不是談六四！

今天是廿五週年，

不知是否數字迷戀，
今年好像特別多人寫六四，
就好像年年有人參加熄燈遊戲，
但轉頭卻日夜開冷氣，
熱一點都不能忍，
有點可笑。

六四除了反貪強國外，
最主要一點是平權公平，
可是口講不做的卻很多，
且當中有少人還自以為公平，
實則歧視異己而不自知。

上星期看見三個十歲左右的小孩一起玩耍，
兩女一男，
其間兩女孩不知什麼原因扭在一起親面，
男童看見立刻大叫:"基婆，好變態好噁，人道毀滅呀！"，
這句話反映了什麼？
兩個同性人親嘴就是同性戀嗎？
性知識何其貧乏？
對同性戀有著不少的誤解和歧視，
是什麼人教授這些想法給他？
這是正確的想法嗎？
這些性知識是要等他長大後才教？
還是由他胡亂猜想錯誤評價呢？

另一方面，
和兒童談性教育以至同性戀會導至他/她們變"基"嗎？
說這些話的"人"有何數據呢？
有些人說性取向問題只是小眾問題，
只要"個別輔導"就可以，
這也是一個很主觀和不公平的說法，
何謂小眾？
少到什麼數字為小？
第二，
教道小童性教育(同性戀也是當中之一)不單是給有性取向問題的一些輔導，
而重點是要讓所有小童自小明白什麼是同性戀，
同性戀不等同變態，
更不代表是金魚佬，
也不等如色慾狂魔，
然後予以尊重和平等對待，
若連大人都不明白這些而在不自覺的把謬見轉給下一代，
這是公平明理的好榜樣嗎？
這些人還講什麼平反六四呢？
這些人只是用自己所謂平等去歧視另一群人，
根本不明白什麼是真正的平等自由平權。

沈默是金?

小明的處事方法:

小學時，
同學在課室內吃東西，
他不會舉報給師長。
有人考試"出貓"，
他當什麼也看不見，
因為他害怕給同學排斥。

中學時，
同學給童黨"霸凌"，
他會不聞不問。
有人在校內販賣丸仔，
他也選擇視而不見，
因為父母自小教他"棒打出頭鳥"，
只有自保才最重要。

社會打工時，
看見上司非女事，
他會轉頭不理，
因為自己份工最緊要。
發現公司有人貪污，
小明也不會出聲，
因為不是自己貪就可以。

小明其實不是誰，
他是中國人的"壞習慣"﹐
事不關己，
己不勞心。
明知是錯的也不會出聲，
就算有人破壞公共規則，
他都不敢出言勸告，
不為什麼，
只怕人家說他歧視別人。
結果各家自掃門前雪，
不理他人瓦上霜，
社會風氣漸壞。

屎.尿.屁 之 尿！

尿: 袋裝"飲料"！

這是幾年前我親眼所見的。
地點是觀塘協和街巿樓上百佳超巿，
人物是中坑和六歲左右小童，
小童在超巿內急難忍，
父親立刻取出膠袋給他解手，
完事後中坑把袋口一扎，
隨手掉到地上，
然後隨腳踢到貨架底下，
小童見狀立刻說老師叫我們不要隨地掉垃圾，
但中坑不單不理，
還想拉著小童走，
最後我忍無可忍，
大聲呼喝中坑把"袋裝飲料"拿走，
他才心深不忿的撿起走人！

有怎樣的父母就會教育出怎樣的下一代，
社會的未來如何還是要看自己了，
我們要繼續為自己找借口，
還是要積極改進呢？

自食其果 的 spam!

看見某舊blohg友說，
她blog裏有兩萬多個spam留言，
要删也没法删，
不知如何是好。
自己近期也發覺垃圾留言多了,
每星期都有四五十個之多，
雖然大部份都給blogger攔截了，
但間不中也會有四五個漏網之魚，
其實我都唔清楚那些垃圾留言有何目的，
是宣傳還是病毒還是什麼呢?
總之無無謂謂又唔安全，
通常我見到會立刻删除，
費事麻煩!

除咗blog有垃圾留言外，
我右邊欄的Cbox也經常有spam，
三唔識七又話有好嘢益你，
有時又讚吓你個blog，
我心諗你個老外連中文都唔識睇，
我個blog寫成點你知個屁咩?
見嚫哩啲垃圾我都係即删，
想都唔洗想!

其實啲垃圾留言、電郵，
真係消耗咗大量人力物去處理，
不過要捉又係花時間、金錢，
隨時得不償失，
最好有一種自動反彈程式，
一收到哩類spam就會回彈返俾佢，
佢發一個就收返一個，
發一萬個就回收返一萬，
愈發得多就收返愈多，
等哩個麻煩人自食其果，
知道自己幾咁討厭和衰格就啱嘞!

世界末日? 我等你!

