我對施政報無意見!!

本來諗住睇完今年嘅施政報告,
一定會有好多嘢我鬧啦,
(新鮮仔:佢又開始發神經啦)
唉~ 點知睇完報紙物都唔想鬧,
唔鬧唔係話佢做得好,
只是份報告了無新意,
換句話即係"咪又係咁"!!

嗰份報告,
你話佢差咩又唔係好差,
你話佢好咩又仲有好多問題抓不着癢處,
減你1%薪俸稅好過無但又無物作用,
免你第四季差餉但又未必人人有樓,
七十歲以上每年有 $250醫療津貼嘅就睇你有無咁長命啦,
不過唔好病咁多呀,
得二百五喳,
用完就要再輪街症喇!
十二年免費教育就好嘅,
尤其啲生埋十個八個啲家庭,
仲有批出三塊用地做國際學校,
我都唔明有物作用喎,
除非你諗住送啲仔女去讀啲貴到死嘅"貴族學校"囉!

扶貧方面,
若工資保障運動效果未如理想,
最低工資立法話考慮吓,
又係得把口!
放寬綜援計劃豁免計算入息安排,
哩點我又唔係好明,
點樣唔計入息又發放綜緩呢???

環保方面,
減低發展密度,減少屏風效應,
我想應該是重新考慮怎樣為"發展"才對,
唔係起樓,起地標,起"大大件"就叫發展架!
立法停車熄匙都好,
講咗咁耐早就要立啦!
另外政府牽頭推行減排運動,
咁又要睇吓你點帶頭了,
其實講來講去都係得哩幾招,
根本起唔到多大的作用,
最大嘅污染源頭係內地呀,
多啲同內地官員溝通吓重好啦,
不過多數都無用架喇,
人地要開發要賺錢,
你講人地就要聽咩!

唉~~~~
唔想講喇,
鬧咗咁多年都唔想再鬧啦,
無心情再鬧喇,
對曾生要求咁多都無用,
蕭規曹隨,
佢叻極都係做個曹參,
都唔會有什麼創見架啦,
咁講都唔知會唔會貶低曹參添,
真係唔好意思!

仲有普選喎,
佢都無物點提,
你明嫁啦!