輕抹紅裝!

夕陽西下影紅霞
雲裳輕展入高廈
紅裝淺抹會初夏
好得涶稱你我他

有口難言!

今天來個錯誤搞笑之作，
没有什麼目的，
只求有趣開心，
也顯示出中文(廣東話)的多變和奇妙。

笑士后號爬終吻昨吻，
恩謂鵝事嘗初伯寺，
逸編吻張捨夏耐，
除事誘拾杞過伯寺，
魯屍體注鵝編吻珍系伙刀梨埋，
蓋刀誤上載蓋袖調犯編吻肶鵝，
腰鵝松身捨個，
袖蒜吾世松捨，
靜系腰驣吻刀油牌鵝驣拿，
李畫系米豪歹獲鴉?

初初以為要寫篇同音別字作很容易，
寫到手時才知道很困難，
一來手到字亦來，
很難把記憶中的正字改掉，
另外廣東音的九音加上四聲真的幾複雜，
很多字表面上是同音，
但在四聲中又會特顯其中的不同了，
要找個同音同聲的中文字很有難度，
還要兼顧埋全句讀下來是否順口，
人們說廣東話難講，
我自己是香港人香港大，
所以從來都不察覺有什麼因難，
直到如今從另一個角度去體會時，
我才發覺就算是同一個音要讀得正都要很小心，
唔怪得我們時常聽到啲外國人學廣東話好好笑，
佢哋就係俾啲九音四聲搞到頭都大埋囉。

同一個問題，
就係很多中文都會出現同音但不同字，
而且意思可以完全無關，
學寫中文字時這又是另一個難題，
一時忘記就會錯別字了，
相對來講，
英文是注音文字，
比較少出現以上嘅問題了，
所以我都幾佩服能操一口流利廣東話嘅外國人，
相信佢哋真係落過一番功夫才能夠成功架。

難忘你!

我是看着小王出世的，
那是很久以前的事了，
故事雖然變得模糊，
但卻永遠不會忘記!

那年的初夏，
小王就是在屋傍的那排木箱的其中一格誕生了，
一共有五兄弟姊妹和他一起來到這世界，
但不知為何他特別和我投緣，
當我無意間打開了那格木箱時，
我第一眼看到的就是小王，
他的毛色黃黑相間，
有點像隻小老虎，
很是趣緻可愛。
當時他眼睛還没有開，
什麼東西都看不見，
只感覺到"家門"被打開了，
盲夸夸的爬到我的手掌上，
還發出微弱的喵喵聲，
看着他弱小又柔軟的身軀，
我感受到一團暖暖的小生命就在我手掌裏，
那種感覺很奇妙，
很難用筆墨形容，
後來小王媽咪知曉她的"育嬰室"曝了光，
當晚就全家移民到別處去了，
其實所謂"別處"，
只是那排木箱的另一格而已，
而我也很識趣，
裝作不知，
只是有空偷偷瞟一兩眼小王算了。

大約三、四個星期後，
小王幾兄弟姊妹已長大到可以自由奔奔跳跳，
他媽咪也覺得孩子們有能力面對外面的世界，
於是便帶他們出來和我們見見面，
很放心似的任由孩子們讓我逗着玩，
而她只是遠遠的坐在一傍監察着整個事情而己。
在幾兄弟姊妹中，
小王特別頑皮，
他很喜歡在我腳邊不停氹氹轉，
有時又會和我的手指玩捉迷藏，
當他"捉"到我時，
他會用力咬着我的指頭，
可能是誤會我的指頭是他媽媽的乳頭呢?
但我的手指頭可不會有奶讓他啜啊!
為了逗小王開心，
如果家裏有牛奶，
我也會偷偷的拿一點給他們飲，
看着他們飲得滿嘴白白的，
很開心很有滿足感，
好像和他們建立了更親近的關係一樣。

小朋友的時間過得特別快，
小王很快便長得有他媽媽的三份一大了，
而且不再和從前一樣整天跟着我，
他愈來愈喜歡走到屋後的小山去探索，
那裏有他從來未見過卻又很新鮮的事物等着他，
爬樹、抓泥、捉蜘蛛、捕小蛇.....
總之花樣百出、樣樣有趣，
也許對於小王來說，
大自然比人類更神奇更有吸引力，
他逗留在山上的時間愈來愈長，
而我亦只是間中才能和他碰個面，
感覺不像從前親密了。
每當大家偶然碰面時，
小王會默默的回頭看我一會，
然後消失於上山的草徑裏去，
繼續追尋他自己有趣的生活，
而我只有看着他的身影慢慢消失在草叢裏。

四面楚歌!!