每隔幾年就有人話會世界末日,
又乜又七又乜鬼預言又乜鬼曆法，
 講到真嘅一樣，
你唔悶我都覺得煩，
但係又無次中喎，
不過依然大把人當真，
得啖笑!

好啦,
今次預言今日下午二點左右末日，
無聊、多餘、食飽無事做等屎痾，
非洲啲饑民一定唔會咁"昂居"，
如果過咗今日下午2:00我死唔去點算先?
即係神棍現形啦，
哩班神棍慌死世界唔夠亂，
人心唔夠無知，
仲係度妖言惑眾，
唔係白痴就係騙財，
唔該通通拖出去斬!!!

會唔會有世界末日?
梗有，
宇宙萬物不會永久長存，
五十億萬年又好,
一百億萬年又好，
點都有終結嘅一日，
不過相對於億萬年嘅宇宙黎講，
得幾十年光景嘅人類根本唔入流，
以生命長短以至智慧高低來睇，
人類係無資格討論世界末日，
做人嘅，
不如做好本份，
做個不自私自利關心別人嘅人先啦，
唔好以為自己嗰套乜都啱，
人家就乜都錯，
目光狹窄，
唔好再人打人戰火連天啦，
人嘅根本素質都做唔好，
有資格去探討宇宙世界末日咩?
人類仲係亙相爭鬥的話，
只怕世界末日未到，
人類就用超級武器亙相毁滅了，
預言世界末日?
想想如何能令人類和平共容仲有用啦，
無嘢講攞嘢黎講，
今日下午兩點，
我等住同大家一齊死，
哈哈哈~~

變種 墨魚怪!

為了戒煙，
身邊都袋了口香糖，
煙癮一起就嚼一粒，
一粒太少又嚼一粒，
兩三粒同時咬兩小時後，
煙癮過了，
但嘴巴很累，
整天不想開口講話，
就連中午吃東西都以流質為主，
粥是最佳選擇，
不用咀嚼，
一灌入喉，
很好!

那天下午三點多要到上環，
從觀塘上巴士，
車廂人很少，
樓下只有三四個人和一個大聲講電話的師奶，
由觀塘道過藍田，
師奶在講她隔離屋的女人，
入東隧出太古城側，
師奶在講人家老公的是非，
上東區走廊轉入北角區，
師奶在講舅仔和家婆的爭吵，
巴士接近銅鑼灣時有點塞，
師奶的嘴巴還是没有停下來，
繼續很大聲的東講西講前講後講，
其實她在講什麼我没有深究，
但實在太大聲太持久了，
就像耳邊的蒼蠅、瘧疾蚊一樣，
長久而永恆的在離你不遠處不斷的發出騷擾，
很想用蒼蠅拍大力一野抽落去那張不曉合上的墨魚嘴。

我覺得有點怪，
由我上車看到直至灣仔她下車，
快一小時了，
她的嘴巴都没有停超過十五秒，
就是下了車她還是在不停的講，
她是變種新人類嗎?
大嘴怪?
墨魚妖?
豬嘴魔?
長舌婦?

口賤身衰!

小巴還没有開動，
前排那少婦就大聲的駡，
「小你老母吖，嗰條八婆真合金鈴、扑佢個臭街吖!」
「 老婆乜事咁能慶呀?」坐在傍邊的麻甩佬問，
「條臭西乜能都唔做，淨係識show波罅，今朝仲同部長插我呀。」
「少七佢囉，洗乜能怕佢呀!」
「我梗有少.......」
跟住廿八字粗口無間斷的充滿整個車廂，
過了不久，
坐在他們背後的一個六七歲小孩問:
「媽咪! 媽咪! 乜嘢叫做"少七佢"呀?」
「死仔包，好學唔學講爛口，再學信唔信我打巴你吖嗱?」
於是小孩只有立刻收聲，
默默的聽着他父母繼續粗口爛舌了!

不知何時粗口變的了香港的重要文化了, 
最近某幾套電影都標榜粗口對白，
戲裏每一個人開口埋口都少媽拆蟹，
男又好，
女又好，
老少都好，
亙相駡戰又好，
平時朋友對話又好，
句句都有"能、西、少"，
好似唔講性器官唔識講嘢咁，
粗口係咁用嘅咩?
有必要無端端講句話都"能、西、少"呀?
依家啲死"口靚"仔本來都無句好架啦，
啲電影仲要火上加油，
錢係咁賺嘅咩?

我知實會有人話你唔好扮高尚，
你無講過粗口咩?
我梗有，
都係火滾到爆時才忍無可忍爆一兩句，
是一種情緒嘅宣洩，
但唔會無端端一開口就句句老母魚蝦蟹，
唔講爛口唔識講嘢架?
開口就問候人家老母，
咁樣好威咩?
衰格就有份!

替老人家們講句公道話!

