老媽語錄: 前半生點滴

圖片:蘋果日報

五月六日是一九六七年暴動四十週年,
新鮮媽說了以下的一段:

新鮮媽:『六七年前些都有些暴動,我親眼係樓上見差佬向啲人開鎗!』
新鮮媽:『碎!碎!碎!啲差佬亂鎗掃射,成排人訓哂係地下!』
新鮮媽:『嗰時嚇到我即刻走返入房,個幾鐘後出騎樓"裝"吓,物嘢都被人搬走哂!我而家都記得好清楚!』

新鮮媽:『我以前住係佐敦道,裕華側邊,嗰時裕華都未起!』
新鮮媽:『積係而家嘉賓大廈舊時,我住時得四層,我住頂樓』
新鮮媽:『係樓上望落街好清楚!』

新鮮媽:『嗰時成條彌敦道都係大樹,唔係得尖沙咀一節,好少車,空氣幾好!』
新鮮媽:『我哋四個女工夾份租房住,上到去先識架!』
新鮮媽:『有個同房包伙食,五毫子一餐,咁佢自己就賺返餐晚飯錢囉!』
新鮮媽:『而家無哂聯絡囉,有個好似去咗英國,其餘啲可能死咗都唔定!』

新鮮媽:『嗰時我哋幾個係新蒲崗紗廠打工,朝朝早行路返工.』
新鮮媽:『好耐都無架巴士架,行路慳返啲嘛!』
新鮮媽:『打完仗十幾年,嗰時一路行過去都係爛地!』
新鮮媽:『一碗白粥,一條油炸鬼,一路行一路食早餐.』
新鮮媽:『我係紗廠做打紗,我負責十二個紗碌,啲紗有時唔靚,整到手出血呀!』
新鮮媽:『嗰時好黑暗,要有人事介紹先有機會入到去做織紗!』

對於別人,以上可能無關痛癢,
但對於我是一頁又一頁的歷史,
我要在她有生之年把這些都一一都記下!