2010年6月28日

「想像」中的你 ~ 小豬來了!


「想像」系列第三彈嘅主角係 小豬 (小朱)
對於這裏嘅BLOG友黎講,
可能不是很常見小豬出現,
事實上佢又唔係成日留言,
小豬多數係淨看不留言的,
究竟佢有無黎睇我個BLOG嘅呢?
哩個問題我都唔肯定,
小豬,不如你話我知啦!

「想像」小豬嘅外型可以講係毫無頭緒的,
因為佢連BLOG相都無一張,
所以完全無聯想貼士,
但係咁樣又可以係無限想像,
不知何時,
我腦海裏出現了一隻可愛嘅飛天豬,
佢全身粉紅色會飛天又行程匆匆咁,
性格有點八卦但又有正義感,
係街見到啲壞份子"蝦人"會挺身而出,
例如見人坐車唔讓坐俾老人啦,
又好似見到嘅師奶當街打仔啦,
佢"應該"會出口相助,
毫無保留咁鬧到人家狗血淋頭,
我見佢咁正義都好佩服,
但係有時我會驚佢勇過頭,
如果遇着啲惡婆師奶或者唔識死嘅死飛仔,
佢隨時會被人"丙"返轉頭,
我又唔覺小豬可以"Where"爛塊面同佢哋黎個潑婦駡街,
話哂小豬都係個斯文人嘛,
到時真係唔知點收科。

另一個原因令我想像小豬似飛天豬就係佢講過佢係個"飯桶",
餐餐無兩碗大飯佢唔會飽架,
又喜歡食啲好味嘢,
好似蒸肉餅、炒肉片之類,
每日到咗食飯時間,
我腦裏便就會出現一隻好可愛嘅飛天豬係咁係度"扒飯",
食、食、食........好味!
如果我嘅想像無錯,
小豬嘅身型會係"小肥",
係"小小"咁肥,
唔係"大大肥"喎,
雖然好少見小豬講扮靚,
但話哂係女仔人家,
佢應該唔會俾自己嘅身型太離舖嘅,
係咪?
(小豬話佢係"唔肥",我唔多信啫)
哈哈哈~~~~~

外型可愛、性格剛強、不計較小節係小豬嘅外表感覺,
但當你細閱佢嘅網誌嘅時候,
你又會覺得小豬係另一個人,
佢感性、深情、固執、硬頸、內歛、強悍,
尤其時看到她和工作嘅"敵人"戰鬥時,
你會感到一個強悍到不得了的人在咬緊牙關,
誓要用自己嘅青春、時間把敵人鬥垮鬥死;
不過當你看到她深情款款的寫着情詩時,
(由於我領悟力低,其實唔係好明佢寫乜的)
相像中又可能會出現一個久經蒼海的深情女子在默默輕嘆,
半夜夢迴,
倚窗望月,
眼眶淚影閃閃,
多少前塵往事迴轉,
教這個勇敢粉紅小豬獨憔悴。
在隱隱的背後會有一個人,
一個讓小豬夢斷輕嘆的人。

另一樣我想像的東西是小豬亦是一個"慒豬",
曾經不少次我發覺佢好像只活在自己的"領域"裏,
例如她不太認識自己公司兩條街以外的事物,
就連如何從公司走去地鐵站她都要想一大輪才肯定,
又或者潮流興啲乜佢都會毫不了解,
小豬,你知唔知iphone係乜黎架?
所以個人覺得小豬應當上上"通識課",
這樣她才會對一些應該認識而佢又唔識嘅事物多點了解,
否則可能會出現在公司附近迷路嘅情況,
到時要打電話叫人"湊"佢返公司咪好"瘀"?
哈哈哈~~~

人慒不等於人蠢,
想像中小豬嘅工作力能非常強勁,
因為時常見到佢係blog裏隱晦地寫到工作上的"戰鬥",
每每是"驚濤駭浪"、"殺聲震天",
粗俗啲講就係鑊鑊新鮮、鑊鑊金,
老實講,
如果要我好似佢咁日日"勞心勞力",
把自己條橡筋拉到緊一緊咁,
我諗我會發癲入青山。
其我曾經勸佢不如"鳴金收兵",
唔好咁辛苦迫自己,
不過估計佢"騎虎難下",
有些事情不可能話放下就放下,
無可奈何之餘,
只有暗地裏默默替她祝禱好了。

小豬,
無論我如何"胡亂猜測"都好,
要記得人生苦短,
要快樂時且快樂,
不要讓時間在不知不覺中流走得無影無踪!

15 則留言:

xiao zhu 說...

>>我腦裏便就會出現一隻好可愛嘅飛天豬係咁係度"扒飯",
>>食、食、食........好味!

