2011年9月15日

Crazy Jungle選大王

轉吓眼又快到Crazy Jungle選大王的時候了,
自從幾年前四眼龜連任大王以來,
整個Crazy Jungle都俾佢搞到一鑊粥,
哩個四眼龜小氣又無用,
又話自己低下階層紅褲仔出身,
好明白森林裏動物們嘅需要,
點知做就.......
唉! 都係算吧啦!

Crazy Jungle裏的動物知道四眼龜要退休,
很多都對大王這個寶座"蠢蠢欲試",
好想過吓大王癮,
例如有陰陰濕濕的黑面豺狼,
佢潛伏係大王身邊多年,
仲服待過兩任大王,
從前佢對Crazy Jungle嘅動物一向不聞不問,
但近來唔知點解變得鬼咁親民,
成個森林四處走,
又四出走訪各區,
老遠嘅山區、近郊嘅池塘都唔放過,
一派老好人的樣子,
搞到大家差啲俾佢感動到呀!

另一個"吼"實大王寶座嘅就係古惑女狐狸,
佢係森林會議局裏做過主持人,
專長係玩手段、耍古惑,
但又一副面善心好嘅嘴臉,
好多人都俾佢嘅假仁慈呃到架,
今次選大王佢口口聲聲話自己唔夠料,
其實係試吓口風,
睇吓有無人支持佢,
其後又話自己心目中有個更適合嘅人選,
講到底咪了解自己唔夠人鬥,
所以咪俾個台階自己走落黎囉,
你話係咪奸到出汁吖?

另外大熱門嘅有個少爺馬,
佢出身豪門命水好,
一生唔洗憂柴憂米,
雖然無乜才能又愛飲兩杯,
但符符碌碌又做到大王嘅副手,
祖上又同上面關係密切,
上面係邊個?
咪係森林太上爺囉,
佢平時唔會出現架,
只係係背後暗中操控森林決策,
依家四眼烏龜都係聽佢操控,
做個有名無實嘅大王喳。
講返轉頭,
其實咁多個大王候選人當中,
最唔恨做嘅就係少爺馬嘞,
事關佢一向食好住好又唔多洗做,
食老豆剩落黎嘅都足夠有凸,
依家做副手咪幾好,'
有虛名又唔洗自己揹飛,
佢都唔恨做大王,
做乜要咁辛苦自己攞黎做喎。
話就係咁話,
但係皇帝唔急太監急呀,
周圍啲老鼠、蟑螂、蜈蚣就心急如焚,
個個急住撲出黎叫佢幾時幾日辭職去參選最啱時候,
人家唔急佢哋急乜喎,
咪諗住將來可以撈返一官半職囉,
哩啲咁嘅蛇蟲鼠蟻真係通曉森林時務,
正經嘢唔做,
淨係識看風駛舵,
如果將來真係俾哩班嘢上場就死得動物多囉!

本來早前仲有個爆炸頭老虎乸想參選嘅,
不過知道太上爺唔多老黎佢就無哂聲氣了,
講到底大家係咁爭都無作用,
太上爺話邊個咪邊個囉,
嗰十二個選舉團大員都係睇阿爺頭嘅,
下任大王係邊呀?
大家心照啦,
有乜好爭呢!

12 則留言:

Ebenezer 說...

animal farm?

新鮮人 說...

ebenezer,
差唔多啦,
你唔覺得依家班人好似啲狐狸、豺狼、野豬、烏龜...咩?

laulong 說...

成班友喺度押注,講真,講才識,豺狼最高,另外嗰兩個,好過依家嘅中學生一啲咋!

新鮮人 說...

laulong,
我都覺得豺狼能力高啲,
不過係能夠真係做得好,
或者有無心真係為香港人做嘢就唔肯定了。

naruto 說...

上任大王係咪腳痛嘅河馬呀?

匿名 說...

one head fog water....可以可以多D tips...

l.minor 說...

哈哈~琴日眼咗小小以為你寫故事

今日認真睇,原來係講...哈哈,你係得嘅

新鮮人 說...

Naruto,
你真聰明,
全中呀,
咪就係去左太上爺度做副主席的跛腳河馬囉。

新鮮人 說...

匿名,
特區選阿頭,
你留意邊幾頭人會選,
對照下就好易明了。

新鮮人 說...

I.minor,
謝謝你, 咁有心返轉頭再睇多次, 多謝哂。

Haricot 微豆 說...

你仲好嘢過新填地d講故佬!!!

我去過非洲,知道森林世界,黑幕重重,羣獸弱肉強食,咁d土著又點樣去保護自己呀???

新鮮人 說...

微豆,

唯有自求多福囉。

新填地?仲有咩?
講故佬?
轉行搵食了。