微鹹笑話兩則!

Blog友巔巔兄講"找快樂"，
我也即興想到兩個笑話，
雖然有少少鹹味，
但也想讓大家笑一笑。

一) 阿婆自殺:
八十多歲的阿嬌年老多病，
周身痛症苦不堪言，
於是要求家庭醫生幫她安樂死，
但醫生不肯，
阿嬌不心息天天都去問，
如是這快一個月了，
醫生忍無可忍就對她說:
「你找把尖刀在你左邊乳頭對下兩吋一插就可以一了百了，但不要說是我教你的啊!」，
於是阿嬌很開心的走了，
過了兩天，
醫生看到阿嬌一拐一拐的走進了他的診所，
他覺得很奇怪的便問阿嬌為何會跌倒，
阿嬌卻說:「我不是跌倒，是插傷呀!我回到家裏就跟你指示用尖刀大力插左邊乳頭對下的地方啊!」，
醫生:「那裏不是你的心臟嗎?」，
阿嬌:「胡說，那裏是我的膝蓋呀! 你看看...」，
於是她把衣服打開，
露出一雙"墮"到膝蓋上的奶奶來。

二) 性教育:
村裏一對性知識貧乏的新婚夫婦要動房，
於是男的就預早請老母親教路，
老母親不好意思直說，
只導:「動房就是用你身體最硬的地方插進女仔尿尿的地方囉!」，
兒子很開心的回家跟着做，
但隔天兒子就進了醫院了，
老母親很擔心的趕去探望，
看見兒子包着頭顱躺着床上，
老母親:「為何會這樣啊?」，
兒子:「你叫我用身體最硬的地方嘛，那不是我的頭嗎?」，
老母親:「就算這樣也不會頭破血流吖?」
兒子:「她尿尿的地方不就是馬桶嗎? 我一頭大力插過去就這樣了!」，
老母親:「哎吔! 生到你咁笨，我死咗佢好囉!」。

前世欠下的孽債！

「你唔明嫁啦， 你都未試過！」,
對，
只有當事人才有切膚之痛，
但有句老話叫「當局者迷！」，
更慘的是"迷而不知還自以為清醒"，
真作孽，
這種情況最常見於男女之事。

友人慘遭拋夫棄女，
妻子一走了之，
原委還沒有搞清之前，
妻子很快便和奸夫珠胎暗結，
還給奸夫至電侮辱，
說什麼自己老婆都看不住， 不是男人。。。
友人除了生氣卻還是給錢妻子"落仔"，
理由是妻子說他對自己不好，
所以才會紅杏出牆，
真是荒天下之大謬，
她走了還敢厚顏回來問丈夫要錢"落"奸夫的孽種，
這是什麼道理？
奸夫去了那裏？
奸夫沒有去那裏，
只是隔天來電譏笑這個笨男人，
難得這個笨男人還相信自己老婆(奸夫的發洩工具)，
錢給了一次又一次，
還口口聲說要接她回家，
仔是"落了，
人是回來了，
不過很快說又要錢，
什麼要買衣服呀，要解悶。。。
藉口白痴卻有人相信，
錢又是到了光棍手，
回來數天又走了，
連女兒也沒有多看一眼，
唉。。。
故事還沒有完，
不過內容卻是重複的，
又再一次珠胎暗結，
奸夫撒野，
要錢俾錢收錢走人。。。。。。
笨！笨！笨！

對，
笨開有條路的，
人走了但是繼續問要錢，
最後給她在深圳租了房子，
還給錢做零用，
結果天天打麻雀解悶，
錢輸光了還欠屋租。
笨丈夫還是再給錢。
有天傍晚笨丈夫有事回深圳一趟，
給她電話無人聽，
直接到她住處也找不到人，
卻在床下找出數個用過的避孕套，
抽屜裏還有半打全新的，
難得這個笨男人還替她找借口，
騙自己說事情未必是這樣，
最後實在連自己也騙不到了，
失望之餘還問:「我對她那樣好，為什麼她還要這樣傷害我呢？」,
愛情本無對錯，
但變了心就要放手，
他自己已經失業多時，
還把所剩無幾的家財一次又一次給了這個無情的女人，
前前後後也有廿萬了，
愛情果然是盲目的，
不過這不是愛，
只是孽，
因為由頭到尾只有那個笨男人付出過，
人家只是來討債，
一定是前世欠她的！

"傷心酸辣麵"!

