2010年6月22日

「想像」中的你 ~ 心空 (space)


「想像」系列第二彈的主角是"心空"(space)
在開始之前要再說多一遍,
這個系列的內容全是穿鑿附會,
看人家的網誌多了就胡亂想像而己,
我不曾認識當中主角,
而且連一面也未見過,
一切都是我的「幻想老作」,
讀者無聊時一看無妨,
但千萬不要認真看待。

完全不記得如何認識"心空"了,
只知道他來了留言,
我又去看他的網誌,
就是這樣成為blog友。
想像中的"心空"是與別不同的,
身形方面,
他說自己身材不高,
記得他曾經形容以自己的高度走到外籍同事的老婆面前,
他雙眼位置正好對着她的雙峰,
是真是假我不知道,
不過這種自嘲式幽默卻讓我樂上半天;
"心空"他選了"企鵝仔"做自己的blog相,
估計是和他的高度有關,
加上他又說自己比較深歸內向,
所以腦海裏出現了一個行路呆呆頓頓的小傢伙,
但千萬不要為他的外表蒙蔽,
這隻企鵝仔嘅記性可以很好,
幾年前你在blog裏說過什麼他都會記得很清楚,
而且他有強勁的搜尋功能,
會竭而不捨的把你說過的說話找出來,
是很好的抽後腳專家,
又或者當你說過什麼事、介紹過什麼地方等等,
企鵝仔都會很快的把相關資料展示到你面前,
我時常取笑他如果轉行做私家偵探一定會更成功。

如果要我找一個形容詞給"企鵝仔",
我會用"包頂頸"這個詞,
在這幾年裏,
包括現實生活當中,
和我爭論最多的人就是這隻"企鵝仔",
無論是政治、文化、愛情觀、人生道理.......
總之乜都可以嘈餐死,
而且佢又好耐力喎,
你留完言佢又一定會反駁你,
你一言佢一語來來往往,
有時為咗一個point可以反覆爭論到三四十次之多,
非常有耐性同毅力,
尤如馬拉松選手,
而且佢嘅洞察力又強,
文中的每一個字眼他都會同你針著,
有時我真頂佢唔順,
無佢咁好氣就費鬼事再理,
一於無眼屎乾淨盲,
不過在過程中我學識了一樣嘢,
就係道理未必會愈辯愈明,
有時愈辯只會愈令你頭昏腦脹,
所以唯有"不辯"。

對於一些好辯的人,
有時你會想"鍊"死佢,
曾經何時我都想過"鍊"死哩隻"企鵝仔",
佢嗰啲似是而非嘅長篇大論真係好鬼討厭,
講嘢又嘢嘢頂到你"行",
但係又懶鬼斯文有禮咁,
咁又無辦法無端端爆粗鬧佢喎,
有時真係被佢頂到我爆炸。
所以憎佢我就梗架啦,
不過我又幾欣賞佢有佢做人的想法,
雖然大部份我都唔同意,
但係一樣米養百樣人,
無必要樣樣都要同自己睇法一樣,
至少佢有自己一套嘅思想啦;
另外我係極之欣賞他能很用心咁寫blog,
讀者可以看到他每一篇文章都做足資料搜集,
當中所討論事物嘅來源、出處、解釋等等都十分齊全,
有時甚至過於詳盡,
按住個"老鼠滑輪"向下碌極都碌唔完,
根本好少人會好細心咁慢慢睇哂,
我估佢唔係唔知,
但哩隻"企鵝仔"依然故我,
完全根據自己的想法去做,
好嘅可以說有原則,
唔好嘅可以係固執,
不過咁都幾好,
每個人有自己嘅風格,
blog係佢嘅,
佢想點寫咪點寫囉,
你睇唔睇係你嘅自由,
但我尊重佢嘅認真和固守原則,
總好過嗰啲搞到個blog花哩花碌,
但係內容空洞無物嘅傢伙。

本來還有一些更深入的想討論,
不過當中涉及較多私人事情,
這些還是保留下來,
雖謂「想像」系列全是憑空相像,
但人言可畏,
凡事適可而止,
今篇就此閣筆,
希望"心空"不要怪我,
也不要太認真針著當中內容,
風花雪月,
大家一笑泯千仇!
(我知我哋唔係有仇,只係順口啫。)

ps:
如估計無錯,
"心空"一定會對這篇細心審閱,
然後逐點幫我糾正,
這個就是他了!

