2010年4月30日
2010年4月29日
觀塘略影: 塗上繽紛
有無覺得香港啲樓嘅顏色好沈悶呀?
唔係灰就係杏，
再唔係就係藍加白，
楝楝都差不多顏色，
啲寫字樓就變哂玻璃幕牆，
夏天係街外見到又刺眼又熱。
近期觀塘區好多舊樓翻新，
有啲重新油過外牆都幾靚架，
好似上面嗰楝就大膽咁揀咗紫藍色嘞，
雖然未必個個鍾意哩隻顏色，
但係多啲唔同嘅顏色總好過楝楝一樣吖，
希望以後唔同嘅大厦有唔同嘅顏色就好囉，
咁樣睇落去都新鮮感多啲嘛!
2010年4月27日
觀塘略影: 巨型狗屎!
這是什麼?
好似係"大樹菠蘿"，
我對佢無乜認識，
未食過亦無意思嘗試，
咁你又影佢?
無架，
我覺得佢哋一嚿嚿放係地下好似:
巨型狗屎。
離遠少少睇噃，
似唔似呀?
哈哈哈~~~
無聊!
話你呀，
寫哩篇嘢嗰個呀!
絶地反搫!
還記得上次提及失業經年友人的"刻薄老闆事件"嗎?
他上班二個星期，
除了工作量多又制度混亂嘅例牌問題外，
最難頂係遇到個賤格缷膊嘅上司，
没有電腦用卻要編排生產流程，
唯有把家裏的laptop拿回公司應用，
追問上司何時有電腦，
卻得來個"拖"字訣;
又由於那間公司制度混亂，
從前可以說毫無正式生產流程，
友人兩個星期來要花盡九牛二虎之力，
回到家裏覆電郵至半夜，
晨早六點起床趕回內陸廠房，
剛巧遇着塞車遲到了大半個鐘一次，
卻立刻遭到上司的譏諷，
說他返工時間"很奇怪"，
他多日來覆的電郵都有時間註明，
上司是没有理由不覺的，
下屬替他落力執手尾，
他不領情之餘反而諸多留難，
真係令人心淡洩氣。
另一方面，
他上司不單不會協助他工作，
反而處處設置陷阱，
例如公司慣常拖欠供應商貨款七、八個月，
所以很多供應商不肯再提供配件，
但他上司卻要他去追公司會計部開票，
這是很荒謬的要求。
第一，
追會計部不是他的工作，
而是他上司的工作範圍。
第二，
那些追數的票據是從前留下來的，
即係全部係佢上司經手的，
外人根本不得而知。
第三，
友人新黎報告就要他同公司追數亦有問題，
給老闆知道就會說:"我是請黎返黎做生產，不是追公司數的"，
這個燙手山竽分明是佢上司缷給他的，
如果真的照佢上司做，
肯定俾老闆媽叉兼炒魷。
結果友人在忍無可忍下來個"温柔的反擊"，
反駁說他遲到是因為自己為求把工作做好，
縱然在没有電腦的工作環境下，
晚晚回家還是在覆電郵、編流程，
每天工作至零晨一、兩點，
早上六點起來趕回內地，
只是遲了大半個鐘一次亦情有可原，
希望佢能夠理解和接受。
友人這樣說有效没有真的不知道，
但係得罪上司就一定無運行，
反正佢上司都唔睇佢，
死忍爛忍只會讓人家欺壓，
現在唯有返一日做一日，
盡力做好自己本份，
同時亦會繼續揾工，
希望他可以早日逃出生天吧!
友人說辛苦、孤寒、衰格上司都可以忍，
最大問題係這間公司不單毫無制度，
生產求其，
產品質數差到無人有之餘，
就是明知貨品有問題都一樣出貨，
老闆對這些問題又毫無意見，
在這樣的公司做下去一定無前途，
所謂君子不立危牆之下，
友人說騎牛揾馬，
走得快好世界呀!
後記:
友人今日說這間公司還有一個大問題，
在這裏工作的舊人投訴公司習慣"拖糧"，
即係今個月出的是兩個月前的糧，
你話死火唔死火吖?
2010年4月25日
2010年4月23日
2010年4月22日
2010年4月21日
青森蘋果汁
在日式超市買的「青森蘋果汁」，
標榜由日木青森縣新鮮蘋果製成，
無加水、無人造色素、無防腐劑，
一公升賣39.9塊錢。
青森我没有去過，
青森蘋果我更没有食過，
聽人家說青森蘋果點好點好，
於是就破例用這個價錢買了一樽回家，
試飲後感覺是可以的，
但味道很甜，
甜到令人懷疑是否真的没有加糖，
如果真的是這樣甜的，
是否應該加水溝來飲呢?