發現一間新開賣粉麵為主的小店，
名字叫"傷心酸辣粉"，
好悲愴的名字，
心傷還要加上酸和辣，
百般滋味上心頭。

麵店賣點是酸和辣，
其實是四川、雲南、上海、台灣的麵食大混雜，
辣油、炸醬、豆蒄、糊椒、酸菜等等全部奉上，
食東西和做人也差不多，
半茶匙獨單、一茶匙寂寞、半點蒼白、一灑淚水.....
人生麵條同樣是悲喜交雜，
什麼滋味都可以嚐到，
只是苦澀酸辣往往長留口中不散，
讓人"回味無窮"，
很難忘掉。
至於麵條反而降到次蓆，
口感如何？
是 "Q"?
是軟?
還是怎樣，
全部都忘記了，
只剩下口腔裏的麻和酸。

店裏的客人多是年青男女，
上了年紀的反而很少，
不知是價錢問題還是什麼，
可能年長的早已嚐透甜酸苦辣，
來間"開心麵館"會好一點，
反而初生之犢不怕冒險，
敢於嘗試，
能帶着一股狂傲邁進百味人生。

欲抱珠還!

如果女人吸引人的是色相，
那麼男人吸引人的是聲線嗎?
若果男人是用眼睛去觀看人，
那麼女人是用心去感受人嗎?
色相看多了會生厭，
情愛在心裏久了卻會沈澱更深，
如果這是真的，
難怪男人很易花心，
女人卻會泥足深邃，
情愛不易開花結果，
因為它本來就是先天不足!

吃着說!

「你猜猜隔壁那個女的吃得完那碟飯嗎?」
「我怎知道?」
「她那碟飯真的很大啊! 如山般高!」
「人家碟飯多少關你什麼事?」
「無，我見佢哋三個女人係咁雞啄唔斷，不知那個女人能否吃完啫!」
「吃不完又如何? 你要吃嗎?」
「神經病，才不是，我又不是無飯食。」
「那你問來幹嗎?」
「我只是想知說話和吃東西是否可以同時進行良好喳!」
「應該可以很好的。」
「你怎知道?」
「看看你就很清楚了。」
「你夠膽就說多一遍!」
「......」

天氣涼了很多，
身體冒出冷汗來了。

七百年前留下來的 "柑子" !

【賣柑者言】明 劉基 (劉伯温)

杭有賣果者，善藏柑，涉寒暑不潰，出之燁然，玉質而金色；置于市，賈十倍，人爭鬻之。予貿得其一，剖之，如有煙撲口鼻；視其中，則乾若敗絮。予怪而問之曰：「若所市於人者，將以實籩豆，奉祭祀、供賓客乎？將衒外以惑愚瞽也？甚矣哉，為欺也。」

賣者笑曰：「吾業是有年矣。吾賴是以食吾軀。吾售之，人取之，未聞有言，而獨不足子所乎？世之為欺者，不寡矣，而獨我也乎？吾子未之思也。今夫佩虎符、坐皋比者，洸洸乎干城之具也，果能授孫吳之略耶？峨大冠、拖長紳者，昂昂乎廟堂之器也，果能建伊皋之業耶？盜起而不知御，民困而不知救，吏奸而不知禁，法斁而不知理，坐糜廩粟而不知恥；觀其坐坐高堂、騎大馬、醉醉醴而飫肥鮮者，孰不巍巍乎可畏、赫赫可象也？又何往而不金玉其外、敗絮其中也哉？今子，是之不察，而以察吾柑！」

