重唔食死你?!

哩個題目我想講好耐，
遲啲可能又會爆大鑊架喇，
就係成日係街市都見到有啲臨時攤檔賣啲古零精怪嘅藥材，
真係完全無人去監官嗰喎！

佢哋賣啲嘢千奇百怪，
好似雞泡魚,蛤蟆,有鬚日月魚，帶子邊,珍珠蚌,杜仲片,石斛粒,紫蘇藤......
就連什麼冬蟲夏草根都有,
真係包羅萬有,
你見過有,你聞所未聞都有,
而且差不多全部都係食落肚架,
佢哋個個檔口都會有煲畀人客試飲,
啲師奶阿姑見到唔洗錢就個個搶住飲,
物都唔清楚係咁倒落肚,
個個心口好似有個勇字咁,
無話哩啲藥材是真是假吖,
就算係真嘅都唔係人人啱啦,
咁樣搞法真係揾命摶,
遲早有人出事!

最抵死係嗰啲操國語口音嘅售貨員,
個個都講到佢啲藥材能醫百病,
什麼糖尿病,高血壓,風濕關節炎,止咳化痰,通經絡......
甚至陽痿,陰虛,癌症等等全部藥到病除,
就算唔能夠根治都話可以減輕病痛,
好似重利害過天山雪蓮同千年人蔘,
係啦,我真係見過佢哋賣所謂天山雪蓮架,
信唔信就由你,勁哩!

話時話,
佢哋通常擺四五日就走人,
啲客食咗有物事就關人X事,
到時人去留空揾鬼捉咩,
難得啲師奶阿姑又會信,
成斤成斤咁幫佢哋買,
食食埋埋死咗都唔知物嘢事呀,
就算淨係痾鑊金都唔抵啦.
政府再唔監管吓總有日會出事,
睇黎哩個政府都係後知後覺架喇,
唔知今次又有幾多人舔嘢囉!