值唔值就要睇個人了，
不過在維他命C來看，
相信不會和大陸來的有很大分別，
這種青森蘋果汁嘗試過就算，
我不會花幾倍錢來買差不多的東西!
日本仔產品形象包裝是一流的，
由宣傳到產品包裝都恰到好處，
只是普通的蘋果汁就可以賣貴人家幾倍，
相反內地啲蘋果就平到無人買，
可能會有人話日本青森蘋果真係好食好多的，
但是好吃的中國蘋果也不少，
可是怎樣也賣不到日本貨的價錢，
所以話東西好不好不是最重要，
最重要還是如何令產品看來很珍貴，
人家賣一樽好過你賣三樽呀!
2010年4月19日
九流小說: 兒女債!
又是一個令人傷心頭痛的故事。
他怒氣沖沖的吼叫:「媽! 她真喺好愛我架!」
已經氣得頭昏腦脹的母親終於忍無可忍，
「她愛你? 愛你會是這樣子嗎?」
他還是猛力為她辯護着:「她對我很好的，只喺幾萬蚊啫! 你何必斤斤計較呢?」
母親快要昏倒了:「幾萬蚊? 銀行借幾萬，大耳窿又幾萬，屋企又幫你幾萬，頭頭尾尾十幾萬啦!」
他理直氣壯的:「那是禮金來的，娶人家的女兒不洗禮金架?」
母親没氣的說:「佢又唔喺唔知道你嘅環境，萬幾蚊一個月，你自己都唔夠用呀!邊度有十幾萬禮金呀? 」
兒子急上心頭:「所以我咪問財務公司幫手囉!」
母親急得快要哭出來的:「阿仔，無咁大個頭唔好帶大頂帽，佢真係愛你嘅就唔會要咁多錢啦!」
兒子還是蠻不講理的:「我唔理，我好鐘意佢，佢要幾多咪俾幾多囉!」
母親眼眶流下淚來:「為咗你，屋企就黎被人淋紅油嘞，阿仔你醒吓啦!」
兒子急上心頭:「我不過暫時唔夠錢還之嘛，你幫我還住先啦!」
兒子說完這句話後就大力把房門關上，
留下淚流滿面的母親一個人在廳裏呆坐!
阿珍八年前便跟丈夫分手了，
朝七晚十一做着幾份清潔工來養育三個子女，
千辛萬苦捱了八年眼見兩個兒子出身了，
想着他們可以減輕自己的負擔，
可惜事與願違，
大兒子讀書不成終日上網玩電腦，
不揾工作不出街成為隱青，
最細的女兒只愛扮靚行街，
讀書年年包尾，
重讀又重讀，
小兒子在麥包店做學徒，
本來也算是一門手藝，
可惜卻愛上一個不知那裏來的四川姑娘，
終日無心工作，
而且時常問母親攞錢，
幾星期前家中接到一個不知名的來電，
電話中那個粗語穢語的男人說自己的小兒子欠錢過期未還，
說再不還錢就要上黎"做嘢"，
母親給嚇得三魂唔見七魄，
一問之下才知小兒子問銀行借了三萬，
又再問財務公司多借五萬，
再計埋早前問自己借的三萬多，
之前問極都唔肯講為什麼要借那三萬蚊，
原來為的就是給他那位四川姑娘作禮金，
可是母親事先卻對這事一無所知，
其實明眼人都知又是一單騙財事件，
一個女人不會要自己的男人借大耳窿錢娶自己的，
可惜"愛是盲目"和無有理智的，
任由母親如何說兒子還是執迷不悔，
事情又有何轉機呢!?
母親呆坐了一個晚上，
眼角的淚水已經乾了，
天還未光透時她回到自己的房間，
拖開抽屜把銀行存摺拿了出來，
一會等銀行開了門，
她還是會把自己辛苦儲下來的數萬元給兒子還債去，
她想她没有其他的選擇，
因為那是她的親生兒子，
難道做母親的都是如此苦命嗎?
老媽語錄: 睇佢點死!
