暑期工招募熱線

死靚仔打電話玩謝暑期工熱線

純屬搞笑，
包你笑到噴飯！
所以食緊嘢，
飲緊水嘅你就一定唔好聽住，
唔係包你一身一地都係，
所有後果，新鮮人蓋不負責！

生活Playback！

見到BLOGGER有Beta版，
新嘢喎，梗係要快手試下啦，
於是手痕痕就走去轉用啦，
轉左都見到有ｄ新鮮嘢玩下，
好似加Label, drop & paste 改template啦...
都有點改進，好過以往幾年什麼都無變過，
但係可能BLOGGER係鬼佬嘢，
新版係中文顯示有少少問題，
尤奇其係send email通知我有人留comment時，
同一封email，內容用UTF8, 標題就用Big 5，
搞到我要轉來轉去，好混亂！

重有，我個BLOG名『新鮮人』永遠係email度係睇唔到，
搞到我要打開左先知係自己嘅feedback，
有點浪費時間．
但係這些都係小問題，
相信遲點是可以解決的，
而家最花時間係把舊post 分label，
雖然自己的posts不是很多，
可是要逐個逐個來分，
二百幾個都有排搞呀！
不過係分嘅時候可以睇返以前的posts，
而且有些只是幾個月前發生的事情都忙記了，
就好似睇返自己人生的playback,
真係覺得幾有趣，
我諗就算搞好以後，
自己有時都會回頭睇返一些舊post,
或者這樣可以多點了解自己呢個儍人！

相依唯命

呢兩隻小豬同小兔放係我枱面有成年了,
最後搞到周身『烏糟臘撻』,
可能生得醜怪,又不是很可愛啦,
所以人家不想收留佢地兩個喎,
真係孤苦零丁好可憐呀,
而家只有他們兩個相依唯命了,
希望人地唔要都至少關心下啦,
嗚嗚~~~~

回鍋【肥】豬肉

朋友叫了這一碟回鍋豬，
老實說，味道是很不錯的，
但是真的十分油，
吃後好像飲了十匙油進口～～
所以食完好有罪惡感，
心裏好不是味兒！

不知是從什麼時侯開始，
肥胖是一種罪，
是一種不可恕的罪，
大家對肥人都極為歧視，
一切都以瘦為美，
所以有『死肥豬』,『豬扒』,『豬頭丙』,『豬蘿』．．．的花名，
在不少人心目中，
肥人都是蠢，頓．醜的代名詞．

記得唐朝人以肥為美，
好似肥美人楊貴妃，
她的珠圓玉潤更得唐明皇竉愛，
那時人人以肥為美，
一個廋的女子是不會有人娶的．

回到今天，情況就剛剛相反，
愈瘦愈是美人，
有些女性得九十磅五呎三高還嚷着要減肥，
真是十分不正常，
可以說是病態心理，
無奈在今日以瘦為美的社會裏，
大家都覺得没有問題，
還大力提倡盲目修身．
正是可悲～～

湯麵日子

因為懶散,
搬進了新屋多個星期,
還没有把厨房的雜物安放好，
所以天天都出街食飯，
食到味蕾都淡了，
有時真的不想食街外的味精，
就只好煮碗簡單的湯麵，
再加點生菜和魚肉，
雖然味道一般，
但都要比館子的健康很多，
可是不能天天都食啊．
我想．．．
要盡快把厨房的東西弄好，
不然這樣下去是不可以的！

公園

每朝經過都感到十分舒服,

公園裏很少人,

聽到的只有鳥聲．風聲，

秋風陣陣送面，

加上和暖的晨光，

那種感覺非常舒暢和諧，

但願每天都是一個好的新開始！

我要投訴！

點解?
點解又『撈』唔到相上個『博』度，
搞亂哂我ｄ『士嘅租』，
我而家好唔開心呀！　

尋寶!