唔知係咪受嘈音影響，
很多人說話都超大聲的，
尤其在公眾地方，
嘈吵的還是寧靜的，
人們都喜歡叫破喉嚨大大聲咁講嘢，
搞到傍邊的人耳膜都快穿了。

圖書館裏:
「哩個事仔包，叫哩米咁嘈，哩道圖書館黎架~~ 哩信唔信我打餐你飽吖嗱!」
那個師奶邊咬牙切齒邊大大咁鬧那個邊走邊叫的兒子，
忽然她的電話響起，
她拿起電話就大模斯樣的講着，
諸事八卦、人地長短、天南地北講一大輪，
完全不去理會傍人的討厭眼光，
有這樣的母親就有這樣的孩子。

廁所裏:
當你靜靜地釋放體內多餘的廢物時，
隔壁廁格內有電話響起，
「喂!! 哦~~ Tommy呀~~ 好耐無見啦，近黎係邊度發財呀? 你.........」，
無聊的對話不斷持續下去，
完全没有停止的跡象，
廁所裏充斥着隔壁的寒喧，
回音不斷在狹小的空間裏迴轉，
令人耳膜發毛，
有什麼話非要在廁所裏講完不可呢?

巴士上:
當大家都默默的釣着魚的時候，
背後那人的電話響起了，
「喂! 黃生呀! 五十蚊唔得啦~~ 起碼六十呀~ 我無賺你架啦~~」
那人聲如洪鐘，
中氣非常充沛，
聲音貫徹全層巴士，
每個人都很清楚很明白五十蚊他是不會接受的，
難為坐在他前面座位的人，
不單耳膜很痛，
而且腦袋也快被震破了，
有需要這樣大聲講說話嗎?

從前家長、老師都曾教導，
在大庭廣眾的地方說話要細聲一點，
這是基本的禮貎，
如今的卻到處喧嘩大叫，
他大聲、你被迫又再大聲啲、別人又再大聲啲，
結果搞到四圍嘈到拆天一樣，
耳膜受損之餘又傷中氣，
走在街上，
簡直令人頭昏腦脹，
好難受。

天生絶配!

有没有聽過老一輩的男人講過:
「女人唔到六十歲唔好俾飽飯佢食呀!」。

如今回看這句話，
當然會覺得很"離鋪"，
女人都係人，
點解唔可以餵飽佢哋呢?
況且女人依家有手有腳有能力，
洗唔洗男人養呀!
不過今次唔係討論男女平等，
只是想推論點解會有咁嘅想法。

從前俾女人食飽究竟有乜唔好呢?
食飽無憂米?
食飽無嘢做講是非?
食飽，女人就會懶惰唔做家務?
食飽，女人唔會再聽老公話?
食飽，女人可能會去勾佬?
無論係乜嘢原因，
從前有啲人會覺得女人好似"病毒"咁，
食飽可能會出現問題。

