門口的腳:
「點解唔行入啲?」
「點解要行入啲?」
「你唔行入啲，人哋點行入啲?」
「點解人哋要行入啲?」
「因為門口啲人想人哋行入啲。」
「點解門口啲人想人哋行入啲?」
「你唔行入啲，門口啲人雙腳點伸返入車呢?」
「門口啲腳入唔入到車關我乜事?」
「無乜事，請繼續企係車中間啦!」
座位上的腳:
「點解你要放對腳上對面位?」
「我喜歡!」
「點解你喜歡?」
「因為舒服。」
「我見你依家坐緊哩個位頭先都有人放過對腳上去。」
「有無搞X錯呀?啲人咁X自私架!」
無語......
座位傍的腳:
「哎吔~~你做乜踩我隻腳?」
「唔好意思，SORRY!」
「你都無答我問題!」
「什麼問題?」
「我問你點解踩我隻腳呀?」
「因為你隻腳放咗出行人道中間囉。」
「咁你就可以踩我隻腳架?」
「我不是有心的，車裏太擠，我看不到你隻腳。」
「你盲架?咁大隻腳放係路中間都睇唔到!」
吹脹......
天下事日日新，
真的學無止境，
昨天我又學曉了一個新名詞，
名為"friend前性行為"。
婚前性行為我聽聞過，
但"friend前性行為"是什麼呢?
我之前從没有聽過這個名詞，
所以難以估計當中意思，
初初我以為是類似一夜情的東西，
即是一認識啱心水就"開波"的意思，
後來人家給我解釋，
我才明白背後有更深一層的意義。
人家說的所謂"friend前性行為"，
重點不在於之前是否認識，
而是在於是否做過friend，
一大群人出黎"玩"有很多"點頭friend"，
認識而不熟識，
甚於連名字都叫不出來，
而所謂"friend前性行為"就是一種行為模式，
在雙方未正式成為"朋友"之前，
通過性行為來認識對方是否"啱key"，
然後才決定是否可以做朋友，
聽落是否有點像狗仔亙嗅性器官，
味道合心意然後就會開波呢?
性交行為演化成交朋的途徑，
這是人類進化的一大躍進了，
又可以說是另一種"返璞歸真"，
原始人為了延續下一代而交合，
後來人類進步了，
將靈慾結合，
愛情昇華，
脫離了原始人的行為模式，
到如今新一代又從新把兩樣東西分開，
性交不是為了生育，
(對少年說，有bb是一種歡愉後的災難)，
性交也不是什麼愛的真諦，
(這理論變成了濫交的借口)
性交變成交友的手段，
就好像打麻雀和下棋一樣，
從中可以觀察到一個人的真性情，
不過真的有人會從性交中去觀察嗎?
說穿了不是把身體當是免費娛樂中心，
刺激、好玩、快慰又唔洗錢，
年青力壯的有得玩就玩，
性交have fun又開心，
仲係免費的喎，
有什麼比這些更好呢?
唔洗諗咁多，
去馬~!