64 則留言:

嘿嘿 說...

我想象:

梁巅巅像戴眼镜的潘志文。有点风流倜傥。

空空儿像秃头的岳华,好记忆得有秃头!嘿嘿~

新鲜人像斯文老实却又有点伶俐的黄百鸣,虽然执着但又很民主开通。

印象得对吗?

嘿嘿 說...

我都是说那些明星们年轻的形象!

梁巔巔 說...

哈哈哈哈哈! 好正! 尤其是~ "有時甚至過於詳盡,
按住個"老鼠滑輪"向下碌極都碌唔完,
根本好少人會好細心咁慢慢睇哂,
我估佢唔係唔知,
但哩隻"企鵝仔"依然故我,"

另, 啱. Space 兄係一君子. 起碼, 唔假. 唔係好似 "秋秋" 呢啲咁撚假西!

"秋秋" <--- 我接近開鳩埋名.

xiao zhu 說...

鼓掌!

新鮮,好中意呢篇,寫得好好!

呀,仲有一樣嘢關於企鵝仔嘅,佢仲好中意估嘢,然後將自己所估嘅寫到真嘅一樣,唔知好嬲定好笑!

匿名 說...

I like Space's blog because of all the information. He is one heck of an "encyclopedia" and researcher. He puts a lot of efforts into his blog and it shows. If he is as communicative in person as he appears to be in his blog, I think he would be a very interesting person to talk to.

exilee

新鮮人 說...

嘿嘿,
我諗後生嘅潘志文會靚仔過巔巔喎,
人家係小生嘛,
哈哈哈~~

心空嘅樣我就估唔到了,
不過佢話佢唔靚仔喎,
係唔係光頭我都唔清楚,
要佢自己講了!

至於我?
我靚仔過黃百鳴九條街,
佢塊面成個鞋抽咁,
人家話我似王敏德架!
哈哈哈~~~~~

新鮮人 說...

巔兄,
我真係估唔到邊個係禾火禾火喎,
我識唔識架?
係咪我無去過佢個blog呢?

新鮮人 說...

小豬,
係啦,
有時我都會被佢誤導,
睇佢"估"完我真係會以為係真架,
最明顯一次咪以為你住係紅碪海邊啲豪宅囉!

好快就會講到你了,
你驚唔驚我亂估一通呢?
哈哈哈~~~

新鮮人 說...

exile,
無錯,
space可以係一個很健談的人,
也可以係一個和你爭論不休的人,
一係會很開心,
一係會很勞氣,
針無兩頭利,
你要有心理預備!
哈哈哈哈~~

xiao zhu 說...

驚? 我膽生毛,冇有驚、冇有怕!

樂遊 說...

Space兄仲未來「逐點幫我糾正」WOW?!
另外,由某資本主義社會雜誌內的相片看,巔巔唔似潘志文......那幅相的巔巔有點江湖味

xiao zhu 說...

>>Space兄仲未來「逐點幫我糾正」WOW?!

計我話,阿 space 其實而家都唔知睇得幾過癮,見到我哋你一言我一語咁,佢梗係想等我哋講多啲先,又可以自我陶醉一下,又可以製造多啲 expectation 至出現。然後呢,就氣定神閒咁,首先會多謝新鮮兄俾面,又頓首又盛,客套一番,跟住呢,先至慢慢逐一糾正、澄清、解釋等等等等。

新鮮人 說...

小豬,
見你咁講我就放心嘞,
我一定會出盡力咁「想像」你架,
哈哈哈~~~~

新鮮人 說...

樂遊,
唔洗急,
我點都會等到佢出現嘅!

對於巔兄嘅長相,
我都有同感,
不過唔敢講出口,
因為如果佢真係江湖大佬我就大大鑊囉!
哈哈哈~~~

新鮮人 說...

小豬,
我覺得你很了解佢嘅行為模式,
我都有同感,
佢好喜歡等人講完一大輪,
然後才施施然咁行出黎講一大堆嘢,
睇吓今次係咪咁嘞!

macy 說...

新鮮人

關於space的外貎, 我都想像不到. 他鮮有描述吧?!

