睇戲、上網一齊黎?

哩個係舊瓶新酒嘅老問題，
內容係關於人們喺戲院內嘅自私行為。
睇戲講電話已經司空見慣，
但係依家有啲人仲離鋪，
一路睇戲一路用手機上網，
我都唔知啲人想點，
上少陣唔洗死啩?

話說噚晚我去睇戲，
隔離坐咗條廿幾歲嘅死肥佬，
雖然個樣後生但個格超衰，
(肥唔係問題，至衰係自私)
未開場就係度玩手機上網，
初時我都無理佢，
後黎做廣告時段佢仲上緊，
直到正式開場，
全部燈關掉時佢都仲係上緊網，
我見佢係個特大螢幕度係咁捽上捽下，
又將個手機上下搖㨪都唔知佢想點，
(我見佢係上緊網，並唔係玩緊GAME)
依家啲新款手機螢幕又大又光，
搞到我坐係側邊完全集中唔到精神睇戲，
後尾套戲做到入戲肉嘞，
條死肥佬終於放低個手機，
我諗住可以唔洗再俾佢個手機"殘"住哂啦，
點知唔夠五分鐘佢條富貴又攞起個手機玩，
如是者每隔五分鍾就玩一玩，
玩吓停吓咁玩足大半場戲，
成場戲我就好似坐係個搖擺不定啲燈籠側邊咁，
上下左右不停咁㨪吓㨪吓，
討厭到不到了，
本來我好想開咪X爆條死肥佬，
不過一嘈就睇唔到場戲嘞，
而且又會影響到其他人，
結果我忍咗佢。

有時我心諗，
啲人上少陣網洗死咩?
或者講少陣電話唔得咩?
次次開場戲院都會放套短戲叫人熄電話架啦，
啲人係盲定係明知故犯呢?
如果佢係大商家大富豪嘅，
講少個電話會賺少幾千萬嘅咪包場囉，
唔好話講電話、上網吖，
瞓教、跳脫衣舞都話之你呀!
依家算點呢?
人家只不過想靜靜哋睇場戲啫，
佢就係度用個電話㨪吓㨪吓，
你話係咪好騷擾吖?
係戲院內咕咕嚕嚕咁講電話一樣好X討厭，
有啲人有舖同電話另一邊嘅人慢慢討論套戲嘅癮頭，
雖然唔係好大聲，
但係好似鬼食泥咁講過不停，
更離舖嘅係打電話問阿仔有無食飯、做功課...
啲雞毛蒜皮嘅嘢就留返出去先至講啦，
全場無人想知你嘅家事呀，
哩啲人咁叉自私，
明知會影響別人都故犯
有時對住哩啲富貴真係好X想爆粗X餐飽佢呀，
不過X爆佢哋都無，
大把人都係咁無品，
哩個講完嗰個講，
前講後講左講左講，
講完又玩手機上網，
X極都X唔X完，
不如留返啖氣好過，
唔好賴係內地人、新移民呀，
我見好多都係地道嘅香港人，
表面上，香港人教育程度愈黎愈高，
但係公眾場合禮儀水平就愈黎愈差，
咁自私，讀多多書都無用，
哩啲人讀屎片好過啦!

"點解要性交?"

今日嘅題目係三級嘢，
年紀未夠十八或心智未逹十八嘅"小朋友"請迴避，
唔係投訴我淫蕩或者教壞小朋友就唔好啦。

今日嘅題目就係"點解要性交?"。
如果哩條題目俾啲人細鬼大嘅細路答，
佢哋實會話我戇居兼搞笑，
搞嘢梗係要happy啦，
唔通想生bb咩?
搞出人命唔係"目的"，
係"災難"呀!

