「想像」中的你 ~ 梁巔巔

開始之前必需說明一下，
「想像」系列中所說全是我憑空幻想，
完全沒有半點真憑實據，
並不能代表當事人的真人如何的。

「想像」系列的第一人我揀了梁巔巔，
原因很簡單，
因為佢夠巔，
相信無論我寫乜佢都唔會嬲我嘅，
係咪?
哈哈哈~~~~

認識梁巔巔係由"風子"那裏開始的，
在"風子"的blog裏時常見到個"吋吋貢"嘅人留言，
一時又話自己靚仔，
一時又話自己係天才小厨師，
嗰個就係梁巔巔嘞，
於是走去佢個blog度睇返佢啲舊文，
心想睇吓佢又有幾醒先，
睇吓睇吓真係覺得佢個人幾吋咀喎，
成日懶醒懶聰明咁，
仲週不時爆幾句爛口添，
嗰時我心諗條友咁吋咁爛口，
都係唔啱key架嘞，
費鬼事理佢啦!
直到有次我同"space"係blog度唔知為咗乜嘢"嘈餐死"，
兩個人正在亙不相讓爭持不下，
忽然見到梁巔巔留咗句話，
大意係想化干戈為玉白之類啦，
我見佢竟然"叉隻腳"入黎，
又好言相勸喎，
咪俾個面佢唔好再嘈囉，
反正我和"space"兩個人各持己見，
再堅持下去都唔會有結果，
不如就咁結束咗個爭論算了。

自從嗰次後我就耐不中都有去梁巔巔個blog留吓言，
我見佢寫啲blog文鬼鬼馬馬，
有時又有啲咸咸哋喎，
幾啱我口味吖，
大家唔好誤會我話"咸咸哋"哩樣嘢呀，
我意思係佢寫啲嘢輕輕鬆鬆又口語化好啱睇喳，
況且佢寫嘢又坦白，
鍾意就鍾意到不得了，
唔鍾意就爆佢粗，
雖然有時就懶醒認叻，
不過勝在夠真誠，
認叻無問題吖，
讀者同唔同意又係另一回事嘛，
哈哈哈~~~~

至於佢嘅背景我都有「想像」過架，
佢曾經講過自己從事古董生意，
而佢又叫自己做乜乜公子喎，
加上佢又係滿州族，
唔通佢係乜嘢清朝沒落王孫?
因為家道中落無錢洗，
所以要出售屋企嘅古董珍藏?
但係又諗邊度有貴族咁滿口爛舌架?
諗吓諗吓都係無結論，
心諗人哋係咪貴族之後關你屁事咩，
啱key咪講多兩咀囉，
咪咁八啩啦!

最後我想講一樣嘢，
就係巔巔係佢blog裏便登嗰啲食物相，
大部份都拍得好差好難睇，
無論佢點努力介紹啲食物點正點靚，
但係睇見啲鬆、郁、濛、變色嘅食物相就唔多開胃，
結果讀者多數唔相信佢介紹嘅嘢好正，
有時仲會覺得好核突添，
巔兄，
你換咗部相機未呀?
用電話影都買部拍照功能好啲架啦，
咁樣你嘅介紹自然會事半功倍架，
你嘅blog亦都會生意蒸蒸日上，
更加車水馬龍，
絡繹不絕!

要說的還有很多，
其餘的留侍有機會吧!
巔兄，
我只是瘋言瘋語一番，
請多多包涵!