「我看見她在屋後的空地殺死了一頭狗!」
這是十一歲的朵琳從她的好友范菈口中聽到的，
那個殺狗的她就是朱蕾，
往在朵琳家隔壁的女孩。
這三個小女孩都是住在哈維鏔，
1970年代的美國俄亥俄州的哈維鎮是個充滿灰黯的地方，
人們還没有從越戰的陰影走出來，
經濟活動一池死水般，
四處都是空置的房屋，
鎮裏很多都是離婚的單親家庭，
没有人照顧的小孩四處遊蕩，
背後是父母分離的茫然無助。
1975年的夏天，
女主人翁朵琳的父母分開了，
爸爸走出了她的生活，
母親為將來的生計努力讀書，
没法花太多時間和她一起，
弟弟因父親的離開而不再說話。
這個夏天，
不單父親離開了朵琳，
她的好友范菈也搬走了，
後來弟弟也被父親接走了，
好像什麼都離她而去一樣。
夏天將近結束的一個下午，
朵琳和懷疑殺狗的朱蕾一起在廢棄的鐵軌上走着，
在一片靜默無語後，
杜蕾終於把朵琳的疑問說清了。
「今年夏天，我不得已殺了一隻狗。
牠快要死了。牠在街上被一輛車撞了以後，我才發現牠。
我不想看着著牠痛苦，為了這件事，我一直很難受。」，
杜蕾慢慢說出一字一句，
好像每吐一個字都很痛苦的，
「我希望爸爸回來，告訴我該怎麼辦...」，
當杜蒏說到這裏時，
兩個小女孩很自然地緊緊擁抱在一起，
在河水流動聲中，
眼淚瞬間在面上凍結了。
這本【大家都離去的夏天】(Songs of Faith)
是非裔作家Angela Johnson所著，
從一個11歲大的女孩子角表逹父母離異後的心境，
文章思路跳躍，
如小孩子的思路般飄蕩，
這夏天一切都好像要開她而去，
一切都茫茫然而失去了重心，
不知要走向那個方向，
故事沒有明確的指出小主人翁要如何面對困境，
但字裏行間隱約發現朵琳漸漸找到心中的愛，
一顆充滿愛的信心將要帶領她走過人生的低谷和困難。
看這本書的時候，
很自然會把自己的童年套進去，
野孩子、無助、茫然、孤單、任性、幻想......
每個孩子都曾經覺得自己很孤獨，
感覺世界上没有人會明白自己的，
不知你有没有曾經這樣想過呢?
三年前我寫過這篇，
如今重看，
我有更另一方的感受。
"Ratatouille"電影中Anton Ego說:
『人最喜歡用刻薄說話去批評別人,
講完自己會自鳴得意,
聽嗰個又會風趣生鬼!
但往往就是這些說話,
使到一些於自己崗位努力不懈嘅人,
從而失去了發揮嘅機會!』
香港人普遍心裏都很大怨氣，
只要一丁點的事就會引發人們失控地爆發，
例如在街上不少心的碰撞、坐車爭坐、揸車爭路...
很小很小的事就會爆發成好大件事，
大家總是睇對方唔順眼，
很容易口角甚至動武，
而且往往以最狠毒最粗暴的說話辱駡對方，
唔毒唔絶的說話唔駡出口，
好像和人家有十怨九仇一樣，
根本不是以事論事，
只求宣洩和侮辱對方，
就算在網上的言論也是一樣，
多數由各持己見開始，
無視對方言論是否有合理的地方，
只求言論壓倒對方，
繼而失去理智，
什麼說話都會說出口。
人們時常說香港人很不快樂，
表面很繁榮很富足，
實則很多人都很自私，
只會看自身的利益，
很少從別人的角度細心觀察，
也許是香港人缺乏安全感，
對前途非有多大信心，
所以只想努力抓緊自己身邊的利益，
別人的意見和處境都會不多加理會，
而且不少人本來就生活得很困苦很無助，
無助無人理會以至變得偏激自私，
這是非常可悲的結果。
一般市民對前途没有信心這個問題，
我想當權者應該多點關注，
一個表面繁榮的社會裏，
人們對自己的未來和前程没有了信心，
証明當權者的失敗，
貧富懸殊的出現，
也重重給施政者面上打一巴掌，
如果他們還是無視和無能為力，
就請他們好好反省，
甚至下台謝過，
因為今天我們見到的問題，
已不是一時三刻所致，
而是多年來積聚而來，
但回歸十年有多了，
情況只是愈來愈差，
我想那班庸官理應有足夠的時間搞清問題，
無奈我們看到只是一個不如一個，
層層叠叠養着一班無能而自肥之輩，
這些無能之徒到底到何時才知道自己對民生困苦的無知，
他們知否自己在浪費着香港人的米飯呢?