屋企附近發現間街坊『士多舖』,
竟然俾我見到細個時想食,
但係又無錢買的『寶物』,
尤其是那個【眼鏡朱古力】真係好COOL，
你有無試過載上臉扮超人？
重有嗰兩隻四洲松鼠仔，
咁多年都無物點變過，
真係超可愛！

其它的零食雖然未食過，
但係都十分『臉善』，
全部是大紅大綠嘅包裝．
好有懷舊的感覺～～
另外好似嗰啲七彩蝦條呀,爆炸糖呀,皮禮士糖呀,芒果乾呀...
從前日日小息睇到流哂口水，
可惜無零用錢買，無得食，
只有得個『恨』字．
今日再見到真係有種一次過買哂佢地返屋企嘅衝動！

試食兵團

無錯，係牙籤！
每次行超市，老媽必備的『武器』,因為自備牙籤可以試多些,而更重要的是可以試快些．

一入到超市就要進入介備狀態，
眼望四周，耳聽八方，
先試麵包，然後蛋糕，
老媽一個箭步把牙籤一拮，
好味嘅再來試過，
唔好食立刻走人．
跟住係提子，紅青黑各食數粒，
唔俾試就話以後唔幫襯，
咁多數又有得入口．
第三站係鮮魚區？
梗係唔會生食啦，
係滾熟左嘅果皮鯪魚青，
次次都食，個亞叔都認得佢囉．
所以見到老媽都主動遞塊俾佢．
其後有蝦子麵，公仔麵，雪糕，無糖豆漿，水胶，豬頸肉，德國腸，猴頭茹鯊魚骨湯．．．

我:『諗住買什麼餸今晚煮呀？』
媽:『我好飽喎．．．』
我:『咁你年中咪慳好多？』
鎷:『痴線．．．試食係老人家嘅【褔利】黎架！』
我:『咁．．．咁．．．我地下一站去邊樹?』
媽:『重洗問,梗係月餅啦,無黎醒目!』
我：>o<...

買月餅

我:『喂,買個月餅俾你應下節好嗎?』

媽:『唓!成四十蚊個都唔值!』

我:『咁今年我唔買架啦.』

媽:『買冰皮咪得囉.』

我:『細細舊都要成百蚊盒仲唔抵啦!』

媽:『你試下唔買丫啦!』

我:　滴汗中．．．．

一生何求？

【女王的教室】的　安藤櫻　同學：
『每一個人對幸福的睇法都不同，我們廿四個人，所以就有廿四種不同的幸福！』

你的幸福又是什麼呢?
你又是如果去追求的?

Click 命運自選台

一個Remote Control可以控制自己的生活，好似Fast Forward, Pause, Mute, Track Back Serarching etc.但係就唔可以由頭再來，因為發生左就不可以改變的.

Adam Sandler係一個已婚和有兩個子女的建築師，事業心十分強，但係在公司裏諸多阻礙，難以發展．後來得到一個神奇遙控，可以把他Fast forward到事業成功的階段，但係那樣就使他損失了不少同家人相聚的回憶，終有百般成就亦無辦法同家人分享，最後落得後悔收場！

不少香港人可以話係典型嘅Adam Sandler，無錢時努力揾錢，到有錢時都係繼續努力揾錢．正職要揾錢，兼職要揾錢，再投資股票，基金，外幣．．．揾錢好似己經成為習慣．朋友相聚多少都說兩句揾錢之道．而且社會是以你家產來衡量你是否成功，總之一切以錢為依歸．至於你同家人關係如何，有無足夠的親子溝通等等，都不大重要；又或者自己認為已經足夠，其實正處於危險邊緣而不知，究竟自己伴侶在想什麼？大家相聚時間足夠嗎？好多東西都被工作遮掩了而不自知．到發覺時，一切都不可以返轉頭了！

揾錢為生活，但係有了錢又無時間『生活』，好似是本末倒置！究竟有幾多錢才足夠呢？有了基本『生存』條件，如果可以同自己喜歡的人多點時間係一齊，無千呎豪宅，無跑車遊艇，無名貴華服，無珠光寶氣，無鮑參翅肚，無42吋大電視，只有咸魚白菜和一個愛你關心你的人在身傍，你可以接受到嗎？

官方網頁：命運自選台

潮樓～我中招了

老實講句,這間稻香集團成員的食物水準絶對麻麻,價錢又唔值，唔好食亦唔正宗,大家有錢無地方洗嘅就不防一去!

係網上啲食評網發現(好似Openrice.com)有很多人做媒，
話又抵食又平，平均消費由$45起喎，呃鬼咩？
佢嗰度晚市除左前菜外，碟碟都過$70啦，
就算係屋邨飲早茶都係啱啱好喳，
但係呢間嘢係尖咀北京道一號喎，
當我地儍架！



菜單:

潮式拼盘（質量同街邊一樣，僅僅合格）

蛋白蟹皇扒鮮蝦帶子（無鮮味，蒸蛋淡如開水）

蠔王花茹鮑片扒翡翠（茨汁毫無鮑魚味，嗰塊鮑片薄如蟬翼）

遙柱冬瓜燉翅（翅都發唔好，佢真係要返歸）

菊花石榴帶子 (一人一粒，無味無豆，塊皮啲口感好似塊麻布）

方魚蠔仔粥（味道可以，但係ｄ飯粒較硬，但還可接受）

雪茸芒果露（一塌糊塗，西柚又酸，雪茸又唔霖）

另加紅酒一小杯（質量可以），如不要只有轉食汽水，絶無其它選擇．
承惠每位港幣＄238 ．價錢貴得黎又細碟，而且又唔好食，如果唔係食左個蠔仔粥，真係要落去茶餐廳再食過．

名稱：潮樓 （唔俾link了,費事同佢宣傳）
地址：尖沙咀北京道一號，十字樓．

朱玲玲回歸！

聽到60歲的霍震霆和46歲的朱玲玲離婚,心裏既驚且喜！
從來都不覺得他們匹配，朱玲玲是我由細到大覺得最靚的香港小姐，不單樣子美麗，而且給人一種賢良淑德的感覺，絶對是做妻子的好選擇．記得小學時有機會近距離一睹她的風彩，真係驚為天人，她不施脂粉，古銅色皮膚，加上親切的笑容，絶對是當之無愧的香港小姐．

後來知道朱玲玲要嫁給大她十四年的霍震霆時，真是十分非常不開心，尤奇是霍震霆那個『蛋撻頭』，真是看到都無胃口呀，而且那時他都差不多四十歲人，還好似個『裙腳仔』咁，無型無款，他竟然可以娶得美人歸？可怒耶～～～　感覺就好像一朵鮮花插在牛糞上１

我不是幸災樂禍，但係聽到他們離婚的消息，真是有點『興奮同喜悅』，從來都不覺得美女應該配野獸的．而且今日的朱玲玲依然明艷照人，更有女人味，相信她要不是為了兒子們著想，都不須要等到今時今日才和霍震霆分手了．

不過話回來，當日都覺得她嫁入豪門，可能是為了錢的原因，但係都已經過了二十多年的少奶奶生活，為什麼現在還離婚呢？富豪界裏霍震霆都不算是『爛滾』的一個，定亦或朱玲玲終於明白金錢是不可以代替真愛呢？

反對香港網絡封殺！

近期bloggers討論得最熱烈的要是PCCW和HGC封殺一個名為Not the South China Morning Post (ntscmp.com)的網站．這個網內容多是以諷刺以上兩間企業為主，展視大集團如何欺壓我們小市民．但係如果你是使用電盈或和記上網的，sorry啦，你係無法可以直接流覽此網頁的．如果你唔信，可以試下click上面條link來測試一下，如果得嘅就要通知下，等大家唔好『誤會』啦！

而更重要的係：九倉嘅i-cable都係上唔到，因為我用i-cable都係睇唔到囉！如果想睇唯一的方只有先上http://www.browseatcollege.com 再輸入www.ntscmp.com字樣，才可以流覽．

其實呢個係一個好嚴重的censorship問題，無理由一間私人公司基於自己利益，可以私自封殺個別網站，簡直係極度損害資訊自由和個人消費權益，就好似內地封殺新聞自由一樣，不知所謂，可怒耶～～～

由於事態嚴重，我會提意大家先向自己的網絡供商『發炮』，然後再去消委會同廣管局（網絡供應商應是受他管制的，如有記錯請指正）投訴！如果我們不作任何反應，佢地就會愈來愈變本加厲，將來可能只可以上到網絡供商指定的網站，而一些不利他們的網站言論，則可能會給他們隨意封殺，可見為禍極大！

揾亞媽!!

「只要搵到阿媽 ，即使要我傾家蕩產 ，我都毫無怨言!」 此話出自尋找74歲失蹤母親的楊官華之口! 楊生母親住在西貢花園,今年6月23日，她向家人表示去後山捉山豬及餵雞後獨自離開住所，之後便失去蹤影!

就好像電視橋段,母親失蹤,兒子懸紅百萬尋親一樣,但今次是真人真事,而且更有一些志願人仕不收分文,自願上山幫助搜索,可謂人間有情! 其實楊生多月來已經多次登報尋人,又將懸紅由十萬增至一百萬,但還是毫無消息,真係天意弄人.而且事情已經發生三個月,情況真係使人擔心!

無論結果如何都希望可以得個明白,了結心事.
希望楊生及早尋回親人,一家團聚!

「千金難買少年窮」!