選舉過後,
很多人說建制派大勝,
對於那些紛擾是非，
我已經感到很不耐煩了，
不想多看。
我已没有心情細看結果，
只是從網上世界略知一二,
而當中最常見的就是指建制派的"蛇、齋、餅"之類的行為,
指責很多人尤其是老人家都盲目貪圖小利，
所以胡亂投票給他們，
對於這個說法，
我不能夠完全認同，
而且這言論實在有點侮辱老人家的智慧。

首先，
派利益這類行為不是建制派獨有，
泛民亦都有做，
不過建制派的資源的確雄厚﹐
做得很多很全面確是事實。
不過大家有没有想過這些所謂利益的背後代表什麼呢?
老人家真的只是貪那一口蛇肉、一次旅遊呢?
容我講講家母在這次投票的情景給大家聽吧!

家母年紀老邁，
年歲足夠攞生果金有凸了，
大陸未曾赤化前，
她已經獨自來港謀生，
未曾受過共黨一分一毫的利益，
相反她大部份家人都留在內地，
對於大躍進、民革、四人幫、六四等等歷史，
她都有很深的認知和看法，
所以無形中她對共黨有着無名的抗拒感，
因此，
她多年來都是投給泛民派的，
但結果是她看不到泛民做到什麼，
只看到他們嘈嘈嘈......
口號漂亮但對民生卻建樹很少,
且不太能真正關心到市民，
另外對於那些自謂身懷民主血液卻天天掉蕉漫駡的人，
她更是討厭之極。
相反，
建制派在地區工作卻愈做愈大，
就以民建聯的陳鑑X為例，
以他那"高高在上"的身份，
多年來他都曾經多次到訪老媽那區，
而且不只是坐在車上遊一遊，
我老媽每天早上都會在屋邨附近的山頭公園耍太極的，
那裏非常荒遠，
每朝只有幾十名老人家耍太極，
但這位陳議員都曾多次到訪，
不單虛寒問暖，
而且詢問地區上有那些地方需要改善，
單這種行為就讓人印象深刻了，
對爭取選票的確有幫助﹐
相反，泛民派卻多年未見踪影，
就算口裏說着如何如何，
那又叫人如何接受他們呢?

其實老人家以至一般市民很簡單，
他們需要別人關心，
更需要人家關注他們的聲音，
在那些老弱無助的一群眼裏，
他們的聲音根本無人關注，
如果連見到没有見過一面，
怎能讓他們把選票投到那些開口埋口說民主的人身上呢?
對於那些駡市民以至老人家貪圖小利的人,
我感到可悲，
他們有否考慮過人家究竟是貪那一丁點的小利，
還是想得到大眾的關注和照顧呢?
駡人之前想一想，
不要以為拿着什麼民主大義就可以口出狂言，
民主是很重要，
但民生亦不可忽視，
請尊重別人,
老人家不一定是無腦貪小便的!

後記:
臨投票的早上，
老媽問我陳X林的人如何，
我實話實說出他的政黨背景和做過的事，
老媽聽後立刻改變主意，
至於她投到誰人身上，
就由她自己決定了，
我很相信她雖然老但不慒懂，
老不一定慒的!

嘈少陣得唔得?

潮流所趨，
差不多每個香港人手上都有部平板電腦，
或者至少有部 3G 手機，
早上搭巴士搭地鐵，
對住部手機或平板電腦，
人人頭耷耷手指係咁捽，
唔係上網 就係玩GAME，
或者睇電影，
身邊發生了什麼事都不知道，
總之自得其樂，
有些人更邊過馬路邊上網，
難得唔會扑崩鼻，
真係佩服到五體投地，
其實咁樣都幾危險，
有車經過都唔知，
上少一陣網唔得咩?

不過這是個人行為，
只要唔影響到別人無乜所謂，
最麻煩係有啲自私鬼，
唔用Headphone又開到個volume大大聲，
嘈到不得了，
我試過係快餐店食嘢時，
聽到附近有人玩鑽石方塊，
係咁bing bing wing wing響過不定，
煩到不得了，
但係左望右望都唔見週圍有人玩，
後尾臨走先發覺隔我四行枱外邊有個麻甩佬玩緊，
討厭到爆。
有啲阿伯阿婆喜歡用手機聽粵曲，
佢哋耳力唔好又唔用headphone，
開到個volume爆咁濟，
我坐係佢隔離唔夠一陣就頂唔順要走人。
其實係唔係要人立法禁止大庭廣眾嘈音騷擾先得呢?
哩啲個人公德唔係要人管先識啩?
或者佢哋覺得無乜嘢好少事，
但係又有無嘗試從別人角度著想吓呢?
你enjoy啫，
唔代表別人喜歡同你一齊欣賞嘛，
人家只是想靜靜地食餐飯，
或者想係車上閉目休息吓，
己所不欲勿施於人，
請那些自私人反省吓，
要人立例監管就無意思啦!

黑手 伸進!!

