2011年1月31日

血拼辦年貨!

年尾辦年貨真係唔易架,
尤其去到街市見到啲戰鬥力超強嘅師奶,
真係要出盡九牛二虎之力先至買到嘢,
有時覺得同打場硬仗無乜分別。

噚日晨咁早諗住去買返隻雞做節啦,
點知一入到條街就見人山人海嘞,
男女老嫩乜人都有,
男嘅就幫手做苦力攞嘢,
左右手各數大包,
女嘅就負責落場戰鬥,
而雞隻當然是首項要爭奪嘅目標,
中國人過年人人都要有隻雞嘛。
見到鮮雞檔前人頭湧湧都知大事不妙了,
唔好話行入去吖,
就係想睇吓有無雞都唔得呀,
後尾決定捨鮮雞買冰鮮雞,
點知去到冰肉檔一樣人頭湧湧,
人撞人、身碰身,
生死大搏鬥咁嘅形勢,
我見到門口放咗一大堆冰鮮雞被人揀,
於是唔理三七二十一衝埋去堆人群度,
見到左右各位師奶手起手落,
左揀右拋雞起雞落揀個不過,
大家嘅身體亙相緊貼又毫無芥蒂,
真係熱鬧得非常。
說時遲那時快,
眼見面前有隻又肥又正嘅冰鮮雞在雞山堆出現,
諗住今次仲唔發逹,
點知我隻手伸到一半就見到到隻肥雞被右邊個師奶一手搶咗,
唉~~ 都怪自己唔夠佢手快,
唯有繼續尋找再二隻囉,
最後幾經千辛萬苦終到揾到隻靚嘅,
我立刻以電光手一嘢納咗佢入黎,
然後俾錢想甩身,
但係好困難咁先至可以擠返出外圍,
入時難出時亦難呀,
真係成身都軟哂!

去到中式糕點檔想買啲糖椰角、糖蓮子啦,
一樣係人山人海水洩不通,
出埋飲奶力先至擠到入內圍,
見到四周嘅師奶七嘴八舌要乜要乜,
個售貨阿姐聽都聽唔切咁多把口,
更加唔會理邊個先後次序,
亦唔會有排隊哩家嘢,
就算排都無用,
啲師奶一樣會飛象過河插隻手埋黎打尖,
同佢講道理唔會理你,
同佢講禮貎就更加鬼啋你,
唯有一嘢衝埋去大大聲咁叫自己要乜,
然後攞定啲錢"隊"俾個阿姐,
售貨阿姐認錢唔認人,
邊個俾錢先就俾邊個,
我諗都唔諗就大大講:「唔該一斤糖椰角、糖椰絲兩溝,再黎半斤糖蓮子!」,
叫完隨手就"隊"埋錢俾個售貨阿姐面前,
如是這終於可以成功買到貨品了,
然後又再千辛萬苦擠返出去,
背後留下成班師奶繼續叫喊不斷。

其餘啲濕濕碎碎就唔講嘞,
總之樣樣要買嘅都要經過苦拼氣鬥啦,
買完嘢返到屋企成個人散哂,
真係辛苦過擔泥,
你都唔會話唔佩服啲師奶,
女人仔一個為咗頭家,
佢哋真係發揮到超強的小宇宙力量,
我哋啲男人真係未必做得到架!

後記:
順帶想提一提的是"街市最強殺力武器"這樣東西,
大家估吓係乜嘢?
唔係師奶獅吼功,
亦唔係麒麟臂批踭,
更加唔係"攞命3000",
而係無敵拉餸鐵車仔,
依家啲師奶買餸興攞埋架連袋嘅手拖車仔,
貪佢方便唔洗攞餸攞到手軟,
佢哋一入到街市就係咁拖住架車週圍衝,
唔會理你死活,
話知你對腳俾佢架車轆過,
又或者撞到你上五吋下五吋赤赤痛,
一於當無事發生過,
你話佢咩佢就一對鳯眼啤實你,
然後仲惡人先告狀咁話:「街市係咁架啦,你唔鍾意咪無黎囉!」,
如果係你撞到佢咩,
佢又會媽三媽四,
真係俾佢吹到啤一聲呀!
所謂好男不同潑婦鬥,
事關嘈起上黎,
真係唔夠佢哋啲把口咁辣架,
無謂自遭其辱,
都係"good"聲吞咗啖氣算了。

12 則留言:

Terence Yun 說...

打完仗。

xiao zhu 說...

新鮮:

你都唔簡單喎!佩服佩服!

新鮮人 說...

鹿米館,
你都去咗血拼呀?
收鑊豐富啦!

新鮮人 說...

小豬,
無辦法啦,
有好多嘢都係同老媽子買嘅,
唔想佢老人家去"搏命"嘛,
老人家去哩個時候哩啲地方好危險架!

naruto 說...

我好怕果架車仔架,好阻掟又易比佢"cake"親,唉!

我早兩日去海味街做野,之後搭地鐵個師奶同佢老公講,今日唔買,過兩日無哂架啦,講時咬牙切齒,唔講以為發生乜野大事呀

Ruth Tam 說...

So exciting! Lucky I don't need to do that.

新鮮人 說...

naruto,
嗰架鐵車仔真係幾攞命架,
我都唔知俾佢轆過無數次了。

辦年貨對於師奶嘅講係好大件事呢架,
唔咬牙切齒咁嘅鬥志點可以買到呀,
哈哈哈~~~~

新鮮人 說...

RUTH,
真係幾剌激架,
我有諗過如果你去到點樣,
諗吓諗吓你都係唔好試,
因為你實唔夠班師奶鬥架,
太危險了。

匿名 說...

男不與女闘,一向不和師奶們爭! 補唔返。

Space

新鮮人 說...

SPACE,
哈哈哈哈~~~

yuen luk luk 說...

辛苦哂囉.....買得咁辛苦, 咪可以豐衣足食過年啦! 新年快樂!

新鮮人 說...

yuen,
唔辛苦,
新年去街市難免如此了,
一年一次無所謂,
新年快樂呀!