一個很有Guts 的決定!

作為一個知名的國際護膚品牌，

SK-II選用泰國變性作家SHA為其廣告宣傳，
個人認為是一個非常有膽色的決定。
不過，
有一點要先聲明`，
本人是平等主義者，
尊重所有人的自我取向和生活方式，
只要不去傷害或防礙別人，
我對任何人任何選擇都無異議。

護膚品主要對象是女性，
而SK-II的主要顧客群多是25歲以上，
雖然這品牌很想把年齡層年輕化，
但據知還未能取得很大的進展。
今次Changedestiny系列的十多支廣告片中，
有來自亞洲各地的女性演員，作家、藝術家等等，
唯獨只有這支是以俱爭議性人物為主角，
相信也是全球首個護膚品牌的大膽嘗試，
也許大家會認為現今社會開明，
這選擇也没有什麼大不了﹐
但現代華人社會真的很開明嗎?
試想想如果你是SK-II亞洲區總裁，
當你要面臨這種決擇，
一個可能會把品牌打落萬丈深淵，
且自己在這行也許會不能再有立足之地時，
你賭博的對象是華人社會的傳統思維，
你是否還能輕鬆的作出這樣的決定呢?

"美"是護膚品的綱領﹐
也是不少女性一生所追求的，
當一個廣告說"接受最真實的自己"時，
片中的"女主角"竟然是"他"，

有多少女性尤其是比較年長的女性能完全接受呢?
當她們塗着這品牌的粉底或眼毛液時，
腦袋裏出現的是一個變性人影像，
她們心裏會有什麼感想呢?
在YOUTUBE的留言中，
當然也有不少支持者，
但更多的是惡言相向，
什麼"變態", "嘔心"以至粗言穢語都有，
可見不少人對這個決定有強力的反彈，
SK-II今次的選擇是聰明的"一鳴驚人"還是"自挖墳墓"?
究竟現在華人社會對一些不同取向的人的包容性又有多少?
相信這支廣告會是一次很有意思的測試。

此外，因為很久已没有看電視了，
請問大家有否看過這支廣告在電視頻道上播放呢?
尤其是在晚上合家歡的時段!

人之初！

相信大家都讀過孟子的性善論，
孟子和荀子曾經為人之本性善或惡作過激烈的辯論，
最後孟子以孩童入井來辯証人本性善。
當有人發現小孩失足落井，
所有人都會毫不猶豫的去救他，
而救人之前並沒有想過有無利益關係，
救人只因為人有憐憫之心，
故人性本善。
姑且不論是否完全同意他的理論，
但基本上人天生是有憐憫同類以至弱小的本性，
此點在不少動物中亦屢有發現，
例如大象群上如有某小象的母象死去，
其他大象亦會幫助照顧這小象，
希望牠能夠長大，
相信當中沒有太多的利益計算。

人同此心，
心同此理，
幫助弱小理應是天性，
可惜人類發展太快太複雜了，
人與人之間有得千絲萬維的利益關係，
為了在複雜的人類社會生存，
人變得自私自利，
虛偽和有攻擊性。
人家說做惡事等天收，
是真是假無人確定，
就算有"天"又是否會去"收"呢？
人又係咪因為怕"天收"才不去做壞事，
無"天收"就可以胡作非為？
當初說過的"良心"又是否存在呢？
人的行為應當如何是由"天"規定還是本性已有概念呢？
這問題尤如孟子的性善論，
值得細意咀嚼！

網購 尤如 吸煙?

圖片來源: 羊城晚報

六、七十年代的商品陳列方式是屬於"封閉型",
商品放在密封的玻璃櫃裏,
或者是售貨員背後的陳列架上,
客人要摸吓難過登天，
遇到啲衰格嘅就十問九唔應，
有啲對眼生係額頭咁，
見你着得寒酸啲就白鴿咁眼啤住你，
好似想講:「件嘢好貴喎, 你買唔買得起先?」，
十萬個唔願攞件貨俾客睇!

到咗七、八十年代打後，
開放式陳列百貨商店大行其道，
商品都放在開放式貨架上任人摸任人揀，
揀到滿意至攞去收錢處俾錢，
方便之極，
不過萬萬估唔到的係今天零售風潮好似又走回頭路，
網上購物大行其道，
無人再要求摸過、睇過、感受件實物，
只要在網上看看圖片和說明就可以買了，
非常兒戲，
亦很易"買錯/多嘢"，
而且唔洗俾現金，
CLICK一下就可以，
月尾睇返啲咭數先知大鑊!