哈哈,你形容得好得意、好可愛呀!不過我都要話你,你真係冇心肝呀!我講過好多次喇,我係食肉獸、無肉不歡,唔係喜歡食啲香味嘢呀,唔同架。另外,我的確係"飯桶",不過唔係"餐餐無兩碗大飯唔會飽架",我每餐食一碗咋,不過係每日都一定要有飯落肚,冇飯食會好似冇食過嘢咁,冇肉食就會好空虛,咁囉!

另外,我唔係小肥,我係得天獨厚,食極都唔會肥嘅!嘻嘻!

呀,爭啲唔記得,我日日都有黎睇你架,最少一次。

新鮮,其實你真係好叻,正如你成日都講,都唔明我寫乜,但係又都可以將我咁多唔同嘅面貌寫到出黎,果然係老友記呀!

樂遊 說...

「外型可愛、性格剛強、不計較小節.....感性、深情、固執、硬頸、內歛、強悍、正義」
我都是這樣想,但我估味必是「強悍」,「不亢不卑」可能較貼切。

新鮮人 說...

小豬,
我有心肝架,
記得你喜歡食肉,
你唔見我舉例嘅都係肉餅、肉片咩?
哈哈哈~~~

不過你話一餐一碗我就唔信嘞,
蛋撻王一個飯盒都唔止一碗飯啦,
你食唔食得哂佢吖?
哈哈哈~~~

新鮮人 說...

樂遊,
我又無諗過用「不亢不卑」,
可能我對佢認識唔夠深,
還要是多多"了解"佢先得,
謝謝意見! ^-^

macy 說...

新鮮人

我都認同小豬係
"感性、深情、固執、硬頸、內歛、強悍"
外剛內柔的女性.

她的"hug hug"會令人很心甜呢!

the inner space 說...

各位朋友:
網友"米搞"曾經繪畫過小朱姐兩次, 小朱姐都欣然移植到自己網誌上登出來, 想必有其相似相近之處.


各位可以點擊以下為方便各位做的連結.

space

米搞畫小朱

p.s. 米搞繪畫的小朱姐兩幅, 並懇請讀埋網友們的留言, 風子尢其欣賞圖二.

新鮮人 說...

macy,
"外剛內柔"這個形好好,
感覺很貼切!

不過佢無hug過我,
無份心甜啊! =p

新鮮人 說...

space,
都話你記得好啦,
兩年幾前嘅嘢都記得,
仲要俾你搜返出黎先好嘢,
真係佩服到五體投地! orz

匿名 說...

新鮮人

小豬真喺會飛天?
佢有冇試過飛唔起?
唔...
我覺得佢身形都"不過不失"啦~~

Ivy

匿名 說...

新鮮人

你寫的這些"人物"篇都好吸引,
喜歡看你的解讀,
是不是還有很多篇?
我要担定凳仔,剝定花生等欣賞呀~~

Ivy

新鮮人 說...

ivy,
小豬得天獨厚,
食極之咁苗條,
飛行應該無問題嘅!
嘻嘻~~

至於會寫幾多篇暫時無定案,
只要是相熟的,
有靈感都會寫,
不過我要強調這些內容都是我「想像」的,
我未見過其人,
亦不真正認識大家的,
全部都是估估吓喳!

匿名 說...

小朱姐俠義心腸, 受人景仰!

space

微豆兄的網頁 lotus and cedar
都有文表揚過.

行俠仗義 / Re-reading a Refreshing Story:

Sometimes, it is fun re-reading old blog articles. I had completely forgotten Xiao Zhu's funny story "今日做左八婆,好嘢!" until I re-read it via Space's Apr 26, 2010 blog article "Curiosity Killed the CAT!". I have a good laugh again. Among the 109 comments posted at Xiao Zhu's place, this was my response at the time ....

一馬当先,江湖兒女現本色
二郎擔山,酒林莽漢敗勢斜
三環吐月,軟硬兼施連又連
四平大馬,黑白分明人上人

*****************************

新鮮人 說...

匿名,
不知閣下是誰呢?
space?

這篇我都唔係好記得了,
不過重讀真係幾有味道,
謝謝!

匿名 說...

哎也! 新鮮兄 我咪在上面文中第二行, 已經處名 space 囉, 不是暱名人呀, 你貴人事忙, 跳讀太快了!


space

新鮮人 說...

space,
我見到,
不過那句l
"小朱姐俠義心腸, 受人景仰!

space",
連署名都曾經出現過係微豆博裏,
我以為係匿名者全部"引用"過來的,
不知原來係你今次嘅署名嘛!
通常你署名都係放到最後的!