有些事聽多了，
本應見怪不怪，
但親身接觸到又是另一回事，
事情極之離舖，
令我愈想愈火滾。

某天某親屬打電話給我，
問我新鮮媽有否登記做選民，
這傢伙 (極親關係) 過年過節要找都找不到人，
今天忽然親自致電問起這個無關痛癢的事情，
我心知必有問題，
一問之下，
他遲遲疑疑含糊的說:
「有個幫過我忙的朋友要我找些未登記做選民的人，
我是一個，另外還要多找幾個......」，
相信聽到這裏，
一般人都會估到不會是什麼好事，
他朋友又不是選民登記處的人，
人家登記了没有和他有什麼關係呢?
所以我立刻阻止他說下去，
且引述了早前有人報假地址投票受查的事件給他聽，
還強調不要把新鮮媽和犯法的事情扯上，
雖然事情不一定和假地址有關 ，
但也不會是什麼好東西了，
所以一定要立刻劃清界線。
佢死佢事，
幾廿歲人，
做人是非黑白不分，
犯法不犯法都不清，
還要把親人拖下水?
這是人頭豬腦還是腦大生草呀?
我狠狠的痛駡了他一餐，
說明新鮮媽已是選民，
要他死了那條心，
還勸他千萬不要上他那個所謂朋友的檔，
但他只是唯唯諾諾的含糊其詞，
看來都是不會把我的話聽進耳了。

有些人"愈大愈精明"，
但卻有人"愈大愈低智"，
無眼睇!

阿爺剩低俾我的，吹咩？

點解 要公平？
我唔要公平，
我要保衛我地d原本權利，
哩一大片土地係阿爺老祖宗剩低俾我地d男丁，
幾百年來我地話點就點，
我地有權係上面做乜都得，
話知我起大屋起魚塘，
甚至做廢物回收，廢車場，
我地想點就點，
咸豐爺管唔到我，
紅毛鬼都管唔到我，
你班庸官敢"gi吉" 我？
係哩度我地大X哂，
想點起就點起，
想幾高就幾高，
乜野叫僭建呀？
我都唔知你up乜九！
塊地我阿爺剩落俾我，
我想點就點，
哩度我就係法律！

你想講法律丫嘛，
我又同你講，
基本法都話要保障我地權利，
所以一向我地話點就點哩種權利就應該保留，
你話係唔係先？
年年分太公豬肉，
歲歲等派地起丁屋，
得閒打下排九，
哩d就係我地既權利勒。
我話過你知丫，
你班狗官仲唔識趣的話，
我擺個二三百萬出黎搞掂你，
車~ 幾百萬打官司算係乜丫？
起個魚塘都要哩個數啦，
我俾唔起咩！

乜野叫公平？
乜野叫特權？
有咩？
我地幾百年都係咁做架啦，
以前又唔會有人講？
你地想剝奪我本身權益呀？
夠pop你就試下羅 ，
你咪行入我地頭呀，
有乜事發生咪懶我呀，
知唔知呀盲丙！！

我錯了!

昨天看唐唐嘅造勢大會，
嘩~~ 真係萬人空巷呀，
政商界名人、電影，歌唱明星都空群出動，
成個場館粒粒都係各界巨星，
平時要集齊咁多"偉人"真難過登天，
今次簡直睇到我流眼淚呀!
就連九十幾歲嘅"港英餘孽"鍾爵士篤住枝拐杖都黎支持，
仲中氣十足咁贈佢一句「靠得住」，
而唐唐都話自己雖然講嘢唔叻，
但係做嘢都幾有能力喎，
睇見咁嘅場面，
見到咁多猛人撐佢，
我開始懷疑自己嘅眼光了，
唔通我真係睇錯佢?
唔通佢真係好有能力?
撐佢嘅名人個個唔係有錢就係有面，
在政治、經濟以至演藝界都是響噹噹大人物，
佢哋嘅觀察力和判斷能力一定比我高出幾千萬倍啦，
如果佢哋都話唐唐適合做特首，
係咪代表我哩個井底之蛙完全睇錯唐唐呢?
我很懷疑!!
我很懷疑佢哋個腦諗緊乜?
我睇到很多有權有勢有地位嘅人嘅睇法和升斗小市民完全相反，
但佢哋嘅意見有人聽，
我哋就連發表意見都無人理，
所以......
我開始懷疑我嘅睇法係"錯"的，
因為我可能"錯"，
就算我有權選特首都會"錯"，
所以根本唔需要全民直選，
依家我明白了，
點解有些人話選舉未必能夠選到賢能，
因為所有無權無勢嘅小市民都是"盲"的，
因此......
有無直選都唔重要啦，
任由上面有權有勢嘅特權上等人揀就無問題，
小市民乜都唔洗做，
亦無資格，無智慧做，
任人家擺佈就可以嘞，
哩啲咪叫做"有效率"囉!!!

