寒冬 熱 維他奶!

剛才睇天氣預告，
嘩。。。。星期日將會降到1 - 4度喳，
今晚都係得6 - 7度，
仲要落毛毛雨，
唔怪凍到成身震哂啦。
印象中好似未試過凍到1度，
最冷都係4 - 5度左右，
大約係讀小四時候，
返上午班中午十二點幾就放學，
那年冬天不單止凍，
又係不停落毛毛雨，
加埋吹西北風，
真凍到十隻手指無哂知覺，
天寒地凍不特止，
仲要企係沙田火車站食西北風等火車返屋企，
嗰時仲係柴油火車年代，
沙田火車站仲未改建，
淨係得一楝一層式平房售票處，
成個車站月台無遮無掩，
一陣西北風夾雜住啲毛毛雨吹埋黎，
真凍到入心入肺，
叫哂救命。
有時手頭鬆動的話，
身上有幾毫子就買枝熱維他奶飲，
揸係手可以暖手，
飲落去成身暖曬，
咁先至頂得順啲冷風，
但係飲完記得還樽喎，
有兩毫子攞返架。
話時話依家仲興唔興飲熱維他奶或麥精賣呢？
又係時候去士多搵返啲童年往事黎懷舊一番了。