近來啲新聞奄奄悶悶，
要講返啲鹹鹹濕濕笑返吓啦。
話說我讀中三嘅時候，
有個同學同我幾鬼fd，
不過佢又懶又無心機讀書，
仲成日掛住做pt揾錢去玩，
結果就升唔到中四無得留低，
佢屋企見佢都無心機讀書，
梗唔會花錢俾佢去讀私校啦，
況且我老友根本唔鍾意讀書，
佢都唔知幾想快啲出黎做嘢揾錢呀，
結果仲係係我中三暑假期間，
佢就揾到份新工嘞。
係乜嘢工?
咪係三級戲院帶位員囉，
係九龍灣淘大嘅翠鳯做，
雖然我個fd未夠18歲，
但佢一來個樣早熟，
而且又大我一兩年，
係呀，
佢留過兩次班架。
嗰時啲鹹片戲院仲未没落，
好多中年、老年漢去觀摩觀摩架，
所以戲院人手經常好缺乏，
我老友未夠秤都一樣被徵入伍了。
那年我仲係放緊中三暑期等入中四，
我個終於老友走咗去做鹹院帶位員，
佢一放假我就揾佢了解了解吓佢新工情況嘞，
我問佢有得任睇鹹片係咪好正呀?
有無睇到興奮過度要去廁所...(你明架啦)
我一輪嘴不停咁問，
佢無我咁好氣等我收口先至出聲。
佢話日日睇鹹片好悶喎，
第一日就好剌激好新奇，
乜都唔想做淨係掛住睇個大螢幕，
腦裏便不斷浮現戲裏啲畫片，
諗到週身都"慶洽洽"，
(以前啲鹹片同依家四仔無得比，好小兒科喳，
不過以前我哋都比較純情嘅! 哈哈哈~~)
至於佢有無去廁所搞啲乜嘢就無講嘞，
不過佢話當你日日睇夜夜睇同一套戲時就會悶到嘔，
(嗰時未有數套輪播嘅做法)
因為你會連每一個動作和對白都記得的，
而且好多都無乜劇情，
來來去去都係差唔多，
所以通常一開場做完嘢，
佢哋就會走返出去吹吓水。
我老友話聽啲師兄講，
有啲阿伯日日黎煲戲，
睇完又睇、睇完再睇，
有啲就專揀最最最前排，
好似想"聞"個大螢幕咁，
有啲相反喜歡有咁後坐咁後，
不過一定會自備望遠鏡，
因為望遠鏡可以"close up"某部位喎，
真係唔知好嬲定好笑。
雖然鹹片多數坐唔滿，
但係每次一做到戲肉時，
成間戲院入便就會傳來"呵呵...哦哦..."聲，
跟住散場走人後，
入去清潔時就會感覺到地下"痴笠笠"，
我老友都唔敢用電筒去照黎睇，
求求其其揾地拖濕水拖兩嘢就走人，
聽到都想嘔呀!!
我老友話除咗鹹濕阿伯外，
鹹片戲院最多啲紋身公仔佬拖住條女黎睇，
佢哋會一路睇一路笑，
男人就乘機"捐"個頭落去女人嘅心口，
又或者個女人會蹲低係男人大脾上面好落力咁"點頭"，
大做鹹濕戲院真人騷，
搞到坐係附近阿伯掛住睇佢哋唔記得睇螢幕添。
另外，
當時實施咗無幾耐戲院禁煙，
啲公仔佬當然唔會理咁多啦，
一次照食照煲當你無到，
聽我老友講，
係佢之前有條新仔被經理點咗去叫啲公仔佬唔好食煙，
點知佢行到埋佢指指嗰枝煙喳，
都未開口就被公仔佬一鎚'餵"埋塊面度，
跟住鼻哥"啤啤"聲咁流蚊飯，
條新仔就喊咁口走返出去止血，
從此再唔會有人敢出聲叫人禁煙了。
我和這個老友都失哂聯絡了，
十幾年無見過，
最後一次係沙田駕駛學院，
佢好似係入便做文職，
我見佢睇到我係認得嘅但又無反應，
我同佢遠遠點吓頭佢又好免強咁笑一笑，
好似唔多想見到我咁，
無行近講過一句說話，
跟住就各行各路了，
有時有些友誼好似有特定時限，
過咗那個特定嘅時間後，
一切關係就好像消失了，
好奇怪!
