2011年6月11日

阻住地球轉!

夏天熱到飛起,
人都容易燥啲。

我發現咗好耐,
就係好多人好喜歡係人流極高嘅地方企係度,
例如地鐵出入口、大路嘅樽頸位、酒樓支客嘅櫃大台前,
人愈多、路愈窄就愈多人喜歡企係嗰度,
佢哋可能係等人、聊天、現IPHONE、打機...
總之係都要企正係走道中間,
就算成條路被佢哋塞哂行唔到都唔理,
簡直當其他人無到,
叫佢哋行開啲就當聽唔到,
大聲啲叫佢又眼瞅瞅、嘴"表表",
好鬼唔願意兼表示好搞住佢哋咁,
個樣仲好似食咗屎咁樣,
其實明知會阻住嘅就一早唔好企係度,
哩啲咁嘅爬街,
我真係好想見一鑊打一鑊呀!
邊有人咁衰格架,
度度唔企係都要企正走道中間,
仲要唔多人唔窄嘅地方唔企喎,
你估條路係佢哋買咗架?
要約人等人嘅唔該約係一邊少人嘅,
依家人人有手電聯絡,
慌會揾唔到咩?

又例如係酒樓,
啲行人道已經好窄架啦,
啲人係都要放架BB車係路邊,
佢應該盡量都收起佢,
你多嘢係車上面唔方便收起係一件事,
條路窄就唔應該放係度,
人家行過嘢嘢要等你攞開,
塊面實會黑架,
所以做人唔好咁自私,
要先知先覺,
要人出到聲就無意思啦。

再衰格啲嘅就係啲一家大細喜歡一字排開咁行街,
成家大細又老又嫩又BB車十幾人,
行街時唔係二三個一排嘅,
為咗方便講嘢就闔家排開哂黎行,
一排開就十幾個人,
全條路俾佢哋闔家霸哂,
仲要好滋柔咁慢慢行慢慢講,
又唔會擰轉頭睇吓後面成村人俾佢哋闔家阻住哂喎,
哩啲咁嘅人唔會理人死活架,
咁大個人唔會唔知咁行會阻住條路架,
明知又故犯係乜吖?
衰格呀!

又好似啲人去酒樓攞位,
有啲人攞咗籌後係都要企定定係個櫃位前面,
仲要唔係一個人喎,
係全家大細闔家企係度包圍位哂個支客姐姐喎,
咁搞法,
你叫之後啲人點行入黎問人攞籌呀?
行開少少慌死俾人搶咗個位咩?
哩啲正"闔家產",
闔家財產人口都企哂係度呀!
阻住地球轉就係哩啲人嘞。

哩啲咁自私嘅人種通街都係,
自己衰格之餘仲教壞埋下一代,
簡直係污染社會呀,
必需重新教育過,
以免為害人間。

14 則留言:

naruto 說...

講得好

D人又自私,又驚蝕底,又無自覺,黑人憎

魔術師 說...

我都唔明香港點解話生育率低,人口老化,要殺校等等。明明行出街,成街都係細路同bb車,不停地阻街固喎!

五珍 說...

真有很多這些人嗎?是MK,CWB最多吧?

欣宜 說...

d師奶最鍾意係路中心傾偈

新鮮人 說...

naruto,
那些人自私而不自知,
佢哋唔會覺得自己有問題的,
還認為人家多管閒事,
講極都唔會明。

新鮮人 說...

魔術師,
香港嘅出生率應該回升緊,
其實要阻街何止bb車,
就係任何一個人企定定係路中心都可以的,
重點唔在止架車,
係自私不理人嘅心態。

新鮮人 說...

五珍,
通街都係,
尤其係人多的地方,
你可以留意吓。

新鮮人 說...

欣宜,
除了師奶外,
有些年青人都喜歡成班人企係路中心等人,
成條路俾佢哋阻塞哂。

Ebenezer 說...

在香港地,聽講阻街係犯法架。

新鮮人 說...

Ebenezer,
咁要叫差人拉佢地 囉。

DeepC 說...

這情況很常見.
我家有教唔好阻路, 不過我留意到不少同輩及後輩這方面的意識不高, 還有新移民, 真係人多勢眾. Haha

新鮮人 說...

deepc,
香港人多路窄,
若果唔注意這方面,
會對別人做成很不便的!

Haricot 微豆 說...

我記得小學時代,有「公民」丶「社会」丶和「常識」讀,敎學生守秩序㗎??!!

新鮮人 說...

微豆,
教了不代表會做得到嘛,
況且都唔知依家有無教哩啲嘢了。