新鮮媽:「今日要早啲返歸。」
新鮮仔:「點解呀?」
新鮮媽:「今晚做"鐵馬尋橋"大結局。」
新鮮仔:「你有追開咩?好好睇咩?」
新鮮媽:「好好睇呀! 你無睇過咩?」
新鮮仔:「有睇過，都OK啦!」
新鮮媽:「你唔記得你哋細細個都係咁嘅咩?」
新鮮仔:「我哋都無殺父仇人噃!!」
新鮮媽:「你哋細個時，我一個帶住你哋幾個，成日被人"蝦"架!」
新鮮仔:「又好以係噃!」
新鮮媽:「嗰啲扑街見我一個女人就"蝦"得就"蝦"，同林嘉華一樣咁衰格!」
(新鮮媽一講粗口就知佢火起了，佢平時很少講粗口的。)
新鮮媽:「我返去睇佢點樣死! 佢實無好收場架!」
新鮮仔:「好! 好! 好! 買埋啲嘢就送你返屋企啦!」
(真不敢想像如果沈萬均唔死，新鮮媽會唔會拆咗個電視機呀!)
報應即係話做咗衰嘢個天會知嘅，
到時到候個天就會將啲衰人"處理"，
這就是所謂"天道"，
中國人相信這一套，
是真是假很難說，
但如果没有這樣"東西"真係幾大劑，
個個作姦犯料都唔驚有報應，
到時真係天下大亂了。
做人最緊要心安理得，
過得人過得自己，
有無"報應"都好，
凡事都要憑良心做人，
名、利、權都只是過眼雲煙，
唔值得不擇手段，
所謂"天網灰灰"，
瞞得過天也瞞不過自己個心，
午夜夢迴，
要一睡到天明，
還是做個好人有意思一點!
2010年4月16日
往日潮服商場!
這是旺角的荷里活商場，
是從前"男孩"買衫買鞋裝身的好地方，
因為內裏大部份商店嘅價錢都比較便宜，
而且款式多兼可以自己設計讓他們造，
這商場其中一個特式就是樓梯傍的小瀑布，
內裏養了十條八條肥大的鯉魚，
每次走過都一定會駐足觀看，
感覺很有趣。
可是隨着時代改變，
現在已經愈來愈少人光顧了。
自己亦很少到旺角逛，
因為人多車多空氣差，
但是只要有機會經過都會上去逛逛，
樓上商場大體都没有什麼改變，
舖頭還是那幾間熟識的，
尖頭鞋、骷髏頭飾物、花紋西裝還是老樣子，
(往日流行一時的蘿白褲當然没有了)
分別只在於從前人頭湧湧，
如今則門庭冷落，
年青也很少會再光顧，
就是遲一點發績的百利也没落了，
更何況是荷里活呢!
況且，
昔日的"油脂飛"都變哂地中海、大肚腩了，
再穿不了從前的"潮服"，
眼看他們生意日漸冷清，
不知還可以支持多久呢?
2010年4月13日
錯了又唔認， 認了又無誠意!
我對醫療服務很不滿意，
從前他們給大家的感覺是很專業的，
做醫生的除了有技術外，
還給人一種很高尚操守的印象，
可是近事醫療界卻屢有出錯，
而且當中不少是不可接受的錯誤，
令人非常之氣憤。
醫療人員之所以受人尊敬是因為他們除了有高超的技術外，
還有一絲不苟的工作態度，
因為他們所做的是關乎人類生命的工作，
除了要有豐富的醫學知識外，
亦要有相當的耐性和心思，
理應不可有任何錯失，
是神聖又受人尊重的職業，
所以醫療界的薪俸相比其他職業是略高的，
這是他們高水平的工作表現應得的。
可是近年所見卻是反向而行，
醫療錯誤屢見不鮮，
有些更是錯到"離哂舖"的，
例如手術其間說私人電話，
又好似手術後没有把用品數清，
遺留下手術刀，沙布等物件在病人體內，
其餘如配錯藥、搞錯病人記錄、動錯手術等等時有發生，
雖然說人有錯手，
又或者推說醫療人手不足等借口，
但這全都是不可接受的，
一條又一條的人命在他們手上，
根本任何理由都不可以用來推卸自己的錯誤的，
試想想如果發生事故的是自己的親人，
他們的感覺又會是如何呢?