大意是:
杭州有個賣柑小販善於保存柑子，
就算在寒冬都一樣有外表黃金的柑子賣，
所以就算叫價十倍，
依然其門如市，
劉基好奇之下買了一個嘗嘗，
但剝開漂亮的柑皮後發覺內裏柑肉尤如爛棉，
乾枯而不能吃，
於是對小販大興問罪。
但小販反駁說:
我都係揾兩餐而已，
人人都係咁做，
為何要計對我呢?
你睇吓依家啲文臣武將，
個個身光頸靚，
高官厚祿，
住洋樓養番狗，
前擁後載，
高高在上，
佢哋何曾有"孫吳之略"?
還口口聲聲說:「没有對不起人民」，
反觀我們小市民就餐揾餐食餐餐清清，
揾啖飽飯食都唔易呀，
你知道什麼是"金玉其外、敗絮其中"，
難道没有看到這些事情嗎?
那些庸官你不管來管我，
還獨指我是奸商!

劉基 作 【推背圖】 推算未來，
不知這篇是否也是預知今天的香港情況呢?
還望那些莫視民情的庸官多看古書，
作了一番孽還訛言自己没有對不起香港人，
看看自己拿的人工比美國總統還要高呀，
攞左我地咁多血汗錢，
你有無打好你份工呀?
無知，無能加無恥，
尸位素餐還侃侃而談，
可恥! 可恥! 可恥!

"但願人長久"!

隔壁一雙三十出頭的情侶在坐着，
男的外貎醒目，
西裝筆挺，
架一副金絲眼鏡，
看來事業上正開始一番作為，
女的淡掃端裝，
黑色辦公室套裝，
腳底三吋高跟鞋，
看來也是事業型女性。
他們談着金融投資，
還有一些辦工室政治，
而重點卻落在如何計劃未來，
正為他們的將來打算着。

因為是吃自助餐，
他們一同走出buffet枱，
没有手拖手，
没有露骨的"愛吻"，
連身體四肢的接觸也少，
但回來時兩人手上卻各自拿着一個大瓷碟，
原來是"心太軟"，
碟上還用朱古力醬寫着"甜言蜜語"，
女的碟上寫着"Ebere, 31 生日快樂"，
男的碟上則是"陳大偉, 我愛你!"，
碟上四邊還劃了幾顆朱古力心心，
愛情在女人心中佔的比例總比男人的多。
他們坐下，
然後慢慢味嘗溶化出來的熱朱古力醬，
一啖一口，
甜不甜?
只有他們自己知道，
你眼望我眼，
情感內歛，
没有勝利V字手勢拍照，
没有蛋糕吹蠟燭，
没有少年人激情，
只有未來的計劃，
人到某個階段就會開始成熟，
也來得實際，
一切都實事求事，
只求情可永在。

"多嚿魚" 之 "玩Line"!

我好"OUTDATED"，
近日見個個講"LINE"，
初初都唔知係乜黎，
後來才略知又係網上一些交友平台之類的東西，
同FB、TWISTER、PLURK、G+都有點相似，
不過我成日諗，
玩一兩個咪得囉，
點解要個個都開黎玩呢?
想識多啲朋友呀?
但係我見啲人開咗後，
又狂叫一向係PLURK係FB有交流嘅朋友LINE佢喎，
咁即係點?
咪又係同返班相同嘅人玩?
咁點解要搞咁多嘢喎，
好煩囉!
啲人真係咁想人"關注"咩?
平時無人理自己呀?

其實我唔係好明，
係現實生活中我又唔見啲人咁熱忱去識新朋友喎，
見到熟人都未必有咁熱情去交流，
但係去到網上世界就好似發哂狂咁，
有咁多開咁多個平台，
有咁多人就ADD咁多人，
唔理三七廿一愈多愈好，
一千幾百個有幾個真係有交流架?
所謂交流又交乜呢?
係咪有乜新APPS可用?
有乜團購新着數?
有嘅八卦傳聞之類?
跟手就一蝸蜂咁衝去討論一輪，
然後又講吓自己起身食飯出街玩之類的東西，
哩啲無無謂謂嘢有需要開咁多個平台講咩?

