2010年10月29日

三姑與六婆!

在一個風和日麗的早上,
圍村村口士多傍大樹下坐了兩個阿婆,
一個叫三姑,
另一個叫六婆,
她們手上拿着裝滿餸菜的菜籃,
正七嘴八舌的在討論什麼的樣子。

「哎呀~三姑呀!你知唔知隔離村村長個女生咗三包胎呀?」
「係咩? 一次生三個咁好生養? 六婆你咁好耳嘅?」
「你無收到風咩? 仲係三個都係仔添呀!」
「咁好彩? 咪住~~隔離村村長個女李愛幾時結咗婚架? 我唔知嘅!」
「咪就係咁至奇囉,聽講係未婚生仔呀。」
「真係?八啲料黎聽吓好噃!」
「我都唔知架,係村尾黃師奶講過我知喳。」
「你知嘅,咪咁衰吊住我條癮啦,講多啲黎聽吓啦!」
「好嘞!好嘞!見同你咁熟至講喳,你咪話過俾人知呀!」
「好~好~好~淨係我知你知得未呀? 快啲講啦~」
「心急得你個衰樣吖!你知啦李愛都成三十幾歲人都未嫁人啦!」
「佢成個女強人咁,又讀咁多書,邊度有男人敢埋佢身喎!」
「你咪閘亂歌柄好嘛!?」
「係! 係! 係! 你繼續啦!」
「咪係囉! 佢咁"叻"又睇唔起週圍啲男人咪無人要佢囉!」
「聽講曾經有過幾個男人同佢行架,後尾又變咗無聲無氣喎。」
「你慌唔係被佢嚇走咩!有次我見佢係村口鬧細B呀!幾鬼惡呀!話佢隨地吐痰喎!」
「唓~圍村咁大,個個人都係咁架啦,又唔係吐係佢門口,關佢屁事咩!」
「係囉~~係囉~~唓~你又拉我講咗去邊呀? 你想唔想知哩單嘢架?」
「嘻嘻~~忍唔住口嘛,你講啦!」
「咪就係無男人要囉,後尾年紀愈黎愈大唔掂囉,咪俾錢揾男人同佢播種囉!」
「啋~~乜咁羞家嘅嘢都做得出架? 講過都要"啷口"呀!我啋~」
「我都係聽人講喳,佢年紀有返咁上下,唔生無得生架啦!」
「咁醜嘅嘢點做得出架? 佢老豆唔會鬧死佢咩?」
「咁至奇呀!佢老豆唔單止無鬧佢,仲鬼咁開心!抱住幾個孫週圍同人影相添!」
「乜個世界變成咁架,醜死怪囉~」
「三姑,咪咁落後啦,大把明星都係咁啦,要仔唔要乸,要仔唔要佬都有架!」
「我就做唔出嘞,咁鬼死核突,以前咁樣要浸豬籠架!」
「咪儍啦!依家邊有浸豬籠哩家嘢架! 話時話,你仲生得出咩? 嘻嘻~」
「我啋過你把口呀! 你鬼舐嘴呀? 啋~啋~啋~」
「老蚌生珠嘛~~」
「我啋! 咁你生嘞!」
「我啋返你呀! 咁老我點生呀!?」
「又係你講先嘅?!」
「你正六婆呀~~咁八啩!」
「你咪又係,三姑!」
「哈哈哈~~~~」
「返屋企煮午飯啦!」

三姑同六婆邊行邊笑走回家去了!

8 則留言:

xiao zhu 說...

衰鬼,又真係扮得幾似喎!

Ivy 說...

真喺三姑同六婆,
阿八婆同九叔去咗邊?

新鮮人,long time see...

新鮮人 說...

小豬,
唔係扮架,
係三姑同六婆講架!
哈哈哈~~~

新鮮人 說...

IVY,
時常到你那邊看的,
不是每次都留言而已!
八婆和九叔放假未返,
遲啲會歸隊一起八卦的!
哈哈哈~~

希樹 說...

哈哈~

新鮮人 說...

希樹,
嘻嘻~~~ =P

Haricot 微豆 說...

八婆: (剛從三姑六婆処回來) 咦,你去边呀?
九叔: 我要去播種,之後去買肚。
八婆: 你個死佬呀!!!
九叔: (唉,播穀種,買豬肚都要俾佢鬧!!)

新鮮人 說...

微豆,
九叔講得唔清唔楚咁,
難怪八婆誤會嘛!
哈哈哈~