三姑六婆 之 咪蝕底!

三姑:「喂! 衰嘢，你早前有無去輪米呀?」
六婆:「啋~~ 乜你無端端講埋啲羞家嘢架? 俾人輪?」
三姑:「你諗咗去邊呀? 我講盂蘭節輪大米呀?」
六婆:「哦~~ 梗有啦! 我仲輪咗兩輪添呀!你呢?」
三姑:「你慌我會蝕底俾人，我梗有輪佢大米啦!」
六婆:「話時話，你屋企無米開飯咩? 大熱天時走去輪人大米?」
三姑:「唔係啦，不過啲米拜過神，食咗保平安，平安米嘛!」
六婆:「你信咩? 啲米有無拜過神都唔知噃!」
三姑:「信好唔信好信啦! 我哋啲阿婆無乜嘢做，成日流流長揾啲世藝做吓囉!」
六婆:「咁又係，不過我嗰日見到有幾個阿婆輪到暈咗呀! 怕係中暑囉!」
三姑:「佢哋死蠢啫，濕毛巾、雨遮、清水我嗰日一早帶齊啦。」
六婆:「嗰日多人到呢! 迫到我死呀，我仲見有幾個阿婆俾人撞咗落地，頭都穿埋呀!」
三姑:「唉~~ 啲人又係嘅，都幾廿歲人囉，唔好聽講句都聞到棺材香啦，仲迫乜鬼吖!」
六婆:「無辦法架，你迫我迫怕蝕底囉，執輸行頭慘過敗家呀!」
三姑:「咁都唔洗搏埋條老命架? 平安米未食就唔平安啦!」
六婆:「你唔好話我話，有啲阿婆阿公好鬼盲塞架，話之你，有隊排都係咁迫呀!」
三姑:「哩啲咪係衰格囉，食古不化，自己攞黎衰，迫迫吓容乜易自己都俾人撞低架!」
六婆:「唉~~ 你估個個好似你同我咁有教養咩? 無辦法啦!」
三姑:「咁又係， 我同你真係好有修養架，又唔貪小便宜，唔係個個得架!」
六婆:「有修養，行快步啦，裕記好似就執啦，行得慢執唔到荀嘢架啦!」
三姑:「係噃，快啲衝嘞!」

Defriend!

Defriend這個字在字典是找不到的，
但相信很多人都會明白點解，
近年facebook, 微博、twister、google+流行，
大家網上朋友一大堆，
認識不認識都叫做朋友，
在網上進行虛擬交友，
唔啱嘴形嘅可以立刻"defriend"佢，
要佢完全消失於自己的網絡世界，
當無見過那個人，
其實又真係無見過，
都唔知算唔算係"friend"!

今朝係plurk裏看見某君"defriend"咗某人，
聽聞是兩人意見不同，
加上言語間又出現衝突，
結果其中一方就"defriend"了另一位了，
而被"defriend"了那一位也不甘示弱，
在plurk裏開名發表"我係我"宣言，
意指唔啱key就算，
自己唔會改變做人態度，
啱key就自然會埋自己堆。
一樣米養百樣人，
不同人不同意見很正常，
只要亙相尊重就可以了，
但在網上世界裏，
大家看不到對方，
說話語氣很多時會變得很不尊重，
有些粗口相向的，
有些則皮笑肉不笑的講風涼話，
總之極不禮貎。
相反，
在現實圈子裏，
人們說話多留三分情面，
一來不想開罪別人，
二來也怕他朝狹路相逢，
但在網絡世界則没有這種顧慮，
因為大家亙不相識，
網名也是虛擬的，
放上網和說過的話也未必真實，
大家可以大吹特吹，
誇口自己家財千萬又得，
說自己靚仔過林峰、嬌俏過鍾嘉欣都可以，
who care? who know?
大家似相識實則亙不相識，
就算在現在世界裏遇見也不知，
發覺你唔啱嘴形時咪丙你兩咀囉，
然後就"defriend"埋你，
跟手仲講句"你咬我食呀?"!
這就是現在虛擬世界裏流行得"交友方式"之一了。