你都寫得好啱咁噃, 他喜歡在與你討論/爭辯時, 拋一大堆資料出黎, 睇得黎都眼瞓, 唔想再坳. 但係我好似無同佢坳過呢, 睇你地坳都几過癮.

我諗佢用企鵝做profile相, 除左係高度之外, 仲係因為佢想保持一點童真?!

他喜歡留心及猜想人家的住處/工作/背景等, 有時可能會令人覺得他小心眼同埋有機心, 之不過, 出得黎寫blog, 寫得出黎, 又怕咩你講呢, 我就覺得無所謂.

關於他的文章, 如果我有興趣的, 我真的會由頭到尾看完, 但係無興趣的, 就一隻字都不會看哦!

新鮮人 說...

macy,
童真!
係, 我都有咁嘅感覺,
可能佢心裏係個大細路啩,
哈哈哈~~~

其實我嘅睇法同你一樣,
小心眼和好奇有時只是差一線,
不過有時佢又太八卦了,
亂估一通又當真喎,
有時真係俾佢激死!
哈哈哈~~~

the inner space 說...

首先多謝新鮮兄肯寫小弟, 實在榮幸! 榮幸支至!

又感謝列位阿哥阿姐, 不圇多多回應, 我照單全收沒有需要多寫.

但我一早已猜到小朱姐家在何區, 她也是早知到的, 何解鮮兄說:'我瞎猜是"以為你住係紅碪海邊啲豪宅囉!" 呢?' 小朱姐又未有更正播!!!!


space 頓首

p.s. 巔巔兄已接收到了, 禾火禾火兄與兄台之事, 不甚了解, 尚未能當和事老, 擺和頭酒, 不過, 如鮮兄所言: "大家一笑泯千仇!"

space 再頓首

p.s.s. 來來來我個 blog 度的 chat box 聊天室, 個處 有幅 animated 的相片, 都有幾分似我的, 新鮮兄常用來氣我的, 可供參考.

space 再三頓首

新鮮人 說...

space,
終於等到你來了!
我仲未知小豬住邊區喎,
不如你講過我知吖?
哈哈哈~~~~

究竟禾火禾火係邊個呢?
我完全唔覺巔巔近日有同邊個爭論過嘅!!!
奇怪!!

講開你個chat box就火滾啦,
你話你幾耐無黎過先?
淨係得我同小豬喳,
你咪叫人去自己唔去先得架!
太差勁了!

新鮮人 說...

space,
唔好成日"頓首"啦,
會頭暈架,
仲有你話"榮幸支至",
個"支"字係咪錯咗呀?
好少見你寫錯字噃!
哈哈哈~~~~

梁巔巔 說...

梁朝偉雷頌德似我吖 ma~

xiao zhu 說...

嗱,哈哈哈,係咪呀,我都話架喇,佢實頓首個喎!

新鮮人 說...

巔兄,
兩個人嘅樣好大分別喎,
究竟係朝偉定頌德呀?
哈哈哈~~~

新鮮人 說...

小豬,
你嘅觀察力都唔弱喎,
同space有得fight呀!

梁巔巔 說...

個個佢係女嚟.

新鮮人 說...

巔兄,
我有無睇佢個blog架!
即係你有無見過我係佢個blog留言呀?

Haricot 微豆 說...

新鮮兄: 我一路睇,一路笑到眼淚都流出嚟!!! 正如小豬姐話:『鼓掌!!』

我同心空兄都係喜欢搜尋資料個類人,不過我就無佢咁仔細,又無咁多耐心研究,所以我都好喜欢讀佢嘅詳細文章,以逸待勞,有時睇完「伸延閱覽」,又再閱「我的舊文」,回答過陣就好似寫論文咁,連我自己都好驚奇!!

我同心空兄都好少頂頸, agree to disagree 嘛!! 不過佢有一次話: 無怪我支持花旗政策,因為我住得太接近美國,当時真係比佢激嚫,咁不過几日之後我又無事。

我地網絡世界係需要好似Space兄咁嘅資料專家,有文有路有cross-reference,唔係好似係YouTube過度嘅莽民,無憑無據就順囗開河作人身攻擊。

努力 !!!!

新鮮人 說...