食屎和飲尿硬是要你揀一樣，
你會揀邊樣?
不過依家無得你揀，
嚿屎我哋食硬，
死未?

選佢老表!

今天有選舉嗎?
我不清楚，
没有人通知我，
因為今次我無選舉權，
其實大部份人都無，
只有少數人有，
有些還有兩票或更多，
有誰可以Tell Me Why??

有人說選舉未必能舉出賢能，
是的，
臭屎密蓋，
總有騙人高手當選，
不過選民有權把人拖下來，
也算亡羊補牢。
看看兩屆特首是什麼貨色，
他們不是由全港市民選出來了，
賢嗎?
能嗎?
還要連任，
我們只能啞忍，
忍到口唇咬出血絲來了，
自己選出來的，
錯了我認命，
人家硬是安排下來的，
我撞頭埋牆!

下屆特首是誰?
蠢嗰個囉，
中大民調說奸嗰個得心民多一點，
但大家都知阿爺硬是要蠢嗰個"當選"，
Why?
Easy to control呀，
白痴都明白!
面對如此困境，
我什麼都做不了，
就連那1300位選委會橡皮圖章我也没權選，
我算是什麼?
一塊粘板上的豬肉，
任人"豬肉"，
好X興!

還好我仲有權係度發UP風，
如果在內地，
我便人間蒸發了!

真"仆街"!

圖片來自台灣仆街少女網頁

我忍咗好X耐，
最終忍唔住要X兩嘴，
哩個世界真係有啲人無聊到咁，
食飽無憂米到咁仆街，
咁多嘢唔去玩，
玩"仆街"，
最大鑊係好多人欣賞，
有樣學樣仲做埋粉絲團，
仲話好有創意喎，
真係仆X哂街!

廣東人"仆街"嘅意思大概係:
大鑊、行衰運、做事不順、行路打倒退、衰到貼地仆落街......
總之唔係好嘢，
但係依家有人反而攞黎玩，
聽聞緣起自日本嘅"漂浮少女"喎，
整個人跳高係空上，
然後用影相機定格影低，
看起來好似人停留在空中一樣，
玩吓玩吓就玩到仆街了，
成個人板直咁仆係街度，
搞到好似條死屍咁，
啲人覺得好有特別有好創意喎，
挑隙星吖，
我就睇唔到有乜創意嘞，
哩啲少女多數都係食飽等屎痾，
無聊之極，
父母養佢哋都哂米飯，
好做唔做，
如果佢哋試過揾朝唔得晚，
成家餓到無飯開，
行路手軟腳軟仆係街，
仲會唔會咁戇居玩仆街吖?

仆係度影張相又點呢?
點有創意呢?
又代表咗乜嘢思潮情緒呢?
代表咗乜嘢含意呢?
要反映表逹心思創意有好多方向，
玩"仆街"我就睇唔到乜嘢創意嘞，
咁得閒快啲出去揾錢養家啦，
食爺飯著奶衣仲要玩白痴嘢，
浪費地球資源!
戇尻! 無聊!

廁所五大賤！

李碧華寫"電梯十賤"，
反映出不少香港人很自私自利，
因而令我聯想到公廁裏所見所聞，
當中不少千奇百怪，
且令人十分厭惡。

一) 不沖廁:
很多人習慣不沖廁，
無論大小二便，
去完就走，
下手開門看到那浮浮沈沈的東西時，
真想吐。

二) 蹲馬桶:
很多人怕公廁唔衛生，
明明是座廁都用蹲的，
搞到廁板上全是黑黑的鞋印，
有些廁板更給人踏壞了。
另一些人則在座廁板舖上厚厚的廁紙，
但完事後又不清理，
弄到一地都是，
加上蹲著易"出公"不準，
屎屎尿尿散落四處，
完事後又不會沖廁，
"抆"完自己蘿友就走人，
簡直是賤中之賤。

三) 淤塞座廁:
很多人喜歡邊如廁邊看報紙，
尤其是馬經和和風月版，
但不少人看完順手就拋進馬桶裏，
結果水一沖就塞了，
且水位不斷上升，
屎屎尿尿不停流到地上，
不單臭氣薰天，
且令人舉步維艱，
狼狽不堪！

四) 廁所塗鴉:
有些人喜歡在廁所大發謬論，
上至天文，
下至政治，
甚至家庭絮事，愛情離合等等，
而最常見的就是鹹濕公仔，
當中自然有男女性交和女性性器官的大特寫，
千奇百怪。
不過最難以接受的是有人用"屎"來塗鴉，
不知是他們無廁紙還是怎樣，
他們就是會用新鮮熱辣的排瀉物在廁格牆上繪畫，
當你一坐下預備大便時，
看見身傍這些近在咫尺的屎畫，
且傳來陣陣幽香，
最慘是廁格門把上也有點點屎跡，
想開開門走人也不知如何下手，
此情此景，
你說如何是好？