昨天報紙登出一名嬰兒給護士沖身時，
由於水温過熱，
嬰兒下身有兩成皮膚被熱水炙傷，
傷勢有可能傷及膏丸影響其以後生殖能力，
這是何等的疏忽大意，
簡直不可以接受。
更離舖的是事後院方竟然想推缷責任，
無禮的質詢男嬰父母是否曾替男嬰沖身，
其後發現問題可能是醫護人事先未有測試水温，
院方亦只是支吾以對，
未後作出任何正面回答，
及至受害男嬰父母把事情爆給傳媒後，
院方才臨時出來作出無誠意的假道歉，
簡直没有任何職業操守可言。
從今次事件可見，
不單下層的醫護人員水準日降，
更見管理階層不知所謂，
不單未能實施完整的醫療制度，
對發生了事故的處理手法亦欠誠意，
只想着如何把責任推卻，
那些高層終日坐在冷氣房裏作紙上文章，
高薪厚職十幾萬一個月卻未能做出合理的工作表現，
簡直是浪費納稅人的金錢，
他們没有理由支取豐厚的薪金，
也没有資格霸着這些重要的位置，
更不應得到以往人們的專敬，
他們只是一群不稱職的蝕米大蟲!
ps:
不是想一竹篙打一船人，
醫療界亦有好醫生好護士，
但相對從前來看，
他們的水準確實是在下降，
就算是因為任何制度問題影響，
也不可用以作為犯上嚴重錯誤的借口，
因為人命尤關，
生命無take two，
是不可以有任何錯失的!
2010年4月10日
何必太急呢?
從事零售事業的服務怠慢不行，
但過份"殷勤"亦會令人吃不消。
今天逛鞋店看"涼鞋"，
卻給那些售貨員"嚇怕"了。
事緣今天剛走進鞋店，
那間鞋店的售貨員的眼睛已像電子掃描器一樣，
把我們腳部看過不停，
及後走到鞋架前看看某款鞋時，
那售貨員又不停推介，
到我表示有意一試時，
背後立刻已有另一位服務員拿着那款合我呎吋的鞋給我了，
真係即叫即有咁快，
試著後覺有點不合心意，
原先那位又立刻介紹其他款式，
還不停拿不同牌子的給我看，
說這款有什麼什麼好，
那款又怎樣怎樣舒服，
總之說到一定有款啱你咁樣，
本來服務殷勤是好的，
但過份熱心卻讓人有點"谷"我買的感覺，
所以最後我都没有買下任何東西，
雖然臨走時他們都没有怎樣，
但臉上很明顯有點不悅的表情。
其實做生意嘅不是一次過，
如果能夠讓人家感到舒服，
就算今次不成功，
人家總會再來光顧，
何必急於一時，
非要入來的客人立刻買東西嗎?
這樣做只會適得其反而已!
2010年4月9日
就黎無錢買餸啦!
近日又再聽到美國佬強迫人民幣升值，
我唔係經濟學家，
只係粗人一個，
唔識什麼經濟理論，
淨係知道香港大部份食物都係由內地入口，
雞鴨鵝豬牛羊以至疏菜麵食，
糧油雜貨、家用貨品差不多講得出嘅都係由大陸入口，
如果人民幣升值，
積係變相要我哋啲升豆小市民大大增加支出啦，
依家啲餸菜、罐頭、雜貨已經有加無減了，
啲雞蛋以前一蚊幾隻，
依家一蚊得一隻喳，
仲有以前啲白菜三四蚊左斤，
依家六七八蚊先買到呀，
真係乜Q都加哂價，
聽過連啲救命藥材都係咁加價呀，
咁樣搞落去係咪想我哋食香燭呢?
啲香燭都係內地做架，
遲啲貴到連香都無得食呀!
你班美國佬想點先?
唔好以為自己想點就點好噃，
點解大家嘅貿易易差咁大吖?
你啲貨又貴又唔啱用咪無人買囉。
我就黎唔夠錢開飯啦，
係咪想趕絶我哋啲小市民先?