"好多"香港人就係咁，
一時興一樣，
有人玩起就全部衝去玩，
慌死蝕底，
唔理好唔好有無用，
開咗先至算，
其實咪又係嗰類嘢，
NO BIG DIFFERENT!
依家又話'LINE"無私隱兼可能要收錢了，
個個又話要考慮玩唔玩得過喎，
唉~~~
真係攞黎搞，
魚民加餸 ~ 多嚿魚，
無無謂謂!

"身上福中不知福"之 寧廢莫奸！

2011-12施政報告

上面條link係曾特首的施政報告，
我好想搵時間睇左佢，
唔想斷章取義，
唔想人云亦云，
不過要睇哂成份報都幾辛苦，
從"往績"推測，
多數唔會有乜新野，
也唔會有乜實則遠見，
更無可能對即時民生問題。。。
例如物價狂升等有什麼答案，
一向無期望就唔會失望，
我好少睇錯人的。

2008年6月27日，
我係當日覆blog友"Imak"時說過，
" 睇咗老曾咁耐,
佢係一個剛愎自用的人,
又死牛一邊頸,
亦都唔覺佢會有乜大改進!
改變係需要時間,
但問題係入面根本無人諗過要改喎, (我指官僚作風)
係老曾領導下,
這個問題唔會有大改變,
風水佬呃你十年八年,
哩樣嘢二年見效!"

今日係2011年10月14日，
事隔三年有多了，
如今再翻睇我當日的言論，
証明所言非虛，
早在"佢"登場前，
好多人讚佢熟識政府運作，
應該有所作為，
我就話佢只是英國人一隻門口狗，
只不過後來由英國狗變大陸狗，
而且資質平庸到極點，
看下門口吠兩聲都仲可以，
叫佢"做野捉賊"就哂氣啦，
所謂沐猴而冠，
自己係乜料都唔知，
睇下門口咪好囉，
做乜大王丫？
出醜之餘仲禍及市民呀！

不過早幾日又係blog友Imak blog裏討論新特首人選時，
見到一句 : "寧廢莫奸"，
我瞬間滴了一滴冷汗，
究竟我地依家係咪"身在福中不知福"呢？
廢係廢d,
乜都做唔到，
但係換左個有能力，
不過估唔到佢心裏諗緊乜既人上場後，
我地會唔會死左都唔知乜事呢？

聾子說話!

你問我香港人係咪好嘈，
就我個人自己所"聽"，
我會話"係"!
這是基於人們在大庭廣眾下說話時，
會否考慮是否影響他人作論點。

除咗朝早嗰個幾鐘未瞓醒，
地鐵、巴士入便啲人好似行屍走肉外，
一般時間真係好Q嘈，
無論在街上、車裏、餐廳裏、圖書館裏......
任何大庭廣眾嘅地方都聽到有人大大聲咁"講"嘢，
但係很少人會覺得咁樣有問題，
更唔覺這是没有禮貎，
街黎架嘛，點解唔可以大聲講嘢喎?
但又時常聽過香港人駡內地人大聲講嘢無禮貎喎，
哩啲係咪五十步笑百步?
可笑!

係餐廳、酒樓有無試過聽唔到同枱的說話聲呢?
唔係十二人大枱喎，
就算係四人細枱，
朋友、家人坐係你隔離，
只要對方唔係大聲公大聲婆，
你多數唔會聽到佢講嘢，
跟住你會好大聲咁叫佢大聲啲，
到大聲到蓋過隔離枱嘅對話聲時，
隔離四周嘅人又要再大聲啲來掩蓋返你哋把聲，
層層遞進、聲聲俱增，
最後全廳嘈到萬鳥歸巢咁，
不過唔緊要，
人人都是這樣，
完全唔覺得有問題，
至多是耳鳴頭痛而已，
人未老就要帶助聽器了!