網購另一個容易出現的現象就係"乜都買一餐"，
什麼抹手紙筒、掛手巾公仔掛勾、卡通公仔相架、潮流計時器....
以至那些好似好有用嘅手腳按摩器等等，
買買埋埋一屋都係，
結果用過一兩次就放係度封塵，
跟手間屋就會變成"垃圾收集站"，
過一排又要花時間去執去掉，
其實網購好似吸煙一樣，
心癮大於實際需要，
過於沈迷仲會出事添，
無必要日日上"淘X"吖，
不如同我一齊"戒煙"咁戒咗佢啦，
好無?
哈哈哈!!

讓太陽吃點甜!

這幾個星期香港的天氣有點像英國的,
天陰多雲又毛毛雨，
日照時間又短，
四週都是黑漆漆的，
看不清你我他。
而且冷風陣陣，
人們的躲在厚厚的大衣裏，
樣子不清，
没有朝氣，
一片世紀末的感覺。

不知太陽何時才出現，
天好像很傷心的樣子，
整天總是在灑淚，
人們說吃了甜的會開心一點，
不知讓太陽伯伯吃點朱古力可有幫助，
能讓他開懷一些，
快快出來和大家見見面，
我們實在太需要他!

老和尚與少女!

老和尚帶着小和尚正要涉水過河，
忽然背後傳來一把鶯鶯的少女叫聲:
「我三吋金蓮不便涉水，老和尚可否背我過河啊?」，
老和尚欣然答應，
過河其間，
少女豐滿的胸脯緊緊貼着老和尚背部，
看得小和尚喉乾耳熱，
心亂如麻。
少女過河後說聲謝謝便走了，
小和尚這時才靜靜的問老和尚說:
「出家人理應戒色，為可師夫你會和少女有肌膚之親呢?」，
老和尚笑了一笑便道:
「剛才過了河我已經把少女放下了，難道你到如今還没有放下嗎?」。

聲色犬馬故然可以亂人心智，
但真正的誘惑卻是來自自己的心裏，
只要能真正從心放下，
視色相、喜惡如無物，
方能逹至無慾無我的境界，
不過我們都是凡人，
能做到平凡自在就很好了。

我愛吃生果!

$60多元一個奧陸蘋果、$289個 T字蜜瓜、$458包什麼青提......
還有菲濟木瓜、以色列無花果、敍利亞蜜棗等等少有的靚貨，
全部是極上的貨色，
美味、甘香、可口、多汁、有益、好看，
望之讓人心猿意馬，
嗅之令人垂涎欲滴，
還有幾廿蚊(唔係廿幾蚊喎)樽的青森蘋果汁，
這是人間樂土嗎?
什麼好美味的生果都讓我"看到"了，
但只是"看"没有買，
靚貨"靚價"，
我捨不得買，
也"買不起"，
心情很矛盾。

這個世界没公平的，
"公平"不代表人人有相同的待遇，
有人天天吃十元一粒的青提，
有人三餐不繼，
有些人含住金鎖匙出世，
有些人靠自己努力賺錢至富，
有些人勤力做工也只得温飽，
没有話公不公平，
各有前因莫羨人，
況且幸福、快樂不應該用物質來衡量，
有錢人不一定快樂的，
鹹魚清菜也很好味，
不過鹹魚也很貴，
窮人吃不起了。

若然我中了六合彩頭獎，
我會買那些又貴又美味的生果來吃嗎?
應該會的，
我也有虛榮心，
我也想嘗一嘗人間美食，
吃的、用的、穿的都會是最貴最好的嗎?
或許不會了，
為何呢?
有時看着這些極昂貴但品質很好的美食時，
我心裏會想......
有需要吃到咁"尖嘴"嗎?
有能力時，
買好一點點的不就可以嗎?
不忍吃一餐生果等如一戶人家幾天的飯菜錢，
實在有點"折墮"，
不是說有錢花是錯，
但總是過意不去，
人也不外是一副臭皮囊，
用的吃的有需要去到咁"盡"嗎?
活到"一把年紀"，
總想對自己好一點，
偶一為之讓自己開心一下，
可以理解，
但有些人卻以此為人生目標，
這樣是否有點扭曲呢?