如果問已經成家立室嘅成年人，
佢哋可能會話鍾意細蚊仔，
又者要傳宗接代囉，
無錯，
係"傳宗接代"哩四個字，
唔好笑老土呀，
依家仲有人抱住"無後為大"嘅想法架，
尤其係啲九代單傳嘅，
唔單止要愈生得多愈好呀，
如果個老婆生唔出個慈姑掟，
簡直係罪大惡極，
就算唔俾人休妻都會打入冷宮呀，
你咪笑呀，
大把人仲係咁諗架，
儒家思想根深蒂固，
無仔生連太公分豬肉都無份呀，
老公死咗有女都無用，
份身家隨時要俾啲叔伯兄弟分哂去，
孤女寡母無人理，
哩啲事依家係中國仲大把呀。

好嘞，
扯遠咗添，
講返"點解要性交?"先，
綜觀上述兩點，
性交嘅目的好似大致可以歸納為兩點，
一) 就係肉體上嘅happy，
二) 繁殖下一代嘅神聖任務，
其實我真係唔覺得有幾神聖，
如果唔係抱殘守缺，
一定要生男嘅，
生男生女，
生唔生都無問題嘅，
我睇唔出"繁殖下一代"有幾神聖，
明眼人一睇就知哩種講法簡直就係封建男尊女卑嘅陃習，
只會係啲食古不化嘅老而不先會咁諗，
不過事實話俾我知，
哩啲老而不國內多的是，
唔係都唔會有咁多殺女嬰發生啦。

如果性交嘅目的唔係一定要"生"嘅，
咁主要目的積係要happy啦，
先唔好話啲青少年濫交唔濫交，
青少年到大人都覺得性交好happy，
尤其係男人，
癮起時對住個靚女就會話:
"你俾我啦! 你俾我啦! 我乜都應承你呀!"，
好明顯性交能夠帶俾男人好大樂趣啦，
至於女人呢?
我梗係唔可以代佢哋答啦，
不過很大程度上佢哋係想自己男人開心為先嘅，
當然女人都係人，
佢哋都有慾念和要求，
唔可以話有性慾嘅女人就係淫蕩，
哩啲係超級封建、男女不平等和異常無知嘅想法，
男人要得，
女人想要又何為淫蕩呢?
有咁嘅思想嘅人唔係小男人就係虧佬，
無能力無勇氣去面對女人嘅要求，
就倒轉過來要女人禁慾，
可笑可悲可憐。

我講咗一大輪，
係咪叫人亂交一通先?
咁又唔好搞亂喎，
重點係"點解要性交"，
唔係"點樣亂性交"喎，
性交嘅對象當然以終身夫妻為主，
其次就係長期伴侶最好啦，
絶對唔提倡隨便見人就交，
我都唔支持濫交架。
這篇嘅重點係想講，
性交唔係一種例行公事，
也不一定是什麼神聖繁衍後代任務，
而係一種男女雙方增進感情和溝通的行為，
當中包含有歡偷、配合、接受、忍讓、體諒...
要兩個人不斷親身去實踐、摸索、配合，
從而逹致水乳交融嘅無上歡愉，
聽完我講，
係咪好想實踐吓呢?
實踐還踐，
唔好話我教你鹹濕喎!
哈哈哈~~~

死開一邊，唔該!

你吸過毒未?
你指鴉片、大麻之類?
仲有K仔或者任何軟性藥物。
我未食過，煙仔就有食，算唔算吖?
都算架，不過唔會食到神志不清囉!

點解要吸毒呢?
唔知喎, 我都未食過，啲人話可以減壓喎。
可以咩? 壓力大到非食不可咩?
我點知，你咪去問啲藝人囉，佢哋講之嘛!
聽過好多藝人私底下都有食喎?
傳聞係咁囉，無實則數據喎。
點解佢哋嗰行咁興食呢?
壓力大嘛，三更紅五更黑，又日夜巔倒開工啩!
人人做嘢都有壓力啦，咁咪人人都要吸囉?
唓~ 我鬼知佢哋點諗，我又唔係明星，我就唔會吸囉。
我想了解吓啫。
關你屁事咩? 人家吸唔吸關你乜事?
我擔心啲風氣會傳染到年青人喳。
你唔洗慌，青少年一早就玩緊咳水、丸仔!
咁大劑? 咁點算好?
無架，依家連啲職業司機開工前都啪返兩粒先，死未?
死架，以後出街小心啲囉，金睛火眼睇實啲Van仔貨車囉!
成街都係車點睇呀? 不如啪丸駕駛捉到罰釘牌啦?
都好噃，仲有醉駕呀，累死人架!
重罰就啱，吸毒、啪丸、醉酒佢死佢賤，唔好累到別人嘛!
好呀，你同政府講啦!
講有用咩? 等如你叫啲細路唔好飲咳水，會唔會聽吖?
唔會囉，咁點好?
自求多福，出街一眼關七囉!

