婆媳糾紛

時間:星期日早上
地點:街坊粥店
人物:兩個年近六十的老婦

老婦甲:『唉~~~~』
老婦乙:『有物嘢事呀?』
老婦甲:『唉~~我就來頂唔順我奶奶啦!』
老婦乙:『佢又鬧你呀?』
老婦甲:『個女要離婚,佢話我唔識敎女喎,唔應該俾個女離婚喎!』
老婦乙:『你個女都成三十幾歲人,都唔到你話事啦!』
老婦甲:『咪係,你估我叫佢離婚咩,但係我奶奶就不停咁由朝鬧到晚呀!』
老婦乙:『咁你咪唔好理佢,自己做自己嘢囉!』
老婦甲:『點得呀,佢要我坐定定俾佢鬧呀,一行開就一個碗"車"過來添呀!』
老婦乙:『咁都得,你話俾你老公聽囉!』
老婦甲:『唔好提個死佬啦,你估佢點話我呀????』
老婦乙:『點呀?』
老婦甲:『佢成六十幾歲人淨係識聽佢老母話,佢叫我坐定定俾佢老母鬧,就算被佢一個碗"車"埋來都唔好避喎,咁佢老母就會消左啖氣喎,你話死唔死吖!』
老婦乙:『咁都得,有無搞錯呀,你奶奶都唔後生,唯有忍多佢幾年啦!』
老婦甲:『佢個老嘢都成九十幾啦,但係鬼打都無咁精神呀,我死佢都未死呀!』
老婦乙:『咁無計啦,唔通咁老重玩離婚咩!』
老婦甲:『唉~~~~唯有希望個老嘢長命百歲啦！』