Si j'étais la princesse Fiona (如果我是 Fiona 公主)

這題目是由"師奶筆記"發起的一次性集文，
有興趣看看其它作品嘅可以到師奶筆記逛逛。


唏~~你哋咪見我身光頸靚唔洗做咁，
其實做公主唔係你哋想得咁爽架，
尤其是做一個中了魔咒嘅公主呀。
我日間係就係鬼火咁靚，
三圍係36-24-36噃，勁呢!
話咁易就瘋魔萬千年青英俊王子，
但係夜晚我就變到隻豬咁醜，
你睇吓我個豬胆鼻吖，
仲要係青咇咇嗰隻，
身材走樣變成46-48-48囉，
喔!諗起都想死呀!
你們諗吓吖，
如果邊位王子咁唔好彩娶咗我做老婆，
夜晚忽然想起身去厠所痾尿，
一張開眼見到隔離瞓咗隻又青又肥嘅怪物，
佢唔嚇到心胆俱裂即刻瓜老襯先至奇呀，
所以話呢，
我最煩惱係究竟點樣揀個嚇唔死嘅老公囉，
講到尾我都唔想咁後生就守寡嘛，
你哋話係唔係先?
乜話?你叫我去整容?
成個樣變哂形點整喎，
咪哂鬼氣啦，
不如留返啲錢買冬甩食好過!

嗱嗱嗱~~~
眼前就有兩個候選人嘞，
一號候選人史力加(Sherk)，
二號候選人魅力王子(Prince Charming)，

淨係睇樣嘅，
如果你係我﹐
你會揀邊個吖?
係青咇咇嗰個定係英俊瀟灑嗰個呢?
唔洗講係女人都揀2號魅力王子啦，
就算論家底都係魅力王子勝一籌，
佢阿媽係教母有權有勢又有錢，
反觀一號選手史力加就窮到"窿"，
個袋仙都唔仙，
仲要住係沼澤入便間爛屋，
又無佣人我使喎，
唔通結咗婚要我落手落腳煮飯洗衫咩?
仲有呀，
嗰個史力加又污糟到死喎，
鼻毛唔剪、涼又唔冲，
仲要成日放臭屁，
諗起都唔開胃呀，
你叫我點同佢過人世喎!

不過講反轉頭吖，
嗰個魅力王子條件係就係好啲，
但係佢頂唔頂得順我夜晚個怪樣先?
我怕佢見到我青咇咇個樣嚇到走夾唔抖呀!
而且我愈來愈覺得佢有自戀狂兼戀母情意結，
成日照鏡自己讚自己靚仔，
仲要將把頭髮揈來揈去懶靚咁，
一諗起我就起哂雞皮啦。
仲有仲有，
佢一遇到挫折淨係識走去嗲阿媽，
無用到死成個群腳仔咁，
叫人下半世點靠佢呀?
而家睇返史力加又覺得佢幾man喎，
起碼佢夠力抱得起我吖，
話哂我都有二百幾磅架，
你估人人都抱得起我咩!
你咪睇佢粗手粗腳咁呀，
有時佢都幾細心架，
又識得送啲小禮物畀我喎，
好似啲毒蛇氣球呀、蜘蛛手鐲呀，
仲有仲有呀，
佢都識講啲甜言蜜語氹吓我架，
有時畀佢搞到我個心囉囉攣瞓唔著添。
不過最重要係佢同我一樣咁「靚」，
夜晚見到對方都唔會嚇親，
最多當照鏡之嘛，
睇怕都係佢頂得順我夜晚個「靚樣」囉，
我都係揀佢做老公好啲，
兼且我個樣真係「靚」過佢吖嘛!
好嘞，今次講住咁多先，
有緣再同大家見面啦，
臨走送張我同史力加嘅貼紙相畀大家啦，
我哋係咪好靚好襯呢?
唔準嘔架! 嘻嘻~~~

註:所有插圖原稿來自sherk.com