2010年7月5日

"小王子"、"小公主"群 的出現!


假日外出見到最多嘅是什麼呢?
不是車不是船,
而係"小王子"同"小公主",
點解咁講呢?
因為假日係一家大細外出嘅日子,
人人拖男帶女,
做父母一定會帶啲細路哥出去玩,
全家大細總動員嘛。
點解又叫"小王子"、"小公主"呢?
因為見到啲父母對子女呵護備至,
唔好講"一隻蛋三個願望"吖,
就算一千個一萬個願望都可以,
要風得風、要雨得雨,
唔係王子、公主係乜。

星期六下午在快餐店黎個下午茶,
見隔離枱一對四十幾歲嘅父母帶着一個十三、四歲嘅兒子坐下,
阿爸嗰個就走去攞嘢食,
阿媽就同個仔坐低等食,
見到個仔黑口黑面咁,
坐低唔出聲就爬係張枱度,
一眼都唔望佢阿媽一嘢,
等咗一陣佢阿爸攞咗兩個餐入黎,
兩公婆一個餐,
另一個就係俾個仔嘅,
點知個仔"騷"都唔"騷"佢哋,
照舊爬係枱度唔理,
個阿媽見佢咁樣就靜靜哋幫佢將件西多逐嚿逐嚿咁切細,
然然仲慢慢咁幫佢塗埋牛油,
跟手仲叉埋伸到個細路咀邊添,
點知個細路眼尾"照照"個老母,
跟住一句嘢都唔講就自己走咗出去嘞,
做老豆嗰個叫都叫唔住,
最後剩低兩公婆無言相對。

我唔知佢哋背後發生了什麼事,
但係做人子女嘅點都無理由咁無禮貎架?
咁大個人,
做老母嗰個又洗唔洗服事週到成咁呀?
你估佢癱嘅咩?
自己唔識切呀?
其實哩啲都唔係個別例子,
每逢假日就會見到類似嘅情況,
十幾歲嘅就黑口黑面,
好似同父母有仇咁,
攞埋位同佢飲茶都千唔願萬唔願,
就算唔願飲茶都唔洗咁嘅面口吖?
十幾歲應該係自己去幫老豆老母攞位啦,
依家出埋錢叫佢哋陪吓老豆老母飲一朝茶都咁嘅樣,
哩啲係乜嘢態度呢?

細啲十歲樓下嘅一樣係王子、公主皮氣,
係快餐店成日都聽到啲細路"依嘩鬼叫",
再唔係就大庭廣眾大聲嚎哭,
總之就要搞到父母買佢哋怕,
有啲仲離舖到一唔鍾意就一巴巴咁打落父母塊面度,
"拍拍"聲環迴立體聲都出埋﹐
最難得係見到啲做父母嘅任佢哋打,
被打完仲要應承野蠻子女嘅所有要求,
你話係咪自己攞嘅賤吖?
咁樣縱容啲細路,
依家啲細路唔鬧得、唔話得、唔錯得、唔失敗得、唔讚唔得......
你話點會唔變"王子"、"公子"吖!

搞到今日咁,
都怪啲父母過份溺愛,
唔識教就去上吓堂啦,
從前嘅因,
今日嘅果,
佢哋自作自受無所謂,
但係知唔知咁樣會幫社會製造一堆"垃圾"出黎呢?。

6 則留言:

匿名 說...

通常系老豆老母唔夠錢買佢的心頭好!


space

新鮮人 說...

space,
哩啲小王子、小公主乜都嘈一餐,
一有少少唔順意就要發皮氣,
買唔買心頭好都會嘈,
以為自己惡哂咁囉!

macy 說...

新鮮人

"做老母嗰個又洗唔洗服事週到成咁呀?
你估佢癱嘅咩?
自己唔識切呀?"

我地十幾歲要一早落樓搵埋位,開埋茶俾阿爸阿媽架噃...仲要霸個靚位, 攞點心攞大粒啲, 唔係都俾人鬧.

"有啲仲離舖到一唔鍾意就一巴巴咁打落父母塊面度,
"拍拍"聲環迴立體聲都出埋﹐
最難得係見到啲做父母嘅任佢哋打,
被打完仲要應承野蠻子女嘅所有要求"

有同感, 真係好恐怖, 我樓下個'靚'仔叫佢阿爸做'死肥佬', 個阿爸都唔鬧架噃. 打爛阿嫲屋企塊玻璃, 阿嫲叫佢道歉, 個死靚仔仲話: "爛左少少啫嘛, 洗死咩!" 佢老豆老母仲話個阿嫲好鬧佢個寶貝仔...

呢啲阿爸阿媽好似好疼錫囝囡, 但其實害左啲囝囡之餘, 仲害埋自己同社會.

新鮮人 說...

macy,
哩啲咁嘅父母簡直為害人間,
第日有排佢哋受,
最慘係社會又多個廢物,
唉~~~~

詭異的木頭狗 說...

新鮮人,你用呢幅相係咪會影衰埋小王子呢?

依家D細路攪成咁, 我覺得罪魁禍首一定係父母..小朋友是非對錯的價值觀來自那裡, 咪係父母囉, 唔通自己上網睇咩?

總之, 有咁嘅父母就有咁嘅細路..

新鮮人 說...

木頭狗,
唔會影衰真正係小王子吧!!
哈哈哈~~~

教導係父母嘅責任,
對!
但我們不可忽視如今網絡風氣對小朋友的影響,
現在啲小朋友幾歲就學上網,
網上很多思想對他們都會有影響的,
這點為人父母不可不知啊!