2011年10月12日

聾子說話!

你問我香港人係咪好嘈,
就我個人自己所"聽",
我會話"係"!
這是基於人們在大庭廣眾下說話時,
會否考慮是否影響他人作論點。

除咗朝早嗰個幾鐘未瞓醒,
地鐵、巴士入便啲人好似行屍走肉外,
一般時間真係好Q嘈,
無論在街上、車裏、餐廳裏、圖書館裏......
任何大庭廣眾嘅地方都聽到有人大大聲咁"講"嘢,
但係很少人會覺得咁樣有問題,
更唔覺這是没有禮貎,
街黎架嘛,點解唔可以大聲講嘢喎?
但又時常聽過香港人駡內地人大聲講嘢無禮貎喎,
哩啲係咪五十步笑百步?
可笑!

係餐廳、酒樓有無試過聽唔到同枱的說話聲呢?
唔係十二人大枱喎,
就算係四人細枱,
朋友、家人坐係你隔離,
只要對方唔係大聲公大聲婆,
你多數唔會聽到佢講嘢,
跟住你會好大聲咁叫佢大聲啲,
到大聲到蓋過隔離枱嘅對話聲時,
隔離四周嘅人又要再大聲啲來掩蓋返你哋把聲,
層層遞進、聲聲俱增,
最後全廳嘈到萬鳥歸巢咁,
不過唔緊要,
人人都是這樣,
完全唔覺得有問題,
至多是耳鳴頭痛而已,
人未老就要帶助聽器了!

又好似係圖書館裏,
理應是寧靜和諧的,
不過最常聽到的是奇怪又響亮的電話鈴聲,
有阿仔叫老豆嘅響聲、更有古典音樂嘅樂章.....
甚至有人用BB仔哭聲作鈴聲,
一響就成個圖書館都聽到,
隨後就聽到大大聲咁講電話,
仲慢慢咁講大大聲咁講,
當正係自己辦工室一樣,
圖書館管理員話佢又唔理,
過無幾耐電話又響過又講。
經過兒童圖書館,
你多數會見到啲小朋友四圍走捉迷藏,
又尖叫又嘈,
無辦法小朋友講極都唔會聽的,
不過你總會聽到佢哋老母係度大大聲咁叫:
「死仔包,叫你唔好走呀,係咪想我打餐飽呀?」
聲如洪聲、大聲過大啦叭,
不過只係叫小朋友唔好走咗喎,
無話唔俾佢哋唔好嘈和叫喎,
事關嗰個師奶坐係度同佢班老友大大聲八緊是非嘛,
所以咪由佢啲小朋友嘈囉,
會唔會影響到其他人?
Who Cares!

記得某年我和朋友到東京自由行,
東京人多車多,
係街上都唔會太靜,
不過日本人係大庭廣眾下很少講電話,
講嘢亦很少有咁大聲得咁大聲,
真係幾有公德心和禮貎。
在旅遊期間,
有次我們從商場走到街上,
一出門口就聽到耳熟的廣東話吵鬧聲,
看看左右兩方距離兩三百步,
各有一團香港鴨仔團,
佢哋應該係度等緊團友出黎,
不過唔知係咪開心過籠,
講嘢時把嘴又咁大張咁大,
笑聲更響徹雲端,
九條街外都聽得到,
仲要全班人企正係走道正中間,
搞到當地人經過都要繞路走,
走過時仲"啤實"佢哋,
不過佢哋一於好少理,
繼續高談濶論,
視別人如無物,
非常失禮。
如果你旅行時有意無意間都是這樣,
唔好意思,
我說的就是你,
多多得罪。

其實點先叫嘈好難下定義,
唔通真係放部分貝機係口邊量咩?
不過方法又可以很簡單,
首先大家在大庭廣眾下講嘢時,
有無考慮過聲音會否影響到他人呢?
有没有盡量細聲一點嘅想法呢?
如果能夠做到先考慮別人,
這就很足夠了,
大部份香港人有無咁嘅想法呢?
唔好咁快答我住,
自己心裏想清楚先吧!

23 則留言:

naruto 說...

哎,我完全認同呀

我堅想帶個聲音分貝機check下究竟師奶傾計,魔童海豚音,裝修佬巴士傾公事,邊個會win呀

新鮮人 說...

naruto,
我強力支持你,
快啲去check啦!

Tat 說...

兩岸三地的人民係公眾地方發出的聲浪,真係以中港台咁排,以大陸人最大聲,香港人次之,台灣人真係幾細聲。

新鮮人 說...

tat,
台灣人會細聲啲咩?
我係尖咀見啲台灣奧巴生講價都好"猛"吓喎!

Alex 說...

It is Chinese....haha

Tat 說...

係台灣搭巴士、地鐵,明顯係清靜D架

新鮮人 說...

ALEX,
中國人愛熱鬧,
講野的確會大聲點,
不過有時都要睇下場合,
唔可以影響到別人就好了,
我都係中國人,
講野都唔太大聲,
希望可以"中和"下外國人對我民族的感覺啦。

新鮮人 說...

TAT,
我未去過台灣呀,
如果如你所說一樣,
那是好事。

L L 說...

一句講晒:自大狂,質素低呀!

新鮮人 說...

Laulong ,
自大和自悲只差一線,
自私和自我也只差一字,
如何演譯,
看個別人了。

梁巔巔 說...

廣東話, 勁!

梁巔巔 說...

中國人嘅地方, 星加坡同現在嘅台灣, 係奇蹟!

新鮮人 說...

巔兄,
我的水準係咁上下,
粗人一個,
咬文嚼字講正統文體我唔掂,
見諒見諒!

可惜,
台灣人想台獨,
星洲人只認係華人,
唔會認係中國人,
千萬別自作多情。

一舊雲 說...

台灣的公共地方確實沒那麼吵

Ruth Tam 說...

In Japan, there are signs saying it's not proper to talk over the mobile in trains. In Europe, usually there's one quiet cart in every train. People really don't talk when in that cart.

naruto 說...

香港嘈嘅原買之一係電話費平,幾十蚊1000分鐘,D人又驚蝕章,傾足999至收口

新鮮人 說...

一舊雲,
那不是很好嗎,
要多學習。

新鮮人 說...

Ruth,
對,
我都見過,
不過香港從來都無人有咁既意識,
有些人還唔覺香港人普遍好嘈,
覺得係一竹篙打一船人,
我完全唔同意佢既講法。

新鮮人 說...

Naruto,
講得長和講得大聲是兩回事,
不要混淆。
大聲婆和長舌婦不一定是同一個人。

Haricot 微豆 說...

新鮮人:

新鮮人:

我沒回港多年,以下全是「時間錦囊」經驗。

当年香港人有句:「執輸行頭,慘過敗家」,從他/她們的心態來看,公共空間是免費商品,是有权利丶無義務的公益,即然是免費,就当然要「攞到盡」霸佔,又怎会先考慮別人?

所以如果有人話: 我有权大声,有权霸位,有权免費佔取公益等。

有關人仕应反問: 作為社会一份子,您有沒有想到義務和公益心?

(有關人仕 = 傳媒丶政客丶敎育界丶知識份子等)

新鮮人 說...

微豆,

簡言之: 自私。

五珍 說...

在街上或交通工具上講電話會特別大聲,尤其係港鐵,因為港鐵本身的轟轟聲已經很嘈,要令對方聽到,唯有扯大喉嚨,可以的話,我都不會在港鐵講電話。

新鮮人 說...

五珍,
據我所知,
日本人有共式,
在公眾地方盡量不長談電話,
因為會影響他人,
也不很有禮貌,
值得我們借鏡。