五) 濺及隔壁:
這是有男廁專有的問題，
男人小解多數用企廁，
但有些企廁卻異常接近，
只要不專心"作業"，
就很容易濺出外邊，
有些人就是喜歡一邊講電話一邊小便，
當他邊講邊去時就會把尿水濺到隔離的鞋子上，
但又不向人家道歉，
這口氣叫人如何嚥得下？
結果口角打鬥便發生了。

另外也聽聞女廁最常見的是把用過的衛生用品隨便亂拋，
不單亂拋且又不包好，
活脫脫上演血案一樣，
上述這些自私缺德的"賤人"，
應該受到重罰牢改方能平息民忿呀！
除了我說的外，
不知大家有沒有遇過更賤的廁所見聞呢？

blog友佳作:
魔術師 ~ 麻甩十賤

七百年前留下來的 "柑子" !

【賣柑者言】明 劉基 (劉伯温)

杭有賣果者，善藏柑，涉寒暑不潰，出之燁然，玉質而金色；置于市，賈十倍，人爭鬻之。予貿得其一，剖之，如有煙撲口鼻；視其中，則乾若敗絮。予怪而問之曰：「若所市於人者，將以實籩豆，奉祭祀、供賓客乎？將衒外以惑愚瞽也？甚矣哉，為欺也。」

賣者笑曰：「吾業是有年矣。吾賴是以食吾軀。吾售之，人取之，未聞有言，而獨不足子所乎？世之為欺者，不寡矣，而獨我也乎？吾子未之思也。今夫佩虎符、坐皋比者，洸洸乎干城之具也，果能授孫吳之略耶？峨大冠、拖長紳者，昂昂乎廟堂之器也，果能建伊皋之業耶？盜起而不知御，民困而不知救，吏奸而不知禁，法斁而不知理，坐糜廩粟而不知恥；觀其坐坐高堂、騎大馬、醉醉醴而飫肥鮮者，孰不巍巍乎可畏、赫赫可象也？又何往而不金玉其外、敗絮其中也哉？今子，是之不察，而以察吾柑！」

大意是:
杭州有個賣柑小販善於保存柑子，
就算在寒冬都一樣有外表黃金的柑子賣，
所以就算叫價十倍，
依然其門如市，
劉基好奇之下買了一個嘗嘗，
但剝開漂亮的柑皮後發覺內裏柑肉尤如爛棉，
乾枯而不能吃，
於是對小販大興問罪。
但小販反駁說:
我都係揾兩餐而已，
人人都係咁做，
為何要計對我呢?
你睇吓依家啲文臣武將，
個個身光頸靚，
高官厚祿，
住洋樓養番狗，
前擁後載，
高高在上，
佢哋何曾有"孫吳之略"?
還口口聲聲說:「没有對不起人民」，
反觀我們小市民就餐揾餐食餐餐清清，
揾啖飽飯食都唔易呀，
你知道什麼是"金玉其外、敗絮其中"，
難道没有看到這些事情嗎?
那些庸官你不管來管我，
還獨指我是奸商!

劉基 作 【推背圖】 推算未來，
不知這篇是否也是預知今天的香港情況呢?
還望那些莫視民情的庸官多看古書，
作了一番孽還訛言自己没有對不起香港人，
看看自己拿的人工比美國總統還要高呀，
攞左我地咁多血汗錢，
你有無打好你份工呀?
無知，無能加無恥，
尸位素餐還侃侃而談，
可恥! 可恥! 可恥!

聾子說話!

你問我香港人係咪好嘈，
就我個人自己所"聽"，
我會話"係"!
這是基於人們在大庭廣眾下說話時，
會否考慮是否影響他人作論點。

除咗朝早嗰個幾鐘未瞓醒，
地鐵、巴士入便啲人好似行屍走肉外，
一般時間真係好Q嘈，
無論在街上、車裏、餐廳裏、圖書館裏......
任何大庭廣眾嘅地方都聽到有人大大聲咁"講"嘢，
但係很少人會覺得咁樣有問題，
更唔覺這是没有禮貎，
街黎架嘛，點解唔可以大聲講嘢喎?
但又時常聽過香港人駡內地人大聲講嘢無禮貎喎，
哩啲係咪五十步笑百步?
可笑!

係餐廳、酒樓有無試過聽唔到同枱的說話聲呢?
唔係十二人大枱喎，
就算係四人細枱，
朋友、家人坐係你隔離，
只要對方唔係大聲公大聲婆，
你多數唔會聽到佢講嘢，
跟住你會好大聲咁叫佢大聲啲，
到大聲到蓋過隔離枱嘅對話聲時，
隔離四周嘅人又要再大聲啲來掩蓋返你哋把聲，
層層遞進、聲聲俱增，
最後全廳嘈到萬鳥歸巢咁，
不過唔緊要，
人人都是這樣，
完全唔覺得有問題，
至多是耳鳴頭痛而已，
人未老就要帶助聽器了!

