2011年3月24日

自作孽!

人衰行路打倒退,
不過有些事是人自己攞黎嘅,
唔抵可憐。
早前友人失業年多,
結果蘿友痕返內地搞大咗人個肚,
無錢又谷住要結婚,
仲要伸請個未來老婆落黎香港住,
可惜佢老兄一家父母親朋住係間幾百呎嘅公屋,
豆腐膶咁細仲要逼多個老婆和bb,
真係屋漏更兼逄夜雨。

幾經辛苦揾到份工,
但係又遇到個賤老闆,
拖糧拖到唔要面,
返兩個月才出半個月,
成間公司個個都被佢老闆拖住,
連買料做貨錢都無,
仲要我個老友"where"爛塊面叫啲供應商捨住先,
老友唔係唔想叫,
不過差不多通行都知佢公司拖數拖都無得俾,
你叫人點揾到供應商肯捨數呢?
點知佢老細仲惡人先告狀,
話我個老友唔做嘢,
咁都揾唔到供應商捨數喎,
你話係咪賤到無人有吖!

一波未平一波又起,
友人老婆又因為唔習慣香港嘅生活,
加上老爺奶奶指指點點,
終於生咗個女一年就頂唔順,
返咗上大陸跟佬走,
老友唔憤氣走去揾佢,
本來想話有事慢慢商量,
但佢老婆就無影無踪,
要通過佢老婆家姐先至用電話聯絡到,
點知佢老婆又話乜又話七,
仲要話依家條仔係佢個舊男友,
有錢有米又有餐廳,
又話自己已經有咗個奸夫嘅骨肉,
(走咗唔夠一個月)
我老友聽完眼火都爆埋,
不過都無辦法,
唔通殺咗佢咩?
佢仲鬼咁關心同佢老婆噓寒問暖,
唔知仲以為個肚係佢自己架,
愛心爆棚,
不過爆錯哂位!

好啦,
諗住疊埋心水返黎搞離婚,
點知佢老婆忽然又話個奸夫唔認數喎,
要落咗個仔,
我老友竟然白痴貼錢佢去落仔,
真係俾佢吹到脹哂。
落完仲要俾人哋個奸夫打電話黎吋,
話我老友無本事任人拖佢老婆走,
老友除咗好慶外就繼續俾個女人呃,
自己無錢仲死咗幾萬蚊俾個女人救急,
當初又話個奸夫幾有米,
個女人又話自己生活好好、好富貴,
點解咁都要問佢攞錢呢?
我真係唔明白係我老友白痴定係佢哋夠奸嘞,
攞明係"昆"你架啦,
我哋幾個老友事前都叫佢咪理佢,
但係佢又唔聽,
結果人又無、錢又無,
仲要俾個奸夫侮辱,
你話佢幾笨七吖。

我哋問佢係咪仲好愛嗰個女人,
老友話少少啦,
不過條氣唔多順多啲,
叫佢咪再理鬼佢,
話知佢死啦,
點知佢個衰老婆早前又同佢講又有咗喎,
老友仲千辛萬苦多番同佢姨仔去証實喎,
我哋聽到真係把幾火,
好狠咁丙到佢上天棚,
叫佢咪再咁"昂居",
係真係假都好啦,
咪再俾佢"昆"嘞,
話知佢有咗18個月都好啦,
快手搞分居手續啦,
點知我老友話搞分居要攞佢大陸地址喎,
佢竟然話完全唔知佢住邊,
又話佢老婆唔肯俾依家嘅地址佢,
咁即係點?
又跟佬走又同奸夫有咗,
口就話要離開我老友,
但係又死都都唔合作,
想點?
大家心照,
只係我老友點極都唔明啫。

有啲人平時好醒好聰明,
但係一去到感情事就一塌糊塗,
IQ變得完全零蛋,
無論傍人點勸點告誡都聽唔明,
口就話:"我明!我明!我唔會再被佢呃!",
結果轉個頭又係俾人"昆"多次,
我哋真係無眼睇,
勸又勸過,
小又小過,
幫又幫過,
佢份工已經出得一半糧架啦,
叫佢專心諗自己嘅將來,
佢唔食個女都要食嘛,
至於佢個所謂老婆就要黎都無謂,
快快諗計一刀兩斷好過,
(你話我叫人分妻唔啱我都係咁講嘞)
留返啲氣力為自己前途着想,
否則過幾年又係咁,
到時乞食鬼理你呀!

16 則留言:

l.minor 說...

你的那位朋友真可憐

感情嘅野,自己永遠是看不清

新鮮人 說...

I.minor,
其實很多東西都是性格所然,
他的性格決定了他的命運和結果,
唔係佢自不清,
係佢明知係錯都要做,
無得講。

xiao zhu 說...

你條題寫左。

新鮮人 說...

小豬,
唉~~~

L L 說...

聽好多人講,上面啲女人好犀利,可以將香港男人剝晒光豬,個香港男人仲可以甘心命抵。

冇偈喇,冇偈喇,原來好多香港男人都係鱷魚頭老襯底!

Ruth Tam 說...

Mainland Chinese have their way of doing things. I know of a similar case too.

naruto 說...

可能屋企個女都唔係佢。。。

新鮮人 說...

laulong,
受騙了就要醒覺,
否則只會跌落深淵,
陷入萬刧不復之地!

新鮮人 說...

ruth,
唉~~
咁樣令人對內地人好有戒心,
也没有好感!

新鮮人 說...

naruto,
佢都有咁諗過,
不過孩子無罪,
好多事唔知好過知!

the inner space 說...

貴友是人辦貫切愛的最高境界!

新鮮人 說...

space,
這不是真正的愛,
他只是笨蛋一名,
愛不應該是這樣的。

the inner space 說...

愛的真諦
作詞:保羅 作曲:簡銘耀
愛是恆久忍耐又有恩慈 愛是不嫉妒
愛是不自誇不張狂 不做害羞的事
不求自己的益處 不輕易發怒
不計算人家的惡 不喜歡不義只喜歡真理
凡事包容 凡事相信 凡事盼望
凡事忍耐 凡事要忍耐 愛是永不止息

http://www.1ting.com/player/d2/player_73597.html
by 北京天使合唱團

新鮮人 說...

SPACE,
文字裏找不到愛的真諦的,
只有親身走進去愛的世界才會洞曉什麼是真愛!

Ruth Tam 說...

From HKEJ:

八成嫁港翁為居權 內地中女徒添遺恨

時至今日,相信大家仍不時會隨街見到,某些年逾六七十的花甲老翁,身旁還會有年紀差上一大截的太太同行。這類老夫少妻,總成港人背後訕笑的對象。

查實,近年隨中港經濟水平愈趨接近,內地等閒二十歲上下的青春少女,都再不願如上世紀八十年代般,委身下嫁上了年紀的港男,以求改善生活;惟年屆花甲的「港翁」,想娶年輕女子的心態長年未變,退而求其次,近年就只能選擇平均年逾四十的中女。

惟有輔導組織的調查發現,這類內地中女肯嫁港翁,八成竟是為求居港權及追求生活保障,結果來港後大失所望,自此「家嘈屋閉」,所生子女亦更難擺脫跨代貧窮。一齣一齣的社會悲劇,自此陸續上演。

新鮮人 說...

ruth,
我看到不少的中港婚姻就是這樣,
活像個計時炸彈,
啲人梗係唔信鏡,
係都要試,
結果要其他人執佢手尾,
無眼睇!