又係三姑和六婆

六婆急急腳走埋去坐係樹下透涼嘅三姑度，
然後氣喘喘咁想講乜嘢咁，
「三姑~ 你...你...」，
「你乜鬼呀? 透順條你先啦，你估你仲係十八廿二咩!」，
「你....你....你....」，
「你吞啖口水透過氣未呀?」，
「你... 你仲咁淡定嘅? 我哋條村發生咗好大件事呀!」，
「有乜咁大件事呀? 乜嘢大風浪老娘未見過吖!」，
「你真係唔知呀?」，
「知乜鬼啫，你講啲唔講啲，我都唔知你up乜!」，
「咪就係有人發起下星期二罷食村口超發記囉!」，
「哦~~你講哩單嘢呀!」，
「你無哩反應嘅? 好似一早知咁噃!」，
「係呀!罷食哩單嘢係我搞起嘅!」
「吓~~~你搞嘅? 係真唔係呀? 超發記同你有仇咩?」
「珍珠都無咁真!」
「真係? 超發記佢得罪咗你呀?」
「佢無得罪我，只不過我睇佢唔順眼啫!」﹐
「唔順眼? 八些少料黎聽吓吖?」
「咪就係我侄女囉!」
「你侄女唔係喺超發記做洗碗嘅咩?」
「係囉，當初仲係我介紹佢去架!」
「咁咪幾好囉，點解忽然咁憎超發記嘅?」
「當初明明講好一朝做四個鐘，包一餐架咪!」
「係呀! 做食店嘅一向都係咁樣包伙食架啦。」
「係屁!超發記個衰佬呀，上星期靜靜雞減咗我侄女啲伙食!」
「積係點呀?」
「即係食乜都要自己俾錢囉，舖頭啲嘢食唔俾食囉!」
「乜咁鬼孤寒架? 一個女人仔食得佢幾多呀?」
「咪係! 仲有呀，佢連食飯半個鐘嘅工錢都減埋，話食飯時間唔算工作喎!」
「嘩~~乜超發記男人老狗啲數口仲精過我哋啲師奶阿婆呀!」
「直情衰格兼"度縮"啦，邊有男人計埋哩啲婆乸數架?聽講係佢個仔諗出黎架!」
「你講佢嗰個係外國讀過乜嘢“精算”返黎嘅番書仔?」
「咪係囉! “精算"喎，咪即係算死草囉!」
「所以你想幫你侄女出口氣，發起罷食嘞?」
「梗係，我侄女仲打緊佢工，唔方便嘛，咪等老娘我出手囉!」
「喂! 三姑呀! 聽講除咗超發記外，村尾“美森”、“肯的計”都係咁做喎!」
「吓~~ 佢哋都咁衰格? 當啲員工係人唔係呀?」
「唉~~ 依家啲人係咁架啦，條數有咁絶計到咁絶，又玩數字遊戲喎!」
「乜嘢數字遊戲呀?」
「咪即係表面上加你幾蚊人工咁大把，然後陰啲陰啲咁減咗啲食飯時間、飯錢咁囉!」
「吓~~ 咁賤格? 咁咪隨時因加變減囉? 作死囉! 生仔無蘿友呀!」
「仲有啲衰啲架，就係做過少少嘢就扣你幾百蚊人工，扣扣吓就白做囉!」
「乜咁"折墮"嘅嘢都諗得出架? 叫佢哋小心後尾嗰幾年呀!」
「所以話你罷食都無用，咁多老闆咁衰格，問你點搞吖?」
「咁咪唔出街食囉，返屋企煮囉，你慌會餓死咩?」
「咁啲打工嘅後生仔點好呀?」
「帶飯盒囉，我哋後生係工廠打工時咪日日帶個"暖壺"返工啦!」
「係喎，你仲出名係工廠皇后添喎!工廠妹萬歲~~」
「哎呀~~你仲記得寶珠姐首歌呀?」
「梗係~~遲啲人人帶返飯盒，可能首歌又興返架!」
「你真係搞笑，工廠皇后變工廠阿婆啦~~哈哈哈~~~」
「哈哈哈~~~」

究竟村口超發記會有乜嘢收場呢?
以後又係唔係會多咗人自備飯壺返工呢?
且看唔知幾時有嘅下回分解了!