模型的迷戀!

細細個就好喜歡模型，
火車、火船、城鎮等等都喜歡，
迷戀那種"宏觀全境"的感覺，
不過細個無得玩，
大個咗都無得玩，
因為哩啲模型嘅價值都唔平，
好似無底深潭、愈買愈貴，
就算有錢都無地方玩，
如果屋企無番千幾二千呎都唔洗旨意放得落座火車小鎮模型。

前幾日係APM見到個小型火車展覽，
我企係度望住架火車係咁轉係咁轉，
足足望咗半個鐘都唔捨得走，
你問我點解我都唔知，
淨係知道望住佢轉吓轉好滿足，
有時又會蹲低從低角度睇住架火車頭，
那樣感覺就好似真嘅一樣，
望吓望吓又唔想走，
而家日日經過APM都會走去睇一轉，
一日唔望過就週身唔舒服咁。