又好似係圖書館裏，
理應是寧靜和諧的，
不過最常聽到的是奇怪又響亮的電話鈴聲，
有阿仔叫老豆嘅響聲、更有古典音樂嘅樂章.....
甚至有人用BB仔哭聲作鈴聲，
一響就成個圖書館都聽到，
隨後就聽到大大聲咁講電話，
仲慢慢咁講大大聲咁講，
當正係自己辦工室一樣，
圖書館管理員話佢又唔理，
過無幾耐電話又響過又講。
經過兒童圖書館，
你多數會見到啲小朋友四圍走捉迷藏，
又尖叫又嘈，
無辦法小朋友講極都唔會聽的，
不過你總會聽到佢哋老母係度大大聲咁叫:
「死仔包，叫你唔好走呀，係咪想我打餐飽呀?」
聲如洪聲、大聲過大啦叭，
不過只係叫小朋友唔好走咗喎，
無話唔俾佢哋唔好嘈和叫喎，
事關嗰個師奶坐係度同佢班老友大大聲八緊是非嘛，
所以咪由佢啲小朋友嘈囉，
會唔會影響到其他人?
Who Cares!

記得某年我和朋友到東京自由行，
東京人多車多，
係街上都唔會太靜，
不過日本人係大庭廣眾下很少講電話，
講嘢亦很少有咁大聲得咁大聲，
真係幾有公德心和禮貎。
在旅遊期間，
有次我們從商場走到街上，
一出門口就聽到耳熟的廣東話吵鬧聲，
看看左右兩方距離兩三百步，
各有一團香港鴨仔團，
佢哋應該係度等緊團友出黎，
不過唔知係咪開心過籠，
講嘢時把嘴又咁大張咁大，
笑聲更響徹雲端，
九條街外都聽得到，
仲要全班人企正係走道正中間，
搞到當地人經過都要繞路走，
走過時仲"啤實"佢哋，
不過佢哋一於好少理，
繼續高談濶論，
視別人如無物，
非常失禮。
如果你旅行時有意無意間都是這樣，
唔好意思，
我說的就是你，
多多得罪。

其實點先叫嘈好難下定義，
唔通真係放部分貝機係口邊量咩?
不過方法又可以很簡單，
首先大家在大庭廣眾下講嘢時，
有無考慮過聲音會否影響到他人呢?
有没有盡量細聲一點嘅想法呢?
如果能夠做到先考慮別人，
這就很足夠了，
大部份香港人有無咁嘅想法呢?
唔好咁快答我住，
自己心裏想清楚先吧!

我愛吃生果!

$60多元一個奧陸蘋果、$289個 T字蜜瓜、$458包什麼青提......
還有菲濟木瓜、以色列無花果、敍利亞蜜棗等等少有的靚貨，
全部是極上的貨色，
美味、甘香、可口、多汁、有益、好看，
望之讓人心猿意馬，
嗅之令人垂涎欲滴，
還有幾廿蚊(唔係廿幾蚊喎)樽的青森蘋果汁，
這是人間樂土嗎?
什麼好美味的生果都讓我"看到"了，
但只是"看"没有買，
靚貨"靚價"，
我捨不得買，
也"買不起"，
心情很矛盾。

這個世界没公平的，
"公平"不代表人人有相同的待遇，
有人天天吃十元一粒的青提，
有人三餐不繼，
有些人含住金鎖匙出世，
有些人靠自己努力賺錢至富，
有些人勤力做工也只得温飽，
没有話公不公平，
各有前因莫羨人，
況且幸福、快樂不應該用物質來衡量，
有錢人不一定快樂的，
鹹魚清菜也很好味，
不過鹹魚也很貴，
窮人吃不起了。

若然我中了六合彩頭獎，
我會買那些又貴又美味的生果來吃嗎?
應該會的，
我也有虛榮心，
我也想嘗一嘗人間美食，
吃的、用的、穿的都會是最貴最好的嗎?
或許不會了，
為何呢?
有時看着這些極昂貴但品質很好的美食時，
我心裏會想......
有需要吃到咁"尖嘴"嗎?
有能力時，
買好一點點的不就可以嗎?
不忍吃一餐生果等如一戶人家幾天的飯菜錢，
實在有點"折墮"，
不是說有錢花是錯，
但總是過意不去，
人也不外是一副臭皮囊，
用的吃的有需要去到咁"盡"嗎?
活到"一把年紀"，
總想對自己好一點，
偶一為之讓自己開心一下，
可以理解，
但有些人卻以此為人生目標，
這樣是否有點扭曲呢?