2010年4月5日
觀塘略影: 街上盆栽
不知大家有没有留意，
在春夏交際的時候，
部份街道的欄杆上會掛着一盆盆的美麗小花，
把灰漆漆的柏油路添上一點嫣紅紫綠，
細看後發現原來是區議會弄出來的花樣，
據聞是向花農"租借"回來的，
即是說花農會不時加以照料，
讓花朵可以開得長久一點。
雖然那些花朵不是什麼名貴品種，
但讓人看了有很喜悅的感覺，
走在街上心情也會輕鬆一點。
2010年4月3日
給刻薄成性老闆們的信
忍不住要講一講。
懶散的員工很多，
做事求求其其，
返工掛住上網，
這些是要自我反省的。
但衰格孤寒的老闆也很多，
對員工刻薄成性，
不當人家是人看待，
只刻意剝削員工應有的報酬，
同樣要大力聲討。
友人揾工經年，
終於找到一份有消息的，
工作內容是project manager，
是替一間電子產品貿易行到各間產品供應廠商跟進，
除了幫助各間供應商在生產時的技術問題外，
還要做埋QC和訂購生產時的原材料，
其中當然亦要包括對原材料議價和檢測，
要知道一件電子產品的原材料數以百計，
例如電路版、機械按鈕，軟膠Kepad、電路程式等等，
要不是有十多年經驗的人是不能升任的，
而且這個職位是要同時應付十幾款產品，
幾十間商家、幾百間原材料供應商，
照行規薪金理應在20k以上的，
友人本來已和對方逹成協議，
而對方亦很滿意友人的工作經驗和能力，
但就是第二次會面完畢時，
對方竟然把薪金由20k降為16k，
十二個月糧無任何津貼，
上內地各廠商做嘢只可以搭巴士，
更加没有任何意外保險，
即係話如果友人係內地有什麼意外就要"食自己"，
公司不會負上任何責任，
這是給"人"的條件嗎?
公司錢要賺盡，
但對員工如此刻薄，
人家會用心做下去嗎?
這麼目光短淺的人能把公司搞好嗎?
這些年頭這樣的衰老闆愈來愈多，
難怪工人和老闆的對立層面愈來愈深，
這是那些只看見微頭小利的老闆們所造成的，
好的員工未必會為一兩千元而想立刻轉工，
但你怎樣對待屬下人家是看到的，
相反如果長期處於半欺壓的工作待遇中，
時機一到人家就會頭也不回的跳糟去了，
就算暫時走不了的也只會求其幹活，
這樣對公司究竟是利多還是弊多呢?
還望那群無遠見、刻薄成性的老闆好好思量，
要賺錢也理應看遠一點，
不要為那丁點兒的眼前微利而把好員工迫走。
2010年4月2日
觀塘略影: 排隊
甲:「排什麼? 又有股票發行嗎?」
乙:「唔係，只是月頭啲老人家排隊攞生果金啫。」
甲:「平時都唔見咁多人架?」
乙:「聽日開始連放幾日假，銀行唔開門呀!」
甲:「咁都唔洗堆埋一日攞架? 遲幾日攞囉。」
乙:「雞碎咁多，未到月尾都用哂啦，唔攞定哩幾日食西北風呀?」
甲:「生菓金嘅原意唔係咁噃，啲老人家啲仔女唔養佢哋架?」
乙:「有啲係自己都顧唔掂，有啲就係唔生性唔理自己父母囉。」
甲:「家家有本難諗的經。不過點解唔用ETC咭呢? 咁咪唔洗排咁長龍囉。」
乙:「老人家點識用喎，又記唔到個密碼，又驚被人執咗嘛!」
甲:「咁咪叫自己啲仔女幫手攞囉。」
乙:「啲仔女啋啲老人家都儍呀，有啲衰嘅連父母嘅生菓金都攞走埋呀!」
甲:「唉~~養兒防老唔啱用啦，養兒到老反而要防佢哋呀! 真慘!」
乙:「唉~~~~」
2010年4月1日
又是四月一日!
又是四月一日，
愚人節像是上天愚弄我們的日子，
對於八十前的來說，
今天又一個他們熟識的人物消逝了，
當年迷倒萬千麻甩仔的"肉蛋"，
今日舉足輕重的航天商家 - 狄娜 逝世了，
享年六十五歲!
日子天天一樣的過着有點麻木，
但看着一個又一個屬於自己成長年代的人"消失"了，
才驚覺時間過得很快很快，
那種感覺很是悲哀，
雖然他們都比自己年長，
但他們卻代表了自己的年代，
他們的消逝好像訴說自己光輝歲月差不多走完了，
看看今天的演藝界，
有多少個新人是自己熟識的，
有些就連名字都未聽過，
自己好像活在過去中，
看見如今青少年對新一輩的藝人如痴如醉，
嘗試努力去"認識"他們，
但總覺得格格不入，
這說明了什麼?
我不再年青了?
是漸漸要走出時代舞台的時候?
訂閱：
文章 (Atom)
發表文章