猜謎人生。。。

台灣女作家三毛(陳平)四十多年來(1988年)第一次重返故土~浙江，
其間受到各方親友熱情款待，
飯局連連，
當中一次是以素菜為主，
佳餚滿滿鋪滿了一席，
三毛一看，
見全是外表像真度極高的雞鴨鵝豬牛羊，
她隨意吃了一口便說:
「有時候真是想不到，
做素菜，完全沒有鵝，
可以做出鵝的形狀和味道來。
吃菜完全可以看出中國的民族性，
太複雜了。」

心裏想的，口中說的，手在做的。。。。。。
可以完全不同的，
想要又不想說，
不說又想人家猜到，
但又怕人家知道太多，
溝通如猜謎，
還要知道當不知道，
奉迎，推敲，猜疑。。。。。
一切都在雲霧間進行！

你快樂嗎?

唔知係大咗比較怕熱還是什麼，
這幾年嘅夏天真係熱得好厲害，
晨早七、八點出門口就感覺到個太陽好惡毒，
曬到成個身都滾哂，
再行一陣就流到成身汗，
有時流到成面汗水一滴滴咁滴落黎，
有啲專家話地球暖化咗，
要我哋環保啲少開冷氣，
道理係啱嘅，
不過有時真係熱得太交關，
唔好講日頭，
就算晚上啲温度都好高，
開着風扇吹都係咁滴汗，
完全呼吸唔到咁，
而且香港濕度高，
又濕又焗又熱真係好辛苦，
真係好難頂呀!

以前住郊外都好啲，
一來四周附近無乜屋，
空曠兼空氣清涼好多，
夜晚如果真係好熱嘅，
最多攞張蓆出屋外瞓，
有少少晚風吹吓都舒服好多，
但係依家住九龍市區都無可能咁做，
困住係間屋入便，
四周都俾啲高樓大廈包圍住，
唔單止無風，
就算有都係啲汽車廢氣，
再唔係就係從四方八面吹過黎嘅冷氣機熱氣，
簡直尤如蒸爐一樣，
你話講環保唔開冷氣，
就要受忍上下左右冷氣機吹入黎嘅熱氣了，
嗰種辛苦法真係非筆墨可以形容，
任你點愛錫地球都忍唔住要開冷氣呀!

細個住新界時好恨搬出九龍，
想做城市人唔做鄉下仔，
但係大咗就好想搬返新界，
尤其係鄉村嘅地方，
一來地方闊落啲唔似白鴿籠，
二來空氣好好多無咁焗熱，
不過香港愈來愈擠迫，
依家嘅所謂鄉村都愈來愈少了，
新建嘅"衛星城市"人口密度又高，
處處都是屏風樓，
空氣流通極差，
夏天一樣熱如火爐，
政府時常把城市計劃掛係口邊，
但係啲高官嘅所謂計劃只不過是"起起起...."，
根本唔會理會啲樓會唔會太密，
人口生活空間是否足夠，
只係關心可以起幾多個大型商場，
啲地可以賣到幾多錢，
所以市民嘅居住質數就愈來愈差，
就算有錢買樓嘅都係豆腐膶咁細，
仲要係樓貼樓兼實用面積偏低，
啲所謂環保露台、窗台等等，
就更加係地產商利用政府嘅無知來魚利的，
住係香港真係幾慘，
空氣質數差，
居住環境差，
樓價又貴到不合理，
而且生活壓力又大，
很多人都生活得很吃力很不開心，
這個就是我們政府口中嘅"國際大都市"了。

有時我唔想香港發展得咁快，
相對番從前，
香港人雖然係窮一點，
但開心的總比現在的多，
人與人之間嘅隔膜亦少很多，
左鄰右里亙相幫忙，
但係現在的香港人人情涼薄，
多數生活得唔快樂，
如果人生活得唔快樂，
我們現在的所謂"發展"究竟又有什麼意思呢!?

大騎樓幻想!