今日在大雄處見到這句:

「千金難買少年窮」

十分欣賞這句話的道理,非常值得現在的家長同少年學習!
這句話是出自會考獲9A1B優異成績陳展芊的母親口裏,喻意做人要吃得苦頭才可以面對將來不同的困難.做人一定唔好好逸惡勞，練精學懶，要親身試過生活嘅艱難先至會成長！

反觀現在的家長多是對子女百般苛護,搞到佢地飯來張口, 衣來伸手,好似廢人一樣.而且又受唔起責罵,一有什麼不喜歡就發脾氣,甚至走去自殺.而這樣的結果都是由於父母溺愛子女，凡事都替子女安排穩當，怕佢地受苦所致，希望做人父母嘅及早覺悟，如果唔係就只會使到子女不能夠適應社會，無力『生存』，為社會將來製造更多問題青少年！

這道理雖然老土，但係真是值得大家細味的！

PS:非常感謝大雄的文章，讓我自我警惕一番！

係地鐡俾人『咸豬手』點搞？

由於近月地鐡風化案增多，警方昨日在地鐡展開便衣偵查，捉獲數名咸豬手和偷影裙底色狼！
據一些調查指出，發覺不少被咸豬手嘅女性都不敢當埸揭發色魔暴行，如果不是太過份，都不想將事情鬧大，多是啞忍了事．尤其是在日本，女性都已經覺得是『家常便飯』，不覺得是什麼一回事，真係千奇百怪，物都睇哂！不過係香港，相信情況不會是完全一樣的．

如果有一日，你係地鐡遇到同樣嘅事，你地會點樣處理？會唔會立刻轉頭一巴打埋去個色魔嗰度？定亦或先捉住佢隻手，然後大叫非禮呢？又有無其他更絶嘅方法呢？

其實如果係地鐵真係遇到色魔，大家一定要舉報，切莫啞忍．因為咁樣只會縱容色魔繼續犯案．而且據香港臨床心理學家羅志華指出，非禮係一種心理病，如果得到適當心理輔導治療，便可以根治這些惡習．所以你地報警，絶對係幫助他們，如果唔係等到將來佢地泥足深陷時就太遲囉！

PS:如果我係地鐡俾人非禮，咁就要睇下非禮我嗰個係唔係靚女啦，如果係嘅就算數囉，如果好似黃ｘ蕙，林ｘ妮咁『靚』，雖然個心會好驚，但係我實會大聲叫架！嘻嘻．．．

生活報時器～Human Clock

在雜誌找到這個網站，覺得十分有趣，所以介紹給大家，唔知以前有無見過呢？
一日有二十四小時，每小時有六十分鐘，網主Daniel Craig Giffen通過1440張相來顯示每一分鐘的時間．他從2001年起收集從世界各地寄來的照片，組成這個時間網站，而且全個網頁絶無廣告，可見Daniel並不是想從中謀利，而是純屬個人興趣和理想而已！

只要入到站來，click一下『view the clock』就會有一個時間視窗彈出，而其中顯示時間的照片是會每隔一分鐘自動跳到下一張．時鐘分digital 或analogue兩款，個人就比較喜歡digital多一點，因為變化較多．而且當你看不同國家的臉孔和風景時，你會體會到一種好舒服自然的感覺，就好似人們成日所謂嘅『地球村』嗰種感受！所以大家有興趣，都可以拍幾張時間照片寄俾網主架，話唔定你有一日會出見為我們報時架！

PS:有無發覺上面其中一張相嗰兩個人好似歌手Solar呀？嗰張相係由意大利寄出，所以都有可能架，因為Solar係意大利住過嗎！

相關網頁：Human Clock

昨日的晚餐 =)

係呀，又係嗰間壽司店呀！
唔好話我無新意，係主角特別指定．

我們都食得好多碟，
其實都無計食左幾多，
更加唔理是什麼顏色的碟，
總之最緊要要食得開心就得啦．
不過我好似食多好幾碟喎，嘻嘻，
開心胃口就好好多架啦！

PS:不過今次唔見左其中一個日本壽司師夫，Ｄ食物質量好似有少少下降，但是還可接受！

大丈夫2 - 一套女性電影

可能為左迎合大眾口味,這套片一開始就不走高格調,所以未睇之前以為又係一套胡鬧cheap戲，看完後才知道戲裏笑中有淚，從女性角度去剖析男人去『滾』，對她們心裏做成極度的傷害！

可能由編劇到導演均由女性主理，這套與大丈夫１的觀點和角度都十分不同．全套戲都是由女人發覺自己男人去『叫雞』，因而產生絶望同報復的心態，最後走去『叫鴨』發洩心中怨恨．．．但係陰差陽錯下，幾位丈夫誤打誤撞知道自己妻子因為自己去『滾』，所以心裏受到極大的傷害．．．

由於没有期望，所以入戲院前是没有多大的信心，但係睇到中段，覺得這套片頗有張艾嘉的女性情懷，處處散發一種幽怨的藍調！雖然全套仍然以笑料包裝，亦没有一般真正女性電影咁細膩，但作為一個男性，看過這套戲都要提醒自己：
凡事三思而後行，不要令到愛你的人為你流淚！

官方網頁：大丈夫2

對部份台灣人好失望!