點解 大型超市 可以攏斷?

巔兄係blog搞"港式茉莉花"，
痛罵大型超市攏斷市場，
魚肉市民，隨意加價，
我們尤如肉隨粘板上 ~ 任剮，
提意團結反擊，
抵制大型超市，
多幫襯街坊小店。
我是舉手舉腳全力支持的，
日常用品多光顧藥房，
麵包西餅小食亦轉往小餅店，
柴米油鹽開七件事都盡量光顧雜貨店，
買菜買肉都以街市小販為主，
盡量令消費不落入大集團手中。

這樣做是很有意思的，
不過有些事情卻不可不提，
首先是衛生，
不知道為何中國人的街市總是污污糟糟的，
肉檔、菜檔跟前總是又潮又糟，
滿地"菜烚"、豬膏，
不少檔主總是求其把菜頭肉尾隨檔掉，
搞到一地污糟邋撻、滿地血水，
聞之欲吐，
相反超市則光猛清潔，
通地乾爽無垃圾，
叫人行得舒服，
相比之下，
你會喜歡到那裏逛市買菜呢?

另一樣就是禮貎，
超市員工的確是機械化的問好、笑容，
但總少黑口黑面相對的，
相反部份小販商檔就一副晚娘面，
問多句都唔理你，
想揀多兩揀又話唔俾揀，
一副唔恨做你生意的嘴臉，
我親眼都見不少生果小販用粗口駡阿公阿婆，
那些阿婆阿公只是想揀吓摸吓而已，
就算唔俾人家揀都不用粗言爛口相對吧?
有些更大大聲的說:「我唔做你生意，唔憂做呀!」，
嘩~~ 唔洗咁"吋"呀?
千奇唔好以為這是個別事件，
我係觀塘街市十幾日就見一次，
不論是在生果檔、肉檔、菜檔都見過，
真係不知所謂，
你話超市趕絶小商戶，
都要睇吓佢哋點對客人，
咁嘅態度係咪抵人家唔幫襯佢哋吖?

另一個問題就係誠懇，
係超市買東西一就一、二就二，
明碼實價，
你覺得貴嘅可以唔買，
唔會呃秤騙人，
但係街市小販就唔係個個咁老實，
尤其係啲生果檔，
佢哋最喜歡將個價定到平一平，
好似提子、車里子哩類比較貴的生果，
標價九蚊磅、五十蚊兩磅，
然後係個磅度做定手腳，
一攞上手就知佢呃咗你三分一去，
你問佢點解咁少，
佢哋就成班人數你，
邊有呃你呀? 咁平係咁啦，
好似你再嘈就出黎打你咁;
又好似買游水蝦咁，
標價三十蚊一斤，
佢撈蝦時就連水都倒埋入去，
問佢點解咁多水，
佢就大大聲話三十蚊斤梗係多水啦，
嗱~~ 就係哩啲咁嘅態度搞到啲人把幾火嘞，
有時真係情願幫襯超市好過，
至少貴得黎唔會俾人"昆"。
你唔好話只係個別小販先係咁，
我梗唔會話個個係，
不過我一個星期去街市五、六次，
買餸經驗都唔少，
見到嘅就係咁嘅衰樣，
好嘅唔係無，
只係少之又少，
第度我唔知，
至少觀塘街市就係咁。
除此以外仲有大把衰格嘢，
不過不能一一盡錄了。

超市正趕絶小商戶係事實，
不過唔該佢哋都要反省吓，
臭檔、吋嘴、呃秤、污糟......
無超市佢哋都要改善吓啦，
再係咁我情願俾多啲錢超市都唔再幫襯，
超市的確在服務、衛生、態度上都比不少小販好，
人家攏斷嘅部份原因都係小販佢哋自己攞黎，
反省吓啦! 唔該!

西西利的淡藍

聲、意、形、畫俱佳，
看畢.....
很有購買的衝動。