夏季趕着來!

雖然今年五月五日才是"立夏"，
但回家路上的杜鵑、剪絨花、大紅花、報春花等已開始爭艷鬥麗，
開過滿堂燦爛，
窗外的大樹開着密密麻麻一串串，
滿樹的小黃花惹來很多很蜜蜂採蜜，
有數隻糊糊塗塗的更闖進了屋來，
還有不少奇形怪狀的昆蟲飛來飛去，
又大又黑有點嚇人。
黃皮樹、石榴樹等等不知名的也趕着結果，
大家都好像要和時間競賽，
植物世界比我們還要忙碌，
夏季在不知不覺中已經走到來了。

九流小說: 小船!

「我們要離婚了!」悅芳終於說出口了。
「哦。」媽媽的語氣很平淡，好像早就料到。
「你不問問我原因嗎?」悅芳有點被疏忽的感覺，
「你已經不是小孩子了，應該明白自己想要什麼。」
「我和他很久没有說話了!」悅芳慢慢的嘆了一口氣。
「連吵架也没有?」她把面轉過來了，
「没有，家裏很靜，放工、食飯、看雜誌、沖涼、睡覺...每天就是這樣。」
「哦!」她又把面轉回去看海了。

她們並排坐在海邊的石壆上，
海風和着鹹味吹着，
兩對眼睛望着海邊上一條小艇，
小艇不自主的左右微動。
「你愛他嗎?」悅芳眼望着遠方，
「你問來幹嗎?」媽媽轉頭過來奇怪的望着女兒，
「這些年來你愛爸爸嗎?」悅芳很想知道，
「他對我很好，爸爸不是很錫你嗎?」視線又再放回那浮動的小艇上，
「你們怎樣走在一起的?」悅芳還想了解多點，
「那個年頭，想有個男人在身邊很自然，感覺安全點吧!」
「有没有後悔?」悅芳大膽的問，
「没有後悔不後悔，我們一起生活得不錯。」
「這樣很奇怪，心好像死了!」悅芳口裏衝出了這句話，
......
瞬間一切都好像靜止了，
風聲、浪聲都忽然靜下來，
悅芳很想收回剛才所說的，
但話出了口又怎能收回呢!
她望着媽媽側面，
心裏有點忍忍痛。
媽媽徐徐的把被風吹亂的髮絲撥向耳背，
「現在和從前不同了，從前的人要求很簡單，有人對自己好就可以了。」
她還是很平和的看着海面，
就像没有什麼事發生過一樣，
「我只想你過得開心。」她轉回來望着女兒說，
「媽媽...對不起...」悅芳雙眼紅了，
眼角泛着點淚光，
「儍女，哭什麼? 没事的!」
悅芳擁向媽媽懷裏，
淚水失控的流下來，
身體微微的在抖震，
她輕輕撫着女兒的背脊，
在茫茫的海面上，
那隻小艇還是孤單的在幌蕩。

完。

商場錯配!

最近"Space"和"微豆"兩位blog友都講小商店的"故事"，
看後自己有感而發，
也隨便寫點感受和想法吧!