「啲女人食飽無嘢做就講是講非架嘞!」，
這句是由一個老女人講出黎，
乜淨係女人會講是非咩?
我唔敢講，
不過坊間一向用"長舌婦"黎,形容講是講非的女人的，
說三道四討論人家長短長久以來好似都係女性嘅專長。
「隔離黃師奶個女未結婚就有咗啦，好似仲係個有婦之夫添呀!」，
「邨頭張師奶個老公出面有個女人呀，個女人好鬼妖野好鬼姣架!」，
「你又知?」，
「 噚日李師奶講架，講到幾鬼精彩呀!」
「李師奶見過個狐狸精咩?」，
「未喎，佢都係聽對面屋林師奶爆料喳。」
「咁林師奶見過個女人呀?」，
「唔知呀，佢聽樓下周師奶講喎!」
「咁我又係邊個呀?」，
「你咪係邨頭張師奶囉，咁都問?」
「你都知咩? 我都唔知我老公出面有女人喎，多謝哂你通知喎!」
「嘻嘻~~ 唔好意思，我趕住去買餸，走先!」。
串門子是食飽飯後嘅娛樂活動，
肚餓時，
人是没有能量去討論事情的，
只有肚飽後才有氣力去硏究人家的長短。
問題係只有女人會講是非嗎?
還是食飽加上無聊嘅人才會講呢?
如果女人都要外出工作，
她們那有時間講是非呢?
都可能有，
可以講公司裏的是非，
分別只是目標和題材不同而已。

「你咁講，有性別歧視喎，女人會鬧爆你架!」，
「無架，男人女人各有所長之嘛! 我無歧視呀。」，
「咁男人有乜所長呢?」，
「去滾囉，十個有九個想去滾，當中有一半附諸行動了。」
「係啦，啲男人見到靚女就會變狗公架，對眼鹹鹹濕濕咁啤住人哋個胸!」
「係囉。男人唔去滾，女人邊有題材講呢?」
「果然係各展所長，天生絶配喎!」

小男孩在超市!

假日的超市滿是試食的推廣攤檔，
有時我們會發現不少有趣的對話。

一個六、七歲帶着紅邊眼鏡的小男孩發現了寶藏似的在叫着:
「媽咪~~~ 哩度有試食呀! 快啲黎試啦!」
「唔試囉! 你自己試啦!」不遠處的媽媽有點尷尬，
「試啦~~~ 唔洗錢架!」還是大大聲的在叫着，
「唔買喎，唔試啦!」
「唔買都食得架!」男孩用疑問的眼神望着試食攤位的姨姨，
「食得! 食得! 你要唔要多嚿呀?」姨姨笑咪咪看着男孩，
「我食咗嘞，媽咪唔試喎!」

超市的游水魚檔也可以是一個"體驗場"。

小男孩又發現有趣的東西了，
「點解要用保鮮紙包住啲蝦架?」
「因為唔想佢哋跳走哂囉!」
「啲蝦都死哂啦!」小男孩用手指輕輕"篤"着保鮮紙的表面，
「包住咪焗死咗囉!」
「噢~~真係慘嘞!」小男孩帶着可憐的眼神說。

「哩條包住嘅係乜魚呀?」小男孩的爸爸問，
「唔~~~ 係咪紅衫呢?」語氣有點遲疑，
「唔係，係大眼雞喎!」

「爸爸，哩份切開一塊塊嘅係乜魚黎架?」
「係鱈魚，你要唔要買呀?」魚檔的姨姨逗着小男孩說，
小男孩知道買唔買自己揸不了主義，
正要轉身問問時卻發現爸爸走遠了，
於是轉頭對賣魚姨姨大聲的說:
「我比較喜歡游水的魚喎!」
賣魚姨姨立刻指着傍邊魚缸裏的游水魚說:
「哩度有好多游水魚架，你要邊條吖?」
「我...我... 我住好遠架，唔係哩度買嘞!」小男孩紅着臉走開了。

其實到處都有學習的機會，
多讓小孩子獨自面對人群，
他們可以學得更快更生動，
也能培養他們和別人溝通的技巧和信心!

"Need" OR "Want" ?

