肉隨粘板上!

飯唔可以唔食,
電唔可以唔用,
隧道好多人日日都要過,
港鐵好多人天天都要搭,
政府為了減少行政成本,
好多市民必需品都賣哂出去,
又或者畀一兩間集團玩哂,
早前咪連啲屋邨商場都賣咗囉,
其實這種做法真是好有危險!

老實講,人家是謀利機構,
你將啲民生事業畀哂佢玩,
基於商業角度來計,
人家一定想有咁多賺咁多啦,
你政府又軟弱無力,管制無方喎,
好似早年東隧話加價,
政府批評佢又點喎,
人哋仲話要買賺埋你紅隧添,夠吋未?
噚日西隧又加啦,政府又是無能為力,
一句聲都無得出,究竟當初啲合約係點制定架?

今次兩電續約商討,
對於年年賺幾十億嘅兩電,
政府最後的絶招只有威脅立例管制價格,
幾經辛苦才可以將利潤比率降至9.99%,
都只是僅僅合乎當初葉澍堃所言而已,
而且兩電均認為電費減低未必可逹雙位數字,
這無形是玩數字遊戲的開始,
到時市民真正可以有多少減免還是未知之數!

大市場小政府,
政府可以討價還價嘅本錢又少,
如果不好好計劃出售資產和專利權的事宜,
將來被人㩒住黎搶嘅情況只會愈來愈嚴重,
小市民生活就會更加難捱,
相反有錢佬就愈來愈有錢了!