尤如潑婦罵街,頑童嘔鬥,
他們根本不知民主為何物,
只是盲目的支持自己人,
完全不配擁有民主選舉的權利,
須要重新再受思想.道德敎育!

(明報) 09月 19日 星期二 10:55PM

台南倒扁起衝突多人傷
在台南首場倒扁活動在衝突中結束，有多人受傷送院，香港亞視攝影記者亦被示威牌擊中受輕傷。

國民黨(相關新聞 - 網站)台南市議員謝龍介在當地發起的倒扁靜坐，計劃為期六天，他強調理性和平，警方以鐵馬戒備，場內約一百人，高喊倒扁，但場外挺扁者約一千人不斷叫罵。

晚上七時許，亞視梁姓攝影記者在鐵馬旁拍攝採訪時，被群眾的示威牌擊中，嘴角流血，接受即場治療，毋須送院。 晚上八時許，一名女性倒扁者離開現場時，還邊擺出倒扁手勢，結果開著的紅色車被打爛車窗，警方協助排除障礙，才讓紅車駛離。

在晚上十時，倒扁靜坐結束，他們分乘多輛巴士離去時，受到磚頭和雜物襲擊，至少三人受傷送院進落幕，警方護送巴士離開。

尋求 萬能追踪器！

有無試過想開電視但係揾唔到個Remote Control丫？
有無試過除左副眼鏡去冲涼，但係走出來揾極都揾唔返，好似個盲俠咁丫？
有無試過係屋企放低個手提，屋企又無家用電話，但又諗極都諗起個手提放係邊度丫？

以上種種我成日都遇到，
都唔知自己個腦係未有問題，
成日都唔記得ｄ嘢！
如果所有嘢都可以聲控就好囉，
『啲啲』兩聲，佢地自己會響幾下，
咁我咪可以容易好多就找到佢地出返黎！
到時發明嗰個就發逹囉！

ps:

好似隻牛咁大隻嘅追踪器就咪搞我囉，唔係點放係個眼鏡上面呀！

個追踪器仲要識分別我『啲』邊個，如果唔係一『啲』全部響哂就大劑囉！

最好就有埋閃燈啦，唔係ｄ聾人點揾助聽器呀！

有無搞～～錯，想殺人咩？

一分鐘前經過都没有什麼異樣，
一分鐘後經過原地就見到一個掉到變了形的水煲．
如果我剛才行遲三十秒，咁咪返唔到來寫blog?
高空飛煲，中頭獎，從此人間蒸發？
所以如果有一天你地見唔到我係度鬧人嘅話，
咁我可能就係中左個大獎了！

『兇器』與下圖水煲相貎相似，如有人知物主是何許人，請與本人聯絡，無賞！

九一八事變

吸取敎訓，展望將來！

延伸閱讀﹕
百年中國（戰幔的展開）
日寇誌（記綠神州空戰）
網上中華五千年～民國篇（認識我國歷史撮要）

To U,

Happy Birthday 19th Sept!
Please forgive my careless!
Loving U Forever~~

小城知味！ =)

前菜：醉雞.西芹海蜇
（賣相不俗,味道一般,雞肉不夠嫩滑．)

湯：酸辣湯，雜菜湯
（前者不俗，我口味較淡，但一般人可能會覺得酸和辣都不足；後者不提算了．）

肉類：小棠菜獅子頭
（汁料味道適中，帶點瑤柱鮮味，但肉球口感太實，無鬆軟感覺！）

菜類：鮑魚茹生菜
（鮑魚茹非常有咬口，鮑汁又入味，加上生菜一齊食是一道不錯的菜式．）

飯類：雞油飯．菜飯
（雞油飯十分有油香味，但入口不膩，值得推介；菜飯則毫無味道，尤如白飯，但菜色清綠，唔會黃『禽禽』，唔知有無菜飯係又有香味但ｄ菜又嫩綠呢？）

甜品：番薯湯水
（甜味剛剛好，但番薯不夠『淋』．）

總體服務態度不俗，地方亦十分寬躺，是眾多『小城知味』中比較大的一間，如果剛巧經過也可一試！
地址：廣東道Gateway樓下，嘉禾港威戲院旁邊．

PS:昨晚食得好『知味』，好開心！　=)

