【光影留情】第二輯

第二輯【光影留情】又來了,
昨天講懷舊飲食文化,建築物,電視廣告等等,
例如臭豆腐,飛機欖,大排檔,白糖糕,爆炸糖,三粒糖...
仲有從前嘅麥當勞,大家樂,大快活賣嘅食物,
原來麥當勞係1975年係香港開業架,
嗰時一個漢堡包都係賣$1.8喳,
大家樂就仲早,1965開業,
當初都係賣快餐汽水漢堡包為主,
而家反而又唔覺大家樂有得賣喎!
另外,你又記唔記得以前係尖沙咀嗰間"伊勢丹"日本百貨呀?
我好耐好耐之前好似去過一次,
不過太細個唔記得好清楚囉,
你有無去過呢?

但係最經典要算播返從前賣電器嗰間"平霸"嘅電視廣告,
"買電視呀?平霸啦!買雪櫃呀?平霸啦! 買電器呀?平霸啦~~~』
相信年過30嘅朋友都可能會睇過,
雖然這套【光影留情】大部份都係剪輯舊片所成,
但係要從數以千萬計嘅舊片裏找到適合嘅片斷都唔易,
所以好佩服做資料搜集和剪輯那班工作人員,
如果你年過25又想懷舊吓嘅,
就唔好錯過啦!
又或者你係後生仔女但又想了解下從前,
這套【光影留情】亦都是不錯的選擇!

【光影留情】第二輯逢星期五晚上七點,無綫電視翡翠台,高清台同步播放.