2011年8月24日

三姑六婆 之 咪蝕底!



三姑:「喂! 衰嘢,你早前有無去輪米呀?」
六婆:「啋~~ 乜你無端端講埋啲羞家嘢架? 俾人輪?」
三姑:「你諗咗去邊呀? 我講盂蘭節輪大米呀?」
六婆:「哦~~ 梗有啦! 我仲輪咗兩輪添呀!你呢?」
三姑:「你慌我會蝕底俾人,我梗有輪佢大米啦!」
六婆:「話時話,你屋企無米開飯咩? 大熱天時走去輪人大米?」
三姑:「唔係啦,不過啲米拜過神,食咗保平安,平安米嘛!」
六婆:「你信咩? 啲米有無拜過神都唔知噃!」
三姑:「信好唔信好信啦! 我哋啲阿婆無乜嘢做,成日流流長揾啲世藝做吓囉!」
六婆:「咁又係,不過我嗰日見到有幾個阿婆輪到暈咗呀! 怕係中暑囉!」
三姑:「佢哋死蠢啫,濕毛巾、雨遮、清水我嗰日一早帶齊啦。」
六婆:「嗰日多人到呢! 迫到我死呀,我仲見有幾個阿婆俾人撞咗落地,頭都穿埋呀!」
三姑:「唉~~ 啲人又係嘅,都幾廿歲人囉,唔好聽講句都聞到棺材香啦,仲迫乜鬼吖!」
六婆:「無辦法架,你迫我迫怕蝕底囉,執輸行頭慘過敗家呀!」
三姑:「咁都唔洗搏埋條老命架? 平安米未食就唔平安啦!」
六婆:「你唔好話我話,有啲阿婆阿公好鬼盲塞架,話之你,有隊排都係咁迫呀!」
三姑:「哩啲咪係衰格囉,食古不化,自己攞黎衰,迫迫吓容乜易自己都俾人撞低架!」
六婆:「唉~~ 你估個個好似你同我咁有教養咩? 無辦法啦!」
三姑:「咁又係, 我同你真係好有修養架,又唔貪小便宜,唔係個個得架!」
六婆:「有修養,行快步啦,裕記好似就執啦,行得慢執唔到荀嘢架啦!」
三姑:「係噃,快啲衝嘞!」

16 則留言:

naruto 說...

真人真事嚟架?定你老作咋?

imak 說...

希望我唔會有一日變左三姑同六婆.......... [汗汗汗]

新鮮人 說...

naruto,
哩啲係典型例子,
屢見不鮮,
我早前真係見到有阿婆輪米輪到頭破血流呀,
仲要救傷隊幫佢包頭送院架,
真人真事。

新鮮人 說...

imak,
三姑同六婆唔錯吖,
幾醒呀,
輪米識帶毛巾仔、雨遮同清水,
醒目婆黎架!

哈哈哈~~~

laulong 說...

人老了,多啲財富多啲物質就有安全感,我諗我老咗都係走唔甩!

新鮮人 說...

laulong,
你現在就想做定預備去輪米呀?
唔洗咁快吧!
哈哈~~~

DeepC 說...

真係好怕啲老人家爭先恐後, 如果對方是後生仔還好, 後生仔多數會讓下佢地, 但老人家跟老人家爭, 就很容易發生危險.

新鮮人 說...

deepc,
都無辦法,
講佢哋都唔聽,
係要出咗事先知驚!
唉~~~

l.minor 說...

我曾幾何時,都睇過單新聞話輪米攪到頭破血流同中暑

新鮮人 說...

i.minor,
這些事,
年年都發生緊,
只是我們没有留意!

Haricot 微豆 說...

>> .... 見到有阿婆輪米輪到頭破血流呀

唉! 真係:人出錢,佢出命。 無謂貪d小便宜,唔值得!!!

新鮮人 說...

微豆,
有些老人家就是喜歡貪小便宜,
又想攞多少少嘢,
有點安全感,
人多你推我撞下,
結果就發生了意外了。

匿名 說...

年年都係咁,總有婆婆會暈低,就不如送上門把啦!根本好多義工,過時過節幫啲咩咩中心,送福袋比老人家嘅!硬係要佢地大熱天時去排隊!﹣肥媽

新鮮人 說...

肥媽,
老人多,義工少嘛!
而且老人家百無聊懶,
去排隊攞米又可以同其他老友記吹吓水,
算是他們不多而少有的"娛樂"活動了。

macy 說...

新鮮人

講到尾都係貪小便宜, 好多慈善機構啲老人中心舒舒服服, 有冷氣嘆, 有義工招呼, 五時三刻派洗頭水, 毛巾, 面餅, 麥皮...成日有D超平一日遊, 去淺水灣酒店食大餐, 大時大節仲有得去酒樓飲, 仲可以聽古巨基, 黎耀祥唱歌, 影埋相都得, 都係十蚊八蚊. 去輪大米, 暈低搽枝藥油都十幾廿蚊啦! 偷雞唔到蝕渣米, 做三姑六婆都要做個精明啲既.

新鮮人 說...

macy,
有啲的確係抱有貪小便宜心態的,
有啲又或者打發時間,
成班人一齊排隊又可以聊吓天咁囉,
我發覺好多老人家有唔安全嘅感覺,
就算唔係好窮有積殼防饑嘅想法,
尤其係經歷過第二次大戰,
佢哋好想儲多啲錢和食物係身邊,
感覺會安心好多的!