又好似係圖書館裏，
理應是寧靜和諧的，
不過最常聽到的是奇怪又響亮的電話鈴聲，
有阿仔叫老豆嘅響聲、更有古典音樂嘅樂章.....
甚至有人用BB仔哭聲作鈴聲，
一響就成個圖書館都聽到，
隨後就聽到大大聲咁講電話，
仲慢慢咁講大大聲咁講，
當正係自己辦工室一樣，
圖書館管理員話佢又唔理，
過無幾耐電話又響過又講。
經過兒童圖書館，
你多數會見到啲小朋友四圍走捉迷藏，
又尖叫又嘈，
無辦法小朋友講極都唔會聽的，
不過你總會聽到佢哋老母係度大大聲咁叫:
「死仔包，叫你唔好走呀，係咪想我打餐飽呀?」
聲如洪聲、大聲過大啦叭，
不過只係叫小朋友唔好走咗喎，
無話唔俾佢哋唔好嘈和叫喎，
事關嗰個師奶坐係度同佢班老友大大聲八緊是非嘛，
所以咪由佢啲小朋友嘈囉，
會唔會影響到其他人?
Who Cares!

記得某年我和朋友到東京自由行，
東京人多車多，
係街上都唔會太靜，
不過日本人係大庭廣眾下很少講電話，
講嘢亦很少有咁大聲得咁大聲，
真係幾有公德心和禮貎。
在旅遊期間，
有次我們從商場走到街上，
一出門口就聽到耳熟的廣東話吵鬧聲，
看看左右兩方距離兩三百步，
各有一團香港鴨仔團，
佢哋應該係度等緊團友出黎，
不過唔知係咪開心過籠，
講嘢時把嘴又咁大張咁大，
笑聲更響徹雲端，
九條街外都聽得到，
仲要全班人企正係走道正中間，
搞到當地人經過都要繞路走，
走過時仲"啤實"佢哋，
不過佢哋一於好少理，
繼續高談濶論，
視別人如無物，
非常失禮。
如果你旅行時有意無意間都是這樣，
唔好意思，
我說的就是你，
多多得罪。

其實點先叫嘈好難下定義，
唔通真係放部分貝機係口邊量咩?
不過方法又可以很簡單，
首先大家在大庭廣眾下講嘢時，
有無考慮過聲音會否影響到他人呢?
有没有盡量細聲一點嘅想法呢?
如果能夠做到先考慮別人，
這就很足夠了，
大部份香港人有無咁嘅想法呢?
唔好咁快答我住，
自己心裏想清楚先吧!

點解 大型超市 可以攏斷?

巔兄係blog搞"港式茉莉花"，
痛罵大型超市攏斷市場，
魚肉市民，隨意加價，
我們尤如肉隨粘板上 ~ 任剮，
提意團結反擊，
抵制大型超市，
多幫襯街坊小店。
我是舉手舉腳全力支持的，
日常用品多光顧藥房，
麵包西餅小食亦轉往小餅店，
柴米油鹽開七件事都盡量光顧雜貨店，
買菜買肉都以街市小販為主，
盡量令消費不落入大集團手中。

這樣做是很有意思的，
不過有些事情卻不可不提，
首先是衛生，
不知道為何中國人的街市總是污污糟糟的，
肉檔、菜檔跟前總是又潮又糟，
滿地"菜烚"、豬膏，
不少檔主總是求其把菜頭肉尾隨檔掉，
搞到一地污糟邋撻、滿地血水，
聞之欲吐，
相反超市則光猛清潔，
通地乾爽無垃圾，
叫人行得舒服，
相比之下，
你會喜歡到那裏逛市買菜呢?

另一樣就是禮貎，
超市員工的確是機械化的問好、笑容，
但總少黑口黑面相對的，
相反部份小販商檔就一副晚娘面，
問多句都唔理你，
想揀多兩揀又話唔俾揀，
一副唔恨做你生意的嘴臉，
我親眼都見不少生果小販用粗口駡阿公阿婆，
那些阿婆阿公只是想揀吓摸吓而已，
就算唔俾人家揀都不用粗言爛口相對吧?
有些更大大聲的說:「我唔做你生意，唔憂做呀!」，
嘩~~ 唔洗咁"吋"呀?
千奇唔好以為這是個別事件，
我係觀塘街市十幾日就見一次，
不論是在生果檔、肉檔、菜檔都見過，
真係不知所謂，
你話超市趕絶小商戶，
都要睇吓佢哋點對客人，
咁嘅態度係咪抵人家唔幫襯佢哋吖?

