:「唓~~睇完個名都唔知佢up乜!哂氣!」
新鮮仔:「咁都無計架!」
新鮮媽:「等我同佢改過哂啲名啦!」

老媽語錄:三十年後食爆谷!

新鮮媽:「我三十幾年無食過爆谷了。」
新鮮仔:「你想食我買畀你食吖。」
新鮮媽:「好呀!」

新鮮仔:「畀多三蚊就大一倍，我買咗個中size呀。」
新鮮媽:「咁著數，梗係買中size啦。」
新鮮仔:「好唔好味呀?」
新鮮媽:「幾好......你都一齊食啦。」
食~~~~食~~~~~食~~~~~~~~
新鮮仔:「個口好攰呀!點解食極都仲有架?」
新鮮媽:「繼續唔好停啦!」
食~~~~食~~~~~食~~~~~~~~
新鮮仔:「我唔得嘞，投降了!」
新鮮媽:「唔好浪費呀!我繼續食!」
食~~~~食~~~~~食~~~~~~~~
新鮮仔:「食唔哂由佢啦!食得多好熱氣架!」
新鮮媽還是在食~~~~食~~~~~食~~~~~~~~

新鮮媽:「唔食啦!」
新鮮仔:「你都差不多食哂啦!聽日熱氣你就知味!」
新鮮媽:「哼~~~」

老人家就是這樣，
捱過苦不想浪費食物，
每次都做了"垃圾收集站"，
其實我都盡量幫忙食，
但真是無能為力，
都怪自己當初貪小便宜啦!

老媽語錄:禮物!

「很舒服，著住走吧!」

老媽語錄: 時光飛快!

Ans Van Dijk-Time's Up
(今年還是這圖，因為太愛它了。)

新鮮媽是一個很口密的人，
她很少會主動說從前的事，
每次都是我問她才說一點，
除了她小時候的趣事以外，
我對她年青的事一無所知，
她對年青時代的愛情故事，
或是生活遭遇都絶口不提，
每次我問及她都說忘記了，
不知是不想提起還是什麼，
其實我很想了解多一點的，
不想對她前半生一片空白，
只有對她的遭遇了解多點，
也許可以更加深入認識她，
從而明白她對事情的看法﹐
也了解她喜歡不喜歡什麼，
我想她過得開心快樂一點。

我們全都是她一手養大的，
從前的新鮮媽火氣非常大，
如有頑皮就一定家法侍候，
什麼木柴木棍籐條都用上，
打完之後還要跪地掹耳仔，
那時對她的嚴厲極之怨恨，
但這幾年她真的老了很多，
人到暮年時間過得箭般快，
我希望能把它再捉緊一點!
雖然新鮮媽不會看到這篇，
我還是要說聲母親節快樂，
祝你長命百歲和身體健康。

老媽語錄:奶媽

新鮮媽:「社區中心有個八十幾歲嘅阿婆以前做奶媽架。」
新鮮仔:「咁又點?」
新鮮媽:「佢以前餵過奶嗰個細路而家都有四十幾歲了。」
新鮮仔:「你又知?」
新鮮媽:「乜嘢唔知，我見過啦!」
新鮮仔:「咁長情黎探佢奶媽呀?」
新鮮媽:「係囉，不過嗰個阿婆做到六十歲已經無做囉。」
新鮮仔:「六十歲先至無奶咩?」
新鮮媽:「痴線! 餵年幾奶就戒奶啦，之後就負責湊大佢呀!」
新鮮仔:「啊! 原來係咁。 咁個奶媽會唔會無人照顧呀?」
新鮮媽:「唔會嘅! 自己有仔女嘛!」
新鮮仔:「咁佢可能無生仔女架嘛!」
新鮮媽:「你儍架!無生過點會有奶呀!」
新鮮仔:「係喎!」

老媽語錄:"嚟"嘢"嚟"到死!

新鮮媽:「嘩~~咁大粒珍寶珠咪有排"嚟"?」
新鮮仔:「唔會咁大粒嘅，唔係咪"嚟"到條脷都斷埋!」
新鮮媽:「你睇吓嘞，成個人頭咁大，仲唔"嚟"死啲細路。」
新鮮仔:「等我睇過，唏~~得個膠波喳，入便得十二粒細珍寶珠之嘛。」
新鮮媽:「十二粒咁多? 咪一樣會"嚟"死。」
新鮮仔:「邊個叫你一次"嚟"哂十二粒喎!」
新鮮媽:「啲細路聽你講至奇!」

音註: "嚟"，發音似普通話的"來"字。

註:
圖中的不是真的珍寶珠﹐
只是貎似珍寶珠而已，
但習慣了叫球狀有棒的做珍寶珠了，
大家唔好見到個題目就諗邪嘢喎。