又係講政治ｄ悶嘢！

【蘋果日報】:

台 灣 立 法 委 員 蔡 啟 芳 昨 日 在 記 者 會... 認 為 ， 扁 和 夫 人 吳 淑 珍 ， 用 其 他 發 票 掩 飾 機 密 政 務 支 出 ， 完 全 符 合 國 務 機 要 費 的 使 用 用 途 ， 根 本 沒 有 違 法 ... 揚 言 政 府 若 不 關 掉 TVBS 電 視 台 ， 他 會 將 其 研 究 室 改 名 「 裱 啟 芳 」 ， 結 果 賭 輸 了 要 改 名 。

什麼是『機 密 政 務 支 出』？如果每次都用這樣的借口過關，那又有什麼違法的事是不可幹的．一個自由民主社會總統，有什麼是不可以見光的，只有貪污舞弊，謀人自肥的事才要找這些下流手段來掩飾的．

為何要把TVBS關掉？在一個民主法治的社會裏，如果一個新聞機構發佈消息時有錯失，可以遁法律途徑追究，怎麼可以用行政手段非法關閉一個新聞機構？而且更是出於一個立法委員之口，可見台灣中有不少人還是對法治精神一知半解，思想只停留在半法西斯的年代！

外間不少人時常批評內地實行思想拑制，毫無自由可言，這話確實不虛．但隨着大陸不斷開放，言論自由已續漸以好慢好慢的步伐向前邁進，至少現在Blog-spot.com已經解禁，內地同胞都可以看見我們BLOGGER的言論．

反觀台灣，表面好像十分民主開放，實則不少人的思想還是處於『一言堂』階段，自己的意見永遠是對的，人家的則絶不接受，此點相信不少人都曾在以往國民黨與民進黨議會爭辯中可見一斑，委員在議事堂中大吵大鬧，更甚至大打出手，尤如市井流氓，貽笑大方!

誠然，無論結果如何，我們都希望這次倒扁的風波可以安然解決．但是兩岸三人的民主發展還是有一條好長好長的路要走，只希望在我們有生之年可以見到有這樣的一天！

阿扁唔死一身潺！

真係可以用波瀾壯闊來形容這幾天的台灣政局,
不知道阿扁今次會不會因而下台,
但是可見他已經是受盡萬民唾棄,
一年來，不少原本支持他的都改變立場，
可見台灣人民對他是十分失望．

搞經濟不在行.
數年來台灣經濟不斷下滑,
搞外交又不見起色,
只見與台灣有邦交的國家愈來愈少,
有的都只是用錢買來的,
搞台獨就更是不值一提,
來來去去都是那幾度板斧,
公投,改憲,改國號...
最後得來的只有大陸強烈的反應和外國人的混水摸魚,
絲毫無進,只見不對兌的空頭支票,
再加上近來一件又一件的貪污醜聞,
就算阿扁今天能保得住『皇位』,
年尾的縣市長選舉民進黨多會受阿扁牽連而慘敗，
到時阿扁的施政就更加困難，
而民進黨就處於進退兩難的局面，
最後可能就會採用『棄帥保黨』的政策了！

在這次倒扁行動中，
有一個人使我十分失望，
那個就是馬英九了．
從最初不支持倒扁到後期支持倒扁，
他的言談決定都是那麼畏首畏尾，
重心只集中在自己2008年總統選舉的機會，
但當他思前想後的同時，
台灣人民已經看透他不會是台灣的真命天子，
剩下來的只得一個二流政客的形象而已！

相關資料：阿扁執政實錄

男人都要氹！

男女分手多數是男友照顧不週，
或者是對女友不忠，出去花天酒地．
不過世事無絶對，男女都要情趣！

有個老友同佢女友一齊多年，
老夫老妻，相安無事，
但係結果都係分手收場，
而且仲係由我老友提出．
點解？(佢女友又好係無所謂咁）
我老友話佢女友唔『理』佢喎，
我問佢係唔係唔煮飯，唔打掃丫，
老友又話唔係，而且佢都唔介意呢ｄ嘢．
佢覺得最大問題係個女友太獨立，
無論工作上，家庭上都能夠完全自己解決，
而且對他又十分放心，
就算我老友夜晚唔返屋企訓，
佢都從來唔問他一句，
問佢點解唔問，佢又話信我老友喎．
所以我老友就覺得好無癮，
覺得自己係女友生活中是可有可無，
曾經多次叫佢女友管自己緊ｄ，
但係佢女友又唔多理，
結果當然係Game Over了！