我想講講公共屋邨裏的領滙管理的商場，
幾年前政府以"不適合經營商業"為由，
把大部份公共屋邨的商場出售給私人公司領滙，
後來領滙上市成為上市股份公司，
亦即是她的運作是要給股東交代，
而經營策略當然亦是以膁愈多錢愈好了，
社會責任好像並未曾包含在她們發展目標之內。

我記得BLOG友Ruth曾經講過，
給私人公司打理公屋商場會讓商場質數變好，
從而提高shopping的環境，
這點我們可以從商場的翻新和改變中得到証實，
地方的確光猛、新潮了，
而且大量新型大集團商店進佔，
賣成衣的有"左丹佬"、"之二千"，
食肆則有"大家獲"、"美金"、"星爸"，
超市百貨的有"吉豬島"、"伯佳"，
食物的有"大張"、"佳島"，
這些大集團商店裝修得美輪美奐，
而且格調比較高檔，
更負得起高昂的租金，
相反以往的街坊食店、士多辦館、文具雜貨、金銀衣紙、金魚水族....
現在都消失得無影無踪了，
她們消失的原因除了是負擔不了雙倍三倍的租金外，
亦是由於在新的管理模式下，
租戶必需要有精美的商店包裝，
要有系統的專業管理，
再加上要有明顯的賺錢潛力，
這樣才會附合伸請租賃的資格，
而一般私人資金的小商戶根本很難逹到要求，
所以大量商鋪落入大集團手中，
而這些大集團商店出售貨品的價錢往往比較高昂，
住在屋邨裏的中下階層亦隨之要付出更高的生活費用，
生活壓力變得更加大了，
要知道屋邨商場和油尖旺、銅鑼灣等私人商場的目標戶客不同，
光顧的全都是收入不多的屋邨租客，
他們到屋邨商場買的不是奢侈物品，
而是日常所需的生活必需品和食物之類，
所以價錢必需愈平愈好，
而這種有着高檔包裝的商場很明顯不是居民所要的，
現在的商場發展方向正是一種美麗的錯配。

聽說油塘屋邨附近現正要興建另一個大型高檔商場，
聽說規模之大可以比美港島太古城，
而且進佔的商戶都是有名有格的高檔商戶，
我很懷疑在油塘等公屋、居屋為主的地方，
發展這樣高檔的商場是否能附合住戶的需要，
當然你可以說一切可以由商業結果來決定，
但當大部份的小商戶都給商場發展方向趕盡殺絶後，
住在屋邨的小市民又可以有什麼其他選擇呢?

聲明:
以前曾提及多位blog友的言論，
但我只是憑自己的記憶而引用，
如有寫錯或誤解了大家以前的意思，
請多多指正，
我會立刻修改。

我必需要說句公道話!

我忍了很久很久，
忍到無可再忍，
我一定要說句話，
無論是中外古今，
亦或任何法律制度之下，
我都不可以接受:
先捉人後找罪名，
如果那人有罪的，
請立刻明確宣示於世，
這不是什麼國家秘密，
點解要遮遮掩掩咁小家呢?
(唔好同講我什麼法律歷史、理論呀，
我一定會x九爆你架,
我只會看是否合乎邏輯。)

還有，
我完全不接受:
要疑犯自己找証據証明自己無罪，
而不是指控者找証據証明疑犯有罪，
這簡直是本末倒置，
而且容易造成寃案，
更甚者可能變成濫用刑法，
那人唔順眼就可以隨意拉人，
讓法律成為某些人的特別武器。

最後一點，
我愛中國，
但絶不代表是愛某一個政客、政權或政黨，
更不會以為他們睡過的床、愛的女人、去過的茅廁特別香，
這令人發笑和摸不着頭腦。
我愛一個自由民主的政權，
人民的權利會受到尊重，
從而會發自內心的忠愛國家，
而不是盲目遵循"愛國口號"的白痴。

我閉了一肚悶氣，
不吐不快。
愛之深，
責之切，
如果真是愛國的，
不要偏袒，
不要盲目，
不要隱惡揚善，
不要所謂強人政治，
只有受到不斷的鞭策，
雜思廣益的民主政制下，
一個健全的國家才會有機會產生的，
否則再過百年，
還不依然是個封建極權國家，
分別只是不用"皇帝"這個名字而已。
我很幸運能夠在這裏暢所欲言，
在其它地方就未必能夠了。

講完!