好奇怪!
人衰行路打倒退，
不過有些事是人自己攞黎嘅，
唔抵可憐。
早前友人失業年多，
結果蘿友痕返內地搞大咗人個肚，
無錢又谷住要結婚，
仲要伸請個未來老婆落黎香港住，
可惜佢老兄一家父母親朋住係間幾百呎嘅公屋，
豆腐膶咁細仲要逼多個老婆和bb，
真係屋漏更兼逄夜雨。
幾經辛苦揾到份工，
但係又遇到個賤老闆，
拖糧拖到唔要面，
返兩個月才出半個月，
成間公司個個都被佢老闆拖住，
連買料做貨錢都無，
仲要我個老友"where"爛塊面叫啲供應商捨住先，
老友唔係唔想叫，
不過差不多通行都知佢公司拖數拖都無得俾，
你叫人點揾到供應商肯捨數呢?
點知佢老細仲惡人先告狀，
話我個老友唔做嘢，
咁都揾唔到供應商捨數喎，
你話係咪賤到無人有吖!
一波未平一波又起，
友人老婆又因為唔習慣香港嘅生活，
加上老爺奶奶指指點點，
終於生咗個女一年就頂唔順，
返咗上大陸跟佬走，
老友唔憤氣走去揾佢，
本來想話有事慢慢商量，
但佢老婆就無影無踪，
要通過佢老婆家姐先至用電話聯絡到，
點知佢老婆又話乜又話七，
仲要話依家條仔係佢個舊男友，
有錢有米又有餐廳，
又話自己已經有咗個奸夫嘅骨肉，
(走咗唔夠一個月)
我老友聽完眼火都爆埋，
不過都無辦法，
唔通殺咗佢咩?
佢仲鬼咁關心同佢老婆噓寒問暖，
唔知仲以為個肚係佢自己架，
愛心爆棚，
不過爆錯哂位!
好啦，
諗住疊埋心水返黎搞離婚，
點知佢老婆忽然又話個奸夫唔認數喎，
要落咗個仔，
我老友竟然白痴貼錢佢去落仔，
真係俾佢吹到脹哂。
落完仲要俾人哋個奸夫打電話黎吋，
話我老友無本事任人拖佢老婆走，
老友除咗好慶外就繼續俾個女人呃，
自己無錢仲死咗幾萬蚊俾個女人救急，
當初又話個奸夫幾有米，
個女人又話自己生活好好、好富貴，
點解咁都要問佢攞錢呢?
我真係唔明白係我老友白痴定係佢哋夠奸嘞，
攞明係"昆"你架啦，
我哋幾個老友事前都叫佢咪理佢，
但係佢又唔聽，
結果人又無、錢又無，
仲要俾個奸夫侮辱，
你話佢幾笨七吖。
我哋問佢係咪仲好愛嗰個女人，
老友話少少啦，
不過條氣唔多順多啲，
叫佢咪再理鬼佢，
話知佢死啦，
點知佢個衰老婆早前又同佢講又有咗喎，
老友仲千辛萬苦多番同佢姨仔去証實喎，
我哋聽到真係把幾火，
好狠咁丙到佢上天棚，
叫佢咪再咁"昂居"，
係真係假都好啦，
咪再俾佢"昆"嘞，
話知佢有咗18個月都好啦，
快手搞分居手續啦，
點知我老友話搞分居要攞佢大陸地址喎，
佢竟然話完全唔知佢住邊，
又話佢老婆唔肯俾依家嘅地址佢，
咁即係點?
又跟佬走又同奸夫有咗，
口就話要離開我老友，
但係又死都都唔合作，
想點?
