霍建寧的答覆

昨天長和系的業績發佈會上，
記者問李超人對大學生四千元工資的看法，
執行董事霍建寧代答:
「四千只是最低限數，佢叻仔啲咪可以高啲人工囉!」
相信不同人對這番話有不同的看法，
大學生打工仔可能會覺得佢好無良，
四千咁低咁咪實拖低哂個中位數，
就算叻極都會變相減低起薪點囉。
係架，
老闆一向都係睇住個Costing做人，
經濟差人工自然會降低，
咁降幾多先至算合理呢?
都係睇市場。
但係又無理由大學生仲低過個清潔工架?
咁又好似係喎，
不過做清潔嘅都好辛苦架，
你可以試吓頂唔頂得順先，
佢哋啲人工真係有血有汗。
不過話分兩頭講，
一個用腦力，
另一個用勞力，
直接比又唔係好公平嘅，
所以啲畢業大學生值幾多就要睇吓佢哋嘅腦力有幾高了，
自問腦力高嘅大學生一定會揾到唔止四千元，
你有料嘅慌老闆唔會畀多啲錢留你咩，
但係揾極都得幾千嘅就要睇吓係咪自己出問題了。
這個世界好現實，
你有本事嘅一定揾多啲，
如果無經驗兼英文半桶水嘅就無得嘈囉，
予其係咁鬧人不如進修吓、磨利自己把刀仲好啦，
你要人畀多幾千蚊你都要人家畀得口服心服架!