有時我自己都覺得我地男人幾『犯賤』，
管我地又話煩．唔管又話無癮，
但係我地又常ｄ女性覺得無左我地就唔掂咁喎，
咁就會得好MAN咁，有強烈保護全家嘅使命感，
而且間唔中check住下我地，男人就覺得你好須要佢咁，
所以小鳥依人嘅女性是最受男性歡迎的，
就算你唔係呢種，
間唔中扮下都會逗到個男友好有滿足感，
對增進感情都有幫助！
我地都要人氹架！　:P

男友應否要幫女友付費?

以前覺得男仔梗係要幫女友俾啦,
十幾歲有個女朋友仔幾威呀，
為左表現自己大個仔，
死人都唔俾個女仔出錢啦，
咁樣好無面架嗎，
但係又未識揾錢喎，
連豬仔錢箱都打爛埋充大頭鬼，
但係結果都係頂唔到幾耐，
最後次次都係齋行商場囉！

後尾大ｄ睇法又改變左，
覺得男女平等嗎！
唔係一定要男仔俾哂錢丫，
外國都係有AA制啦！
而且有些女仔重揾得多過我地ｄ男仔啦！
其實心裏想着的都是想慳錢而已．

諗下諗下又諗到ｄ縮骨橋，
如果係男女平等嘅，
不如一人一餐就可以啦，
但係每次食完叫埋單，
個店小二都係俾張單我，
如果叫佢找對面女友埋又真係好鬼瘀架，
結果都係自己埋左張單！

到左而家又唔同左諗法，
大家心中已經有左默契，
有時佢俾，有時我俾，
都没有刻意去分的了，
總之到埋單時自自然然就知的，
根本不用開口，
唔知呢ｄ係唔係叫心有靈犀呢！

男女之戰～港男篇

上篇講港女，今篇就寫港男，咁就比較公平一點．
看完這些論點和意見後，
都係覺得這些論點是很有強烈的個人觀點，
不太客觀，而且部份更帶有人身攻擊性，
但係又發現其中有些評論都幾到肉，
值得大家討論和留意，
而我地做男人嘅就要『有則改之，無則加勉』．

港男廿宗罪節錄自：香港網絡大典~港男篇

一個二個都係低學歷。條仔唔係讀 hku/cuhk，條女拖住佢都覺得醜啦，影衰曬條女.

錢又冇。同佢去酒店食餐飯都唔肯，驚死要比錢咁。幾百蚊一餐 tea 都比唔起，冇鬼用.

唔識搵錢。做o左兩年o野先至得皮幾人工。比埋老母o個份後得返幾千蚊。我買個袋都唔只啦，仲洗旨意佢養。廢柴！

冇內涵。同佢講d 西方藝術史佢一d 都唔識。垃圾！

冇主見。我話想去邊佢就帶我去邊，成個奴隸咁，我唔要拖件奴隸出街。死狗！

唔講道理。一味指責港女，又唔諗下自己係點.

孤寒。情人節洗千零蚊 tum 下條女都唔捨得。乜條女千零蚊都唔值咩 ? 冇用.

冇文化。人地講o野夾雜幾隻簡單o既英文字句都聽唔明；講英文又鬼死咁重香港口音.

懶。成世都唔做家務，食完飯又唔幫手洗碗.

自閉。由朝到晚只係對住部 PS2 打機，毫無社交圈子.

窮。戶口得雞碎咁多錢，夠我買袋唔夠我食.

冇上進心。打死一世工，做死一世狗.

冇風度‧媾唔到女賴地硬.

媚外。成日認為日本/大陸女仔好.

固步自封。香港女士不斷進步，港男卻原地踏步.

低等。成世受制於女人，毫無男子氣概.

低學歷。一個二個都係 IVE 人.

ＭＫ。著埋曬d cheap o野出街，影衰條女.

un 挑鬼命。成班港男都係身形矮小o既白皮豬。自己廢，又要求條女有身材。港男都唔講道理o既.

下賤。做侍應、速遞、快餐店、車房仔呢d 低等工作，影衰條女.