大家心照，
只係我老友點極都唔明啫。
有啲人平時好醒好聰明，
但係一去到感情事就一塌糊塗，
IQ變得完全零蛋，
無論傍人點勸點告誡都聽唔明，
口就話:"我明!我明!我唔會再被佢呃!"，
結果轉個頭又係俾人"昆"多次，
我哋真係無眼睇，
勸又勸過，
小又小過，
幫又幫過，
佢份工已經出得一半糧架啦，
叫佢專心諗自己嘅將來，
佢唔食個女都要食嘛，
至於佢個所謂老婆就要黎都無謂，
快快諗計一刀兩斷好過，
(你話我叫人分妻唔啱我都係咁講嘞)
留返啲氣力為自己前途着想，
否則過幾年又係咁，
到時乞食鬼理你呀!
凍、熱、凍、熱、凍......
乾、濕、乾、濕、乾......
人生過山車未玩完，
先來個天氣過山車，
比女人心還要變幻，
滋味無窮吧?
瓷磚上的"萬能吸盤"忽然自動脫落了，
掛在上面的拖把、刨絲鋼片等應聲掉下，
嘭的一聲發出巨響，
把正在廳中上網的我嚇了一跳，
初時還以為有賊入屋，
後來才知是潮濕所致，
用手指輕抹墻身，
感覺潮濕的天氣要來了，
但想不到濕得如此厲害，
冷氣和抽濕機齊開才能勉強支持得到，
我明白這很不環保，
但自己非常怕潮濕，
周身肋骨酸酸痛痛，
可能我不再年青了。
街外的貓兒又"叫春"了，
每年春天要來時牠們都叫得很賣力，
不是爭女就是爭地盤，
喵聲四起，大打出手，
而且慣常在三更半夜鬼殺咁嘈，
今年天氣冷完又熱、熱完又冷，
"叫春"習慣被打亂陣腳了，
不是一兩次搞定，
而要分數次進行，
如此下去，
恐怕貓兒也被弄到思覺失調了。
真不知還要"叫春到何時"?
十分擾人清夢，
所以我很討厭牠們。
今天天氣又涼了回來，
昨天還開冷氣的我，
今天竟然要穿回外套，
在這些變幻無常的氣候中，
厚的薄的來來回回交替穿着，
廳裏掛滿穿過又未要洗滌的衣服，
好像變了洗衣店一樣，
不知何時才可以正式把冬天外套入櫃呢?
很怕滿屋掛滿衣服的樣子。
濕度99%，
我們好像活在水世界一樣，
全身上下都感到不舒服，
又焗又熱又悶又難頂，
科技令人生活舒適了，
冷氣機、抽濕機、空氣淨化器...
没有了這些，
人們好像生活不了。
這幾天裏，
我也是依靠着這些科技產品來"生存"，
人類何時變得那麼不能適應環境?
反過來說，
我們有必要走"回頭路"嗎?
回頭是找回人類的基本"功能"嗎?
在近百年來，
科技讓人類可以"改變"大自然來配合自己，
人類漸漸變得非常依靠科技來生活，
這究竟是"進步"還是"退化"呢?
想想没有這些科技產品，
我們可以忍受得到嗎?
而最大的問題是:
當我們享受着這些所謂科技的同時，
地球往往受到某程度的傷害，
但我們可以放棄這些"享受"嗎?
我們可以回到從前嗎?
我們真的需要走回從前嗎?
這個很值得大家去深思!
香港人真係好有同情心，
一有天災就好喜歡捐錢，
孟加拉、大陸水浸、四川地震都捐唔少，
(其實捐錢俾孟加拉嘅反應麻麻哋)
哩啲地方咁貧窮，
真係要多多幫忙，
不過日本係已發展國家，
國家儲備多過香港一大截，
人家有無需要你捐呢?
唔好話我冷血，
捐錢都要睇需要，
唔係為咗安撫自己嘅心靈，
要捐得其所。
事實上，
有其它地方更需要別人幫助，
四川嘅事後建築做好未呢?
夠唔夠錢做落去呢?
孟加拉浸完又有無人繼續捐助呢?
