2011年4月18日

魔鬼泳室!



舊blog友可能會看過我舊居的照片,
但新近來訪的朋友就未必知道了,
上圖下方中間那個紅色方格就是我孩童時代的居所了,
今天我想講講自己學習游泳的故事,
如果大家對我成長的環境知道多點,
應該會比較容易理解我當時的境況。

我小時候是住在海邊的,
以一身健康古銅色膚色,
未學行路就會先學游水,
所以小時候的外號就是"海王子"了。
住係海邊唔識游水除了會被人恥笑外,
最重要係安全問題,
父母無可能廿四小時監視我們,
尤其在酷熱的夏天,
朝早一起身,
父母外出不在家時,
幾兄弟就會跳落海游個早泳,
而且行落海邊都不用一分鐘,
如果不是自小就學曉泳術,
隨時浸死十萬九千幾次了,
所以我父母都非常贊成我們盡早學識游水,
免得他們擔驚受怕,
當然識游水不代表萬無一失,
但是幾兄弟一起游有照應,
出事的機會自然少得多了。

講返我學游水的經過,
當時我大約四五歲左右,
細佬細我差不多兩歲,
其實那時我們兩兄弟都時常在海邊玩水,
不過新鮮媽知道我們都未識游水,
多數會叫我大佬睇住我們,
我大佬大約大我十歲,
所以絶對有能力完全控制住我們兩個"蚤豆窿",
而我大佬就在毫無先兆下"教"我們學游水了。
記得有一次當我和細佬在沙灘邊玩水時,
佢係海外出不遠處游過來,
游到大約水深高過我個頭的地方就停了下來,
然後佢同我打咗個手勢,
叫我游過去佢嗰度,
我貪過癮又膽粗粗咪腳"un un"慢慢咁撥過去啦,
行吓行吓就覺得對腳唔到地嘞,
初初仲係水度彈彈吓就撥過去,
後黎愈來愈深就開始驚嘞,
於是就想游返轉頭啦,
點知我大佬即時走過黎,
一手將我抱起,
我以為佢咁好心抱我埋岸啦,
點知佢抱住我向海中心行出去喎,
愈行愈深我又愈黎愈驚,
於是就想掙扎走人啦,
點知佢話哩度好深架,
我一郁就唔到地架,
當時我變成肉隨粘板上,
驚到震得個叫字,
但係都無人理我,
佢愈行愈出,
最後衰到一嘢咁將我拋咗出海外邊,
我咕嚕咕嚕咁成個人跌入海底,
嚇到我發哂癲咁向水面亂咁撥,
千辛萬苦浮返出水面時已經飲咗幾啖鹹到痺嘅海水,
不停咁咳、吐、嘔、叫......
跟住係口水、鼻涕、眼淚一齊黎,
而且咸到鬼殺咁嘈係度亂咁撥水,
點知個衰大佬唔救我不特止,
仲係距離我幾步係咁叫我游過去,
我出盡力咁"爬"過去少少,
佢又退後少少,
如是者"爬"吓退吓咁游返咗埋岸,
到我對腳踩到海底時我成身都軟哂,
口裏仲含住啲咸水,
就係嗰刻我個衰大佬又陰陰笑咁行埋黎,
然後一言不發咁又抱起我,
我發哂狂又咬又踢咁掙扎都無補於事,
結果又再俾佢抱咗出海中心拋落水,
可憐的我又再重復剛才的"爬"水行動,
如是這重覆了兩三次後,
我整個人都虛脫哂,
叫到把聲都沙哂都無人理,
但係我發現到最後一次被佢拋落海時,
已經變得好輕易就可以"爬"返埋岸,
開始能夠控制自己在水中的動作了,
後來自己在心口高的水位練習多幾次,
結果終於學識了自己游水了,
雖然仲係好樣衰嘅狗仔式,
但不竟已經可以"活動自如",
游深游淺任我控制了。
而當我在淺水區繼續練習狗仔式同時,
我細佬便面對着我剛才的惡運,
在外出不便處叫到拆天咁嘈。

我的舊文:
我的舊居

18 則留言:

l.minor 說...

哈哈~魔鬼教官呀!

咁你以前住咁近海,打風落雨會唔會好危險?

新鮮人 說...

i.minor,
風吹雨打都習慣了,
只是打颱風就比較危險,
要事先用石塊把屋頂的"鐵片"壓實,
把其餘容被風的東西扎好,
這樣問題還不算太大。

悟樂 說...

依尐真係不成功, 則C人...

Ivy 說...

好可怕的學游水經歴!!!
你現在游水應該游得好好了是不是?
好奇的問一下,新鮮人的大佬大你十年,你和他有沒有代溝的?

山山 說...

但識游水係好好玩架!!!

新鮮人 說...

悟樂,
死不了的,
我們幾個都係海邊長大,
這些只是小童科,
不會有問題的。

新鮮人 說...

ivy,
我游水不是很叻,
不過唔怕水就真。
大十年當然有代溝,
不過隨着年紀漸大,
代溝也逐漸減少了。

新鮮人 說...

山山,
游水梗係好玩啦,
不過依家學游水就開心過我以前了。

匿名 說...

我細個時,8歲倒啦,
就係俾我哥哥好「唔小心」咁
推咗落成人池,
浸唔死,學識踩水同游水㗎,
不過佢嘟有跳落嚟救我。
佢仲用個兩蚊港幣,
呃咗我個五蚊港幣,
話個兩蚊Coin有浪花花紋,
係咪靚好多呢!
今時今日,佢為人老竇,
我仍然不停提住!哈哈。

細蚊Boy

DeepC 說...

嘩~~ 咁教人都得!?
有點嚇人啊!

Ruth Tam 說...

Interesting.

新鮮人 說...

細蚊Boy,
你哥哥小時候對你都幾"好"喎,
這些小趣事在我們成長後,
的確令人回味,
很多時都會讓我們發出會心的微笑。

新鮮人 說...

deepc,
無事嘅,
佢會睇住我哋,
人唔經過深刻的經驗是不會成長嘛,
no pain no gain,
這樣大咗少可以面對殘酷的社會。

新鮮人 說...

ruth,
thanks! =)

Haricot 微豆 說...

Someone told me this once: If you throw a new born into the pool, they will instinctively swim as if he/she were submerged in embryonic fluid.

I have not seen any mother throwing her baby into a swimming pool yet. But it seems your brother wanted to test the theory and you live to tell the story :O

新鮮人 說...

微豆,
我都聽過類似嘅故事,
說嬰兒在母體裏時都是沈在液體中,
所以天生有游水的能力,
只是脫離母體後就慢慢失去這種能力了,
而我這個子可能就証實咗這個理論是有根據的,
哈哈哈~~

悅悅 說...

你真係要多謝你個好大佬,虧佢夠膽咁教你游水,哈哈!

新鮮人 說...

悅悅,
係架,
多得佢唔少架,
成口鹹水又無助嘅感覺好深刻架,
一世都記得,
包括埋游水哩架嘢!