微豆,
謝謝你的鼓勵!
我很同意你的睇法,
space真係blog界數一數二嘅資料專家,
有乜嘢佢寫過都能令人得以深入了解,
這點很值得欣賞!

space個人就係咁,
平時講嘢有文有路,
但係有時又會無端端彈句"不知所云"嘅嘢出黎,
真係俾佢激到唔知好嬲定好笑,
不過佢係咁架啦,
我都習慣哂,
如果有日佢唔係咁,
我可能會覺得唔自然添!
哈哈哈~~~

the inner space 說...

似乎是褒多於貶, 感謝各位留言.


酩感於心.

space

p.s. 是否應該見好就收呢? 我突然有這念頭!

新鮮人 說...

space,
又唔係做歌星明星,
收乜鬼喎?
有地方俾自發表吓,
或者同我嘈吓唔好咩?
哈哈哈~~~

嘿嘿 說...

空空儿,
见好就收?有必要么?反正收了你也一样会想念他们的!没双赢何苦?哈哈哈~~~

新鮮人 說...

嘿嘿,
space個人好頑固的,
佢決定咗嘅嘢無人可以勸到,
不過佢都係講吓先,
暫時應該未決定的!

嘿嘿 說...

他顽固,却不执着!对自己还蛮民主的!

哈哈哈~~~

anmary 說...

其實我無去過space個blog, 但唔知點解我一直都以為(認為?)佢係女仔=p

新鮮人 說...

ANMARY,
照我認知,
佢應該係男仔,
如果唔係,
我真係俾佢呃透了!

嘿嘿 說...

喺哦!我现在就来辨别男女!

男:新鲜人、巅巅、空空儿、Ebenezer、Derek、苦瓜、小猪……

女: DeepC、Anmary、微豆、舞了、樂逰……

对吗?


新鮮人 說...

嘿嘿,
若瓜、小猪我不認識啊,
好像没有去過他們的blog,
他們亦無黎過噃,
所以無從辨認了!

樂遊我唔肯定,
微豆好明顯是大男人一個噃!

嘿嘿 說...

我错啦!不是若瓜,我是说 苦瓜!

嘿嘿~

嘿嘿 說...

咦?

你不认识xiao zhu,你不是叫他“小猪”咩?乱了???

呵呵~~~

新鮮人 說...

嘿嘿,
"苦瓜"是我手快打錯成"若瓜",
但我真係唔識他噃,
都無見過佢黎,
更加唔知佢個blog!

"小猪"?
你指"小豬"嗎?
兩個字唔同,
我以為你指的"小猪"是另一個人,
她是女的!

the inner space 說...

XIAO ZHU 是漢語拼音!

可參考漢語字典呀, 有很多可能性, 小豬, 小珠, 小朱, 都是我們一廂情願, 為求方便給 xiao zhu 起的中文名字.


谷哥搜尋: 漢語字典

新鮮人 說...

space,
究竟個"猪"字係咪"豬"嘅簡寫呢?
定係"豕"字呢?

嘿嘿 說...

新鲜人,
你也是的,怎么这样肯定她是豬呢?嘿嘿~ 是不是很怀念Miss Piggy?

豬本来就是猪啰!
看来不是却是是!

哈哈哈~~~

新鮮人 說...

嘿嘿,
"小豬","小朱"等等是由她的英文blog而來的,
而她亦接受,
至於"猪"字曾未有人這樣稱呼了,
你喜歡的可以問問她!

至於她是否真的女的,
就如這系列最初所言,
是真是假不需要去探硏,
她話係女就是了,
知不知無關重要!

xiao zhu 說...

哇哈,原來研究緊我個名呀!

"猪"字應該係"豬"字嘅簡體。其實我喺早期曾經解釋過關於我個名起碼兩次,不過我都唔記得喺邊度提過喇。或者阿space會有辦法揾得番出黎。

總之 xiao zhu 係我一個花名嘅普通話拼音,但係唔方便開估,因為世界好細,怕撞到熟人俾人點相。而"官方"嘅譯音係"小豬",因為我好中意IQ博士,主題曲裡面有句"豬仔黎喇!"不過我又唔抗拒網友幫我改嘅其他名,例如"小珠"、"小朱"、"小茱"、"小蛛",玩嘢嘅就有"燒豬",我全部照單全收,都會應,因為名字只係個符號,方便溝通啫。

呀,我係女黎架。

the inner space 說...

