2010年9月29日

九流小說: 老婦八卦手記!

社區中心門外圍滿了人,
不遠處兩個婆婆正急步走上去了解了解。
「行快啲喇,遲咗無嘢睇架啦。」
「行得好快啦,你估我唔想咩?對腳唔生性嘛!」另一個婆婆氣喘的說,
「黎啦!黎啦!等我拉你嘞!」
「咪拖咁快呀!扑死我呀!」
兩個婆婆三扒兩撥地走到人群背後,
「借過!借過!讓吓阿婆啦!」
她們左穿右插的把頭竄進人群裏去,
走得快點那個婆婆把頭一伸就看見阿玉暈倒在地上了,
兩個救護員將阿玉抬上擔架正要送走,
看見人群愈圍愈多,
救護員叫着:「唔該讓開,俾啲空氣個阿婆透氣呀!」
圍觀的大部份都是公公婆婆,
他們都是這個社區中心的常客,
朝早十點和下就二點都會黎坐一坐,
除了貪這裏有免費報紙睇外,
還可以嘆吓冷氣,
最重要的是一早一晏準時黎可以"蓋印仔",
一個月集齊25個就有禮物送,
兩小包米粉、餅乾都是錢來的,
食不完儲起來也是好,
而且又可以同班"老友記"講講是非",
這種生活對老人家黎講都幾"多姿多彩"!

救護員把那個叫阿玉的婆婆送上救護車,
主角送走了,
没有東西可以八卦,
人群也慢慢散開,
剛才那兩個婆婆還邊走開邊討論着:
「作死囉!做乜阿玉會暈咗係門口架?」
「點鬼知佢呀!」
「唔係喎,你唔係同佢好老友記咩?」
「你咪亂講呀,我見無乜人理佢先至同佢講兩句之嘛!」
「佢咁鬼死衰,梗係無人啋佢啦!」
「你又知佢啲衰嘢?」
「梗知喇!上次聽人講呀!有次社區搞旅行,中午一埋枱佢就係咁搶,搞到其他人無嘢食呀!」
「我都知呀,好似話佢好似餓鬼咁,將啲餸係咁掃哂落自己碗度,幾衰格呀!」
「咪係!我最多攞多兩三嚿之嘛,佢仲狼過我呀,前世未食過咁!」
「仲有呀,佢次次量血壓都打尖架,中心啲姑娘叫佢排隊,佢就裝聾扮啞,小家到死!」
「咁你知唔知佢點解會暈嘅?」
「你慌唔係噚日佢攞平安米貪心咩!攞完又排過隊,一個人攞成三四包呀!」
「噚日有平安米囉咩?點解你無通知我架?」
「你無攞咩?」
「我唔知呀!你咁架,唔通知我聲!」
「下次囉!我以為你知喳!」
「唉~~~蝕底哂啦!」
「咪咁啦!依家我哋去邊度好呀?」
「今日星期二,不如去買注六合彩吖?」
「成五蚊嫁,咁貴,我買包雜嘜米粉都得啦!」
「今期有多寶三千萬喎,你摶唔摶先?」
「有咁多咩?咁又諗得過喎!」
「係呢!你估我個孫幾衰呀!佢話我咁老中咗都無用,都係益佢喎!」
「乜咁講嘢架?」
「咪係!我中咗一毫子都唔會分俾佢,自己環遊世界都唔益佢呀!」
「咁就啱嘞!依家啲後生都唔理我哋啲老嘢嘅!」
「喂!聽講遲啲六合彩加到十蚊一注喎,你知唔知呀?」
「撞鬼囉!馬會乞兒度揦飯食呀?連我哋阿婆發吓夢都唔俾!」
「係啦!一加加五蚊咁多,你叫我哋點買喎,街市啲隔夜麵包都係五毫一個之嘛!」
「正斬頭鬼!咪鬼理佢,襯依家未加價去買咗先算啦!」
「行喇!行喇!唔係一陣放咗工好多人排隊架!」
「弊~~」
「作死咩!弊乜吓?無啦啦咁大聲,俾你嚇鬼死呀!」
「我哋未入去"蓋印仔"呀!」
「係喎!咁仲唔走返入去問姑娘?」
「過哂鐘啦,唔知姑娘俾唔俾呢?」
「唔俾咪"nur"到佢俾囉,再唔得咪扮暈囉!」
「係喎!咁仲唔行快兩步?」
「行緊喇!」
然後,
哩兩個阿婆就七咀八舌咁急步走進了社區中心了。

完!

12 則留言:

匿名 說...

唉!六合彩加到十呅一注!
我買開電腦票廿皮四注。
以後要自己填飛,
買兩注仍然是廿皮!
個夢嘅機會細咗一半。


Space

新鮮人 說...

space,
星斗小市民的悲哀!

嘿嘿 說...

有得拿时还客气咩?岂不是“暴殄天物”?嘿嘿~

匿名 說...

星斗小市民的悲哀列表:

~六合彩加價,中獎個夢嘅機會細咗一半。
~人民幣兌美元的中間價每日創新高,港幣鈎了美元,柴米油鹽醬醋茶衣食住行,都要用人民幣找數,香港通漲過眼眉。
~醫療融資,政府先諮詢後提倡終極推行全民醫療保險,營成向夾心階層雙重抽稅,無錢投醫保,就自己甌死在街頭。
~公共交通加價,隧道加價,坐電車都加價。

還有還有很多 。。。。。不贅!


Space

新鮮人 說...

嘿嘿,
我好明白你的想法,
好像和那些公公婆婆差不多啊!
嘻嘻~~~

新鮮人 說...

space,
都是一個字: 錢!

The Inner Space 說...

唉!若政府社保福利足夠,就不用擔心錢囉!
如今政府又不負責任!我不妄想做富豪,我祇求到要用錢時,口袋有足夠金錢付款!

新鮮人 說...

space,
這已是不容易的事了!

匿名 說...

喺囉!至今還未達到,時常都足襟見肘!


Space

新鮮人 說...

space,
知足常樂,
順其自然!

Haricot 微豆 說...

傳神!傳神! Well done !!!!

新鮮人 說...

微豆,
thanks for watching! ^-^