老實講，
我真正幾喜歡可以有個共進早餐嘅露台，
不過係香港都幾難，
依家啲樓咁貴，
唔好講咁大個露台，
室內都好似豆腐膶咁細，
實用面積又少，
要有咁大個露台簡直係奢想，
就算有都俾人封哂做多間房，
我住嗰條街好多人都係咁，
啲人話知佢啱唔啱建築條例，
政府管到黎先算，
人多屋細唔夠用喎，
不過個露台根本唔夠力支撐成間房，
如果崩坍就死得人多嘞，
香港人都幾慘，
花一生積蓋都未必住到間合意嘅樓，
仲要揾命搏。

有時睇旅遊節目見到啲歐洲小town幾鬼正，
人又少，景又靚，
湖光山色空氣好，
間房又有前後花園，
一望無際永無遮擋，
夜晚又可以睇吓星星、月亮，
又唔洗被隔離屋啲打仔聲、鬧交聲嘈住哂，
而且屋價又唔係貴，
有時百幾萬就買到間好正嘞，
係香港?
買間厨房就差唔多，
想有前後花園、有景無遮擋?
得! 俾幾千萬以至成億住半山囉，
住新界丁屋都可能近磅啲，
不過要同人share二、三樓，
遇着個一家大細兼自私嘅，
一樣嘈到飛起，
仲要分分俾啲村狗追你九條街，
再唔係就踩到週腳狗屎，
安寧和自在邊有你份吖。

外國啲居住環境普遍比香港好，
唔怪得咁多人退休後移民去加美、瑞士等地，
空氣好啲、嘈音少啲，
病都少啲、人都長命啲，
不過大前題係有無錢先，
無錢就唔洗諗嘞，
留返係度繼續捱世界啦，老友，
夢醒!

焗豬扒飯的背後!

"大家鑊"的焗豬扒飯昨、今、明三天大特價，
午市只售$18元，
十二時開售，
售完即止，
聽過噚日有好多人排隊，
搞到我今日心思思都想去排埋一份，
你話我係咪好鬼衰吖?

有人話"大家鑊"嘅焗豬扒飯有四十年歷史喎，
我好懷疑呀，
乜間嘢1972就開咗哩咩?
仲要一開始都有焗豬扒飯賣喎，
都唔知真定假。
話時話，
我唔係好喜歡食佢哋嘅豬扒飯，
尤其是面頭一pat番茄醬嘅焗飯就更加唔like，
咁你又話去排隊買?
我都唔知呀，
羊群心態啩?
見到有著數唔去排隊又唔舒服囉。
你都唔鍾意食，
排到又點喎?
係麻麻哋鍾意食，
但又唔係討厭喎，
$18咁平好難揾架，
好嘅一餐唔好嘅又一餐，
可以嘅話我外賣多份做晚餐添呀!
乜嘢"好嘅一餐唔好嘅又一餐"呀?
好多人當佢係寶黎架，
你真係孤寒兼口衰呀，
專諗埋啲縮數。
我都唔想架，
依家乜都加，
啲人一見個市好丁丁咁多就係咁加，
柴米油鹽車船租金乜屎都加，
又話經濟好返啲，
我就唔多覺嘞，
淨係覺乜都加，
啲錢愈來愈唔見洗，
唔慳啲點夠洗喎，
我夠想吃得好住得好囉，
要有錢先得嫁!
咁又係，
我都知依家做小市民好慘，
開資愈來愈大，
收入雞碎咁多，
見到乜嘢平就要入定啲貨，
唉~~
羊群心態又好，
貪小便宜又好，
都係因為無安全感啫，
鬼叫我哋個政府無用咩，
無計劃無能力無x用之極，
做小市民嘅唯有左慳啲右慳啲囉，
人人有本難諗的經呀!

井底之蛙!

三歲定八十，
我想讓小孩子從小養成閱讀習慣是很有益的，
閱讀不一定是為了學業分數，
因為讓孩子們擴濶眼光同時，
也給他們知道世上不同人有不同思想，
避免過份主觀和自以為是的性格。
不少人就是有着這個毛病，
總是以為自己的想法是絶對正確，
看過一丁點名人的理論就引經據典，
微末技量還自以為專家，
對人家的意見視而不見，
排除異己，
滔滔不絕大造文章，
固執偏頗而不自知，
這等人簡直是井底之蛙，
可笑! 可笑!

