血拼辦年貨!

年尾辦年貨真係唔易架，
尤其去到街市見到啲戰鬥力超強嘅師奶，
真係要出盡九牛二虎之力先至買到嘢，
有時覺得同打場硬仗無乜分別。

噚日晨咁早諗住去買返隻雞做節啦，
點知一入到條街就見人山人海嘞，
男女老嫩乜人都有，
男嘅就幫手做苦力攞嘢，
左右手各數大包，
女嘅就負責落場戰鬥，
而雞隻當然是首項要爭奪嘅目標，
中國人過年人人都要有隻雞嘛。
見到鮮雞檔前人頭湧湧都知大事不妙了，
唔好話行入去吖，
就係想睇吓有無雞都唔得呀，
後尾決定捨鮮雞買冰鮮雞，
點知去到冰肉檔一樣人頭湧湧，
人撞人、身碰身，
生死大搏鬥咁嘅形勢，
我見到門口放咗一大堆冰鮮雞被人揀，
於是唔理三七二十一衝埋去堆人群度，
見到左右各位師奶手起手落，
左揀右拋雞起雞落揀個不過，
大家嘅身體亙相緊貼又毫無芥蒂，
真係熱鬧得非常。
說時遲那時快，
眼見面前有隻又肥又正嘅冰鮮雞在雞山堆出現，
諗住今次仲唔發逹，
點知我隻手伸到一半就見到到隻肥雞被右邊個師奶一手搶咗，
唉~~ 都怪自己唔夠佢手快，
唯有繼續尋找再二隻囉，
最後幾經千辛萬苦終到揾到隻靚嘅，
我立刻以電光手一嘢納咗佢入黎，
然後俾錢想甩身，
但係好困難咁先至可以擠返出外圍，
入時難出時亦難呀，
真係成身都軟哂!

去到中式糕點檔想買啲糖椰角、糖蓮子啦，
一樣係人山人海水洩不通，
出埋飲奶力先至擠到入內圍，
見到四周嘅師奶七嘴八舌要乜要乜，
個售貨阿姐聽都聽唔切咁多把口，
更加唔會理邊個先後次序，
亦唔會有排隊哩家嘢，
就算排都無用，
啲師奶一樣會飛象過河插隻手埋黎打尖，
同佢講道理唔會理你，
同佢講禮貎就更加鬼啋你，
唯有一嘢衝埋去大大聲咁叫自己要乜，
然後攞定啲錢"隊"俾個阿姐，
售貨阿姐認錢唔認人，
邊個俾錢先就俾邊個，
我諗都唔諗就大大講:「唔該一斤糖椰角、糖椰絲兩溝，再黎半斤糖蓮子!」，
叫完隨手就"隊"埋錢俾個售貨阿姐面前，
如是這終於可以成功買到貨品了，
然後又再千辛萬苦擠返出去，
背後留下成班師奶繼續叫喊不斷。

其餘啲濕濕碎碎就唔講嘞，
總之樣樣要買嘅都要經過苦拼氣鬥啦，
買完嘢返到屋企成個人散哂，
真係辛苦過擔泥，
你都唔會話唔佩服啲師奶，
女人仔一個為咗頭家，
佢哋真係發揮到超強的小宇宙力量，
我哋啲男人真係未必做得到架!

後記:
順帶想提一提的是"街市最強殺力武器"這樣東西，
大家估吓係乜嘢?
唔係師奶獅吼功，
亦唔係麒麟臂批踭，
更加唔係"攞命3000"，
而係無敵拉餸鐵車仔，
依家啲師奶買餸興攞埋架連袋嘅手拖車仔，
貪佢方便唔洗攞餸攞到手軟，
佢哋一入到街市就係咁拖住架車週圍衝，
唔會理你死活，
話知你對腳俾佢架車轆過，
又或者撞到你上五吋下五吋赤赤痛，
一於當無事發生過，
你話佢咩佢就一對鳯眼啤實你，
然後仲惡人先告狀咁話:「街市係咁架啦，你唔鍾意咪無黎囉!」，
如果係你撞到佢咩，
佢又會媽三媽四，
真係俾佢吹到啤一聲呀!
所謂好男不同潑婦鬥，
事關嘈起上黎，
真係唔夠佢哋啲把口咁辣架，
無謂自遭其辱，
都係"good"聲吞咗啖氣算了。