哩啲地方真係窮到飛起，
揾多個錢刮沙都無，
究竟係日本需要錢多啲還是那些貧窮嘅發展中地方需要呢?
唔好講遠，
香港表面好似好繁榮咁，
實在有一百廿十幾萬人生活在貧窮線下，
十幾萬人住係尤如人間地獄嘅籠屋，
如果真係咁有愛心嘅，
點解唔去幫助吓哩啲仲慘過日本人嘅貧窮戶呢?
看到人間慘劇，
心裏不舒服很正常，
作出同情和祝福也很合理，
但無理有理都隨便捐錢有用嗎?
人家嘅國家儲蓄多過香港多多聲呀，
你捐錢又有何用呢?
這個世界有人更迫切需要你的幫助!
三姑:「你搶唔搶到呀?」
六婆:「梗搶到啦，我六婆出手，點會失手呀。」
三姑:「你搶到幾多呀?」
六婆:「有咁多得咁多囉!」
三姑:「即係幾多啫?」
六婆:「夠我食一年左右囉。」
三姑:「你都好勁喎!」
六婆:「咁你呢? 又搶到幾多呀?」
三姑:「同你差唔多啦，我諗都可以食到一兩年嘅!」
六婆:「咁厲害? 你瘦孟孟點攞到咁多呀?」
三姑:「有買餸車仔嘛，裝到幾多買幾多囉，我走咗兩轉添呀。」
六婆:「吖~~你隻衰嘢吖，今次咁醒目嘅!」
三姑:「梗係，上次啲"版南根"俾人搶哂，今次我醒呀，倒屎咁早就去搶啦!」
六婆:「你買幾錢呀?」
三姑:「百幾二百蚊罐囉。」
六婆:「你講乜呀? 百幾蚊罐?? 我都係買廿蚊一磅之嘛!」
三姑:「你唔係講搶奶粉咩?」
六婆:「乜呀?我講搶鹽呀? 食鹽可以抗幅射呀!」
三姑:「無啦啦乜鬼幅射呀?」
六婆:「好似話乜嘢"艾瘋"殺到黎嘛，有幅射架。」
三姑:「乜嘢係"艾瘋"呀?」
六婆:「我都唔多知噃，我聽啲人話傳染得好勁喳。」
三姑:「哦~~~」
六婆:「話時話，你搶咁多奶粉做乜呀?你有咗呀?」
三姑:「我啋、啋、啋....有你個頭，我見人人搶我都唔蝕底喳。」
六婆:「唉~~ 搶黎做乜都唔知，你好無知呀，學吓我啦，我就知食鹽可以防幅射啦，幾醒!」
某人問:「你在找什麼?」
自我答:「在找自己。」
某人問:「找到没有?」
自我答:「在鏡子中。」
某人說:「那不是你。」
自我問:「那是什麼?」
某人答:「那是你想像中的你!」
自我問:「怎會這樣?」
某人答:「因為鏡中的你是你編造的。」
自我說:「我没有。」
某人說:「你不自知而已!」
自我問:「真我在那裏?」
某人說:「一直跟貼在你背後。」
自我問:「那轉身不就找到嗎?」
某人答:「不能。」
自我問:「那麼近，怎會不能?」
某人答:「你轉身，他也會跟着轉，貼得很。」
自我問:「那可以怎辦?」
某人答:「用人家的鏡子找。」
自我問:「什麼意思?」
某人答:「只有從人家的鏡子看才夠真實。」
自我說:「那很簡單，我問人就是。」
某人說:「你要有心理準備!」
自我問:「為何這樣說?」
某人答:「真我的樣子不漂亮的。」
自我問:「怎會，我不是很好嗎?」
某人答:「自己的鏡子中看不到醜的一面的。」
自我說:「没可能，我怎會醜!」
某人說:「你現在不是已經站在我的鏡子前嗎?」
自我說:「神經病，那個怎會是我。」
某人說:「我不是說過自我不一定漂亮嗎!」
自我問:「你究竟是誰?」
......「我就是你自己!」
自我說:「發神經，有病就快點看醫生吧!」
請不要駡我無同情心、無血性，
這篇blog文是我看見日本大地震後的第一個想法。
當電視畫面出現地動山搖、驚濤駭浪時，
