不孝子的信!

明天係母親節,
就襯吓熱鬧講吓母親啦!

小時候,新鮮媽好惡架,
佢真係「有乜依郁, 揸住碌竹」,
我哋幾個又頑皮喎,
讀書又懶又唔做功課,
考試又成日唔合格,
平時就通山走唔黐家,
週不時激到新鮮媽出手打鑊金嘅!

記得有一次天未光就畀新鮮媽拖起身,
都未知發生乜嘢事就畀人"fit"咗兩嘢籐條,
大肶即刻有兩條血痕,痛到我成個醒哂呀!
跟住新鮮媽就攞咗我收埋係櫃桶底嗰兩本默書簿出黎,
『你以為收係櫃桶底我就唔知架嘞?』
.....
『同我跪係度,揸住自己對耳仔!』
跟住隨手又抽多我幾嘢籐條,
我用手擋住都無用,
新鮮媽見我擋仲抽多兩鞭,
快馬加鞭係咁抽多十幾嘢,
我痛咪想起身走人囉,
就畀新鮮媽喝住:
『你走吖,走就打多幾下!』
無計可施下唯有"忍辱負重"囉,
希望佢打多幾嘢就收手啦,
嗰時啲眼淚就"be be"聲咁標哂出黎,
喊到收唔到聲咁,
『成日爤街唔温書吖嘞!』抽一嘢,
『哎呀!』
『收埋就以為無事架?』又抽一嘢,
『哎呀! 嗚嗚~~~』
『喊吖嗱!喊吖嗱!』跟住鞭如雨下,
『哎呀!哎呀!唔好打呀!我以後唔敢嘞!嗚嗚~~~』
就係咁打打鬧鬧十幾分鐘後,
一切漸漸轉歸平靜,
一個打到無哂力,
一個就喊到無哂氣,
『以後仲敢唔敢?』
『嗚嗚~~~唔敢啦!』
『以後仲敢唔敢偷懶唔温書?』
『嗚嗚~~~唔敢啦!』
『以後仲敢唔敢收埋本默書簿?』
『嗚嗚~~~唔敢啦!』
『你同我跪到天光夠鐘返學為止!』
『嗚嗚~~~~』

其實類似嘅情況小時候成日發生,
畀新鮮媽打完就乖一排,
跟住過咗無幾耐又故態復萌,
打打鬧鬧打打鬧鬧就咁過咗個童年了,
而家諗返都覺得幾好笑,
不過新鮮媽就唔會再打我囉,
佢年紀老咗好多,
畀佢打都唔夠力了,
有時都幾希望佢身體好似以前咁"健壯",
不過無可能了,
歲月催人老,
可以嘅話畀新鮮媽"fit"多幾嘢又點話吖!

新鮮媽, 母親節快樂呀!
身體健康,長命百歲!