2011年4月27日

死開一邊,唔該!

你吸過毒未?
你指鴉片、大麻之類?
仲有K仔或者任何軟性藥物。
我未食過,煙仔就有食,算唔算吖?
都算架,不過唔會食到神志不清囉!

點解要吸毒呢?
唔知喎, 我都未食過,啲人話可以減壓喎。
可以咩? 壓力大到非食不可咩?
我點知,你咪去問啲藝人囉,佢哋講之嘛!
聽過好多藝人私底下都有食喎?
傳聞係咁囉,無實則數據喎。
點解佢哋嗰行咁興食呢?
壓力大嘛,三更紅五更黑,又日夜巔倒開工啩!
人人做嘢都有壓力啦,咁咪人人都要吸囉?
唓~ 我鬼知佢哋點諗,我又唔係明星,我就唔會吸囉。
我想了解吓啫。
關你屁事咩? 人家吸唔吸關你乜事?
我擔心啲風氣會傳染到年青人喳。
你唔洗慌,青少年一早就玩緊咳水、丸仔!
咁大劑? 咁點算好?
無架,依家連啲職業司機開工前都啪返兩粒先,死未?
死架,以後出街小心啲囉,金睛火眼睇實啲Van仔貨車囉!
成街都係車點睇呀? 不如啪丸駕駛捉到罰釘牌啦?
都好噃,仲有醉駕呀,累死人架!
重罰就啱,吸毒、啪丸、醉酒佢死佢賤,唔好累到別人嘛!
好呀,你同政府講啦!
講有用咩? 等如你叫啲細路唔好飲咳水,會唔會聽吖?
唔會囉,咁點好?
自求多福,出街一眼關七囉!

18 則留言:

the inner space 說...

藝人藝術家創作人都有吸毒豪飲性愛豪賭的記錄,是要刺激大腦,大腦受到極大外力,從中找尋創作靈感。

務求刺激大腦,一樣唔夠,兩樣一起來,再唔夠三味一起上,最後四元及第!

所有能夠刺激大腦的都做齊,咁去發掘靈感,在靈魂出竅之時,靈感泉源一瀉千里,靈感一到,就如滾滾長江,就如黃河之水。

新鮮人 說...

space,
又可以試吓揾把叉插吓個腦喎,
咁樣夠直接呀,
包保思湧如泉!

哈哈哈~~

naruto 說...

D人無控制力呀~即係失控,自己都控唔到自己

the inner space 說...

新鮮兄是創作人鰈珊乸應該比我清楚!

新鮮人 說...

naruto,
我諗啲人根本無諗過要控制,
佢哋唔覺得係一回事,
當食糖咁食囉!

新鮮人 說...

space,
好多人食緊都唔係做design,
也不是藝人,
有無數據支持吸毒同designer有直接關係喎!

l.minor 說...

有d人太空虛,無聊,點知一試上引...

新鮮人 說...

l.minor,
千奇唔好俾人無聊,
一得閒啲人就講是非、搞分裂,
又或者走去吸毒,
係等啲人做到連去廁所都無時間就唔會亂諗嘢,
更加唔會有時間去吸毒了!

悟樂の空間 說...

每每睇到尐人食完出街... 開車真係心都寒....

匿名 說...

佢地唔識 natural high,意志薄弱俾人控制又唔自愛無鬼用...

蚊蚊

新鮮人 說...

悟樂,
我都未親眼見人啪完丸仔個樣喎,
你見過啦?

新鮮人 說...

蚊蚊,
natural high?
high咗會唔會失控架?
咁樣都危險喎,
唔俾人控制都無用喎!

laulong 說...

嗯嗯,那些人,要死就行開一邊死,不要累人累物!

新鮮人 說...

laulong,
對,
吸毒是他們的選擇,
但影響到別人就太離舖了,
人命尤關,
佢死佢事,
無理由咁自私唔理別人危險的,
所以一定要嚴厲取替。

匿名 說...

黃,賭,毒,一定要你攪一范,你會攪邊范?我打死都唔會攪毒!

新鮮人 說...

匿名,
其實邊樣都死,
死法唔同而已!

Haricot 微豆 說...

Generally speaking, drug addicts commit crime to feed their habits and many kill themselves from OD. But drunk drivers are the worst, they kill others too!!!!

新鮮人 說...

微豆,
我同意你的看法,
但香港近年興啪完丸子(軟性藥物)後去駕駛,
這個現在職業司機中愈來愈嚴重,
而且啪丸揸車發生意外時有所聞,
情況和醉酒駕駛一樣嚴重啊~