另一個問題就係誠懇，
係超市買東西一就一、二就二，
明碼實價，
你覺得貴嘅可以唔買，
唔會呃秤騙人，
但係街市小販就唔係個個咁老實，
尤其係啲生果檔，
佢哋最喜歡將個價定到平一平，
好似提子、車里子哩類比較貴的生果，
標價九蚊磅、五十蚊兩磅，
然後係個磅度做定手腳，
一攞上手就知佢呃咗你三分一去，
你問佢點解咁少，
佢哋就成班人數你，
邊有呃你呀? 咁平係咁啦，
好似你再嘈就出黎打你咁;
又好似買游水蝦咁，
標價三十蚊一斤，
佢撈蝦時就連水都倒埋入去，
問佢點解咁多水，
佢就大大聲話三十蚊斤梗係多水啦，
嗱~~ 就係哩啲咁嘅態度搞到啲人把幾火嘞，
有時真係情願幫襯超市好過，
至少貴得黎唔會俾人"昆"。
你唔好話只係個別小販先係咁，
我梗唔會話個個係，
不過我一個星期去街市五、六次，
買餸經驗都唔少，
見到嘅就係咁嘅衰樣，
好嘅唔係無，
只係少之又少，
第度我唔知，
至少觀塘街市就係咁。
除此以外仲有大把衰格嘢，
不過不能一一盡錄了。

超市正趕絶小商戶係事實，
不過唔該佢哋都要反省吓，
臭檔、吋嘴、呃秤、污糟......
無超市佢哋都要改善吓啦，
再係咁我情願俾多啲錢超市都唔再幫襯，
超市的確在服務、衛生、態度上都比不少小販好，
人家攏斷嘅部份原因都係小販佢哋自己攞黎，
反省吓啦! 唔該!

紙皮菜肉包 ~ "膠包"!

市面上的包裝包點多不勝數，
有時真的不知屬佳屬劣，
今次試食了這款新品牌 ~ 菜肉包，
結果令我失望之極。
大家不要相信上圖，
首先包裏餡料極少，
切開空空洞洞無乜料，
而且用料奇差，
椰菜乾硬如紙皮，
咬都咬唔碎，
另外又無端端有幾絲"霉菜"，
其實我都唔敢肯定係咪"霉菜"，
見佢啡啡黃黃一絲絲靠估喳，
佢仲係有渣嗰隻，
食落要隨口吐出，
簡直離Q哂舖。

至於包的外皮則極有彈性，
但不是鬆軟有彈性那種，
而是"IN UN"如軟膠EVA一樣，
咬落去就會彈返轉頭，
膠感十足難食到痺，
感覺落了很多發粉，
完全是咬軟膠的感受。
對於這新牌子我用一個字形容 ~ 膠，
賣嗰個"膠"，
買嗰個"戇膠"，
我"膠"咗一次了，
你哋千奇咪再"膠"呀!

侮人自侮!

昨晚看電視新聞，
又發現內地一單嚇人的新聞，
就是那些豬農竟敢將收回來的厨餘加熱後，
再把那些本來用作餵豬的潲水面頭的一層油撈起，
然後賣給一些食肆當食用油用，
真是離哂大舖，
人命黎架，
咁都做得出，
真係豬狗都不如，
要打落十八層地獄。

其實類似嘅問題日日有之，
只是我們知道不知道而已，
內地不少人為一丁點的利益，
什麼事情都敢做出黎，
好似早前嘅毒奶粉、假雞蛋、紙碎饅頭、垃圾池鹹菜、孔雀錫綠魚......
以至早年嘅"甲醇假酒"，
可謂日日新款鑊鑊金，
食你唔死算你好運，
就連內地人自己都信唔過自己，
成群成群咁湧落黎香港搶貨，
咪就係自己知自己衰囉。

除咗貪錢胡為外，
不少內地人啲格真係衰到痺，
唔好講什麼洗手盤痾屎、隨地吐痰了，
就是啲自由行都夠攞你命，
早前阿珍事件只係冰山一角，
條友聲大夾惡攞明想攞着數先收聲，
我有個朋友帶團遊日本的，
佢話啲內地人係洗好多錢，
但係啲格式就衰到無人有，
嘈邊巴閉唔在講，
導遊服侍略有不週就破口大駡，
仲要人大庭廣眾中道歉，
可謂野蠻不堪。
至於其它劣行多不勝數，
唔洗我講大家都聽唔少了。

有人些話咁樣係歧視，
當然唔可以話所有內地人都係咁，
可是我們日日看到、聽到的都不是好嘢，
我唔敢話這些聽聞全都是真相，
但唔多唔少某程度上都反映到內地人的性格樣貎，
就好似一粒老鼠屎掉落一瓶酒裏一樣，
只是一小撮人就足以破壞了全局，
況且這所謂"一小撮人"為數極多，
尤其是一些初見世面的暴發戶，
有少少錢就以為可以侮辱人。
人必自侮而人侮之，
就算是歧視都是自己攞黎的，
如果說這是不應該的，
請問內地奶粉和日本奶粉二選一，
你會為自己下一代選那一隻?
為何?