我心裏立時感到非常震撼，
好像世界末日一樣。
但當畫面轉到日本人在地震後有條不紊地疏散和等候救援時，
我心裏不得不表示讚揚和欣賞。
雖然電視畫面不能展示全部實況，
但日本人的團結和頑強是鮮明易見的，
尤其在國難當前的時候，
日本人多數很能夠亙相幫忙，
不會自私自利只顧自身，
這很值得我們借鏡學習，
雖然很多人都不會喜歡聽，
但事實是中國人在這方面的確比不上日本人，
這也是為何在以往百年日本一路比中國領先的原因，
日本國小但團結，
中國國大而鬆散，
而且喜歡自己人打自己人，
還要借別人的手去打自己人，
所以才會一路讓人騎在頭上，
這種慣性非改不可，
否則很難有翻身一日。
有一個重點我想補充的，
很多人喜歡用"團結"這個概念去讓不同的意見"消音"，
整天說為了國家好、為了國家團結，
要人民無條件就犠牲自身的權利、財產、自由、生命.....
這全都是愚民政權的藉口，
團結不代表要盲目順從，
權力的來源應該是由下而上的，
人民的意願和生活得到保障後，
人心自然就會產生形聚和團結，
否則空談愛國又有什麼意思呢?
後補:
看新聞見部份旅行社並不打算取消今明兩天出發到日本的旅遊團，
亦不允許客人延期或退出，
還說到日本東北應該會安全的，
這代表什麼?
自私、無恥、眼裏只看到利益，
無顧他人安危的發錢寒人板呀!
整個日本都處於地震帶上，
誰敢說現在去日本是安全的，
為了一丁點的利益而大放謬論，
這是人說的話嗎?
香港的商人呀~~
錢不是這樣賺架!
有没有見過街邊生果攤五元一堆的生果呢?
是那些因為長期無人買而變爛的生果，
生果檔主不想浪費，
所以執埋一堆賤價出售那些呢?
人們因為怕唔新鮮會肚痾，
很少買這些爛生果吃，
但不少老人家卻樂此不疲，
覺得好抵好便宜。
數天前聽到朋友談到這事，
感覺到這些年來人們的價值觀變化很大。
朋友說他父母到今時今日還是會買五元一份的爛生果來吃，
看見那些橙面變淋發黑，
或是雪梨某邊會變啡少許出水，
垃垃雜雜一堆放在塑料籃子裏的生果，
再便宜我們也不會買，
但老人家總是想:「食得唔好浪費」，
又或者是「慳返多啲錢係身邊」，
買回家把爛的那邊切了就照食無疑，
其實很多時候他們不是窮不是無錢，
子女也出身了，
每個月也會給他們錢用，
但老一輩的卻總想慳得一蚊就一蚊，
愈平愈抵愈喜歡，
貨品的質數好壞變得不太重要了。
也許是老一輩從前捱過苦，
有些更經歷過打仗，
曾經吃盡苦頭，
對未來的生活心裏有着無形的憂慮，
所以寧願把錢多留在身邊，
對物質的要求不高，
只要吃得飽穿得暖就好滿足了。
也許這種想有點過時，
但"應慳則慳，應洗則洗"卻是一種美德，
物質供應不會無窮無盡，
我們的生活逹到一般足夠的水平就好了，
又或者久不久"奢侈"一點，
食好一點、用好一點就夠了。
當然我不是叫人去買爛生果，
食了很易病菌入肚要洗胃的。
反觀現在不少人花錢只求"過癮"，
很多時買東西看潮流風氣，
人有佢又想有，
人買自己又想買，
不會理會自己有無"真正"需要，
買來不久潮流過了又去追求其他東西了，
週而復始、循環不息，
錢就是這樣花光花淨去了。
不過這都不是問題，
每個人都有選擇生活方式的權利，
但自己的錢花光了不要怨窮，
更不要回家問父母攞就可以了。
一個妓女會唔會俾人強姦?