聲明:
由於這篇題材敏感，
或會惹人討厭和指責，
君子坦蕩蕩，
不同意見都可以接受，
但我不接受任何無名留語，
我唔怕人多口雜，
亦唔怕會拖慢blog務，
所謂人人有權發聲，
但鬼鬼祟祟的辱駡和胡言亂語是會被删掉的，
有種嘅就放馬過黎，
我必定奉陪到底。

魔鬼泳室!

舊blog友可能會看過我舊居的照片，
但新近來訪的朋友就未必知道了，
上圖下方中間那個紅色方格就是我孩童時代的居所了，
今天我想講講自己學習游泳的故事，
如果大家對我成長的環境知道多點，
應該會比較容易理解我當時的境況。

我小時候是住在海邊的，
以一身健康古銅色膚色，
未學行路就會先學游水，
所以小時候的外號就是"海王子"了。
住係海邊唔識游水除了會被人恥笑外，
最重要係安全問題，
父母無可能廿四小時監視我們，
尤其在酷熱的夏天，
朝早一起身，
父母外出不在家時，
幾兄弟就會跳落海游個早泳，
而且行落海邊都不用一分鐘，
如果不是自小就學曉泳術，
隨時浸死十萬九千幾次了，
所以我父母都非常贊成我們盡早學識游水，
免得他們擔驚受怕，
當然識游水不代表萬無一失，
但是幾兄弟一起游有照應，
出事的機會自然少得多了。

講返我學游水的經過，
當時我大約四五歲左右，
細佬細我差不多兩歲，
其實那時我們兩兄弟都時常在海邊玩水，
不過新鮮媽知道我們都未識游水，
多數會叫我大佬睇住我們，
我大佬大約大我十歲，
所以絶對有能力完全控制住我們兩個"蚤豆窿"，
而我大佬就在毫無先兆下"教"我們學游水了。
記得有一次當我和細佬在沙灘邊玩水時，
佢係海外出不遠處游過來，
游到大約水深高過我個頭的地方就停了下來，
然後佢同我打咗個手勢，
叫我游過去佢嗰度，
我貪過癮又膽粗粗咪腳"un un"慢慢咁撥過去啦，
行吓行吓就覺得對腳唔到地嘞，
初初仲係水度彈彈吓就撥過去，
後黎愈來愈深就開始驚嘞，
於是就想游返轉頭啦，
點知我大佬即時走過黎，
一手將我抱起，
我以為佢咁好心抱我埋岸啦，
點知佢抱住我向海中心行出去喎，
愈行愈深我又愈黎愈驚，
於是就想掙扎走人啦，
點知佢話哩度好深架，
我一郁就唔到地架，
當時我變成肉隨粘板上，
驚到震得個叫字，
但係都無人理我，
佢愈行愈出，
最後衰到一嘢咁將我拋咗出海外邊，
我咕嚕咕嚕咁成個人跌入海底，
嚇到我發哂癲咁向水面亂咁撥，
千辛萬苦浮返出水面時已經飲咗幾啖鹹到痺嘅海水，
不停咁咳、吐、嘔、叫......
跟住係口水、鼻涕、眼淚一齊黎，
而且咸到鬼殺咁嘈係度亂咁撥水，
點知個衰大佬唔救我不特止，
仲係距離我幾步係咁叫我游過去，
我出盡力咁"爬"過去少少，
佢又退後少少，
如是者"爬"吓退吓咁游返咗埋岸，
到我對腳踩到海底時我成身都軟哂，
口裏仲含住啲咸水，
就係嗰刻我個衰大佬又陰陰笑咁行埋黎，
然後一言不發咁又抱起我，
我發哂狂又咬又踢咁掙扎都無補於事，
結果又再俾佢抱咗出海中心拋落水，
可憐的我又再重復剛才的"爬"水行動，
如是這重覆了兩三次後，
我整個人都虛脫哂，
叫到把聲都沙哂都無人理，
但係我發現到最後一次被佢拋落海時，
已經變得好輕易就可以"爬"返埋岸，
開始能夠控制自己在水中的動作了，
後來自己在心口高的水位練習多幾次，
結果終於學識了自己游水了，
雖然仲係好樣衰嘅狗仔式，
但不竟已經可以"活動自如"，
游深游淺任我控制了。
而當我在淺水區繼續練習狗仔式同時，
我細佬便面對着我剛才的惡運，
在外出不便處叫到拆天咁嘈。