天殘腳~

門口的腳:
「點解唔行入啲?」
「點解要行入啲?」
「你唔行入啲，人哋點行入啲?」
「點解人哋要行入啲?」
「因為門口啲人想人哋行入啲。」
「點解門口啲人想人哋行入啲?」
「你唔行入啲，門口啲人雙腳點伸返入車呢?」
「門口啲腳入唔入到車關我乜事?」
「無乜事，請繼續企係車中間啦!」

座位上的腳:
「點解你要放對腳上對面位?」
「我喜歡!」
「點解你喜歡?」
「因為舒服。」
「我見你依家坐緊哩個位頭先都有人放過對腳上去。」
「有無搞X錯呀?啲人咁X自私架!」
無語......

座位傍的腳:
「哎吔~~你做乜踩我隻腳?」
「唔好意思，SORRY!」
「你都無答我問題!」
「什麼問題?」
「我問你點解踩我隻腳呀?」
「因為你隻腳放咗出行人道中間囉。」
「咁你就可以踩我隻腳架?」
「我不是有心的，車裏太擠，我看不到你隻腳。」
「你盲架?咁大隻腳放係路中間都睇唔到!」
吹脹......

自作孽!

人衰行路打倒退，
不過有些事是人自己攞黎嘅，
唔抵可憐。
早前友人失業年多，
結果蘿友痕返內地搞大咗人個肚，
無錢又谷住要結婚，
仲要伸請個未來老婆落黎香港住，
可惜佢老兄一家父母親朋住係間幾百呎嘅公屋，
豆腐膶咁細仲要逼多個老婆和bb，
真係屋漏更兼逄夜雨。

幾經辛苦揾到份工，
但係又遇到個賤老闆，
拖糧拖到唔要面，
返兩個月才出半個月，
成間公司個個都被佢老闆拖住，
連買料做貨錢都無，
仲要我個老友"where"爛塊面叫啲供應商捨住先，
老友唔係唔想叫，
不過差不多通行都知佢公司拖數拖都無得俾，
你叫人點揾到供應商肯捨數呢?
點知佢老細仲惡人先告狀，
話我個老友唔做嘢，
咁都揾唔到供應商捨數喎，
你話係咪賤到無人有吖!

一波未平一波又起，
友人老婆又因為唔習慣香港嘅生活，
加上老爺奶奶指指點點，
終於生咗個女一年就頂唔順，
返咗上大陸跟佬走，
老友唔憤氣走去揾佢，
本來想話有事慢慢商量，
但佢老婆就無影無踪，
要通過佢老婆家姐先至用電話聯絡到，
點知佢老婆又話乜又話七，
仲要話依家條仔係佢個舊男友，
有錢有米又有餐廳，
又話自己已經有咗個奸夫嘅骨肉，
(走咗唔夠一個月)
我老友聽完眼火都爆埋，
不過都無辦法，
唔通殺咗佢咩?
佢仲鬼咁關心同佢老婆噓寒問暖，
唔知仲以為個肚係佢自己架，
愛心爆棚，
不過爆錯哂位!

好啦，
諗住疊埋心水返黎搞離婚，
點知佢老婆忽然又話個奸夫唔認數喎，
要落咗個仔，
我老友竟然白痴貼錢佢去落仔，
真係俾佢吹到脹哂。
落完仲要俾人哋個奸夫打電話黎吋，
話我老友無本事任人拖佢老婆走，
老友除咗好慶外就繼續俾個女人呃，
自己無錢仲死咗幾萬蚊俾個女人救急，
當初又話個奸夫幾有米，
個女人又話自己生活好好、好富貴，
點解咁都要問佢攞錢呢?
我真係唔明白係我老友白痴定係佢哋夠奸嘞，
攞明係"昆"你架啦，
我哋幾個老友事前都叫佢咪理佢，
但係佢又唔聽，
結果人又無、錢又無，
仲要俾個奸夫侮辱，
你話佢幾笨七吖。