男女之戰～港女篇

最近不少香港男女互相『討論』港女呢個問題,
眼見其中不少points都幾有趣,
希望攞出來給大家看看.
個人認為其中大部份是針對一些十多歲,
思想未成的少女而已,
其中有些意見亦十分偏激,
而且可以看出是一些受過『傷害』的少男所撰,
放上來只是給大家一個茶餘飯後的話題,
亦可以讓大家了解下時下少男少女的情況!

節錄自:偽基百科~港女篇

鬼妹：滿頭都係金色頭髮
港女：滿腦都係拜金思想

鬼妹：皮膚夠白
港女：性格撥辣，頭腦空白

鬼妹：十六歲好多已經似廿六歲（指外貌）
港女：廿六歲好多都仲似十六歲（指頭腦）

鬼妹：會將問題化整為零，逐個POINT去分析嘗試令你接納佢既觀點
港女：會將問題化零為整，一開口既結論係「你唔啱、你錯曬」之類

鬼妹：希望男朋友會讚下自己親自動手悉心既化妝與親自SET既頭
港女：希望男朋友會認同自己去中環ORIENT 4或LA SALON俾＄1xxx所SET既頭

鬼妹：對你無好感，都會同你微笑下或SAY HELLO
港女：對你無好感，會以鄙視既眼光望下你再即刻擰轉面

鬼妹：會睇書，對基本既歷史、作家、政治、烹飪都會識少少
港女：剩係識睇八掛雜誌與娛樂版，對歌手與Ｋ歌都瞭如指掌

鬼妹：舒服就得，唔一定要名牌
港女：名牌就得，唔一定要舒服

鬼妹：如果大家意見不合，會先去努力改變，唔得先至再分開
港女：男朋友要為自己而努力改變以迎合自己

鬼妹：至少識一種運動
港女：至多識一種運動（打麻將）

相關資料：港女災難應變中心

呢ｄ人唔死都無用～～

【明報專訊】

「快閃強姦黨」...已婚的餐廳東主陳錫明（42歲），被控去年8月13及15日在網上留言版發放信息，煽惑網友伙拍他輪姦女子。...案情指出，陳去年8月13日以MasterMind名義，在家登入網站www.she.com中的GOSSIP留言版，邀請6名男網友籌組「快閃強姦黨」（Jack Rolling），阻截及向單身女子施暴，行動中各人會互相把風，事畢把事主封口綁手後速逃。他留下個人電郵，盼望把這個南非概念引進本港。

呢d扑街,最好閹左佢，費事為害人間，我做男人都覺得俾佢影衰哂！再唔係就罪佢去做配種豬，日日要佢對住部機係咁做，睇下佢重敢唔敢再諗ｄ咁賤嘅嘢！

我係邊度來？

有無幻想過自己是來自一個不平凡的家庭?
有無諗過自己上一代有一些不平凡的背景?
有無推測過自己有d好有錢或者有勢力嘅遠房親戚?

我細細個就有咁諗過，可能係睇電視睇壞個腦啦！
可惜以上嘅一切幻想暫時都無發生在我身上！
點解係『暫時』？
因為我到而家都唔係好清楚自己上一代嘅背景！

好似我唔知道我亞爺亞嫲叫咩名，
他們以前做物嘢，是靚是醜，
就連個樣都未見過！
點解？就連老媽以前都唔肯講！
直至近年我旁敲側擊先至略知一二，
不過都只限於外公外婆那邊，
原來自己的上一兩代都有些奇特的遭遇，
至於詳細內容就還要慢慢從老媽口中細查！
至於亞爺亞嫲的則毫無頭緖了！

不過前幾天，我問老媽我外婆姓什名誰時，
她竟然答不出來，還說幾兄弟姐妹只有我咁八卦，
但係我覺得這不是八卦啊，
這是我自己的身世喎，
如果而家唔問個清楚，
將來可能就會變成永遠的秘密了，
唔通到時同自己講自己係石頭爆出來嗎！

忽然好掛住豬小姐啊!

細個睇The Muppet Show，見到豬小姐都有少少驚，佢好鬼死惡架，一唔鐘意就對Kermit the Frog拳打腳踢，講野又霸道，有佢講無人講，但係我又好鍾意睇佢發嬲打人嗰個表情喎，好鬼狂野架，唔知呢種係唔係叫做隱性被虐狂呢？
真係好鬼死鍾意佢個鼻，性感到痺呀！　>o<
Reference:
Miss Piggy by Muppet Wiki
爆笑豬小姐Pizzahut廣告