我的舊文:
我的舊居

"Mr. Sandman"!

Vilhelm Pedersen drew this representation of the Sandman

很久以前的孩童年代，
在收音機裏聽到這首Mister Sandman後，
腦子便像着了魔一樣，
調子不斷重覆又重覆出現，
尤其是開首那活潑的打拍子，
加上旋律輕快，
給人一種很快活的感覺，
可惜當時並不知道這首是什麼歌，
也不知從那裏可以找到資料，
那時没有電腦，
更没有google, yahoo,
要找人問也很困難，
結果就不了了之了。

直至近期那調子偶然又重現在腦裏，
憑着"衫文"、"閃門"、"删門"等這幾個隱若的音調，
(小朋友那時根本聽不懂英文)
終於給我發現原來是"Mr. Sandman"，
是一首50年代美國流行音樂，
曾經流行一時，
現在再聽依然令人心情偷快。

後來再查看"Mr. Sandman"是什麼意思，
發覺他本來是希臘神話裏的睡夢之神(Ole Lukøje)，
童話家安圖生(Hans Christian Andersen)把這些神話收集重寫，
在他的童話故事裏，
Mr. Sandman每晚都會到小朋友的床前，
輕輕把少量睡夢神沙灑到他們雙眼裏，
令小朋友安靜的進入夢鄉，
而我們每朝睡醒在眼邊發現到的那些"沙粒"，
所以就出現"Mr. Sandman"這名字了。
大家可能會發現另一樣事情，
就是"Mr. Sandman"手上會拿得很多雨傘的，
其實每一個傘代表一個夢，
他會由小朋友每日的表現來帶給他們不同的夢，
乖巧的就會給他們發個甜蜜的美夢，
相反頑皮的就會發惡夢。

以上這些都是童話傳說，
內容是假是真就不得而知了，
不過聽起來非常有趣，
令人有重味童真的感覺，
很開心、快活!

英雄也折腰!

圖片來源:http://www2.nutn.edu.tw

木棉（Bombax malabarica DC.）:
木棉因為樹形高大挺拔，開花紅艷壯麗，又被稱為英雄樹。
木棉外觀多變化：春天時，一樹橙紅；夏天綠葉成蔭；秋天枝葉蕭瑟；冬天禿枝寒樹，四季展現不同的風情。花橙紅色，3～4月開花，先開花後長葉，樹形具陽剛之美。

紅棉盛放耀光芒
英雄向上誰能擋
正直無偏傲骨幹
棉子借風飄四方
繁衍萬代人景仰
獨有無知將他劏
摘果滅子摧花忙
天道盡失理智喪
(內容取材於鄭國江填詞的紅棉)

地球不是人類單獨擁有的，
今天人們因為木棉絮讓自己不舒服而要剷除它，
明天人們可能會因為鼻子敏感而摧毀所有花朵，
這樣下去，地球將來會變成什麼景況呢?

焗豬扒飯的背後!

"大家鑊"的焗豬扒飯昨、今、明三天大特價，
午市只售$18元，
十二時開售，
售完即止，
聽過噚日有好多人排隊，
搞到我今日心思思都想去排埋一份，
你話我係咪好鬼衰吖?

