2011年3月25日

三級戲院與舊友!

近來啲新聞奄奄悶悶,
要講返啲鹹鹹濕濕笑返吓啦。

話說我讀中三嘅時候,
有個同學同我幾鬼fd,
不過佢又懶又無心機讀書,
仲成日掛住做pt揾錢去玩,
結果就升唔到中四無得留低,
佢屋企見佢都無心機讀書,
梗唔會花錢俾佢去讀私校啦,
況且我老友根本唔鍾意讀書,
佢都唔知幾想快啲出黎做嘢揾錢呀,
結果仲係係我中三暑假期間,
佢就揾到份新工嘞。
係乜嘢工?
咪係三級戲院帶位員囉,
係九龍灣淘大嘅翠鳯做,
雖然我個fd未夠18歲,
但佢一來個樣早熟,
而且又大我一兩年,
係呀,
佢留過兩次班架。
嗰時啲鹹片戲院仲未没落,
好多中年、老年漢去觀摩觀摩架,
所以戲院人手經常好缺乏,
我老友未夠秤都一樣被徵入伍了。

那年我仲係放緊中三暑期等入中四,
我個終於老友走咗去做鹹院帶位員,
佢一放假我就揾佢了解了解吓佢新工情況嘞,
我問佢有得任睇鹹片係咪好正呀?
有無睇到興奮過度要去廁所...(你明架啦)
我一輪嘴不停咁問,
佢無我咁好氣等我收口先至出聲。
佢話日日睇鹹片好悶喎,
第一日就好剌激好新奇,
乜都唔想做淨係掛住睇個大螢幕,
腦裏便不斷浮現戲裏啲畫片,
諗到週身都"慶洽洽",
(以前啲鹹片同依家四仔無得比,好小兒科喳,
不過以前我哋都比較純情嘅! 哈哈哈~~)
至於佢有無去廁所搞啲乜嘢就無講嘞,
不過佢話當你日日睇夜夜睇同一套戲時就會悶到嘔,
(嗰時未有數套輪播嘅做法)
因為你會連每一個動作和對白都記得的,
而且好多都無乜劇情,
來來去去都係差唔多,
所以通常一開場做完嘢,
佢哋就會走返出去吹吓水。

我老友話聽啲師兄講,
有啲阿伯日日黎煲戲,
睇完又睇、睇完再睇,
有啲就專揀最最最前排,
好似想"聞"個大螢幕咁,
有啲相反喜歡有咁後坐咁後,
不過一定會自備望遠鏡,
因為望遠鏡可以"close up"某部位喎,
真係唔知好嬲定好笑。
雖然鹹片多數坐唔滿,
但係每次一做到戲肉時,
成間戲院入便就會傳來"呵呵...哦哦..."聲,
跟住散場走人後,
入去清潔時就會感覺到地下"痴笠笠",
我老友都唔敢用電筒去照黎睇,
求求其其揾地拖濕水拖兩嘢就走人,
聽到都想嘔呀!!

我老友話除咗鹹濕阿伯外,
鹹片戲院最多啲紋身公仔佬拖住條女黎睇,
佢哋會一路睇一路笑,
男人就乘機"捐"個頭落去女人嘅心口,
又或者個女人會蹲低係男人大脾上面好落力咁"點頭",
大做鹹濕戲院真人騷,
搞到坐係附近阿伯掛住睇佢哋唔記得睇螢幕添。
另外,
當時實施咗無幾耐戲院禁煙,
啲公仔佬當然唔會理咁多啦,
一次照食照煲當你無到,
聽我老友講,
係佢之前有條新仔被經理點咗去叫啲公仔佬唔好食煙,
點知佢行到埋佢指指嗰枝煙喳,
都未開口就被公仔佬一鎚'餵"埋塊面度,
跟住鼻哥"啤啤"聲咁流蚊飯,
條新仔就喊咁口走返出去止血,
從此再唔會有人敢出聲叫人禁煙了。

我和這個老友都失哂聯絡了,
十幾年無見過,
最後一次係沙田駕駛學院,
佢好似係入便做文職,
我見佢睇到我係認得嘅但又無反應,
我同佢遠遠點吓頭佢又好免強咁笑一笑,
好似唔多想見到我咁,
無行近講過一句說話,
跟住就各行各路了,
有時有些友誼好似有特定時限,
過咗那個特定嘅時間後,
一切關係就好像消失了,
好奇怪!
好奇怪!

21 則留言:

the inner space 說...

新鮮兄都是有車牌有車之人在路上點相認呀?我架錢七有對龍貓在 rear screen!哈哈哈哈!

新鮮人 說...

space,
我無車架,
只要行路和搭公共交通工具,
好難和你偶遇,
我只是普通人一個,
見到都唔認得啦。

Ebenezer 說...