用拼音

xiao 可以是:小,孝,芍,笑,曉,篠, 筱..... etc etc


zhu 可以是:朱,杼,珠,祝,茱,箸,蛛,豬,竹..... etc etc


你喜歡那個 combination 呢?

新鮮人 說...

space,
請問"猪"字點讀呢?
係咪簡體嘅"豬"字呢?

xiao zhu 說...

嗚嗚嗚,點解咁架,我頭先lunch之前明明留左言覆左個喎,點解冇左架架架架架???!!!又要我再打過,唉!

其實我早期寫博嘅時候都曾經講過起碼兩次關於我個名架,好似係啲留言度答過,不過真係唔記得邊度嘞。可能要我哋嘅資料搜尋專家阿space出動揾吓至得嘞。

xiao zhu係我以前一個花名嘅普通話拼音,不過因為世界太細,唔想萬一撞到熟人俾人點相,所以唔用中文字寫出黎。而"小豬"就算係我認可嘅"官方"中文名,因為我好中意IQ博士,而主題曲裡面有句"豬仔黎喇!"故取起名,咁囉。哈哈!

不過好多網友好俾面,幫我改左唔同嘅稱呼,包括"小珠"、"小朱"、"小茱"、"小蛛",仲有搞嘢嘅"燒豬",全部我都照單全收,因為名字始終都只係符號,方便溝通啫。

呀,另外,我係女黎架。

新鮮人 說...

小豬,
很感激你認真回應,
明明留了一次言,
因系統出現問題,
所以特意再打一次留言,
感激不盡!

現在真相大白了,
大家心中的疑問一掃而空了!

the inner space 說...

噢! 上面小朱姐的解釋, 我當然記得, 不過這包括她個人私隱, 所以沒有寫出來。

至於"資料搜尋專家阿space出動揾吓至得嘞。" 我就不打算登出來了, 若真是有心人,自己會去搜尋的。

新鮮人 說...

space,
小豬都自己講出來了,
唔洗再揾啦,
無作用嘛!

the inner space 說...

XIAO ZHU 如果是= 曉祝 都幾幽雅!
若是= 孝杼 就很有書卷味添!

各方友好有無好提議?

新鮮人 說...

space,
人家小豬都講咗佢嘅來源嘞,
你仲講乜呀?
人哋嘅名可以由你去改嘅咩?
尊重吓好噃!

匿名 說...

發揮一下想像力遮, 無使甘惡呱!
新鮮兄想做埋經理人添?
講下都要代為出聲干涉?


space

匿名 說...

Avoid duplication

發揮一下想像力遮, 無使甘惡呱!
新鮮兄想做埋經理人添?
講下都要代為出聲干涉?

SPACE

新鮮人 說...

space,
我一向都咁惡死架啦,
你唔知咩?
哈哈哈~~~

嘿嘿 說...

人家有Laughing Cow,
怎么不能是“笑猪”呢?!

What a Laughing Pig,Cheerful Miss Piggy!Nice to know you。

the inner space 說...

惡就系真的, 但為了別人發惡, 是否一種表態呢?

新鮮人 說...

space,
表乜態?
你想講乜呢?
咪想得太多了,
好易壞腦架!

the nner space 說...

唔使詐傻勒, 新鮮兄的表態, 當事人相信已經收到, 至於....唔知了!

新鮮人 說...

space,
如果你係要咁講,
咁我唯有叫埋小豬黎討論吓,
睇吓佢點睇你所講嘅嘢,
你都係唔行欠鬧啦!

xiao zhu 說...

嘿嘿:

唔好意思,咁遲至應你。

哈哈,你唔識我啫,我成日都"見"到你架!

xiao zhu 說...

蝦,我覆完嘿嘿至諗起,我隔左咁耐至黎留言,除左新鮮自己,我諗都冇人返轉頭睇番呢度架嘞。

新鮮 & Space:

你兩個好似都有一派冇拗頸嚕喎,拗吓都好架,我最中意睇架嘞。不過揾過第二個話題拗喇,唔好燒埋我果疊呀!哈哈哈!

新鮮人 說...

小豬,
blog右邊有個"留這欄顯示",
一看就見到你留過言的!

近來space好少出現,
連blog文都少咗,
所以咪無得拗囉!