2011年1月17日

老媽語錄: 我要利工民!



雖然新鮮媽已經又冷帽又頸巾又羽絨大褸,
全身都包到好似隻糉咁樣了,
佢仲係話:「我想買返件利工民羊毛內衣。」
於是我摸吓佢隻手但又唔係好凍喎,
「依家邊度仲有利工民架? 好似執咗啦!」
「邊個話執咗, 好似係深水埗呀!」
「你依家唔夠暖咩? 件羽絨唔得咩?」
「暖就暖,不過利工民啲衫真係又薄又暖架!」
「無啦啦都唔知係邊度揾件利工民俾你! 雞X嘜好唔好呀?」
「唔好,又貴又麻麻,佢哋啲嘢差哂啦!」
「咁真係唔知仲有無利工民噃!」
「無利工民? 咁要秋蟬牌啦!」
「秋蟬牌? 又係乜傢伙黎架?」
「秋蟬牌羊毛內衣呀! 我做女時好興架!」
「噢......」

後記:
利工民秋蟬牌羊毛內衣是同一個品牌,
利工民係公司名,
秋蟬牌係商品牌子,
因為日子久遠,
新鮮媽把兩者搞混亂了,
同系的還有利工民金鹿線衫,
又薄又通氣,
夏天著咗成身爽哂架!

20 則留言:

xiao zhu 說...

邊個話利工民執左呀!今勻新鮮媽就醒過你喇。

http://www.leekungman.com/new1/

你快啲帶新鮮媽去買番件啦!

新鮮人 說...

小豬,
係噃,
都係你厲害喎,
不過牛池灣、順利都有佢嘅分銷,
有無需要走咁遠去買呢?

xiao zhu 說...

今次輪到你有啲某君的影子喎!

大佬呀,而家都冇人話一定要去深水埗買喎。新鮮媽要嘅嘢好簡單,就係買返件利工民羊毛內衣啫。你仲唔嗱嗱臨帶佢去,仲大大聲話牛池灣、順利都有添!快啲 Go! Go! Go!!

新鮮人 說...

小豬,
其實佢大大聲話要件時,
身上根本就著住一件從前買落的了,
我覺得佢係心癮,
想見吓利工民個招牌,
想見吓啲黑口黑面嘅老員工,
佢話以前去過買利工民,
有個員工阿姐問有無買過噃,
仲一手拉佢衣領睇吓佢件衫嘅招牌喎,
我估佢想睇吓嗰個女人死咗未,
未死就俾返啲顏色佢嘆囉!

哈哈哈哈~~~

xiao zhu 說...

哈哈,既然係咁,你就更加要帶新鮮媽去深水埗一趟喇!

新鮮人 說...

小豬,
哩個理由可以考慮吓,
如果真係去,
我嗰日要飲定開聲茶,
唔係唔夠人fight架!
哈哈哈~~

the inner space 說...

新鮮兄:你時常去灣仔應該可以去

莊士敦道224號
Tel: 25728840

香港利工民織造廠有限公司灣仔門市部,這較去深水埗方便些!

新鮮人 說...

space,
我不是說過我很少去灣仔嗎?
一年都係幾次咁大把,
新鮮媽就更少去,
佢好怕搭車搭咁遠的,
所以深水埗啱啲!

匿名 說...

嗄!我讀新鮮兄你的舊blog文,好多次都提過去灣仔”聊“,例如:吃泰妃雞啦,吃豬手飯啦,檀島吃蛋撻啦,去泰式按摩啦,買羅漢松啦 。。。。。Etc etc!

問清楚度清楚尺碼,咁就唔使新鮮媽長途跋涉,去深水埗或者灣仔囉!



Space

新鮮人 說...

Space,
羅漢松不是在灣仔買的,
其餘的都是幾年內的事了,
請你相信我吧,
我真係很少行灣仔的!

其實老媽子唔係志在件衫,
係想懷緬吓從前的歲月啫,
佢想親自去睇吓利工民嘅商標、老店,
保暖嘅衣服她有很多,
買不買利工民都無乜影響,
帶佢親自去睇吓間店會有意思啲!

the inner space 說...

新鮮兄:Morley wool 摩利羊毛衫,都是很平民化的老人羊毛衫,可以考慮!

吉之島 Jusco 有得買。

新鮮人 說...

SPACE,
謝謝!
不過她真正要的是"回憶",
不是一件衫,
明白嗎?

匿名 說...

喺囉!新鮮兄買咗新的,新鮮媽就可以放下舊的回憶,let go!

著起新的摩利羊毛衫,就開始新的記憶。


Space

xiao zhu 說...

Space:

點解你硬係唔聽人講嘅呢?新鮮講得好清楚,新鮮媽唔係志在買新衫咯。而且,呢個回憶又唔會帶黎咩負面嘢,點解唔俾佢去唧?點解夾硬要佢放下唧?呢啲咁簡單、又無傷大雅嘅事,點解唔可以幫佢償吓心願喎。

匿名 說...

小朱姐:可能是我的悲觀主義,我卻往負面去想。每件事都可能是正面回憶,也可能是睹物思念故人。

例如:可能是新鮮爸送給新鮮媽的第一件禮物,再買多次就凃令新鮮媽傷感亡夫多一些。


humbly yours
Space

xiao zhu 說...

如果係咁,就更加唔應該刻意去做啲嘢要佢壓抑佢嘅情感同思念。呢啲根本係常情,旁人唔適宜過份一廂情願去幫佢決定咩對佢係好、咩係唔好。

新鮮人 說...

新鮮媽都幾廿歲囉,
好話唔好聽都嗰頭近了,
佢可以想去邊就去邊,
唔需要有任何顧慮了,
況且都唔到我話事,
佢想去佢自己都會去,
我都無得反對,
不過我陪佢去就安心啲,
唔洗擔心咁多囉!

the inner space 說...

有意見分歧是無損網友之情嘅!

匿名 說...

哈哈哈咁週末有暇就去深水埗秋蟬牌利工民撞吓有冇機會見到有個有王敏德咁靚仔的猛男陪位婆婆嚟買羊毛衫。

利工民深水埗南昌街188號


Space

匿名 說...

為何有好女不入利工民