有人話"大家鑊"嘅焗豬扒飯有四十年歷史喎，
我好懷疑呀，
乜間嘢1972就開咗哩咩?
仲要一開始都有焗豬扒飯賣喎，
都唔知真定假。
話時話，
我唔係好喜歡食佢哋嘅豬扒飯，
尤其是面頭一pat番茄醬嘅焗飯就更加唔like，
咁你又話去排隊買?
我都唔知呀，
羊群心態啩?
見到有著數唔去排隊又唔舒服囉。
你都唔鍾意食，
排到又點喎?
係麻麻哋鍾意食，
但又唔係討厭喎，
$18咁平好難揾架，
好嘅一餐唔好嘅又一餐，
可以嘅話我外賣多份做晚餐添呀!
乜嘢"好嘅一餐唔好嘅又一餐"呀?
好多人當佢係寶黎架，
你真係孤寒兼口衰呀，
專諗埋啲縮數。
我都唔想架，
依家乜都加，
啲人一見個市好丁丁咁多就係咁加，
柴米油鹽車船租金乜屎都加，
又話經濟好返啲，
我就唔多覺嘞，
淨係覺乜都加，
啲錢愈來愈唔見洗，
唔慳啲點夠洗喎，
我夠想吃得好住得好囉，
要有錢先得嫁!
咁又係，
我都知依家做小市民好慘，
開資愈來愈大，
收入雞碎咁多，
見到乜嘢平就要入定啲貨，
唉~~
羊群心態又好，
貪小便宜又好，
都係因為無安全感啫，
鬼叫我哋個政府無用咩，
無計劃無能力無x用之極，
做小市民嘅唯有左慳啲右慳啲囉，
人人有本難諗的經呀!

公廁搞笑實錄!

近來的文字有點傷感，
今天要來個真人真事搞笑版。

話說某人行街人有三急，
係急到要賴嗰種，
於是三步當兩步咁衝去公廁，
去到男廁門口見人頭湧湧，
諗住行入去多數連企廁都無位，
就係急到成頭大汗無計可施嘅時候，
忽然被佢"目及"到公廁門口右側有間殘廁，
於是二話不說就走埋去擰開度門嘅把手啦，
點於度門開咗少少就聽到黑暗中有把師奶聲大叫，
跟住仲隱約見有個肥師奶嗱嗱淋休緊條黑色褲，
個無敵大股係咁左擰右扭，
樣子非常狼狽，
某人當時真係嚇到一身冷汗，
立刻以迅雷不及掩耳的速度把門關上，
跟手就話:「有無搞錯呀? 痾屎都唔鎖門架?」
入便個肥師奶就吱吱嘰嘰講咗啲唔知乜嘢，
好彩當時某人總算淡定，
無被咁嘅恐怖場面嚇到賴咗出黎，
而且更唔想被哩pat蘇州屎搞上，
於是快手快腳走咗去側邊男廁解放，
否則搞到週身都係就麻煩囉。

哩個故事教訓我哋，
無論任何情況下，
就算急到要爆都好，
去廁所一定要鎖門呀，
唔係累到人家要洗眼就唔好啦。

第六年的約會!

以下是我想記下的人和事。

熱鬧的地鐵大堂裏，
人們匆匆各自走向自己的方向，
嘈雜聲中忽然響起一陣無名的女人尖叫聲，
高音叫起卻以低沈的野獸悲嗚作結，
令人毛骨悚然，
瞬間世界好像冰結了一樣，
一切的動作和聲音都休止了，
大家都停下來尋找叫聲的來源，
我發現在停頓的大堂中央走道上，
一個四十來歲的女人大聲的邊行邊自說，
她外貎衣着和一般"師奶"無異，
但說話聲音急速且模糊，
完全聽不明白她說什麼，
隱約間只聽到"死...差人...握死你.."，
她說話的音調愈來愈高，
也愈來愈大，
大到在大堂的每個角落都可以聽得很清楚，
當所有人都注目着她的時候，
她忽然毫無先兆的大力拍動雙手，
然後又來了一陣野獸般的狂叫，
雙眼卻流露出散慢錯落的目光，
跟着慢慢走出了地鐵大堂，
消失於人群走避的遠方。
很快的，
大堂又回復從前的人聲雜踏，
大家繼續各走各路，
好像什麼都没有發生過一樣。

