係人民養你哋架??

小小一間漢普頓酒店被執達吏查封,
付了房租的旅客竟被驅趕,
從這件事可見政府的僵化和無能,
更見各個部門只會各家自掃門前雪,
總之一切以自保為上,
置香港聲譽於不顧!

看見這單新聞後,
本來想『按圖索驥』抽出原兇,
可是愈睇混亂,
係未債主東亞銀行太涼薄呢?
封舖兼逐客好似好無人情味喎!
話哂東亞主席李國寶都係議員吖,
洗唔洗咁絶呀?
但諗真啲人家又唔係做善堂嘅,
無錢還就封你舖囉,
又好似無乜錯喎,
李生又咁忙碌,
哩啲芝麻綠豆嘅事佢點會理吖!

咁點解嗰間漢普頓酒店仲接客呢?
法庭早幾個月己經話咗無錢還就要封舖啦,
你哩幾個月仲收新客係未想"搶錢"先?
聽講話好似有人洽購緊間酒店喎,
仲話九月就會成交添,
咁又無理畀甘泉航空咁做而家又唔畀漢普頓做嫁?
睇吓睇吓又好似無錯喎!

債主無錯,債仔無錯,
咁仲唔係個官錯?
無理由話封就封,
唔理啲客人嫁嘛,
但係司法獨立吖嘛,
個官點判無需要通知其他部門架,
啲政府部門都話事後幾個鐘先知有咁嘅事啦,
人家梗係唔想執你手尾啦!

好嘞,好嘞,又唔係你又唔係佢,
咁究竟邊個先要揹黑鍋先?
下面有一大堆機構,
商務及經濟發展局,
旅遊事務署,
酒店業界,
旅遊發展局,
民政事務總署,
消費者委員會,
旅遊業議會....
發生咗事之後就走出黎講嘢,
但無個做到嘢出黎,
結果就係叫啲旅客去"梁顯利社區中心"暫住,
哈哈哈~~~ 嗰度好似係畀啲露宿者暫住噃!
再加埋個價值二三百蚊嘅香港半日遊,
真係失禮死人呀,
當人家係乞兒咩?
人家好恨你個爛鬼半日遊咩?
見過鬼人家都唔再黎啦!

而家台灣又開放畀大陸遊客嘞,
地方又大過你,
新鮮感又多過你,
服務又未必差過你,
價值又差唔多,
香港今次自己整衰個招牌,
睇黎遲早無運行,
諗吓諗吓,
最錯就係我哋自己,
錯在畀錢養班廢物囉,
大家記唔記得四川地震時温總理講過乜吖?
『係人民養你哋,你哋睇吓點辦事嘞!』

相關文章:
田少！你去咗邊呀？