這是一篇關於"設計準則與市場推廣的角力"的闡釋，
純粹從個人多年觀察所得的理解，
未曾做出過精確的數據調查，
也没有引用什麼大師的理念為依歸，
所以不算一篇精準的言論，
而且內容偏向枯燥無味，
未必能夠引起大家的興趣，
現在寫下來只求記述自己此時此刻對這命題的想法，
也許十年之後重看這篇，
會發覺自己是多麼的無聊和幼稚，
但不竟也算是個屬於自己在這階段的想法和記述。

"自我感覺良好"這名詞，
是一種"自我主觀感覺"，
没有客觀的準則，
實則也没有需要，
以個人感覺為準!
我們嘗試把這個"感覺"放之於消費角度，
很容易就發覺這是對設計基本概念的一大挑戰。

簡單一點說，
就是人類的消費模式已失掉理性選擇，
很大程度上被市場推廣資訊完全掀引去了，
商家釋放的任何消費信息都照單全收，
忽略了自己的真正需要，
感覺上自己必需跟着市場"潮流"而走，
不停把錢消耗在一些自己没需要的東西上，
成為市場潮流的跟貼者，
繼而沾沾自喜自己能走在潮流的尖端，
心裏自然產生良好的感覺。
這或許是羊群心態，
人們都怕自己被"孤立"，
只有和大眾走在同一路軌上，
才有安全的感覺。
又或者是一種虛榮心作怪，
走在人家的前頭總是有點自鳴得意，
不理東西是否合用、有無用，
只想顯示給別人看自己多"型"，
這也是所謂的"自我感覺良好"了，
也許我們可以從另一個角度看，
如果消費不是有實則作用的，
能夠滿足心理上的要求，
也可算為一大"進步"，
只不過在現今的消費型社會裏，
人們實在缺乏自我節制能力，
花費太多金錢在不必要的消費品上了。

從前學到"The function of design"是:
"To improve the living value of human being"，
好的設計是要先理解人類真正的需要(Need)，
而不是表面的慾望(Want)，
因為人類很多時都會受到外在環境或一時衝動而迷失。
不過今天看來這個概念已經被人遺忘了，
真正的"human living value"已經被扭曲得蕩然無存，
人們要的不再是實效功能，
而是一種能滿足購買慾望和虛榮心態而已，
如此無節制無實際的產品創作方向，
只會為社會帶來更多不必要的浪費，
看看一副副功能良好但因為款式跟不貼潮流而被拋棄的產品，
繼而又重新購買新款但無實際功能突破的東西，
人類現在大量虛耗着大自然資源，
地球的資源並不是五餅二魚，
它將會很快被我們消耗殆盡，
到時我們手上拿着那塊廢鐵又有何作用呢?

母親節母親快樂!

不分春夏秋冬時
天天都是母親節。

女人之苦

這個題目好像不應該由我寫，
我不是女人，
也没能力偷聽女人心，
對女人了解也很有限，
但在茫茫的半生中，
多多少少點點滴滴，
我開始理解到，
不想身邊的人受到半點傷害，
縱然有些女人會喋喋不休，
有些女人會斤斤計較，
但女人是用黎愛錫的，
因為還有女人是可愛的，
她們能夠讓你的人生變得更完滿!

時常聽到男人對女人的怨言是:
逼婚、管制、貼身...
一言蔽之: 無自由。
女人一開始拍拖就會計劃未來，
尤其是接近適婚年紀的女仕(中女)，
所以有"非誠勿擾"的出現。
時間對女人和男人不同，
老一輩的都說:
男人三十一枝花，
女人三十爛茶渣。
無論她多能幹、多有才華、多強悍，
每個女人都會怕"老"，
尤其是怕人老珠黃無人要，
現代女人故然可以自食其力，
不結婚不靠男人一樣可以生活得好快樂，
但若然有得揀的話，
那個女人不想有個男人在身邊呢?
因為人總是怕寂寞的，
尤其是一個能幹的女人，
當她成功時，
她想身邊人和她分享，
當她在外邊受傷後，
回家有個男人的肩膀讓她靠一靠，
那種感覺是多麼的好多麼的安全。

