覆水難收

姜子牙有個衰老婆,
姜子牙係邊個?
佢咪係二千幾年前幫周文王,武王伐紂,
積係封神榜入面嗰個姜太公囉!

話說佢年青時好潦倒,
雖然好有學問,學富五車,
但都揾唔到錢又無人請佢打工,
連佢老婆都睇死佢無發逹走咗佬,
點知後來佢得到周文王賞識,
封侯拜相有名有利,
佢個衰老婆見到有著數又走返轉頭,
懶温柔咁話要重修舊好喎,
姜子牙梗係唔多願要啦,
個衰女人又老又皺揾鬼要咩,
但係又唔意思一口拒絶佢喎,
於是就諗咗條橋出黎整蠱佢!

姜:『拿, 哩度有盆水,我潑佢出門口,你收得返黎我就要返你啦!』
姜子牙話都未講完就將盆水一潑落地,
佢個貪錢老婆就撲都撲唔切咁想收埋盆水,
結果係點?
咪收到一身一面都係泥水囉,
潑出咗嘅水點可以話收就收,
做人唔千奇好學姜子牙個老婆呀,
講咗出去嘅話就如潑咗出去嘅水,
收唔返架,知無??

註:
經反複查正,
"覆水難收"此成語實出於漢朝朱買臣馬前潑水的故事,
只因姜子牙亦有類似故事才會借來諷刺當今人物而已,
在此十分多謝SPACE兄和小豬的指正!