十個小朋友十個喜歡食雪糕雪條,
可是十個大人十一個唔畀小朋友食,
又話咳又話食生冷嘢無益,
總之一年都唔會畀你食一次啦,
所以有時只好返學時偷偷哋買黎食,
但零用錢有限,
一年都喺只可以偷食幾次,
重要食完唔好咳喎,
唔喺被人發現就打餐飽!
偷食都要醒目啲,
千奇唔好臨放學食,
最好就係第一個小息時食,
點解?
因為嗰時流行食橙汁雪條囉,
食完成條脷都變橙色就穿崩啦,
食完飲多幾啖水食個包,
到放學就神不知鬼不覺啦!
但喺次次咁鬼鼠都幾無癮,
最重要喺零用錢不多,
根本唔可以成日買黎食,
所以細細個就諗如果屋企喺開雪糕店就好囉,
咁多雪條雪糕任你選,
而且咁多貨攞幾枝都唔會有人知啦,
最緊要喺可以食到平時無錢買啲貴價貨呀,
好似鳯仙呀,旺寶脆皮呀,
細個諗起就流哂口水,
而且又可以喺班同學面前威吓喎,
話畀人知自己屋企開雪糕店喎,
幾威呀,身份都唔同啲呀, (細細個就沽名釣譽喎)
而且又可以利用啲雪糕引誘啲同學借功課畀我抄喎,
你話係咪一舉兩得呢? (三歲成八十, 哩個人都幾奸喎)
哈哈哈~~~
不過,以上當然喺白日夢啦,
屋企從來都無開過雪糕店,
但喺我喺有抄人功課嘅!
11 則留言:
舊時.......
家中常備有鳳仙和旺寶
天氣大熱有時都會食下
反而我不嗜甜是我少吃
雪糕雪條的主要原因！
space,
所謂控制力愈大,
反抗力就愈大,
愈唔畀我食就愈想食啊!
你就有啦,
屋企有咁多雪條,
我細個諗都唔洗諗呀! :(
你講開芒果又講唉
鳳仙有芒果冰在頂
我愛吃芒果冰所以
選擇吃芒果雪糕條
吃完了芒果冰之後
因為我並不嗜甜味
咬多兩三口就算了
其餘分給我家養的
貓貓和狗狗它們吃
哈哈想起來真浪費
不過貓貓狗狗真系
好好好鐘意食雪糕
見我食就會走埋來
要分享我手中雪糕
弊弊....
講到呢處發覺有弊
哎唷唔好意思哎唷
我只是照回憶來說
no no offence 架我
如有得罪多多包函！！！
space,
offence?
有咩?
唔覺喎!
ps:唔見鳯仙脆皮上面有芒果冰喎!!!
我舊時吃鳳仙是有芒果冰在裡面的，
是在頂頂內面，要咬去黃色外殼，
就見有一塊芒果色和芒果味的冰，
之後才是白色的雪糕。
外層脆皮是香蕉味的，
裡面頂頂是芒果冰，
對下的才是溫尼拿雪糕。
space,
我真喺唔多覺喎,
可能我唔喺時常食,
又唔鐘意嗰陣香蕉味脆皮卦,
記憶入面無這樣的資料啊!
(老人痴呆症發作)
我用鳳仙在網上查過在人家的網誌都有相同的形容相信大家都沒有記錯。
新鮮兄 可能近幾年冇食鳳仙又或者他們偷工減料？
space,
應該喺老人痴呆症作啦,
所以唔記囉!
嘻嘻~~~~ :p
我又唔系向你借錢
又唔系向你追債呀
唔使咁快老人慈愛
老人癡呆！
Space,
原來你用哩招對付啲問你惜錢嘅人架?
哈哈哈~~~ :p
發佈留言