我哋問佢係咪仲好愛嗰個女人，
老友話少少啦，
不過條氣唔多順多啲，
叫佢咪再理鬼佢，
話知佢死啦，
點知佢個衰老婆早前又同佢講又有咗喎，
老友仲千辛萬苦多番同佢姨仔去証實喎，
我哋聽到真係把幾火，
好狠咁丙到佢上天棚，
叫佢咪再咁"昂居"，
係真係假都好啦，
咪再俾佢"昆"嘞，
話知佢有咗18個月都好啦，
快手搞分居手續啦，
點知我老友話搞分居要攞佢大陸地址喎，
佢竟然話完全唔知佢住邊，
又話佢老婆唔肯俾依家嘅地址佢，
咁即係點?
又跟佬走又同奸夫有咗，
口就話要離開我老友，
但係又死都都唔合作，
想點?
大家心照，
只係我老友點極都唔明啫。

有啲人平時好醒好聰明，
但係一去到感情事就一塌糊塗，
IQ變得完全零蛋，
無論傍人點勸點告誡都聽唔明，
口就話:"我明!我明!我唔會再被佢呃!"，
結果轉個頭又係俾人"昆"多次，
我哋真係無眼睇，
勸又勸過，
小又小過，
幫又幫過，
佢份工已經出得一半糧架啦，
叫佢專心諗自己嘅將來，
佢唔食個女都要食嘛，
至於佢個所謂老婆就要黎都無謂，
快快諗計一刀兩斷好過，
(你話我叫人分妻唔啱我都係咁講嘞)
留返啲氣力為自己前途着想，
否則過幾年又係咁，
到時乞食鬼理你呀!

惶恐不可終日!

人都怕死，
天災又好，
人禍又好，
只要有些風吹草動就會惶恐不安，
吃不下，
坐不安，
擔心這樣，
擔心那樣，
想做未雨綢繆，
(今朝聽聞有人搶購鹽、醬油...)
有時事情還没有看清楚就杯弓蛇影，
幻想事情背後一定有大陰謀，
而且必定比想像中更差更壞，
東猜西疑，
胡思亂想，
自己嚇自己，
災禍未至就自己嚇親自己，
腦裏的細胞死了一大半，
這樣生活，
生不如死。
長命百歲又如何?
活受罪!

人生尤如浮光掠過水面，
轉瞬間熣燦就化入無痕，
要活得精彩絶倫有意思，
不要拘謹惶恐不可終日。
先把事情搞清楚一點吧，
不要人云亦云胡亂驚叫。

問與答!

某人問:「你在找什麼?」
自我答:「在找自己。」
某人問:「找到没有?」
自我答:「在鏡子中。」
某人說:「那不是你。」
自我問:「那是什麼?」
某人答:「那是你想像中的你!」
自我問:「怎會這樣?」
某人答:「因為鏡中的你是你編造的。」
自我說:「我没有。」
某人說:「你不自知而已!」
自我問:「真我在那裏?」
某人說:「一直跟貼在你背後。」
自我問:「那轉身不就找到嗎?」
某人答:「不能。」
自我問:「那麼近，怎會不能?」
某人答:「你轉身，他也會跟着轉，貼得很。」
自我問:「那可以怎辦?」
某人答:「用人家的鏡子找。」
自我問:「什麼意思?」
某人答:「只有從人家的鏡子看才夠真實。」
自我說:「那很簡單，我問人就是。」
某人說:「你要有心理準備!」
自我問:「為何這樣說?」
某人答:「真我的樣子不漂亮的。」
自我問:「怎會，我不是很好嗎?」
某人答:「自己的鏡子中看不到醜的一面的。」
自我說:「没可能，我怎會醜!」
某人說:「你現在不是已經站在我的鏡子前嗎?」
自我說:「神經病，那個怎會是我。」
某人說:「我不是說過自我不一定漂亮嗎!」
自我問:「你究竟是誰?」
......「我就是你自己!」
自我說:「發神經，有病就快點看醫生吧!」

靜思!

對周邊所發生着的事情已經變得有點麻木了，
那些煩擾、嘈雜、悲天憫人、自以為是、自私自利...
還有政治、經濟、民生、民族...
很多很多大師、理論家、預言家等等都不停發表"偉論"，
世人卻視之如瑰寶，
細意針著、硏讀、討論、追隨，
這令人由煩悶變討厭，
再漸漸變得毫無感覺。
感覺不會是一瞬間完全消失，
但對於不能改變或不同的見解，
又可以做些什麼呢?
予其激動的爭論那些無關痛癢的字眼，
倒不如靜靜閉上雙眼靜思，
或許在世界的某一角，
還能找到一片讓人休憩的靜土。

懼高!