今天這網誌踏入第六個年頭，
在過往的五年裏，
我都不曾記起這天，
但今年我竟然在早幾天就記起了，
也許五年對我來說算是有點份量吧!
很多人說寫網誌的潮流消失了，
我也見很多BLOG友没有再寫，
但對我來說卻未有很大的影響，
反正寫不寫都和"潮不潮"無關，
我想我是要找個地方抒發一下自己的感覺，
但那不會是我自己私人事情的感觸，
那些是不需要公諸於人前，
反正人家也未必有興趣去了解。
要寫的應該是自己身邊周遭接觸到的感覺，
當中未必會有很大的意義，
也不會是國家大事或大仁大義，
我開始知道自己喜歡觀察社會你我他身邊的人和事，
那是很直接很真實很有生命的，
我喜歡這種感覺，
我很想在這裏記下和轉述給大家知道我見過觀察過的人和事，
在可見的未來，
我還是會繼續這樣寫下去，
直至有天發覺自己感覺麻木為止，
那刻便是這裏"死亡"的時候了。

腸粉的醬汁!

老辦娘從遠處問道:
「腸粉要乜醬呀?」，
中年男人喃喃自語的說:
「乜醬都要，唔洗錢乜都要!」

男人五十來歲，
頭髮開始斑白，
面上黯黑帶點風霜，
灰舊風褸下配上沾了不同顏料的牛仔褲，
腳上的波鞋表皮污糟龜裂，
背着個佈滿灰塵的背包，
雙手粗糙有點爆拆磨損，
看來是做體力勞動工作的。
他連說了兩聲"唔洗錢乜都要"，
語調一次比一次晦氣，
看來生活得不太順意。
生活壓力大賺錢不多，
有怨無路訴，
怨氣積聚久而不散，
人生變得很無希望，
很灰很不愉快的樣子。

腸粉來了，
甜醬、麻醬、豉油舖得滿滿，
但男人還是好像不太滿意，
隨手拿起枱上的辣椒醬，
打開瓶蓋整樽狠狠的上下搖動，
白色的腸粉立刻湮没在啡啡橙橙的醬料裏，
堆得像座小山般高，
然後男人快慰的把腸粉往嘴裏送，
腸粉瞬間變成他的仇人一樣，
誓要把它通通生吞活剝，
動作又急又快且充滿狠勁，
紅的、啡的、橙的隨着嘴邊滴落，
碟邊、枱上全是不同顏色的醬液，
一塌糊塗慘不忍睹，
場面令我儍了眼。
忽然，
男人抬起頭來並發現我注視的目光，
看着我的眼神尤如射出惡毒的利箭，
嚇得我立刻把雙眼投向不知那裏好，
只好匆匆低頭吃回自己面前的東西，
然後耳邊又再傳來吸啜汁液的聲音。

饑餓轆轆!

小時候不愛看書，
就是要交老師的讀書報告也是矇混過關的，
只看開首和結尾就"作"用出來交差，
結果我錯失了很多文字世界裏的瑰寶。
今天重拾自己喜歡的書本，
把遺失已久的寶藏之匙找回，
讓無限思路伸向無窮無盡的空間，
盡量把自己的眼界投入窮蒼萬里。
人家說:
「讀萬卷書不如行萬里路」。
路要行，
書也要讀，
行累了就坐下看看書吧!

井底之蛙!

三歲定八十，
我想讓小孩子從小養成閱讀習慣是很有益的，
閱讀不一定是為了學業分數，
因為讓孩子們擴濶眼光同時，
也給他們知道世上不同人有不同思想，
避免過份主觀和自以為是的性格。
不少人就是有着這個毛病，
總是以為自己的想法是絶對正確，
看過一丁點名人的理論就引經據典，
微末技量還自以為專家，
對人家的意見視而不見，
排除異己，
滔滔不絕大造文章，
固執偏頗而不自知，
這等人簡直是井底之蛙，
可笑! 可笑!