在現實界世裏則無哩枝歌仔唱，
朋友唔可以click個"defriend"按鈕就消失，
他們會一直存在在你的生活圈子裏，
就算你唔見佢，
你和他的朋友圈子總會有交疊的機會，
大家的言談和行為也可能傳到對方耳裏，
產生某些影響，
而且要交投緣的朋友的確很難，
因此在現實中，
我們的說話、行為都比較慎重，
不會隨口up當秘笈，
朋友間會多點忍讓和尊重，
不會隨隨便便當作兒戲!

燕瘦環肥!

燕瘦環肥擇愛侶
腩肉燒骨任君追
美醜肥瘦無分誰
只求賢慧愛相隨

好自為知!

今朝十點幾看看恆指，
差點給它嚇破膽，
才開市一小時就下跌千五點，
本來早料這兩天會大跌，
但是真的預料不到會跌得咁誇張，
雖然後來收縮到五百點左右，
結果還是要跌千多點收場，
真是給美國累死，
跌一個信貸評級就拖累全球經濟，
罪魁禍首未死，
池魚先死了。

我身兼數學和經濟白痴雙學位，
是經濟理論文盲，
但老人家說過"
「先洗未來錢，老來實會賤!」，
一個長期以借錢渡日嘅政府點可能有三條A嘅信貸評級呢?
說到底不就是"數字遊戲"，
加上三間國際評級機構都係自己友，
點會評衰自己國家呢?
現在忽然有家"玩認真"，
來個"AA+"俾佢嘆，
不過美國佢未死，
我哋股市、樓市先死，
黑狗偷食，白狗當災，
鬼叫佢仲係全球最大的經濟體系咩?
你吹佢唔脹、扯佢唔長，
唯有"GOOD"聲吞咗佢，
暫時無佢乜辦法喎!
不過時移勢易，
美國佬借貸渡日嘅日子唔可能太長了，
全球都係度忍佢，
忍忍埋一肚氣就爆啦，
唔好話中國會漸漸冒起，
其他國家都唔想再依懶哂美國，
美國亦不是唯一有消費力嘅進口國，
相信在可見嘅不遠未來，
美國不能再獨佔經濟領導，
全球將進入百花齊放，
不再是由單一經濟體系控制哂全球經濟，
到時那些只是靠借貸過活的國家，
將會面臨更嚴進嘅考驗，
絶不能再過討人便宜的生活了。

為吸引日本資金盡最大努力!

有奶便是娘，
肚滿腸肥最重要，
不需理會人家從前做過什麼，
只要有利可圖，
怎麼厚顏無恥都可以做得出，
這是某些人的寫照。

黑龍江省方正縣為了吸引日本人投資，
立碑紀念日本在侵華時期在東三省的開拓團死亡者,
更要求商戶牌匾也要標上日文,
否則不會獲發牌照，
黑龍江外事部官員稱此舉是為了引史為鑑，
開拓和平未來，
用心真的非常良苦。

我們香港是以吸引外資投資為本，
但手法不外是減輕利得稅，
或是建立有系統、透明、方便的營商環境，
這些方案看來已十分落後了，
更不能與方正縣新穎、直接的手法相比，
我們的政府理應立刻組團拜訪，
多向當地有智慧有遠見的幹部取經，
並且盡快學到做到，
不要空口說白話，
否則只會落後他人，
不單被人迎頭趕上，
甚至會流失大量外資企業，
希望特區政府要以此為鑑，
積極討好外國人為上，
例如在學校裏強制性學日文、改日本名、用日本人為教師，
建立第二次世界大戰大東亞共榮圈硏討團，
相信只有這樣貫徹推行"媚外"，
方能把本土日本資金保留，
不會讓黑龍江省專美啊!