這個問題可以分兩個層面睇，
首先是妓女和一般女人一樣有機會遇到色魔，
有機會遇到自然有機會被強姦;
另一面就是妓女出賣肉體為生，
讓陌生的男人在自己身上發洩，
那麼給人強姦了又可以當作多做一單不收錢的買賣嗎?
妓女都是女人，
或許穿著性感一點，
誘來一些咸濕的目光，
更可能俾人走近摸心口，
或者半夜遇到長髮披面嘅色魔，
所以有人會說全都是她自己攞黎，
俾人強姦都是應該的，
這說法實在太強詞奪理，
穿得性感就可以強姦嗎?
那麼著生光鮮不就要給人搶錢嗎?
又或者有人會說妓女一向都是任男人"上"架啦，
俾人強姦一次半次又有什麼關係呢?
這種說法更是可恥，
我們不可以因為受害者是妓女就認為她俾人強都無所謂，
妓女只是一種"職業"，
出賣肉體是她的自我選擇，
但強姦卻是一個男人強行把自己的慾望發洩在另一個女人身上，
不是她自願的，
行為具有傷害性和侵犯性，
或者根本是對對方一種侮辱。
妓女也是人，
也有有尊嚴的，
絶不能因為她的職業而認為她被強姦是應該的，
更不可能認為那個強姦犯的行為是"情有可原"的，
強姦了別人就是犯法，
要根據法律作平等的調查和審判，
這才是真正人人公平的原則，
不可以把是非黑白巔倒!
鬍鬚曾決定收回注資強積金，
改為向年滿十八歲的派六千蚊，
我很開心聽到這個消息，
開心不是純因為有錢收，
而是終於見到政府官員肯聽大眾意見了，
唔再會死牛一邊頸。
派錢未必能有效解決貧窮問題，
但確實可以舒緩市民心中的鬱結，
讓香港普羅大眾透一透氣，
讓社會氣氛祥和一點，
讓你、我、他可以開心一陣子，
這樣的錢花得很值很有意思，
不過錢不可以年年派，
做官嘅你要積極諗吓計，
要真正搞活香港經濟，
唔好嘢嘢只靠大財團推動經濟，
因為這樣只會讓大部份利益落入有錢人手裏，
貧富懸殊只會更嚴重;
應該造就多元化發展，
令更多不同的創意工業有空間發展，
讓個人、小商戶有創業自助的機會，
這樣才可以減少大量財富集中在大商家手裏，
讓普通大眾有可能自我提昇生活階層，
逹至一個更和諧、更公平的社會狀況。
天氣:
天氣開始有點熱，
中午太陽高掛時，
身體會出點汗了，
是回南天走了嗎?
還是夏天早來了?
冬日的餘威在那?
天氣難料如女子!
財政:
近日聽到的都是財政預算案，
很頭痛，
無期望就無失望，
庸官當道，
隨了駡還可以做什麼?
還是不要再說了，
想起那班廢柴個個月我哋幾十萬人工就食唔落飯了，
想(佢哋去)死!
朋友:
最近身邊的朋友都有麻煩，
很多工程師朋友(N展佬)很難找工作，
大陸廠不是結業就是全數請內地人了，
就算願意走到"長三角"、"大西南"等地都未必有人請，
加上很多廠佬都唔會幫你供強積金，
有些更會拖糧，
生活真的很困難，
很多(N展佬)都話揀錯行，
但事到如今又可以怎樣，
轉型去做物流還是清潔好呢?
從頭由最低做起嗎?
你肯做人家會請你嗎?
身體:
年紀大機器壞，
要多注意飲食，
要多做適當運動，
我不需要長命百歲，
但不要未老先衰，
更不想給人家麻煩，
過了三十想求其都不能了。
發表文章
所有留言
