"強勢"政府 下令:
你哋班蟻民咪阿支阿咗,
再嘈我都唔會理你哋嘅,
我決定咗係咁就要係咁,
我特登畀啲走私雞入黎,
就係等今日有借口殺雞,
你哋同我通通收檔轉行,
香港唔會再有活雞出現,
我硬要一日內三讀通過,
立法滅絶香港養雞賣雞,
由得內地雞場佢哋去養,
到時發雞瘟都唔關我事,
遲啲就輪到啲養魚養豬,
乜嘢畜牧業都通通殺光,
到時就唔怕雪卡或豬瘟,
我都係為你哋市民好啫,
咁就會一了百了好安全,
賠返少少畀你哋算係咁,
以後點生活就要靠自己!
今日要講嘅就係咁多嘞,
等我返歸餵吓啲錦鯉先!
相關文章:
又無鮮雞食囉!
12 則留言:
:O.............
噢, 知道政府大人 :x
若雞販真心給市民，可以有合格的衛生的活雞吃，點解唔接受『天天清』呢？有冇具體數字 backup呢？佢地威脅要停業，還恐嚇市民，以後在沒有新鮮活雞吃喇。顯然若是要『天天清』，對引入走私活雞利潤降低，凈喺賣合法途徑，進口的活雞賺到的利潤，還不合附期望。
啲雞販反而話政府打擊走私活雞不力，喂！你地個雞販商會，都可以幫吓忙，成立監察組，維持行內秩序，舉報不守法雞販，篤啲害群之馬出來格！顯然『神又喺你，鬼又喺你！』
喺雞販自己話如果『日日清』就寧願結業，好嘞，政府提出賠償方案，打算以約10億元公帑，收回牌照，基本上提供過去同類賠償的3倍，但是零售商要求10倍賠償；批發商要求以租金和生意額等計算賠償；運雞車更「進取」了，要求20倍賠償。
從1997年本港首次爆發禽疫開始，市民經常被這個問題疲勞轟炸，早已感到厭倦；另外市民對於吃雞的口味，也有轉變，現在雞隻銷售的市場佔有率，凍雞佔61%，冰鮮雞佔22%，活雞只佔17%弱！
以上數字資料來自我轉載的【明報社評】
明報社評的結論是：
『不過我們要清晰地指出，市民欲擺脫禽流的困擾和威脅，不等於願意付出不合理的高昂代價，活雞業者不應該有一朝發達的心態，亂開天價；更不應動輒透過激烈行動，以社會安寧來要脅大眾。政府則要把好關，不應該為求達到目標而屈從苛索。
事實上，時間已不在活雞業界一邊，如果條件過分，最終吃虧的，絕不會是政府和市民。「合情、合理」應該是終結活雞問題的四字真言。』
而我的結論是： 啲雞販喺度玩嘢，利用禽流感威脅恐嚇市民，拷詐政府，制做混亂，企圖混水摸魚，最後再還是一句『神又喺你地，鬼又喺你地！』
space,
我唔同意你嘅睇法,
不是可話走私雞是雞販促成的,
每個行業都有害群之馬,
不可以話大部份走私雞都係一般雞販嘅習性,
你又有數據嗎?
把關從來都是主要由政府做的,
無聽過有政府把主要責任推到行業者身上!
咁樣等如叫人自己找証據証明自己無罪,
十分可笑!
雞販嘅要求是否高就好難講,
其實從佢哋嘅要求來睇,
佢哋係唔想結業的,
所以才會叫咁高價來威逼政府!
啲養雞賣雞嘅人做咗哩行幾十年,
你叫佢哋點轉行?
唔通走去賣麥當勞呀?
明報講嘅唔代表就係啱嘅,
我唔同意佢嘅睇法!
啲雞販係有威脅嘅行徑,
但都係為兩餐,
唔係個個都係貪得無厭嘅,
你唔好一竹篙打一船人!
至於市民嘅口味,
唔係啲人唔想食新鮮人,
只是隨着內地物價飛昇,
食冰鮮雞平啲咁解啫,
有錢嘅你估啲人唔想餐餐食新鮮雞呀!
你無所謂,
唔代表大部份家庭煮婦無所謂呀?
全港邊類人買餸最多先?
有邊個師奶唔係話新鮮雞好食好多吖?
你唔覺有分別只是你好少煮啫,
你話悅香雞用冰鮮雞整有無分別吖?
日日清是一個可以商榷的議題,
但做政府嘅要留心領聽行業人仕嘅難處,
唔係嘢嘢懶強咁逼人哋就範先得架,
你估政府班人好醒咩?
佢哋諗啲政策實啱架?
點解內地人哋養雞就得,
香港就唔得吖?
人哋佢死佢賤定係香港政府無能,
斬腳趾避沙蟲吖?
大陸養雞有事,
香港可以免疫咩?
你咪學政府咁天真啦,
一有事咪一樣會中招,
根本問題唔係養唔養,賣唔賣,
而係點養點賣,
這個政府實太懶,
以為畀大陸養就無事,
如果有事時,
唔通大陸又話唔畀人養雞呀?
你諗清楚至講啦!!!
新鮮兄：
明報個社論幾中肯平衡了各方面利益。你同情啲雞農雞販,但有冇冧過留返啲雞過夜傳染禽流感個機會，不是祇留在雞隻之間，人都可能染病，唔喺一定食咗，病雞至得到禽流感，流感病毒喺會在大氣傳播。
禽流感人傳人在內地印尼泰國外國啲地方都已時有傳聞，
你是想到發生沙士咁嘅疫症時才臨急抱佛腳一天內急急，
叁讀通過議案？防患于未然啊 新鮮兄！
內地地大可以隔離養雞業有事時都有地方遷移香港得個千平方公里叫啲人跳落海乎？
space,
你同意佢睇法咪覺得明報中肯,
所以這不是肯定明報說得對的point!
我不是同情啲雞販,
而是覺得政府嘅態度好野蠻粗暴,
所以啲雞販才會有咁大嘅反應,
政府咁嘅態度只會成事不足!
你嗰句"隔離養雞業"真係笑死人,
不如禁咗食雞仲好啦,
遲啲禁埋豬,深水魚,牛....
咁咪一了百了囉,
斬腳趾避沙蟲!!!
『隔離養雞業，真係笑死人』
你笑我幼稚唔緊要，但咁你笑埋好多很多人噃。
歐美的養雞業都是設在遠離人煙的地區，
利用中央屠宰再輸入市區賣畀的消費者，
你咁講法即是否決咗人地實行咗幾十年，
沿用的食禽同畜牧業行之有效的方法噃。
或者活雞將來會有
但要食就要花一大大大筆錢
space,
唔係笑你,
只是覺得人家嘅方法未必一定啱用啫,
就好似你話西方民主不是適合照字搬紙咁,
西方人口無中國咁多,
農場本來就是起在人少的地方,
本來不是為了避免什麼禽流感!
個point係而家有不同嘅病菌出現,
乜都封哂"殺哂係未最好嘅方法呢?
係這件事上,
政府一路掩蓋自己辦事疏忽,
而且態度又強橫無禮,
啲官員淨係想把問題推給大陸就算,
佢哋做嘢就算將來只入冰鮮雞都會出事,
風水佬呃人十年八年,
今次件事如果真係實行,
一兩年就見到入口冰雞一樣會有出錯,
唔信你慢慢放長雙眼,
我話嘅!
哩個政府係乜料,
你同我都心知肚明!!!
伊麵丹,
去動物園應該會睇到! =p
睇得唔食得....唔要:(
伊麵丹,
唔到動物園,
到時想見真嘅活雞都好難囉!
發佈留言