$50/ 2 件羽絨外套!

網上圖片

物價係咪愈黎愈貴,
唔洗問阿貴都知係。
以前五毫幾隻雞蛋,
依家個幾銀一隻，
以前十蚊有個腿旦飯，
依家要廿幾三十蚊一個,
飲品要加三至八蚊不等，
人工永遠追唔上物價升幅，
公眾市業有賺無賺都要加，
舖租、樓價不停升,
帶動所有物價都飛升，
你話死唔死!

我哋哩啲打工仔，
睇住個荷包日漸乾塘，
做人做到無哂心機，
不過前幾日我係街市發現啲超筍嘢喎,
一間短期租約出租嘅超小型衣服店門外,
一個五短身材嘅師奶係度大叫:
「手快有手慢無, 五十蚊兩件羽絨外套! 超低價!」，
係 50蚊 2 件喎!!!!
幾抵呀!!!!
門口成堆師奶係咁搶，
七手八腳你爭我奪,
其門如市，
啲外套款都幾靚，
本來心郁郁想買返兩件，
不過諗真吓都係咪搞，
內地人工材料乜都加，
仲有無咁平咁筍嘅嘢賣呀?
你估八九十年代咩?
有可疑!!!
我又忽然想起早幾年咪有人用"黑心棉"造衫咩?
仲唔洗唔漂照用，
搞到啲人生嘢週身痕，
諗起都起雞皮，
唔理係棉定係絨，
唔理係真定係假，
光棍佬教仔: 便宜莫貪，
況且哩間係臨時店，
幾日後就會消失，
有事佢都唔會上身，
諗過計過都係唔買安全啲,
費事贏粒糖輸間廠,
得不償失呀!