變了質的母親節

一年一度嘅母親節又黎喇，
舖天蓋地嘅廣告宣傳攻勢又開始囉，
花店，酒樓，精品店，珠寶店，衣服鞋襪以至電視宣傳，
總之同母親有關係又好，無關係都好都同我哋洗緊腦，
母親節喎，做人仔女嘅梗係要同阿媽食飯兼買禮物，
如果你無表示就等如不孝仵逆，
嘩～～～你唔係呀，母親節都唔同老母食飯？
物你咁不孝架，佢生你育你呀！
一年一次喳，你咁都唔做啲嘢？
起碼送枝康乃馨吖！
咪就係一年一次咁大把囉，
好多人食完餐飯咪等到做冬嗰日再做孝順仔女，
平時幾個月都唔見一次，
電話都無個，你話係唔係得個樣吖？

唏！咁母親節嗰日同吓老母食吓飯都無問題吖，
係就係，不過嗰日人多車多，
出街食飯又唔抵（次次食親佢都話唔值），
買返黎煮咪又係辛苦個老母，
你煮咪得囉，
我煮梗係無問題（如果食佢唔痾嘅話），
但係要我煮埋畀班好日都唔理老母啲人食就唔係好想喇，
個個食完成座佛咁坐係度，
唔好話洗碗吖，執碗都懶呀，
要我煮埋畀佢地食，
條氣就唔係好順喇！

不如取消咗母親節喇，
又或者改做一個月一次，
起碼逼到佢地一個月去見老母一次嘛，
咁樣可能先發揮到關懷母親嘅目的．
而家母親節都變哂質了，
好似變咗係啲商人賺嘅時機，
同埋畀啲平時『不孝』嘅人做返啲補償，
送完禮物，食完飯個個急急腳就走，
都無同老母講過十句話，
老母問多兩句都厭煩，
咁樣係母親節咩？？