可惜，
在女人心目中，
男人多數是個長不大的男孩，
他們永遠都有顆男孩的心，
想自由自在的去做些"無聊事"。
結婚在男人心目中是永不翻身的墓穴，
結婚代表成為大人，
要承擔一家的責任，
男人很怕很怕，
自己還那麼年青，
還有很多很多東西還没有嘗試過啊!
但身邊的女友已經為自己眼角的魚尾紋感到懊惱，
同時，
她也開始關心高齡產婦的資訊，
心裏正計算自己還剩多少時間。
在這個男人身上，
青春已經投下了不少，
年月不可能讓她從頭再來一次，
歲月催人老，
為何他好像吃了防腐劑般光滑如新，
但自己日搽夜抹還是徒勞無功呢?
她很惶恐很無安全感，
結婚! 結婚! 結婚...
這聲音不斷在她腦袋裏迴蕩，
她想的、做的、計劃的都是朝着這個目標，
但她的男人卻和她對着幹，
每次和他談都說"過兩年"，
兩年又兩年又兩年，
女人過了三十歲有幾多少個兩年呢?
為了這件事，
兩個人爭吵了無限次，
漸漸地，
女人開始死心了，
這個男人變成她的雞肋，
可有可無，
但她不知自己應該離開還是怎樣，
她愛他，
他也愛她，
但她知道他愛自己多一點。
這刻，
她正在做預備，
假如有天她和他真的要分開，
她還是可以孤身上路，
反正再找別的男人也差不多，
路可能要自己一個人走下去，
是痛苦但奈何?

珍惜!

今天讀到blog友deepc的文章，
才知道觀塘月華街舊巴士站的細葉榕要搬遷，
雖然住得很近那裏，
但對於這件"大事"，
我事前完全沒有察覺，
着實有點愧疚!

那棵細葉榕不算很老，
只有四十歲大，
和老樹相比，
它只是年青人一棵，
但樹身連泥土也有三百多噸重，
要妥當把它移植有一定的難度，
而且細葉榕不算是罕有樹種，
所以這棵大樹根本並未列入保護名單，
但由於它樹形優美，
又為一眾觀塘老街坊留下不少回憶，
當局終於理解到"百年樹木"的道理，
"英明"地決定把它保留，
更花了年多時間計劃部署，
在五月一日把它安全地搬至七十米外的月華街公園安置，
它能和月華公園裏眾多大樹一起生活，
這實是一件美事。

有些東西就是這樣，
當它好好的在身邊時，
我們會覺得是理所當然，
有時甚至並不察覺它的存在，
但當它可能會消失時，
我們才會發覺它的珍貴和重要，
物件和人都是一樣，
人們應該好好珍惜和保護，
因為很多東西不是必然的，
否則當我們失去他們時，
無論我們付出多少代價都太遲了。

大騎樓幻想!

老實講，
我真正幾喜歡可以有個共進早餐嘅露台，
不過係香港都幾難，
依家啲樓咁貴，
唔好講咁大個露台，
室內都好似豆腐膶咁細，
實用面積又少，
要有咁大個露台簡直係奢想，
就算有都俾人封哂做多間房，
我住嗰條街好多人都係咁，
啲人話知佢啱唔啱建築條例，
政府管到黎先算，
人多屋細唔夠用喎，
不過個露台根本唔夠力支撐成間房，
如果崩坍就死得人多嘞，
香港人都幾慘，
花一生積蓋都未必住到間合意嘅樓，
仲要揾命搏。

有時睇旅遊節目見到啲歐洲小town幾鬼正，
人又少，景又靚，
湖光山色空氣好，
間房又有前後花園，
一望無際永無遮擋，
夜晚又可以睇吓星星、月亮，
又唔洗被隔離屋啲打仔聲、鬧交聲嘈住哂，
而且屋價又唔係貴，
有時百幾萬就買到間好正嘞，
係香港?
買間厨房就差唔多，
想有前後花園、有景無遮擋?
得! 俾幾千萬以至成億住半山囉，
住新界丁屋都可能近磅啲，
不過要同人share二、三樓，
遇着個一家大細兼自私嘅，
一樣嘈到飛起，
仲要分分俾啲村狗追你九條街，
再唔係就踩到週腳狗屎，
安寧和自在邊有你份吖。

外國啲居住環境普遍比香港好，
唔怪得咁多人退休後移民去加美、瑞士等地，
空氣好啲、嘈音少啲，
病都少啲、人都長命啲，
不過大前題係有無錢先，
無錢就唔洗諗嘞，
留返係度繼續捱世界啦，老友，
夢醒!