話時話,現在d三級戲院好似絕晒種喇:(

匿名 說...

最後一次係沙田駕駛學院見過個friendot,咁你起碼識駕駛車輛是有牌之人,暫時未有車可以借車租車,哈哈哈哈!

借借回覆 以便兄:
讀Agnes的網誌,最後一間專映成人哦哦額電影院,在佐敦隔離嘅官涌,即將閉館!
要去懷舊趁早!http://agnesvaria.blogspot.com/2011/02/50.html

naruto 說...

朋友有期限,但有時過左一段長日子後,又可以變番熟朋友

L L 說...

>>有時有些友誼好似有特定時段,
過咗那個特定嘅時間,
一切關係就好像消失了,
好奇怪!
好奇怪!


生活圈子唔同咗,冇咗交集,慢慢淡薄係正常架喇!

梁巔巔 說...

"有時有些友誼好似有特定時段,
過咗那個特定嘅時間,
一切關係就好像消失了,
好奇怪!
好奇怪!"

講得好正!

係. 好認同! 好唏噓. 另外, 亦令我諗起好耐以前一齣戲~ 變色龍.

匿名 說...

最後一次係沙田駕駛學院見過個friendot,咁你起碼識駕駛車輛是有牌之人,暫時未有車可以借車租車,哈哈哈哈!

借借回覆 以便兄:
讀Agnes的網誌,最後一間專映成人哦哦額電影院,在佐敦隔離嘅官涌,即將閉館!
要去懷舊趁早!http://agnesvaria.blogspot.com/2011/02/50.html

Space (sorry 上面忘記了響朵!)

匿名 說...

welcome 巔巔兄回歸blog界!


Space

梁巔巔 說...

我有經常去你哋度咖.

回歸 Blog 界? 仲未. 遲啲啦. :)

新鮮人 說...

ebenezer,
啲阿伯都識買四仔返屋企睇囉,
後生仔就更加唔會去睇,
網上多的是,
想唔執粒都唔得啦!

新鮮人 說...

space,
我無需要用私家車呀,
搭公共交通就ok啦!

新鮮人 說...

naruto,
咁就要睇緣份了!

新鮮人 說...

laulong,
都係嘅,
不過我們連走上前講兩咀嘅衝動都無,
真係好怪,
有點唏噓!

新鮮人 說...

巔兄,
好開心這遍能"誘惑"到你出黎講兩句,
多謝哂!

變色龍我無睇過,
我係你友台嘅粉絲嘛,
所以唔多知道戲中嘅含意了。

Ogake 說...

篇blog既重點係最後一段.... 有時,緣份無左就係無左, 當日攬頭攬頸既朋友, 今日一樣可以係視而不見.....

Ruth Tam 說...

Don't really have good friends from old days. Classmates were not close in "reputable" schools.

新鮮人 說...

Ogake,
也對,
緣份飄忽無定,
來去無定數,
隨緣吧!

新鮮人 說...

ruth,
咁樣都幾寂寞喎!

樂遊 說...

假如我見到一些舊同學,舊友,我都唔會扮唔識,唉....我好怕無話題,或者又有點點自卑吧....
可能,佢見到你,見你又未死得,又有錢玩車,應該幾OK,那就「安心」啦,招呼嗎?不要啦,「只記共你當年曾經相識過」就OK啦。
朋友都是如此,有些時侯日日見,過了那段時間,就沒有了.....以前有點感慨(係我從來唔主動找人,都不知感甚麼慨),現在覺得人生大概如此。
原來真係會「痴笠笠」。十多年前,我和一班友(當時一個星期見幾次,現在十年無聯絡)不知何解走到屯門一間大戲院睇「金枝玉葉」,發現那間野朝朝有三級早場.....我地真係驚會「痴手痴腳」,幸好間野幾乾淨,沒有甚麼問題。
其實你中三應該可以入場睇戲吧?我小學時無三級制,只有「兒童不宜」,甚麼人入場,不多理。有個女同學(係呀,女仔呀)聲稱佢個阿爺帶過佢去睇.......那時我家附近都有幾間專播三級片的戲院,有「劇照」放在大堂,但主要位置都被塗上黑色「泳衣」。我會借D二行到附近「偷窺」,那時我真的以為戲內人真的穿泳衣演的。
三級戲院的結束,最可惜的是再也沒有那些抵死到極點的三級片名了!

新鮮人 說...

樂遊,
我不記得那時有没有三級制了,
不過肯定有"兒童不宜"嘅標誌,
仲話明未夠十八歲不準入場,
所以我唔敢闖關呀,
唔係俾人捉返學校見校長咪好大鑊!?

舊朋支嘅嘢真係好難講,
有啲好耐無見,
見返都唔會好生疏,
有啲就可能會相對無言,
或許我那個老友覺得我是後者啩!