熱到我飛起!

近排真係熱到飛起,
晨早八點幾個太陽就好似"殺人"咁,
企係街唔夠一分鐘就可以中暑,
以前咁早個太陽唔會咁勁,
真係唔知發生乜嘢事!

八十年代住係新界海邊,
夏天再熱都好,都有啲海風吹吓,
嗰時屋企都無話裝冷氣這回事,
其實都無錢裝啦,電費又貴喎,
(那時根本無電力拉到我家)
從前比較有錢嘅人先至會係屋企裝冷氣,
晚黑如果覺得熱到頂唔順嘅,
咪攞個枕頭出門口嘅長木椅瞓囉,
陣陣海風吹埋黎,正過開冷氣多多聲,
不過就要忍受啲惡蚊嘅攻擊,
唔點蚊香好易叮到成身都係,
真係有辣有唔辣架!

後來搬咗出九龍,
天氣好似愈來愈熱,
左右上下全部都裝哂冷氣,
夏天一到,夜晚黑一陣陣熱氣咁衝入屋,
但係新鮮媽依然唔想裝,
最多買把坐地扇吹吓,
因為佢話涼冷氣無益,
而且電費好"拿利"喎,
話唔洗佢出錢佢都唔制,
直至我搬走前佢都無裝冷氣!

早幾年,
新鮮媽終於頂唔順,
係我哋半推半拖下終於裝咗冷氣,
佢話真係愈來愈熱,
晚頭黑熱到週身汗無辨法瞓得着,
連佢咁唔怕熱嘅人都頂唔順,
你話香港係咪熱得好交關吖?
不過你開佢開個個開,
啲氣温只會愈來愈高,
但係唔開又真係無辨法瞓到,
我都係夜晚九點幾十點先至開冷氣,
一來慳電慳錢,
二來非不得意都唔想日間開冷氣,
三來總覺得有點罪惡感,
除非有客人來我家,
否則我情願冲個涼降吓温算了!