學好英文為賭馬!

講開"賭"我又記起幾年前一件事情,
當天係星期日早上係街坊茶餐廰食緊早餐,
因為係賽馬日所以成班賭客係咁"刨馬經",
賣魚佬,賣菜婆,地盤佬以至學生哥什麼都有,
對面枱有兩個六七十歲嘅街坊打扮阿伯"楝"高隻腳係咁刨,
刨刨吓見佢哋居然攞份英文馬經出黎刨添,
重要講哂英文馬名咁互相討論,
真係估唔到係啲咁嘅街坊餐都卧虎藏龍,
唔知嘅以為自己去咗"香港會"添!

係香港,
咁嘅年紀又好英文嘅人真係唔多,
如果賭馬可以令到人去學英文嘅,
或者都可以算是一件好嘅"副產品"吧!