咁高?
你敢唔敢做哩份工?
我唔敢，
因為我懼高，
點解懼高?
我都答唔到你，
總之一行到啲好高又無欄桿嘅地方我就腳仔軟，
可能係天生，
無得改變。

人好多嘢都係天生，
部份性格都可能係咁，
唔好試圖去改變一個人或一群人嘅思想，
因為結果只會是弄巧成拙，
浪費時間，
而且有誰可以話自己嘅睇法一定啱嘅呢?
由佢哋啦，
留返啖氣暖肚吧!

謙謙君子?

"Nothing is more deceitful than the appearance of humility. It is often only carelessness of opinion, and sometimes an indirect boast."
— Jane Austen

中華民族是一個謙卑的民族，
從前男人慣常稱呼自己妻子為"賤內"，
又喜歡叫自己的兒子為"犬兒"，
又"賤"又"狗"，
不知狗隻知道後，
會感到光榮還是沮喪呢?

「陳太，你哋明仔就叻啦，考到入男拔，我哋輝仔就唔得囉!」
「李太，你謙啫，你哋輝仔都去英國留學啦，聽講啲學費都幾乸利喎?」
「邊係呢!馬馬虎虎啦，不過好彩考到個獎學金咁囉!」
「獎學金咁叻仔呀? 所以話你哋輝仔叻仔囉，我哋明仔無鬼用架，年年都係考三名之內，都未試過攞到獎學金。」
「你哋明仔叻啲!」
「你哋輝仔叻好多!」
「哎吔! 我哋唔好讚黎讚去嘞，幾時得閒打番場麻雀仔呀?」
「幾時都得啦，揾日吖!」
「好~ 攞日吖!」

「老李，聽講你早排扑中幾隻紅籌國企，賺到盤滿砵滿噃?」
「老陳，邊度有你咁猛料，你上個星期放咗嗰幾間豪宅，打跛腳長嘆啦!」
「你講笑咩，我轉手都係賺幾個巴仙咁多大把，有得幾多落袋吖。」
「你講笑就真，嗰幾個股票我揸咗好耐架嘞，好彩俾我等到佢翻兩翻喳。」
「嗱~ 講真嘞，幾時帶協吓我先? 射住細佬我好噃。」
「你咪玩我啦，你哋啲大佬睇住我哋啲做細就真!」
「咁好啦! 我都要去捱世界嘞，得間出黎飲茶吖?」
「梗係要啦，跟你學吓嘢嘛。」
「你又黎嘞，揾日啦!」

從上述兩個情況可見我們中華民族的確是"謙卑"的表表者，
簡直由內至外，
再由外至內，
由心到口，
再由口到心，
裏裏外外都充滿無限"謙卑和順"，
不過話雖如此，
我們之所以能夠謙卑有禮，
都是有懶祖先古人的教導和指引，
所以今天才能在修養上有絲毫吋進，
而且我們要時常提醒自己還有很多地方仍需改進，
希望有朝一日能夠在這方面勉強略有所成吧!

年尾不回顧

年尾很多blog文的標題都會是"回顧"、"展望"之類的東東，
就好像小學的"我的志願"，
年年唔寫就唔自然咁，
年年埋單計數係好習慣來的，
不過看來看去都是差不多的內容，
真係無乜新意。

「唓~ 人家自己回顧吓唔得咩? 關你乜事?」
「係~ 我又無話唔好，不過呻兩句啫!」
「你唔鍾意咪唔睇囉，係度呱呱嘈做乜?」
「人有人寫，我有我呻啫。」
「你呻乜鬼? 指指點點實得罪哂人呀!」
「我無惡意架! 我都係講吓自己心聲喳!」
「你唔抵得咪自己寫埋一份囉，無人唔俾你寫架!」
「我唔寫! 我唔寫! 小學仲寫唔夠呀? 我點都唔寫!」
「你咪無寫囉， 你寫人家都未必想睇呀? 儍瓜!」

朽木不可雕!

蟲蛀多在內裏開始，
初時不會看到問題，
當從外觀察覺到時，
情況必定已很糟糕。