2011年9月16日

放飛劍!

俗語話"放飛劍"即係隨地吐痰。

老實講,
我至#憎人隨地吐痰,
除左好嘔心外,
仲好唔衛生,
早前沙士時,
個個又帶口罩又洗手,
依家無事,
D人又打回原形,
污糟邋遢隨地吐痰,
今朝我就不幸地遇見一個咁既扑街了。

今朝初秋微涼,
秋風吹下吹下好鬼爽咁,
正當我係斑馬線前想迎風過路時,
唔知邊度走出個老坑係我身邊竄向前,
我無理佢照過馬路啦,
點知個老坑忽然係我兩步位置前仰天長號,
跟手一陣濃痰在口腔滾動聲,
我距離近,
痰聲清晰入耳,
我立時心口有作悶作嘔的感覺,
點知噁心野陸續有黎,
條老坑係口裏滾完啖濃痰後,
諗都唔諗就係我面前兩步位置"咳吐"一聲,
放出了一把又大又黃既"飛劍"出黎,
"飛劍"因風向影響,
還在我跟前不遠的空中搖曳了幾下才落地,
那刻我真係嚇到目定口呆,
好彩只係微風輕吹,
如果再大風d咪吹正我塊面?
就係我心神不定時,
個死老坑已經頭也不回走人,
到我想丙鑊金佢時都渺無人影了。

哩d 咁賤咁衰格既扑街一定要嚴懲,
除左罰錢坐監外,
最好罰佢空手清潔返啖痰積,
等佢知道乜野叫做核突同污糟。

12 則留言:

naruto 說...

有一堆廢人完全唔理人架,鍾意吐痰,巴士剪指甲,隨手掉拉垃,大大聲non-stop講野等。。。

應該捉去堆填

新鮮人 說...

Naruto,
哩d 人無讀過書,
又或者讀屎片囉,
佢地自私自利,
唔會理人,
要嚴懲才可以收效,
罰佢地掉乜就食返佢,
睇下仲有無人敢亂黎?

Ebenezer 說...

在大陸,呢種情況簡直避無可避:(

梁巔巔 說...

話唔定都會有啲 "痰花" 濺咗喺你係件衫上, 條褲上咖噃.....

yeee.... 驚驚. 糟糟.

新鮮人 說...

Ebenezer,
以前真係好多,
依家會少一點吧?
我最驚奇的一次看人吐痰也是在內地的,
有機會都可講出黎笑下。

新鮮人 說...

巔兄,
唔會哇?
睇過無事喎,
咪嚇人好喎。

L L 說...

最憎就係哩啲!

l.minor 說...

人黎!拎個狗頭鍘出黎!

DeepC 說...

好怕見到這些情境, 用"嘔心"來形容真貼切不過.

新鮮人 說...

laulong,
我都係至憎,
衰過掉垃圾,
唔洗見到,
淨係聽到吐痰聲就想嘔呀,
哩啲人咁自私又唔衛生,
一定要重罰,
罰五千就算不多了。

新鮮人 說...

i.minor,
啱啦,
唔斬唔得呀,
影響衛生又衰格,
斬完再斬~~~~

新鮮人 說...

deepc,
同意,
聽到都打冷震,
好嘔~~~~